Philips Diamond clean 電動牙刷& AirFloss噴射水式牙縫清潔機

記唔記得上個月我講過有牙週病，然後病發


有個星期六我痛到咬合唔到

又唔想睇牙醫，加星期六日牙醫唔開無得睇

跟住去買敏感牙膏再買支電動牙刷

我人生第一支電動牙刷，以前我好怕電動牙刷，感覺晌個口到發動引擎

但係我朋友CC，佢係牙醫夫人，佢同我講用電動牙刷好好多，同一定要用牙線

結果用電動牙刷好快習慣，但我實在接受唔到牙線，我真係無從入手

加上感覺唔太好，都困擾好耐

直到早兩個星期，Philips PR搵我，問我對口腔用品有無興趣

話有個AirFloss牙縫清潔機，係似牙線功能，係用噴水式去清潔牙縫

於是我答應了

不過…好好笑，我與Philips marketing兩位小姐見面時，不停問人個氣炸鍋點用

無辦法…我好有興趣，但大少爺又覺得氣炸鍋奇怪，咁我本能上就不停問人點用？哈

最後我教人放墨魚丸入去，因為墨魚丸焗香佢會好食，哈

Diamond clean牙刷$1698，佢毛頭係鑽石型

用專利音波震動技術

咁睇唔特別，但睇埋落去……

佢有個漱口杯，可配合個底座叉電器，只放支牙刷入去隻杯已經叉到電

呢樣我超喜愛，因為唔使叉電時，隻杯都用得，加上佢咁叉電感覺美觀d

唔叉電可以拎走個底座，就係一隻杯呢

有五個功能…有清潔、美白、拋光、牙齦保健同敏感

我暫時多數用牙齦保健，因為我牙週病希望佢好轉同埋牙齦會好d

所以話…當健康受到威脅，靚都要拋開！否則我會一味用美白功能

咁旅行呢？佢有個盒，只要插條電線晌個盒底，再放牙刷就可以叉電

佢可以用USB電腦叉電架！唔使煩要多個插蘇



個盒可以好整齊咁擺配件

好！個噴射式牙縫清潔機，$868

好抵既價錢

佢後面可以放水入去，亦可以放漱口水

但我只用水便可以

初初第一次用時，因為個噴水有力度，加上無諗過，每一下我都覺得自己中槍，有一下聲音、一下撞力、然後我個頭向後chok一chok

其實唔係真係好大力，當唔知道時自然反應大

因為噴水式，自然有水會晌口腔，一吐時發現牙縫裡真係有好多美酒佳餚晌裡面(殘渣)

可想而知，終於都明白…牙縫係有幾多殘積物呢

只要將噴咀放於牙縫位置，按一下，佢就會噴射d水入牙縫中間

每一下都有高速水滴，噴射牙縫處

可以99%清除牙菌斑

一分鐘可以清理晒成棚牙

好老實…我覺得佢好好用，至少唔使我克服用牙線

牙縫要好好清潔，我牙週病就明白個苦處了



其實我寫未心太詳細只能寫個感覺，大家可以到電器店睇睇，睇完覺得適合可以考慮買

消費者有權去選擇架嘛~

不是定理(薑蔥蒸魚豉油鮮魷)

好多時我地都會有d定論：

認為雪糕一定係甜，偏偏有鹽味雪糕，雖然都係甜但帶少少鹹味

飯要趁熱食，但世上有受歡迎既壽司

從前搽指甲多數係紅色，近十年卻hit黑色或將紫色、藍色、紅色深到似紅色

從前染髮只有金毛強，近年卻曾hit過藍黑色

所以蒸魚豉油唔一定用晌蒸魚上

蒸魚豉油其實係取自於蒸魚，蒸魚既魚甜味配合豉油，做成人人都喜愛撈飯既豉油

慢慢就有蒸魚豉油出現

然後人們將蒸魚豉油配蒸魚

但我卻試過整煲仔飯加蒸魚豉油，因為佢味道帶少少甜，又甜唔晒

蒸魚豉油唔似豉油既單一豉味，所以感覺上無咁濃味

當然我用蒸魚豉油配蒸魚唔太有意思，其實佢可以配鮮魷

結果出來效果比我想像中更好

鮮魷   一隻

薑     3片(切絲)

