2016年10月28日 星期五

瞬間看脷頭之Ondeh-Ondeh

今集"瞬間看脷頭"係介紹馬拉風味既斑蘭椰漿小丸子Ondeh-Ondeh

裡面包有椰糖,煮完後裡面流心的

但我無影到表現唔到佢流心美態


*我正在執行李所以寫住咁多先先先先先


食譜:

班蘭葉  4條

暖水    50ml

糯米粉  65克

椰糖    2粒

椰絲     適量

做法:

椰糖切碎


將斑蘭葉剪碎後加暖水打爛,然後隔渣剩下班蘭水

糯米粉加入斑蘭水中攪勻再搓成糰


分成15g一粒,搓圓按扁加入椰糖封口再搓搓搓


最後放入滾水中烚至浮起,再轉細火煮一陣

撈起瀝乾水份,灑上椰絲















大少奶's Delicatessen

宣傳你的專頁

2016年10月27日 星期四

瞬間看脷頭

歡迎各位又來到"瞬間看頭"既節目

繼早幾日泰國甜品、昨日四川爆炸品

到今日就嚟到韓國,今日韓式午餐有泡菜豆腐蠔湯

同韓式走辣老少咸宜炒粉絲

貶下眼節目又到尾聲,如果大家想重溫的話可以 click入:http://iamtaisiu9.blogspot.hk/2016/10/blog-post_27.html

無錯今日遊走韓國,純想食辣及熱湯,個湯既蠔係用韓國蠔煮出來肥美d之外蠔味都重

包包好喜歡食韓式粉絲,所以要炒都唔可以辣既

好!今日好忙食譜如下




蠔湯:

泡菜    1/2碗(可以更多視符自己喜愛)

豆腐    1件(我今次用韓國豆腐)

韓國蠔   10隻

大蔥          1/4條

鹽     少許


用個煲放750ml水,加泡菜及大蔥煲滾,滾大約15分鐘後加豆腐再滾一陣

最後先加入蠔,及少許鹽(建議先試味)便完成

呢個係韓國豆腐,係滑豆腐較軟身



韓式炒粉絲,由於我邊煮呀包邊叫所以忘記了影相

韓國粉絲   1扎(先出水煮至軟身)

大蔥   1/4條切絲

紅蘿蔔、洋蔥切絲    隨意

蒜頭   2粒切片

牛肉     半碗仔(用生抽、糖、生粉及麻油去醃)

蝦    隨意

汁料:

生抽  1湯匙

老抽   1茶匙

水   3湯匙

鹽   少許

糖   2茶匙

麻油    少許

先爆牛同及蝦至半熟盛起備用

炒香蔬菜料,再加入醬汁略滾後放已經出過水既粉絲炒炒炒炒炒,再加少少麻油便成

喜歡的可以加蛋絲

*韓式食物既味道通常偏甜,所以糖都要多少少








大少奶's Delicatessen

宣傳你的專頁

2016年10月26日 星期三

噴火


我相信身體雖然什麼就會向你表達,咁你就會突然好想食某一食物

晌上星期打風落雨後,我成日想食羊扒,仲好想食辣

於是就將兩樣 組合成為麻辣煎羊扒,佢最不得了既地方係好夠麻又夠辣

所以甚得我歡心,昨晚其實再想整但怕朋友食唔到咁辣所以放棄

但我知道…我會再度重遇你..................

呢個之所以夠麻就係花椒夠靚,佢唔係黑色一粒粒那種,係似小花咁既先係夠麻

佢既麻簡直令心頭一震既,哼~

今日呢個羊架令到我成個blog都變得好Hot,我就變成Hot baby個呀媽

Come on baby~有朝一日天寒地凍你就會整食佢


材料:

半扒     4-件(用生抽、少少酒、生粉去醃10分鐘)

花椒    1湯匙

辣椒乾   5隻

蔥段    幾條

蒜頭    4粒切半

芫茜     隨意

*其實要落洋蔥,但我忘記屋企無了

做法:

