2008年11月30日 星期日

舊曆快樂~~~~~


過咗一個好開心舊曆生日

首先:一起身收到隻錶
係大少爺送我既神祕舊曆生日禮物
正日生日既生日禮物自己揀,當然知係乜,連你哋都知係乜
但舊曆生日係一份意外驚喜

一向唔鍾意帶錶既我,會再次嘗試習慣帶錶
因為我要將份心意帶住

到夜晚由菇奶奶帶住幾隻馬騮:烏GG、呀茄同我去福音晚餐會
我同烏GG、呀茄一碰埋通常都會失控
事前連呀妹diana都好擔心我哋會不受控制
但放心,琴晚我哋只係偷偷地玩呢
呢餐晚飯...心靈上得著好大
有如溫偉耀先生所講,係一件快樂既事!無錯!我的確感到快樂


一圍人我地唔好意思去影呢


收到菇奶奶送比我既壽包
我終於有機會食菇奶奶整既包包,哼~~~~
係bagel啊!
夜晚返到屋企,連大少爺都猛去望個包包
哈~~~佢都好想食
呢2對包包成為我倆早餐,我再焗熱後,外脆內軟好味啊

菇奶奶: 多謝你啊!你令我感到好快樂!
包括我認為理所當然既事,你都話我知,其實係幸福既一種





菇奶奶整埋薑味曲奇添




趣事:
話說食飯時,上到雞既時候
居然上菜時雞頭對住我,我即時縮埋一舊,擰歪臉
烏GG即刻好奮勇咁,不理同檯其他人投以奇異目光,第一時間夾起個雞頭
當時我以為雞頭已經消失,就將頭擰回
點知烏GG緊張得滯...失手,個雞頭晌張檯上滾動

個感覺好似古裝劇犯人被斬頭,然後個頭晌地上滾動

烏GG,多謝你!多謝你咁為我
雖然我當時又笑到喊
但其實內心好感激你,你令我好感動
我愛你喔!
亦多謝你被我疲勞轟炸後,既舊曆生日禮物





2008年11月26日 星期三

望住先


香蕉未熟透整唔到蛋糕
近來要好好休息下,好累
就介紹下我呢輪既下午茶

圖中係我近來常飲既......苦茶
係清感冒、調理下既......苦茶
有2粒話梅係用來送.......苦茶

話說我好唔慣飲........苦茶
但後來發現
當我放d甜食,如蛋糕、糖果晌面前
飲時望住甜食,然後內心不停同自己講:忍住!飲完就可以食甜喇
咁呢就無咁抗拒

過兩日又凍,我要好好作出準備
以免又病
12月我有好多活動,同埋好多must buy item,唔病得架



↓ 圖中兩件蜂蜜蛋糕同話梅係fiona買比我既呢




醫師叫我呢輪無乜事唔好出街,以免被感染

我即時駁咀:你會上我屋企會診嗎?

然後佢忍唔住笑:只可以落黎覆診取藥!

*我無事啊!只係調理下、清感冒菌,好好地清晒囉佢呢!放心放心

2008年11月25日 星期二

哼~ well燉


近來好攰,所以都盡量爭取休息
一到12月就好忙
攪到我滿腦子雜物咁

出年1月新年,都會繼續頭昏腦脹


反而期待2月去旅行,今次去大阪、京都
好奇怪點解唔去東京?
因為5月大少爺生日會去東京慶祝
大少爺已經確定大假日子呢(佢要補償番我今年只去得一次旅行)

無錯!12月既事我都未安排好,已經有出年既計劃

天氣又乾又燥
繼續玩雪梨
今次係燉雪梨
燉比雪梨水好味,較濃郁
我會鍾意燉雪梨較多,而且個感覺係精華所在

做法:
將雪梨切頂去心,唔好批皮,否則燉完會爛晒
加入已浸軟雪耳、南北杏、冰糖
加入少少熱水入燉盅,約2湯匙
隔水燉1個鐘

燉done~~~~~~Well done~~~~~~~~~哼~~~~




2008年11月21日 星期五

紅噹噹


除士多啤梨外,raspberry我都好鍾意
將raspberry配襯好甜既食物,感覺能夠中和
例如...白朱古力、黑朱古力
同raspberry襯埋特別好味

雪櫃冰格必有raspberry同熱情果既果蓉
但又無時間整
應該可以留番整生日蛋糕呢

鍾意紅色既物品、又好鍾意酒紅色、棗紅色
例如…
士多啤梨、raspberry
minnie mouse 感覺好多紅紅
紅色棉質睡裙
紅色既糖,我會專揀紅色既糖果
深紅色玫瑰

