2012年10月31日 星期三

新玩具…免油健炸鍋(附炸乳鴿食譜)


其實我又趕出門口,但晌千均一刻出多篇

一直對炸物有偏愛,但用油炸的確攪到我滿臉油煙,又彈油,又浪費油

呢點我明,但我又覺得自己要全面d去做,先可以做得更好

不過…從今起可能唔會了

因為世界上有一種叫:免油健炸鍋既鍋具(簡稱氣炸鍋)

從此我唔需要怕乜乜物物,但都可以炸餐飽

多謝Philips送我氣炸鍋

今次先炸乳鴿,氣炸鍋佢炸肉類唔需要用油,但如果乾身例如…薯餅、炸乾既呢就同焗爐一樣先掃層油

佢比焗爐既效果好,加上如果肉類d油會自己揮發出來

變相件肉健康左呢

但我個食譜係即使你唔用都做得到,當然會附加彈油、浪費油..............etc



首先滷水隻乳鴿

乳鴿…雞檔已經有售,我當然叫佢切走個頭啦

你見到呢隻唔太深色,因為我怕炸時會太黑

今次個色反而炸出來個色剛好!

乳鴿    一隻

八角 3粒

花椒  半茶匙

草果 1粒

桂皮   2片

老抽 1/4杯

生抽 半杯

水     1杯

鹽   半茶匙

冰糖 半大粒至1大粒

麻油少許、酒少許、薑蔥少許

先收乳鴿洗淨,抹乾

先爆香薑、蔥、八角、花椒、草果、桂皮,,然後加老抽、生抽、水鹽、煮滾

加冰糖,試味!如果唔夠鹹加生抽,太鹹加多少少冰糖,滷水其實好難講份量,真係要自己去試

試到合口味就加酒,滾起放乳鴿,轉小火煮10分鐘,然後熄火蓋上蓋,30分鐘

跟住就將佢放上個架風乾,及滴清水份,大約1個鐘

就可以炸

如果用油炸要再索乾水份,炸至表面呈金黃色

*用氣炸鍋,180度 15分鐘便可以

**隻乳鴿因為會再炸,所以滷水時間唔好太長,否則會肉"鞋"

***食既時候磨d鹽落乳鴿,會更惹味




佢其實唔算阻位,操作容易




內鍋都夠大,可以平排兩隻乳鴿





 Airfryer是在家烹調不同菜式的好幫手 (可烤、焗、煮、炸等,亦可烹調魚類、肉類及蔬菜)
  健康煮食之選而不減香脆口感,烹調肉類無需額外加油之餘, 更可隔走食物本身的油份,降低脂肪含量


又25仔(附漢堡牛扒改良做法)


原本今日打算post新食譜,可惜因為某d事,所以更改了

post回上星期六gathering

話說上星期同朋友聚會,又一個攪到頭暈既25人聚會

於是我用九牛二虎之力去搓30個包,搓到膊頭痛

然後再整25個迷你漢堡包,原來自己連包都自己搓,整出來既漢堡包係好食之餘仲會好開心的

下今次個漢堡牛肉用另一做法:

牛肉碎   大約一磅

鹽     半茶匙

黑胡椒少許

洋蔥半個切粒

蛋黃     一隻

粟粉     1茶匙

奶    半杯

麵包糠    半杯

將牛肉碎加鹽、黑胡椒、洋蔥粒、蛋黃、粟粉攪勻

將麵包糠加奶,麵包糠加奶後要成糊狀,否則再加麵包糠

然後加進牛肉內再攪勻,攪到麵包糠與牛肉融合

將牛肉放入保鮮袋,然後撻30次,撻既時候轉唔同方位

撻到佢滑身起膠便可以

然後雪落雪櫃30分鐘,便可以分開一個個去煎!

呢個做法令牛肉即使加鹽都唔會變"鞋"的

咁就自己夾落包配喜愛醬料便可以呢


呢盤大意粉,好大盤啊!係用本菇、煙肉、忌廉去整



越南春卷,炸到我暈咁滯

以後只整二人份量好了




兩隻芥茉籽焗雞

其實仲有沙律、同一d冷盤

那位大少爺掛住食同朋友傾計,都無幫我影相,激死人,食食食食懵你!哼



2012年10月29日 星期一

舊甜品與新相機(椰皇燉鮮奶蛋白食譜)




上星期太快樂!完全吃喝玩樂直到昨日,有新相機當然帶相機出去啦!但無乜影到相,哈


今星期要收拾心情,同埋我訂左健身單車,希望快d到要努力踩單車


然後載大少爺去山明水秀、遊山玩水(*注意:健身單車無轆的,哈)