羊架先煎香及半熟盛起備用


先爆花椒再放其他材料爆炒,加1/4鹽兜勻

將羊扒回鑊,加大約1茶匙生抽及少許糖落鑊,令羊扒因為小小水份同乾料配合

最後贊少許酒就完成,完成後可以放d花生粒




大少奶's Delicatessen

宣傳你的專頁

2016年10月25日 星期二

修護防脫髮療程


頭髮一向都係被我忽視既,我永遠有個七年轉變

7年留長髮後,keep了7年短髮,又再開始留長,但我都無特別去護理個頭髮

當收到 @ReneFurterer 邀請去做 Reactional Anti-Hair loss ritual(修護防脫髮療程)時第一時間諗:我把頭髮好濃密喎

唯一一段時間甩到我驚就係生完仔第三個月,甩到我擔心

其次秋天既時候

大家有無發覺秋天係甩頭髮既高峰期呢?每逢秋天我就甩得特別多

無論長髮或短髮總之一到秋天就甩頭髮,而且換極洗頭水d頭髮都好容易黏埋一餅咁

所以反正試下都無壞又可以問下意見就去試下啦

首先專業頭皮顧問就幫我頭皮做分式析…佢會幫我睇下唔同區域既頭皮狀況



一個毛囊正常會有幾多條頭髮為之健康?

答案: 2-3條



當你甩了一條頭髮,最端位置通常都會有一粒毛囊,毛囊點先係健康呢?
答案:毛囊要夠肥大先可以啜實個頭皮
*以下呢條頭髮唔合格,因為頂既毛囊唔夠大粒




咁甩頭髮係咪代表你頭皮或頭髮一定唔夠健康所以脫髮?
答案:唔係!人每一日都會甩40-100條頭髮,而且呢個係正常既新陳代謝

洗頭係咪代表頭皮一定乾淨呢?
答案:唔係!好多時大家洗頭都只係洗頭髮缺乏頭皮護理

咁呢個treatment到底點做既呢?



Step 1:皇牌活髮精華油COMPLEXE 5

薰衣草及柑橘精油按摩,專業頭皮顧問用法式按摩手勢去幫我按頭各區域

薰衣草及柑橘精油
•具深層清潔功效,有效滲透至髮根
•促進微血液循環,提升頭皮吸收其後護理産品功效的能力達10倍

使用方法
洗髮前,將適量的活髮精華油分區塗於頭皮上,輕輕按摩約5-15分鐘,再靜候10分鐘,待精華油滲透至毛囊,然後清洗。

被按摩頭皮中............






十分鐘後就可以去洗頭,其實我之後都有繼續用以下洗頭水同護髮素

呢隻洗完後可以乾爽足一日

附上洗頭水資料:





防脫髮洗髮水FORTICEA Stimulating Shampoo
主要成分: 巴西人蔘®、薰衣草、柑橘及迷迭香精油
•提升頭皮組織的微循環達7倍*
•強化頭皮組織,促進頭髮健康生長
•延緩脫髮情況
•提升毛囊吸收防脫髮精華素産品的功效
滋潤修護乳CARTHAME Gentle Hydro-Nutritive Mask
主要成分: 埃及紅花、維他命B5
•為嚴重缺水的頭皮及頭髮修補天然皮脂膜
•提供滋潤與保護,鞏固髮幹
•回復髮絲水嫩亮澤,減少髮結及折斷問題


之後就做

Step 3 -防脫髮護理

精華素80 ATP增強版RF80 ATP ENERGIE 用完呢個後唔需要再沖洗,由得佢自然風乾或吹到半乾就可以了  

巴西人蔘®、鼠尾草精油及檸檬精油
•促進血液循環,增進新陳代謝
•提供頭髮生長所需之養份,令頭髮重新健康生長
•防止頭皮組織纖維老化,強化毛囊吸收營養能力
•有效延長頭髮生長週期,鞏固髮根,延緩毛球退化
•特別適合因產後、壓力、過份疲倦、節食減肥引致脫髮的人士補充營養

使用方法
每週使用1次,持續使用3個月。洗髮後,將整瓶精華素80分段塗於已清潔的頭皮上,然後輕輕按摩頭皮,待精華液吸收,。





做之前個測試,頭皮比較乾,同埋我頭皮有d損同毛囊倒塞




做完後個頭皮有光澤,毛囊通透左,明顯不同了




做多幾次home treatment,慢慢就會發覺頭皮開始生番D初髮


以上既Treatment全套做一次係 $820,有興趣可以 send Email to: info@renefurtererhk.com
話大少奶介紹既可以用半價即係 $410做一次 (名額10個,額滿即止)