蔥     數條切段

醬汁材料

萬字蒸魚豉油 2湯匙

水    1湯匙

糖    2茶匙

麻油 半茶匙

做法：

將鮮魷洗淨去衣及清理乾淨後切成圈型

開一煲滾水，加入少許檸檬汁，鹽，放落煲熄火，利用餘溫略灼鮮魷，盛起後瀝乾水

熱鑊下油，加入薑及蔥爆香，加入鮮魷略兜

將醬汁材料攪勻，加入鮮魷中，兜勻至收汁後可以上碟

http://www.facebook.com/kikkoman.hk

萬字出埋蒸魚豉油




總括來講，今次試到萬字各新醬料，感覺新鮮

個豆豉醬令我再接受番豉味，佢唔會澀，有d豆豉醬有澀味，但萬字又ok

又發現豆豉醬加少少海鮮醬又唔同感覺

呢個都係今次個新體驗

8個萬字食譜post完！謝謝收看~

delete

delete

探險

今日可以留晌家，但等陣有教會小朋友上我家學曲奇

一起身搓定包包整熱狗比佢地茶點

順便整午餐比自己

餓死都無得食既午餐，破格食豬扒包

原因…經KC介紹去澳門最好食既豬扒包係咖啡明

上次我去Galaxy，事頭婆同繼姐過來澳門陪我，佢兩個朝早去食咖啡明豬扒包

返來大讚，講到此包本應天上有咁

我問：咩味？

佢地答：好味

咁塊扒乜味？

佢地話：有香料味

我問：乜香料？

佢地答：唔知啊

=.='，唉…我話我想試，佢地即時好驚咁話：你去到一定鬧架！d椅好矮，乜乜物物

我一直都想試，但未有機會

咁唯有自己整比大少爺試

諗過香料有乜呢？um.....香茅啦！咁加洋蔥去醃定點？

最後…我用生抽、一滴老抽、鹽少少、糖、2茶匙黑啤酒、香茅1支樁碎去醃過夜，件豬扒唔剁，只係拍兩下

成為我十無唔逢一潤既豬扒包，個包自己整，係熱狗篇個鹹包食譜

所以如果好餓，一定餓死都無得食囉囉囉！感覺像探險，好彩佢好味否則得個吉



好味！我醃到塊扒無豬味，哈

卷卷紅(紅棗卷食譜)

個紅棗卷之前post過相，無寫過食譜

今次舊相新字

之前唔公開得食譜，因為本身係用作書食譜

可惜…我係時間唔再等，自己去搵路行了

其實個卷要卷得薄先好
這紅棗卷與紅棗糕不同

紅棗卷是從前年代小朋友到酒樓時的恩物菲林卷的變身

它的質感較為爽身，味道相似個質感卻不同

如請朋友吃飯，可以做芝麻卷與紅棗卷雙拼呢

去核紅棗    50g

糖      3湯匙

馬蹄粉  80g

粘米粉  18克

水      225ml

紅棗用水浸軟，加225ml水放入攪拌機打碎，取出紅棗汁

(如果水份量不再夠225ml或多於225ml，就需要自行調較，水多例掉、水少加少許清水便可)

加入糖、馬蹄粉及粘米粉、攪至粉狀溶化

用一個盤，倒入粉漿，不用太多，略為蓋過盤底便可以，放入鑊大火蒸3分鐘，放涼後便可以卷起成為紅棗卷

汪汪(熱狗)