聖誕節、農曆新年都好鍾意,因為又係好紅色呢

raspberry配吉士tart,I'm loving it




2008年11月20日 星期四

空手道


近日愛上咖啡味食物
咖啡雪糕、咖啡蛋糕
但偏偏我唔受得咖啡,唯有用咖啡味食物去代替

琴日整咖啡戚風,無理由都秋冬仲打風
你地唔好見到我整戚風就諗定放假啊




好多人問過我點甩模,其實我學整戚風蛋糕時係跟一本日本食譜學既
佢係教就咁用手甩,唔需要用刀刮架!

當然你個蛋糕要絕對成功先可以咁做啦!哼~~~~~~~~

1.先四週按壓
2.按壓後,蛋糕會回彈既     (戚風蛋糕成功既話,係會彈回)
3.倒轉個蛋糕模,然後輕輕將模向下推,就甩到

個軸心既蛋糕都係咁做,就完全甩模





同場加映
琴晚做台慶,我睇睇下電視
見到大少爺食薯片
我係除左食粥外唔食薯片
但見到軟殼蟹味就好奇,哈哈!真係有少少蟹味架

其實呢.........薯片越來越多....奇怪味




2008年11月19日 星期三

試過嗎?


有試過一瞓醒後,感覺到自己好似剛拉完臉皮,比打botox更繃緊嗎?

有試過見到自己個鼻出現蛇皮嗎?

有試過個咀唇成為一個田字,因為中間有裂紋嗎?

唔駛怕,你只係乾燥之嘛!

噢!天氣轉冷,我最開心架
但係又逃不過乾燥
尤其係.............似水流年

所以我一起身就煲雪梨水飲,希望自己無咁乾,哼~~~~

有雪梨、南北杏、無花果、雪耳同冰糖,係我睇到小春煲就諗一乾燥我都要煲

大少爺好怕飲呢d雪梨水,佢鍾意就咁食雪梨
但係果d得個甜字, 乜乜堂雪梨物物茶佢就飲喎




簡單做法:

雪梨     3個

水         750ml

雪耳     一朵

南北杏、無花果   隨意

冰糖       自己調較

做法:

先將雪耳浸軟、雪梨洗淨去芯,但唔好批皮,因為營養成份晌果皮裡面

南北杏、無花果略浸,煲水至水滾放晒材料落煲,煲滾後轉細火煲40分鐘

熄火加冰糖調味

2008年11月17日 星期一

時光機


今晚0000am就會停blog一日啊!

我出世開始,爸爸就已經用彩色相機,所以我無黑白相
BB相都係彩色既
當時係用菲林機

到我長大懂性就見過外公用下圖既相機
但我又從來無見過曬出來相片
因為我好少見外公,一年2~3次到啦
而且外公係好有威嚴既人,我都唔敢問:呀公,你影我相,好拎相比我睇喎

但係上次見Bear Bear舅父時,舅父拎比我睇外公呢部相機呢
我又會有好多回憶
尤其對外公外婆

細個時我外公有幢3層高別墅晌橫台山
我好恨入去玩,每次爸爸都會駕車入去,當時覺得好遠好遠架
間屋一入大閘就有個小花園,我同表弟先生專係由個花園踩單車入屋
當時車轆好多泥,會整到週屋泥
外公嚴重潔辟,就會沿住條泥路追住鬧
但每次只鬧表弟。。。佢只會鬧表弟先生

哈哈!大家明白點解我會每次都整野比表弟先生食啦

因為佢細個已經好有義氣,幫我頂晒嘛!(表弟先生係無得選擇地頂晒)

↓到底影出來既相係點既呢?部相機好熟悉又好遙遠感覺




側邊有條攪攪棒既物體,要轉動先可以影




我為新假期寫既食譜出埋今期!