藍蝶

本身好唔喜歡藍色,除了牛仔褲外我得一件落街既衫係深藍色,即使披肩有藍色都只係點綴性質,主色好少揀藍色


包包係男仔都無可能完全唔接觸藍色所以雖然唔鍾意但又慢慢逼自己接受

近日卻對蝶豆花產生興趣,但唔知香港邊度有

點知我姊妹一家去完泰國有買蝶豆花仲問我有無興趣要,我幾乎跑入廚房煲飯咁 hur飯應

接觸唔同食材係我興趣呢

呢個係蝶豆花椰汁糕,蝶豆花其實無乜味今次個糕係椰汁味為主



我係絕對盡量禁止包包食色素食物,出街有時無辦法但晌家中盡量少比有色素既食物佢食包括茄汁

所以呢個糕佢有興趣都會比小小佢食(佢肯定咬一啖就唔要,佢對甜食不大興趣只喜歡食生果)

呢個糕既食譜質感係我最喜歡,佢有彈性又唔會實

大家無蝶豆花唔緊要,可以將夾層用斑蘭葉榨汁去代替或用咖啡、甚至你喜歡魚香茄子又做得到既話都可以,哈~


蝶豆花係好得意,你將佢泡晌水就會變藍色、加檸檬汁就會紫色






食譜:

椰汁層

椰漿  400ml

奶    100ml

糖    100g咁上下,其實多與少大家可以試味,我自己試到合適為標準,唔會度到好準

魚膠片  25g (如用魚膠粉用同一份量)

做法:

魚膠片冰水浸軟

椰漿加奶加糖,座水整熱,直至糖溶便可以,加入魚膠片待溶化

放涼備用


蝶豆花層

蝶豆花       12-15粒

熱水水       400ml

糖     80g咁上下

其實多與少大家可以試味,我自己試到合適為標準,唔會度到好準

魚膠片  20g (如用魚膠粉用同一份量)

做法:

魚膠片冰水浸軟

蝶豆花及糖放入熱水中直至變成深藍色後可以拎起d花粒

將魚膠片放入蝶豆花水中攪至融化便完成


將椰汁層放底,雪至凝固(可以放入冰箱急凍,但要留意唔可以結冰)再加蝶豆花層梅花間竹去做便完成

*答了100次題目,答案:魚膠片同魚膠粉同等份量

*白色層做底及面,所以份量會多過顏色層

大少奶's Delicatessen

宣傳你的專頁

2016年10月22日 星期六

千禧新世界酒店之飲食篇

千禧新世界酒店即係邊度?咁舊日航酒店你一定知啦

兩者既關係又係乜?

