2017年9月29日 星期五

TGIF

今日又係happy friday,然後緊接就係假期

呢種放假心情我都好明白,期待每一個假期帶包包去街去玩

想起假期就好開心,所以出份瘋狂蛋牛治

一睇佢就知係瘋狂啦,佢係用和牛漢堡肉+芝士+加蛋+麵包做成

但佢做法正確來講係和牛芝士法式多士,用法式多士做法整成一份三文治

見到都開心而且好好食,建議一定要share!否則一個人食好容易荷蘭豆的


食譜:

漢堡扒    1塊

方包   2塊

mozzarella cheese  隨意

蛋   2隻

奶   50ml

鹽、胡椒少許

超市有和牛漢堡扒賣,咁就唔使整方便又好食咁囉

先煎香佢啦


兩隻蛋+ 50ml奶+1/8茶匙鹽、黑胡椒又少許咁啦

將佢打勻


煎好扒又整定蛋漿後就用一片方包+芝士+煎好漢堡扒+芝士+方包做成三文治咁樣


成份三文治浸落蛋漿


兩邊都浸好後就煎,用牛油起鑊成份三文治放落鑊煎

煎 煎 煎煎煎,兩邊煎至金黃色就可以



大少奶's Delicatessen

宣傳你的專頁

2017年9月27日 星期三

歷久不衰

有d食物會記一世,尤其係細個時接觸過

無論邊一代人去到某d位總會有懷念嘅食物,有d已經消失,又有d即使依家可以食得返都未必係一樣味道

初初學煮時,我真係煮好多次西米焗布丁,我每一次都加餡

因為我只喜歡食西米布丁個部份,對蓮蓉無乜好感

咁自己整就可以全部都係西米布丁
但早前同朋友belle去怡東軒飲茶食到個栗子西米布丁覺得好好食

一來我好鍾意食栗子、二來都因為我好鍾意食栗子,咁就想自己試下整

今次唔單止整西米布丁,仲自己整栗子醬做餡

世上無難事的,哼



先做栗子餡:

栗子  一斤

糖   30g

奶  50ml

做法:

將栗子剝殼剝衣,如果連殼栗子就將栗子放入焗爐用200度焗佢10分鐘個殼就會裂開然後剝

如果只係有衣就煲一煲滾水,放栗子入去煲滾,然後就用一塊乾淨布包住粒栗子再摔一摔就會去到衣

如果有d細衣黏住就再煲佢時就會自己剝離 

當栗子去衣後就用煮到栗子稔身,跟住瀝去水份


栗子加糖加奶放入攪拌機內打成醬


如果你鍾意滑身就過篩一次


一斤可以整到一碗


西米    50g

奶     150g

椰漿   150g 

糖     40g

牛油    10g
  
吉士粉    30g

蛋黃     2隻




做法:

煲滾水,將西米放入煲,滾煲後熄火蓋上蓋焗大約10分鐘,西米便會透明,過冷河令佢分成一粒粒
*西米切忌不停開火煮佢令佢透明,咁樣西米會"達成一塊"


將椰漿、奶、糖、吉士粉、牛油煮熱,用中火煮滾後加入西米邊攪邊煮至到杰身





煮到咁就可以加蛋黃


快手攪勻




倒入焗盤或杯中,先放西米布丁糊,加一層栗子餡,再鋪一層西米布丁上面



放涼後用焗爐200度火焗至表面金黃(每個焗爐火力唔同)

*布甸放涼先焗,但面會好食d








大少奶's Delicatessen

宣傳你的專頁

2017年9月26日 星期二

蜜桃成熟時.......................

呢兩日我好沉迷睇國內真人騷

原因係陳小春個仔同鄭希兒個女,兩個小朋友都好可愛

陳小春個仔Jasper好懂事好溫柔完全係暖男

鄭希兒個女好靚好得意

晌睇過程中有好多共鳴,我指湊仔會發癲共鳴

外界好多聲音話陳小春太惡、鄭希兒無耐性

其實都要知道為人父母都係人,都會有頂唔順一刻,當然我都係一樣

湊仔就係有好多逼到埋牆角感受,我有時見到包包掂到污糟嘢個反應更加利害

所以睇就容易,但湊仔真係唔易

我最唔容易係煮飯,每一餐都要諗煮乜比個仔食,又要味道好、有要有營養又要有賣相

今日包包午餐份蜜桃牛柳係成功,包包雙手無離開過隻碟,就係咁佢晌度捉實直到我影完囉


終於食得到,你睇佢幾專心


食譜:

牛柳   1至2件切件或粒

紫洋蔥   少許

蒜頭   1粒

蜜桃   2塊切件

醬汁:

茄汁   1湯匙

生抽   1/2茶匙

糖   1茶匙

做法:

洋蔥、蜜桃、蒜頭切切切切切

牛柳鹽煮之前可以用少少鹽、生粉撈一撈


先將牛柳爆香至半熟再加入洋蔥、蒜頭兜勻,最後加蜜桃


醬汁材料撈勻後就加入牛柳入兜勾就可以上碟呢




2017年9月25日 星期一

秋飯


其程度上我都幾鍾意發掘d簡單食譜

直頭乜都掉晒落去就得,尤其係要兼顧好多唔同事之時

上星期五我趁包包返學一個人出去行超市,晌一田漫無目的地見到 Kinki(喜之次魚)

又見到牛肝菌,我完全無乜過用來做乜之下就買

當然魚係買比包包食,佢好鍾意食魚,而我又好鍾意食喜之次

其次個牛肝菌就只諗到整飯,再配上栗子

呢個係秋日中之未有味飯,出來味道好好所以好想寫比大家呢

有d食譜大家可能會唔覺得有乜特別,但寫果個其實係好想分享喎



自己整kinki唔同出面可以燒到骨都脆,但煎就唔得

好多細骨要慢慢挑骨比呀包


個飯好容易做

用20g牛肝菌,+雞湯浸2-分鐘
雞湯份量係平日煮飯一樣,我煮2嘜米就配2碗水

我用自己淆既雞湯,大家如果買雞湯可以買有機那種,唔會添加太多鹽的,反而史乜乜隻偏鹹,反正我唔會接雞湯生意,所以老實講又何妨?哈

栗子就隨意加,秋天栗子開始當造

洗好米後就加埋牛肝菌及雞湯、栗子及1/4鹽,放晒入飯煲等飯熟後唔好開蓋焗多5分鐘便完成






大少奶's Delicatessen

宣傳你的專頁

2017年9月24日 星期日

戒奶的疑惑

近日我收到一個電郵,講述有調查指近年香港嘅小朋友好早戒奶

對奶類攝取不足等等........

其實包包都已經三歲,身邊當然好多人七嘴八舌咁話:咁大個仔戒奶啦、佢都食飯就戒奶啦

記得包包一歲半時,健康院姑娘就話:佢要開始戒奶,奶對佢來講只係飲品

心諗:奶茶、咖啡、檸檬茶都只係飲品,但又唔見啲人咁積極去戒?

小朋友飲奶都無可厚非丫,佢哋有自己飲品唔好咩?

而且包包飲完奶暖下肚就會瞓得好

後來又睇啲報導,原來要小朋友早戒奶原因係:飲得奶多會蛀牙,因為奶粉中有糖份,甚至有啲奶粉係有香料

如果奶粉較甜,容易令BB吸收糖份,呢類奶粉係好容易飲到BB肥嘟嘟

肥嘟嘟BB當然又得意又可愛,過早吸收糖份唔係好事,而且會影響牙齒生長

而有啲奶粉好重香味,呢種香味的確吸引到BB,不過香味其實係添加劑

我對香精油有敏感,食完會唔舒服甚至頭痛,所以我揀奶粉從來唔揀有香味嘅

呢類香味添加物仲有機會令BB腸胃敏感繼而衍生各樣皮膚問題

睇過晒有關報導後我仍然繼續比包包飲奶!


因為包包係飲雀巢®超級兒童能恩®4號奶粉(https://goo.gl/hMWLwz),呢隻奶粉含pHF水解蛋白配方,能有助防敏,仲係不添加蔗糖及雲呢拿味


除了唔怕腸胃敏感外,更加唔怕佢太甜或有香味添加,減少包包養成嗜甜習慣

所以媽媽們,唔好只貪求食肥BB奶粉或者有香味奶粉

而真正對BB健康好係要小香味更加小甜味,而且從BB有第一隻牙齒開始就應該要幫BB清潔口腔及牙齒

包包直到現在除了刷牙外,我會用紗布幫佢再抹多次牙仔,希望佢牙仔能夠健健康康到換牙啦

做了媽媽我會發覺一定要揀得精明,坊間太多太多不同說法難以分對錯,只能夠係能力範圍內去選擇得最好~

#資料由雀巢防敏1000天計劃贊助  #戒奶 #精明媽媽



2017年9月22日 星期五

花燈炒鮑粒 x 李錦記蠔油

一年容易又中秋,中秋節都好著重團圓
有乜好得過一家人或朋友一齊食過節飯,不過整過節飯都唔係咁容易
要整多幾款菜式又要好味又要靚,心機都唔少得
所以我決定寫個又脆又靚但又容易整的 "花燈炒鮑粒"











個花橙其實係用炸雲吞皮去整,做成一個杯型裝住蔬菜粒同鮮鮑魚粒
最重要係只用李錦記蠔油去做調味兼提鮮,利用蠔油辟去蔬菜草青味
又唔需要加太多調味,一枝蠔油就攪掂哂

食譜:
新鮮鮑魚   6隻
鮮露筍     5條
珍珠 筍    4條
紫洋蔥     1/4個
雲吞皮     12片

調味:李錦記舊裝蠔油   1/2湯匙

做法:
新鮮鮑魚去殼,用刷洗再沖乾淨,切粒備用


露筍、珍珠筍、紫洋蔥切粒備用

先炸雲吞皮,預備兩個鋼篩,將雲吞皮放上個篩上疊起(如下圖)