大少奶的秘密網誌   <---已update

2008年11月15日 星期六

To:表弟


是日:表弟日

表弟到訪,我當然又整嘢比表弟食

噢!表弟's 女友病咗無得嚟,今晚既晚餐無大規模製作

只得南瓜湯、蒜茸包同白汁磨菇意粉

甜品有近來大熱既crunch cake,表弟好鍾意食cream

第一次親手整crunch,無難度,哼~~~~~~~

戚風蛋糕都係我常做蛋糕,個cream我加Rum酒同雲呢拿籽

但抆cream就有難度,所以我又晌度用匙羹彈花紋




 Shirley Yick 既食譜 ,係繼姐介紹架

材料:

100g砂糖

25g粟膠/粟米糖漿 (corn syrup)

25g水

5g梳打粉 (baking soda, bicarbonate of soda)

做法:

將糖, 粟膠, 水煮至起泡及少許金黃色....再將已篩好既baking soda 加入拌勻...之後倒入盤內待涼後整碎就ok啦...

注意事項:

1) 不要用易潔鑊

2) 要先將baking soda 篩好

3) 煮糖漿時只要煮到有少許金黃便可以離火....因為餘溫會將糖漿繼續煮.....小心煮得太耐....糖漿會變得太苦

4) 篩入baking soda後...只要略略拌勻便收手....拌得太耐會令 crunch不能發起而導致不鬆脆




今晚最勁既係有我誠邀餅神為我整既Tiramisu

佢仲為我整栗子味,同一盒大既比表弟啊

試食栗子味

個感覺.................餅神即係餅神、瘋魔幾百萬人,呼風喚雨叱吒風雲




2008年11月14日 星期五

第4次 @爐端燒


一星期裡面第4次見小冬喇

今次我又去搵佢食lunch,佢請我食爐端燒啊

點解會請我食lunch? 因為...................................遲d咪知囉

除食Lunch外,我向佢訂購蛋糕啊!係乜蛋糕?聽日咪知囉!







坐晌爐前對住食物呢

蔬菜類




海鮮同肉類




先來小食,有燒墨魚丸、燒冬菇、同燒雞肉、仲有味噌汁




呢個燒銀鱈魚好好味啊




網燒牛肉

噢!overcook




甜品:個puff唔好味,但個焦糖燉蛋都OK




多謝晒小冬,過幾日見喇!Yeah!!!!!

2008年11月13日 星期四

便飯啊


琴晚煮飯比大少爺食
我一耐無煮飯比佢食就會有點兒內疚
雖然我唔係一個電飯煲
但都覺得自己應該多煮飯

話雖如此,我都依然整易過借火既菜式

因為我晌屋企好忙,私底下好忙呢!

金菇牛肉卷配日式燒汁




我用吉之島加拿大牛肉
特價都只係$36,整牛肉卷係唔錯選擇呢


鹽焗烏頭魚
好好味啊!我無買普寧豆醬
因為覺得太鹹,我唔多鍾意
反而我加檸檬汁呢




仲有煲湯,係花膠湯啊


2008年11月12日 星期三

四口子


一直想整mousse cake比 bear bear舅父食
聽日去搵bear bear舅父,就整chocolate Truffle Cake
古力係舅父一家四口都鍾意既

表弟同表妹鍾意牛奶朱古力多過dark chocolate
表弟同表妹唔鍾意食raspberry、甚至士多啤梨都唔食
Bear Bear舅父鍾意食果仁
舅母最乖乜都食

顧及4個人口味,所以我唔敢加任何梅類
所以加焦糖果仁做deco

而家終於明白舅母每晚諗餸都會好頭痛呢

朱古力片係小冬幫我整架
今次d cream打得太實,表面凹凹凸凸好唔靚




2008年11月11日 星期二

1111(追加版)