細個好喜歡食腸仔，食親都食腸仔包

到大個後唔喜歡一般腸仔，鍾意脆皮腸、德國腸、johnsonville

鍾意食腸仔更喜歡熱狗

細個爸爸帶我行海運大廈，以前晌海運大廈近香港酒店有個熱狗檔，係商場內一部類似外國小型熱狗車，我諗唔係太多人記得或知道

咁呢佢似外國，有隻熱狗、然後有酸瓜、洋蔥、番茄等等問你要乜

其中係墨西哥辣椒，殺人於無型，係辣到會跳舞，仲係Hip hop，到我大約十歲後就無左呢部熱狗車

然後15歲度到Supersandwich興起，當時金鐘PP樓下有一間，因為老豆鍾意去行，我永遠都話要食熱狗

食完行落灣仔禮棧酒莊，當時得番一個老酒莊，個酒莊係我姑丈開，每次爸都會傾一輪，我地再返炮台山

再大d已經對熱狗情懷減退

有時我會去丹麥麵包店買熱狗，因為有時一個人出去行街唔知食乜都會求其一隻熱狗，佢既熱狗最吸引係個醬

而家…我會晌屋企整熱狗，哈

星期日一班朋友又上我家，佢地話肚餓，我就同佢地講：放心d麵包發酵中，好快焗得

佢地好驚訝，未試過有人同佢地講：d包發酵緊，等陣焗

如是者到包出爐一陣震憾！哈哈

我好懶，只用亨氏三文治醬，個醬有酸瓜有紅蘿蔔酸酸地好好味，一篤攪掂晒

哈



出爐時大家都好開心！呢個包真係好好食，湯種我已放埋一邊，又再日本麵包書，哈

食譜：

高筋粉     250g

奶     80ml

水     80ml

鹽     3g

糖     25g

蛋黃   一隻

酵母   3g

牛油 20g

做法：

將奶、水、鹽、糖、蛋黃攪勻，加麵粉，加酵母，如用酵母

搓3~5分鐘，開始撻到光滑，加入室溫牛油

然後再撻至起薄膜

第一次發酵45~60分鐘，排氣(排氣後我會蓋上擰乾濕布放雪櫃2個鐘，會更鬆軟)

發酵完成將麵糰分成等份，搓圓，駁口向下，蓋上濕布靜置10分鐘，將麵糰反轉，唔需要再蓋上濕布，靜置5分鐘

放入喜歡餡料，整造型，可以搽上蛋漿(我今次無)最後發酵45分鐘

180度焗12~15分鐘

山寨版(山楂咕嚕蝦膠釀豆卜)

人有權選擇自己喜好，不論人同事

正如我唔喜愛豬肉，例如…豬扒、肉餅、豬肉、肉片

盡量都唔會選擇食，去試菜都會試，因為唔想受限制

但我愛豬肉乾、豬肉鬆、咕嚕肉、甚至自己整既豬肋骨

唔好問點解，我都唔知點解，哈！

正如寫食譜，我鍾意化繁為簡，總唔明點解會有d化簡為繁認為咁叫好功力？

食物唔一定複雜先會好食，當你有一定廚藝認識，自然隨手就可以

我只會用自己認為最舒服方法去做一碟好食既

份量更加無規限，你愛甜我愛酸係靠自己雙手做，理得你愛甜定愛酸，每個人甚至家庭都唔同

煮食最怕一言堂

所以我會從自己口味去配合喜愛的

我愛豆卜、愛蝦膠、愛咕嚕，唔想炸，自然就出現山寨版咕嚕肉

呢個係我自己忠於自己成品

煮食要有創意先好玩，跟食譜係參考，到自己手到拿來時跟本無規限，就自己口味去調節

山寨版咕嚕肉用蝦膠釀入豆卜再焗，然後加山楂咕嚕汁

哼




不用炸、不用吃豬肉

山楂同美顏有消脂作用，而且增加了香氣呢


做法

蝦膠

豆卜  10~15粒

配料：

洋蔥   一個切塊

青椒一個切塊

汁料：

山楂   12小粒

熱水    3湯匙

茄汁    3湯匙

白醋    2湯匙

糖   1.5~2湯匙(視符自己喜好甜味)