再放另一個篩上面,放入油鍋度炸,雲吞皮定型後會變成杯型,炸至金黃色便可以上碟備用

先爆香露筍、珍珠筍、紫洋蔥粒,然後放入鮑魚粒炒勻


 
加上李錦記蠔油,然後兜勻


炒好餡料放上雲吞杯上便完成





2017年9月21日 星期四

慳力

我唔知點解兩父子咁鍾意食豉油王炒麵,對我來講無乜吸引力

不過…昨日煲粥食就諗不如試下炒麵

隻臭包最怕食粥,佢唔食粥都可以食下炒麵

其實豉油王炒麵好容易整,又唔需要多配料

真係簡簡單單一餐之選,今次我證明自己試炒後,以後煲粥都唔怕佢兩個唔夠飽

仲要佢兩個非常之鍾意食,加辣醬後又真係幾好味

包包今日鼻涕蟲無返學,我都係長話短說,下回再講過…


去麵檔買兩個麵,其實足夠3個成人咁多

返到屋企要略煮,煮完要瀝乾水


買唔到銀芽,用芽菜搣頭搣尾

加韭菜花,大家可以用韭菜的

份量自己喜好啦

炒之前預備調味料:

2個麵 調味大約如下:生抽  1湯匙  老抽 1.5茶匙  糖  1茶匙

做法:將芽菜同韭菜花爆香,然後加麵入鑊兜勻

將調味料事先撈勻再倒入麵中兜勻就係

呢個份量調味剛剛好,其實個麵發起都幾多,大家如果兩個人應該用一個麵都夠

如果用一個麵調味方面就減半吧 




大少奶's Delicatessen

宣傳你的專頁

2017年9月18日 星期一

就係咁

近日突然好想食錦滷雲吞,細個晌酒樓飲茶老豆經常會叫

好彩我有個愛junk food老豆,否則人家係會錯失好多好味食物

其實我唔係第一次整,可能今次隔得耐,那種驚為天人感覺又回來

以前錦滷雲吞個汁係有珍肝、乜乜物物

今次只係用叉燒、蝦!當然我整炸物唔會得一家人食

早幾日朋友開始上我家食中秋飯喇!咁gathering無奶油係無炸物架嘛

咪係囉!就係咁啦


炸雲吞一part無難度,你處炸咪得囉

用雲吞皮包少少蝦膠或墨魚膠咁就去炸,炸到金黃色就done


汁料:

叉燒、蝦、隨意(其實你唔落肉就咁用三色椒等等都得架)

三色椒    每樣各一個

洋蔥   1個

汁料:

茄汁     3湯匙

白醋    3湯匙

糖   2湯匙-3湯匙

水   80ml

鹽    少許

另備生粉水少放許

將餡料炒香,將汁料所有材料撈勻(生粉水除外),倒入鑊同餡料煮勻

分兩次加入生粉水,個汁你可以自己調較杰度的




大少奶's Delicatessen

宣傳你的專頁

2017年9月15日 星期五

圓圓肉丸

包包返學後我唔見得好得閒,以前都會同佢出去午餐但而家就一定要日日煮

好彩包包返來胃口好好,好肯食飯

當然我都落足心機煮比佢食,佢午飯同晚餐都係煮得比較豐富

而我就一起身要為佢午餐去預備,好似今日咁整葡汁焗肉丸都花了一個早上

不過佢好鍾意食,我知佢鍾意食汁所以就煮葡汁

呢個葡汁係自己調較,唔似現成咁多 E30624700 味精或化學品

雖然都會落d椰漿但其實唔算好多呢

個汁仲令佢主動食西蘭花...............1粒咁多 囧



首先做肉丸,呢個係我好拿手

用大約1碗豬肉碎,加1/4個洋蔥粒、1隻蛋黃、1/4茶匙鹽同生粉去撈勻再攪到小小起膠便可以

醃佢1個小時就入味,我唔會用太多調味,但加洋蔥粒會多份香味同肉汁會豐富d

醃完之後就煎



唔需要完全熟因為會焗

如果唔焗都會回鑊煮,所以定型便可以


另外配料我用西蘭花、紅蘿蔔、洋蔥同2粒蒜頭

西蘭花同紅蘿蔔先用水烚下先

爆香洋蔥、蒜頭、紅蘿蔔後就加1湯即麵粉


麵粉炒完後就加黃薑粉 1茶匙之後加水500ml煮滾,再加鹽大約1茶匙

試味夠唔夠鹹,唔夠先再加鹽


所有材料回鑊加椰汁,我隨手落的

然後兜勻後就煮到汁杰身,放上焗盤 250度焗10分鐘(視乎焗爐火力而定)

唔焗就可以直接上碟








大少奶's Delicatessen

宣傳你的專頁