Yeah!!!!!!!!!整曲奇比vanlily、笨B媽媽同路過烏GG
睇下今次唧得幾靚
哼~~~~~~~~

我去 Sweetie買野時,老闆娘介紹一個大唧咀
仲教我最重要攪粉時唔好攪得太耐,要輕力
今次個效果好好啊

我鍾意整曲奇,但唔鍾意食

鍾意整唧花曲奇,因為鍾意玩唧咀

今次用金桶牛油,個感覺無乜同三角嘜無太大分別呢




1111我同vanlily、笨B媽媽相約晚飯

地點:Zambra

無特別原因,我同小冬特別鍾意晌特別日子去約晚飯

好耐無一齊食晚飯呢!雖然簡單但好開心

揀Zambra係食物好味、又夠靜、又唔駛趕交檯,可以慢慢傾計

又抵食喎!你地試下啦啦啦啦啦啦啦

叫3個套餐:有我地3個共同喜好南瓜湯




2款沙律,個菜沙律配醋汁,菜好新鮮啊




呢個意粉好好味!係Ham & mushrooms w/ creamy sauce




Grilled salmon

側邊有泰式沙律,好好味啊




Baked chicken

芝士焗雞塊,裡面有忌廉焗薯片同雜菜




Banoffee pie

小冬見到佢既cream已經雀躍




小冬送比我地既Raspberry Ganache Tart

連大少爺都話好味啊




地址:灣仔謝斐道239號地下

2008年11月10日 星期一

與CC @La Bon Cafe


已經唔記得正確日子係幾時,有一位blog友稱自己係我fans
當時我都不以為意,後來我發現佢叫我偶像
我有d覺得唔好意思

再後來我習慣左,每日佢都會出現我blog留言
通常我做乜佢都會認同,佢會先認同然後先話我係傻既
後來我班好友發現呢位blog友,經常議論紛紛覺得有人比我更傻
又成日都會話:你個fans呀!得你個fans覺得你既道理係啱

第一次同佢見面6.7籌款gathering,佢好激動咁捉住我隻手
又好激動咁喎!

但其實佢唔盲目既,佢會話我:咀gel gel 歪理變真理

我可以講呢個就係CC,其實唔講大家可能唔知
CC佢係好有理智架!只係佢當癲婆係偶像之嘛嘛嘛嘛嘛嘛嘛嘛

約左好耐好耐好耐好耐好耐好耐好耐終於約到La Bon Cafe食Lunch

食足兩個鐘,講到過晒鐘




南瓜湯




居然去到話牛扒賣晒,好無語問蒼天

我又唔食得羊同雞,就食日式芝麻汁煎魚

唔知點解熱既芝麻汁配魚,我覺得好似食腸粉啊




CC要煎羊架




我既Creme burlee




CC多謝你啊!多謝你既禮物

希望你都會鍾意我既禮物啦啦啦啦啦!

正常相片@新假期


琴晚10pm就睡覺,今日8am起身但好精神呢
落街買新假期,無錯!有我寫既食譜,仍記得我post過拍攝花絮嗎?
上星期已出,但我交比佢既近照,佢地將張相改造過好肉酸,所以唔高興無提到
但雜誌社已經幫我今期整番好,正常返

唔該晒Winsome,麻煩到佢唔好意思

今期泰式魚餅好好味架!

GG幫我用大機影profile相,張相影得OK
但唔知點解印落雜誌就濛
上期夾硬cut大頭相,今期正常番,起碼認得番自已

 


仲有下期會出,但大家要繼續買,如無意外之後3期呢.........係........呢

總之係甜既呢.............佢呢..........既.

.

..



今日東方日報介紹我本書啊!不過資料有錯啊

http://orientaldaily.on.cc/fea/index.html?pubdate=20081110&ads=/fea/fea_cads.html&content=/fea/fea_h01cnt.html




2008年11月7日 星期五

苦茶前@Doraya


今朝一早出去睇中醫
好彩臨時有人無睇,我早左睇
醫師只係話我要戒雞、鴨、鵝、羊 (除左雞,其他都一向少食)
要飲暖水、再食幾劑藥咁咁咁

之後行銅鑼灣,買保濕mask、睫毛液、甲油、skin care
仲買左條頸巾
去bobbi brown修眉
由於要返屋企約左鐘點上門
就食個Lunch就返屋企

去Doraya
食藍鰭吞拿魚扒飯定食
set有玉子、前菜同味噌





 


都OK呢!下次要試吞拿魚蓉飯
起碼食到吞拿魚鮮味

其實呢......以前我好怕魚生飯
感覺好似生豬肉飯咁呢
hahahahhahaaaaaaaaaaaaaaaaaaa







送西瓜,醫師話食得架




鐘點姐姐正在煲苦茶,噢!