生粉    1茶匙

將豆卜洗淨，切開口，釀入蝦膠備用

焗爐預熱200度，放入豆卜焗15~20分鐘，焗至蝦膠熟豆卜脆身便可以

山楂月三湯匙熱水浸軟至出味，把其餘汁料材料加入山楂水攪勻

燒熱鑊加油，爆香洋蔥及青椒，然後加入汁料兜勻

當汁料開始透明及杰身便可以放入焗好豆卜，兜勻上碟

蝦膠做法：

鮮蝦    一斤

鹽   半茶匙

蛋白    半隻

生粉    1茶匙

麻油    1/4茶匙

沙葛    1/4個切成細粒粒

小棠菜   5棵切粒

蝦買沖洗回來去殼，去腸索乾水，要索到全乾既

把蝦用刀大力拍打，至筋斷，再剁碎，放入鹽、蛋白及生粉順時針方向攪至起膠，再撻至有彈性

加入沙葛粒，攪勻，然後加1/4茶匙麻油，撈勻，放入雪櫃兩小時

小棠菜切粒，加入蝦膠肉，做成一個隻蝦餅

平底鑊放油，燒熱，把蝦餅煎香即成

*如用現成蝦膠，要先入保鮮袋撻佢幾十次先會彈性，因為街外花膠只會攪爛就算，所以點都要做多個步驟

 

Rasupermen

Rasupermen開幕了，佢前身係米芝連一星既MIST

最大特點同誠意係自設工場從日本買製麵機做麵

今次揀晌希慎開店，其實感覺上位置與麵店既形像配合

個門口帶點幽默，配合得到內有設計

我影唔到店內，因為當時午餐時間實在太多客人，唔能夠將人攝入鏡而post

裡面有一張長桌配高椅，亦有卡位

但一定要提醒，rasupermen唔設訂位，要walk in，所以門外經常排長龍

(因為店內燈光唔算好光，相片影得唔好，有d要用電話相片)