話說大少爺一向比我好大自由,我喜歡點、鍾意買乜,佢都好少阻止



唯獨健身單車佢唔比買,我都唔知點解,屋企有位擺,我希望可以睇住電視去踩


以前做gym我都只喜歡踩健身單車,但佢反對


不過…近來終比我打動(死纏),佢終於比買喇!呵呵


心情好,所以昨日去完一日街都整個甜品


整過既椰皇燉鮮奶蛋白,一個食完好暖既甜品


最難係將椰皇劈開,但我有大少爺代勞,所以對我來講好易的的的的的


我覺得呢個甜品非常好味,係非常咁好!Like

呢張相係G15影,我終於夜晚影都可以喇!之前就算用大機影,夜晚都影得唔好,G10更加一入夜就唔太好呢

而家呢部可以了



食譜:

椰皇一個,先倒晒椰水(椰皇水可以飲左佢),然後劈開個蓋(好易,將可以篤洞嗰邊方向,切開,要大力小小又要小心手)

蛋白    2隻

鮮奶   200ml

糖   隨意,約25~30g(每人對甜喜好唔同,就自己落吧!但如果個椰皇本身甜,就唔需要落太多糖,否則掩蓋香味)

將蛋白、糖、鮮奶輕力攪勻,過篩一次,倒入椰皇內,蓋上保鮮紙

水份要準確,否則難凝結

然後大火燉20分鐘,熄火唔好開蓋焗2~3分鐘,Done~






一向都只晌Fans page放敗家之物,今次想放埋blog

我的新拍檔G15,佢景深比G10靚,有水平尺咁我影食物歪左會即刻知

夜晚影相靚了,新功能都有d幾好用

從此大機可以專心晌屋企幫我影食譜

我同大少爺旅行都可以一個用G15、一個用G10,唔使佢再帶大機咁重,大家都有得去影相




呢個一定要講


Shu Uemura x老佛爺既限量版紫色眼線gel,非常靚,我初初怕自己唔襯

但因為深紫色,所以好易襯到,用一日都唔脫色,但自己要用掃,我用番bobbi brown支掃上都ok




近來最得寵既中boots,Like!都話秋季入到對boots,人就會變得開心,哈




電子量匙,最憎d 1g 2g 3g,用量匙一"畢"就可以

但其實你隻手要好定,定過抬油先最準,否則放上檯上量,我覺得咁無乜意思

不過手夠字,其實都會準的!我覺得都算唔錯吧




直播完畢,交番比新聞部

Haagen dazs 立體模型


Haagen dazs送來的,一間立體雪糕屋

其實未砌完,遲下補post完全版






2012年10月27日 星期六

上海 x 日本菜@智選假日酒店


今日星期六,晚上有聚會,有30個包發酵中,搓到我膊頭痛

麵包發酵中就寫下外食,試菜篇

今次係上海菜同日本菜既混合篇

唔係我自己混,而係當日試菜時,間酒店未開,結果晌同一間餐廳試晒兩間餐廳既食物

將軍澳開既新酒店,智選假日酒店

今次同時試既係晉薈同稻



看餐牌,係中日混合咁上




有白酒又有清酒




個合桃好食啊





先上冷盤

陳醋海蜇頭、鎮江肴肉、花雕醉雞、香干馬蘭頭、麻香小象拔、龍井燻蛋

每樣小小,滿足個人慾望又唔會太大碟




呢個我無食,係富貴糟肚尖

即係醉豬肚

大家都話好味,但我無試呢




日式:海膽冷素麵

麵係櫻花麵,海膽係北海道海膽

我喜愛呢個



清炒河蝦仁



花雕蛋白蒸蟹鉗

其實呢個先係難,隻蟹鉗要同蛋白夾時間蒸得好

否則會唔平均呢





清燉獅子頭

呢個粒肉同平時既唔太同呢個質感似小籠包裡面粒肉

個湯好清好清



蒸河鰻

魚蒸得好滑,但我唔食呢類魚的

sorry,浪費大廚美意!




鯗烤肉

下面有塊生曬既魚,但我影唔到呢




小籠包



呢個生煎包非常好食,真係好好食




汁燒雞肉棒

好好食啊!個面好脆裡面juicy,加上混合蛋黃既汁

好開心的!好好食




鹽燒喜之次

Kinki魚,鹽燒係我愛既食法,連魚頭上,所以我咁樣影,嘻



甜點……唔記得乜名,麥乜乜?

好好食,但唔記得名

有無人幫下我呀?





日本蜜瓜,甜



中、日、大廚合照



食日本菜既:稻




食上海菜既晉薈




2012年10月26日 星期五

翼雞花百燒鹽(附鹽燒百花雞翼食譜)



今日又週街走,今星期我坐唔定咁

希望今日順利買到新相機,我要買部去event既,G10開始覺得有d重,同埋我想同大少爺出街每人一相機

佢都唔想成日拎大機出街

仲有我個枕頭都好荒謬,近來攪到我週身骨痛

但揀枕頭有d難,我唔會瞓晌樹試,咁都唔知點買,你話我知你點買枕頭?