今次同Vanlily、Isaac、不眠王子一齊去食

麵方面有季節性既總類

夏天不少得冷麵

在我而言，好喜歡呢個，呢個望落似海灘，但我好想話你知點解，總之似，而且清涼

呢個係冷超人麵牛肉精華沙律，佢個湯做成Jelly狀，撈勻佢食

橄欖油拌麵配烤豚腩

呢個係撈麵，配有一碗湯

感覺像廣東撈麵，當然味道係日式啦啦啦



辣蔥味噌麵

你唔好以為佢係什麼地獄拉麵咁，但湯係辣

佢既辣來自蔥

對於我喜愛蔥既情度係超滿足，佢湯底較濃，講真…其實味噌湯底總會係較濃，呢個係預左既事

如果要唔濃可以選擇其他，有鹽味、豉油

其實之前我食過梅鹽味，個湯好味，可惜我又out focus，要等Vanlily比相我先post得

迷你熱鍋鵪鶉雞肉丼

呢個係細細份量既飯，佢用迷你Le Creuset去裝

小巧的一個飯

個雞肉好滑醬汁係一貫日本風味既帶甜既汁

上桌時都會開心，我得閒都要用我個LC煲仔做個翻版飯先，哈

七味雞翼

初初我以前係雞全翼，原來係雞中翼

其實雞翼部份大多數人都喜愛雞中翼，所以呢個合心意

佢乾脆、味夠！做到乾脆已經係好好既事



西瓜豚腩  脆麵沙律

佢個脆麵係係鬆版童星點心麵

一個月內我試了兩次西瓜配腩肉

一個中式，一個日式

兩者都係腩肉鬆軟，個脆麵係一個特色

實在罪過張相影得唔好

呢個係焦糖拌味噌忌廉

呢個係偏甜，焦糖味夠出味噌味只係淡淡點綴

起初以為係布甸質地，但佢基本上係cream，所以唔好帶布甸既期望去試

同埋唔愛甜、食唔到甜要注意，佢的確會甜少少

我同vanlily接受得到！哈



杏香奶凍

呢個我認為質地唔錯，但杏味可以再重手dd，會完美多d

Rasupermen波子汽水

我要士多啤梨味，Vanlily要原味

士多啤梨味永遠係我最愛

波子汽水係日本做既，運來香港，遲下還有新口味

餐牌可供參考

順帶一提

其實有時做食客，遇到唔滿意係應該要出聲同店員講去表達意見

麵店老闆係會視符原因去換

一碗熱湯麵，影相影完都已經失真，呢樣即使我晌日本食，比我影一大輪都已經唔同味

如果發現麵一來到，麵質唔符合口味，可以要求換過

呢度係rasupermen既承諾，當然唔係食到4份三先表達或者不停換口味只為好奇一試，品質上意見係可以表達的

表達意見係客人既權利，而且新開業如有甩漏都需要讓店主知道先可以改善

正如我…有時都唔會明白點解整麵包時得時唔得，正因為我新手，有好多野都未掌握得最好

那位食客(大少爺)只一面倒話好食，連唔軟都話好，我跟本無法得知"真相"，所以出外食我都會表達意見，即使係一杯凍檸茶。哈

混醬cupcake(附涼瓜食譜)

我不停講過涼瓜既苦?(別人說甘)我係無法接受

總覺得咁苦既食物點解要食？

連大少爺都好開心咁食涼瓜

每隔幾年我總會去試一片，但都係獲利回吐地吐出來

到而家都唔明

但點解我要明呢？

因為無奶油一個寫食譜既人，唔去嘗試，即使唔食既都要學下做既技巧

但I'm so sorry

今次為用上萬字所有醬料做到一個喜愛醬汁，我仍只能食塊肉

其實我都唔太食豬肉都要試

哈~所以我認為，我單方面認為、我一箱情願認為自己好大犧牲

今次係cupcake苦瓜(涼瓜甫)

涼瓜 1條

免治豬肉   約一碗

醬汁：

萬字醬油   1茶匙

萬字蠔油   1茶匙
 

萬字豆豉醬 1茶匙

萬字海鮮醬 1茶匙

萬字蒸魚豉油 1茶匙

水3湯匙

糖 1茶匙

粟粉   1茶匙

做法：

涼瓜切段，中間挖空

醃好豬肉(豬肉醃料：萬字醬油1茶匙、糖 1茶匙、粟粉 1茶匙)，攪至起膠

將豬肉釀入涼瓜內，大火蒸 12分鐘

將醬料所有混合，倒入鑊，煮滾淋上蒸好涼瓜甫上

http://www.facebook.com/kikkoman.hk

今次我大膽去收所有萬字提供既醬去用，因為發現海鮮醬配豆豉醬係會變得好味
係一個美好化學作用

痴心(附百花小棠菜)

係呀係呀！我又post百花小棠菜

無辦法我人生最愛食…蝦膠、墨魚膠等等既食物

去飲…我最愛百花釀蟹鉗

以前去JW Lunch buffet有炸蝦波食，但之後無左，我嬲左佢

所以識煮野一定可以滿足到自己

同埋一定要滿足自己

我愛百花小棠菜既程度等於.......愛Chanel一樣

小棠菜混入蝦膠，簡直係化學作用

所以我愛呢個化學作用

講開今晚又想整

我望住張相都想再食

好痴心的Fans…愛你愛你愛你愛你愛到你都不想聽~哼




做法
鮮蝦    一斤

鹽   半茶匙

蛋白    半隻

生粉    1茶匙

麻油    1/4茶匙

沙葛    1/4個切成細粒粒

小棠菜   5棵切粒

蝦買沖洗回來去殼，去腸索乾水，要索到全乾既

把蝦用刀大力拍打，至筋斷，再剁碎，放入鹽、蛋白及生粉順時針方向攪至起膠，再撻至有彈性

加入沙葛粒，攪勻，然後加1/4茶匙麻油，撈勻，放入雪櫃兩小時

小棠菜切粒，加入蝦膠肉，做成一個隻蝦餅

平底鑊放油，燒熱，把蝦餅煎香即成

*如用現成蝦膠，要先入保鮮袋撻佢幾十次先會彈性，因為街外花膠只會攪爛就算，所以點都要做多個步驟

擊中目標(燻魚食譜)

男人是否都一樣？

大少爺從來未話過我整既野難食，即使連我自己都覺得難食

未識煮野時，我每次整都...."驚為天人"，係嚇得死人

但佢都唔會彈一句

到底佢係無味覺或是…講不出聲 講不出聲，任由自己半夜驚醒 我不過偶爾受了驚 於是遺忘本性？

佢出街食或者食到朋友整既野卻又會直接去彈

有次教會有個姊妹整曲奇餅，我離遠見到大少爺用筷子夾住曲奇餅

跟住我好奇怪，我望到佢咬左一啖面有難色，佢居然走去個姊妹度問：你整架？

姊妹好興奮答：係

大少爺居然擰擰頭

我見咁樣就行埋去問：做乜你用筷子夾曲奇？

大少爺答我：我望個樣以為係煎蛋角

那一刻我個姊妹無語問蒼天，更無語問蒼天既係我，因為我姊妹話我：佢食慣你d野攪到乜都彈

哈哈！

我分唔出到底佢食到我整既難食食物時既感受，但我知佢如果喜愛一樣食物時會問：難唔難整？

以下呢個燻魚係佢好鍾意，因為我擊中晒目標，香、脆、酸、甜、魚

佢好期待我再整，呢個魚係之前葛老師教我的，好味



燻魚汁：

黑醋    2湯匙 (我用黑醋整，好香)

糖   1湯匙

生抽   1茶匙

五香粉  半茶匙

鹽    1/4

先試味，如覺得酸可以糖

魚：

用鯇魚整的，葛老師當時教我一個祕技，就係用花雕酒、薑蔥去浸個魚15分鐘，咁會完全，係完全無晒鯇魚既泥味



完全索乾水，加生粉，生粉唔使多，夠沾滿魚便可以

炸出來又乾又脆，然後煮熱個汁，再將魚回鑊每件沾上汁便可以，唔好兜得耐

沒有污染的波霸(附椰汁紅豆粉圓西米露)

話說以前有段時間好喜歡飲珍珠奶茶

係上左癮咁

當時珍珠奶茶店剛興起

本身唔喜愛奶茶，從來只愛凍檸茶

後來發現我係愛珍珠，所以轉飲蘋果茶珍珠等等

好明顯…迷了一段時間後會徹底地厭惡

如是者…一年都飲唔到一次

不過…近來教會姊妹晌台灣買左包波霸珍珠比我

當時我即想起.....雜誌封面，無錯！d雜誌既標題完全係污染

攪到我都想歪了(哈)

忍唔住手整甜品，我唔會整珍珠奶茶，用來整椰汁紅豆粉圓西米露

驚覺…原來珍珠奶茶好抵飲，因為d粉圓好難去整

要先煮50分鐘…後要燘一個鐘(佢係咁寫)

網上有d食譜就煮完焗煮完焗煮完焗

所以原來一杯珍珠奶茶$20但好抵囉！

我用Fissler高速煲煲20分鐘！咁乘起上來用明火要搞成個幾兩個鐘

西米

好多人問西米點解煮極中間有白色

好簡單你只需要煮滾蓋上煲蓋焗至水涼，如仍未通透又再煲滾再熄火焗重複便可以

椰汁紅豆粉圓西米露

紅豆 半斤

冰糖 適量

水    1.5分升

先將紅豆浸冰水，15分鐘，待滾水滾後隔去冰水放入煲，煲1個鐘變成紅豆沙，加冰糖即成，然後放涼

(用Fissler高速煲就將紅豆浸冰水，然後放入煲滾既水中，蓋上蓋2號速，煲10分鐘，熄火減壓排氣，再番滾加冰糖便可以)



西米  50g

將西米放入滾水中，翻滾後熄火唔好開蓋，然後焗至水涼，如果仍有白芯，重複做一次



粉圓(波霸珍珠)

我用Fissler高速煲，水滾後放入粉圓 100g然後蓋上蓋2號速煲20分鐘，然後減壓排氣

撈起粉圓浸冰水






普通煮法可以參考呢個巢晒既包裝，其實我唔係好明佢寫乜



食既時候可以淋上少許椰漿便可以

哼爆(西洋參無花果螺片湯)