之前個太空枕都舒服,但近來攪到我每日起身都頸梗膊痛

今星期甩繩咁四圍遊,但都要整下野

以下係鹽燒百花雞.................翼

因為我無辦法成隻雞去起肉再釀,於是用雞翼試下

原來呢…就咁用鹽、同胡椒醃雞翼再煎香,日好煎到乾身,會好似日式鹽燒雞翼

拆骨再加上蝦膠,好食啊

拆雞翼骨好易,將頭尾兩個結剪走,用手指推條骨出來就可以

當然要練下功啦

Look.....隻翼脹卜卜、又乾身,哼



我切正一件入面無紅蘿蔔粒,其實個蝦膠我加了新鮮粟米同紅蘿蔔粒



二人世界食譜:

雞中翼    5隻或隨意

蝦膠 大半碗

粟米、紅蘿蔔   隨意

鹽 1茶匙(視符醃既時間,如果醃得耐就落少d,要好快手醃完整落多d,但煮既中途再灑d落去亦得)

黑胡椒   隨意

做法:

雞中翼,將頭尾既結剪開,用手指推兩條骨出來

雞翼沖洗後要完完全全抹乾水份

加上鹽同胡椒粉醃

蝦膠加上紅蘿蔔粒同粟米粒,然後將蝦膠用唧咀唧蝦膠釀入雞翼

最後燒熱鑊,加少少油,慢火煎香兩邊,done~

實不相瞞,今次蝦膠我無自己打,呢個買既

買回來入煲鮮袋中,然後加少少生粉、撻幾十次,佢會變得彈牙,因為街外買既蝦膠大部份只係攪爛便算

蝦膠加入少少粟米粒同紅蘿蔔,會爽d,加沙葛都可以



雞翼用慢火煎

今次用Fissler煎pan,不鏽鋼煎pan可以煎出香脆

同埋呢個pan煎出來係好乾身,因為雞翼既油逼晒出來

先中火燒熱鑊,加少許油,然後慢火煎,最後較番大少少,佢就會乾身同脆




因為蝦膠佢發脹,令雞翼有d位掂唔到隻pan,所以棟起來,棟起來~




煎完後都會有漬,因為我最後貪快較大火



但趁熱倒熱水入去,d漬拜拜!我捨不得你....耶耶



順帶一提

圖中就係我用緊既煎pan,而家加埋個煲,二人世界套裝特價$3028

有興趣去睇下,問清楚點用,可以考慮下

不鏽鋼如果識用,絕對耐用過易潔,至少唔怕刮花有物質滲出呢


2012年10月25日 星期四

刀嘜食譜之藕餅


以前每逢過時過節都會飲蓮藕湯,然後家人會炆蓮藕,一直都無認真去諗蓮藕可以做d乜,直到有一日食到藕餅,感覺好好味,蓮藕既爽同獨有既味道令人回味

自從我愛上整蓮藕餅,做法簡單,帶點鄉情呢! 因為蓮藕餅又稱家鄉藕餅呢…


需要重溫以往上載於好媽媽網站的食譜:http://www.haomama.com/bloggers/7/


溫溫燉燉(清燉牛腱)



呢個星期癲左咁行街買野,我上星期病了,之前又忙,攪到今星期好似未行過街咁

今日又打算出去,因為大少爺今晚查經,我又自由鳥...................

行街點都會買少少野,近來買到今季第一boots,心情即時開心鳥

因為秋冬總會為boots煩惱,哈

每次我行完街總會落City's super打個白鴿轉

即使一星期我出去七日,七日都要去打個白鴿轉,心癮

而且我的確愛去買d肉類或者菜蔬

昨日去買一pack牛腱,今日午餐食燉牛腱

實不相瞞,重陽節我同少爺去街食 Shabushabu後,佢d濕疹有少少紅

唔敢比牛肉佢食

得自己既自由時候我就為所慾為吧!哼

清燉牛腱,用燉既方法,原汁原味




呢pack係我昨日買的,佢有大pack 8件 $111

我用細既有4件,自己食剛好

但實在太好味,我唔忍心少爺無份,最後都留左件同湯比佢



材料:

牛腱

白蘿蔔  

月桂葉   2片

八角 半粒

杞子 1~2茶匙

薑 1小片

1.牛腱加入滾水出水,加一小粒冰糖,然後將牛腱撈氣,將煲過牛腱既水撇走肥油同血水備用

2.白蘿蔔切件放落燉盅或器皿,加入香葉、八角、杞子、牛腱,將(1)既牛腱水或清水注滿至蓋過牛腱面

3.隔水燉2個鐘
*我用高速煲3度煲30分鐘

4.燉好後,拎出加半茶匙鹽(*我一定係煮好先加鹽,鹽有機會令牛腱"un",所以我最後先加)




燉好撇走肥油,個湯好甜啊!開心午餐了

喜歡的可以加上蔥粒

我配小一小碗白飯