原來今年好少post湯，因為煲來煲去都係差唔多

呢個心理影響下，先發現有一款漏網之魚，西洋參螺片無花果瘦肉湯

夏天好討厭，好易發癲

加上舟車勞動(成日走出街)、仲易癲

而且香港由星期一至星期七都係好多人，又有人大聲叫、出街又比人推撞，又見到小孩週街便便(琴日又見到)

真係好燥！好想"哼"爆(燥哼)

所以要一個可以降火既湯

呢個湯久唔久都會煲，因為容易又清，用螺片後唔需要落鹽、又帶有甘甜，成日夏天既湯水之一

d相影左成個月，而家先排得到！哈

個湯好清


西洋參即係花旗參，只係產地唔同，原來人一星期唔可以飲花旗參超過10g，所以煲湯兩個人用10g就夠(上次個西洋參event負責人講既，信不信由你)

螺片  3片，先浸軟洗淨再用薑蔥出一出水去腥味

無花果用6粒，唔知點解影呢張相時無左3粒，用6粒夠甜

瘦肉無影相，用瘦肉無乜肥油，先出水再煲湯，呢個湯會好清

水2.5公升


我用Fissler高速煲30分鐘減壓排氣後，再滾15分鐘會更出味

用普通煲就煲3個鐘

醬油蝦(附食譜)

在明明應該風雨交加，但我家又出奇平靜的晚上

送上豉油王乾煎蝦

呢個project仲有幾期就完，呢個蝦算係我新嘗試

不過好難影得靚，所以抽四隻影！哈

一向煎蝦偏向茄汁蝦碌，因為個project所以新嘗試

大少爺居然愛上呢個味道，之後我做過幾次！一來方便，二來想甜就甜加糖，唔想就減方便得很

蝦     8隻

萬字醬油  1.5湯匙

糖        2茶匙

紹酒      半湯匙

做法：

蝦去蝦、剪蝦腳及鬚，然後抹乾水份，放雪櫃一小時

蝦沾上適量粟粉或生粉，放上鑊煎，煎香一邊再反另一邊

加萬字醬油，糖快手兜勻，最後贊酒便完成

*醬酒份量可隨著蝦多少去改，只需要每隻均勻沾上便可以，否則會太鹹



今次用萬字醬油


http://www.facebook.com/kikkoman.hk

海景軒

今日風和日麗，陽光大剌眼

暴風雨前夕既定律嗎？

望出窗都覺得好熱，不過點都要出街

我約了朋友去Tea，無辦法下都要潛出街

今日比自己休息日，所以乜都唔煮喇！

講下試菜篇

早個星期同KC、不眠王子、Isaac去試菜，地點係海景嘉福酒店既海景軒

其實我對海景軒唔陌生，因為我偶然都會同大少爺來食飯

今次試8月既夏日菜式

*四喜小花拼

有菊花雲片白肉、陳醋脆鱔、西瓜無黃蛋、糟香炒魚鬆

中間以為係豆腐？No…係無黃蛋，即係蛋白啊！我最愛呢個同脆鱔

菜膽花膠燉北菇

足料、清同甜，係火喉十足



*牛油果焗釀帶子



*香片茶葉蝦

呢個係香口既茶葉蝦

*呢個係亮眼既........西瓜紅燒肉，一個唔係凍食西瓜

我好少食豬肉，更少食腩肉，可以講呢個肉夠稔之外，仲感覺唔肥，唔會一咬就感覺有肥油

鹹既西瓜係點既呢？其實個表面黏有鹹味既汁，但咬落還是清甜既西瓜，因為佢始終係西瓜，哈

龍皇珊湖煎米粉，呢個我會學整

因為我Like！

狀元煎茶果

呢個都幾好食，茶果看似簡單但唔一定好食

呢個仲煎香埋，個皮夠煙un

大廚梁師父親身整蛋白杏仁露，佢仲分享點先整得好！人好nice呢

香滑

呢個又一亮點…*山楂卷

佢係好夠味既，而且質感有彈性

係非常好既甜點！Like

奶皇脆春卷

有*既係八月供應既菜式，過八月後要早兩日預訂