答案:千禧新世界酒店係現在式,日航酒店已經係過去式
*解釋埋今次後,大家就要忘記過去喇

其實我初初好唔習慣,一來日航酒店一早已經種植晌心上,二來改革後又唔覺得好大轉變

不過當酒店裝修完後就感覺千禧新世界酒店係獨立個體,完全一番新氣象

寫呢篇文我盡量都叫公關比多些不同餐廳資料我去寫,酒店好努力革新之餘,餐廳都不停進步

由初初改名我覺得唔算太凸出至到近來有點驚喜既感覺,相信除了酒店希望撇除大家舊有印像之外,"進步"都係佢哋大前提

酒店內著名餐廳嵯峨野、La Table等仍然繼續留低

仲有由意大利總廚Claudio Dieli坐陣後既 the Lounge都非常出色

Claudio Dieli擅長設計意式小食外,帶有意式風味既各樣菜式都集賣相、味道與健康一身

還有負責甜點既大廚Daniel Law,令到The Lounge鹹甜食物都同樣出色


裝修後煥然一新既感覺



先介紹 afternoon tea set  $346 For 2

如果晌酒店內 Cafe East食 buffet就可以有以下優惠

由即日起至11月30日期間,六人同行惠顧Café East 自助午餐或四人同行惠顧自助晚餐,即送The Lounge一位用下午茶,如此類推。


呢個raspberry既 macaron好好食,因為加了紅桑子果汁令到佢有層次之餘仲唔會偏甜


以上食物有乜?看menu吧

這個價錢以酒店級既 afternoon tea set來講係算平,但食物並非如一般tea set

呢個價錢多數鹹點都會用上不同手指三文指就算

但呢度鹹點係用有不同點心,而蛋糕亦都唔係單一用朱古力而係有不同口味


我去到邊都係飲凍檸檬茶,佢既冰係用紅茶做成,飲幾耐都如一有茶味


太厚待呢個奀皮仔了,佢每次來都有大廚為佢設計甜點

呢個奀皮仔越來越奀皮,就快被禁止跟我去搵食




The Lounge都有set lunch的

$188 /3個course 主菜會有一款肉、一款海鮮及一款純素午餐可以選擇

仲可以晌甜品櫃揀一款甜品

8月尾時候,我都有晌呢度食過lunch,當時 午餐都仲未有套餐

我試了部份菜式,呢個煙三文魚並非街買既,而係大廚自己醃製

分別係三文魚會保持得到原有質感,而味道唔會係街外既鹹味咁重,而係微微煙燻味


Set lunch會有前菜式餐湯揀,而湯都係用上有機蔬菜做成

呢個意大利番茄湯係我想像以外既好味

初初我幾抗拒番茄濃湯,但意大利人總會凸顯到番茄優點不單無想像中腥味

反而有清新既微酸味


Panini及蟹餅 ,我好鍾意食蟹餅啊

呢個晌  A la carte menu會有,如果放工happy hour點呢個小食都不錯


甜品就可以晌呢度揀一款


女人就係見到甜品會發狂既生物,三個女人忍唔住試四款甜品

大家睇開都知我近年不愛甜品,呢度甜品每款都不同層次


臭包福利時間又到



順帶一提: 酒店中菜餐廳桃里有大閘蟹menu,大家喜歡既都可以試試














交學費

各位同學!今日呢堂係教"香茅魚露粉絲煮蜆"

蜆用鹽水浸一小時以上吐沙,然後放入鑊(不用加水住,蜆會有水出的)

加2條拍碎既香茅、2粒蒜頭及幾粒乾蔥

煮到剛開口將蜆撈起,加大半碗水,放埋粉絲入鑊煮到腍
就將蜆回鑊加入幾滴魚露再滾起之時就可以熄火原鍋上

呢個做法好好食又方便

好!落堂...出校務處交學費,已經裝了24小時CCTV唔好走數





大少奶's Delicatessen

宣傳你的專頁

2016年10月18日 星期二

唔好爛滾

Well~因為呢個Chicken wings叫瑞士雞翼

So就要晌呢度寫呢粒English去襯番,Even瑞士雞翼 not from瑞士

But都係唔know why要咁write囉~哈哈

正題:呢個瑞士雞翼個重點係無乜重點,佢係堅易去做又好味

那些雞翼迷係會好喜歡,不喜歡雞翼既都會愛佢個汁咁囉

雞翼個質地要好最重要唔好爛滾,記住唔好爛滾,爛滾就正衰翼

煮滾個汁落雞翼後蓋上蓋用餘溫去浸熟,個質地係最好的

食譜:

雞翼    2磅

老抽    半枝

水同老抽同一份量

糖   50g

冰糖   1小粒

八角   2粒

麻油    少許

將老抽加水加糖及冰糖、八角一同煮滾,然後放雞翼再翻滾時就蓋上蓋熄火浸熟雞翼

當雞翼放涼後剛好入味架喇!加少少麻油上去就done




大少奶's Delicatessen

宣傳你的專頁

2016年10月17日 星期一

乜乜物物卷物物乜乜

包包氣管炎病了幾日,佢第一次病得咁嚴重

或者我無經驗未經歷過所以好擔心,原本醫生寫定紙比佢入院

後來晌診所聞氣後有好轉所以先可以回家,幸好食藥後佢病情得以好轉

加上佢好乖知道要食藥所以都好感恩病情比想好得快

星期六、日好少有唔同佢去街攪到我比蟻咬

留在家可以諗下有乜食譜可以整,尤其望住佢病幾日後成個人瘦晒個肚腩仔都細埋就好有動力想不同食物比佢食

屋企有整芝士蛋糕剩下既cream cheese、有機雞柳、火鍋肉片,同埋食極唔完菠菜及番茄

令我整了以下既芝士菠菜雞肉卷,將菠菜加cream cheese做夾心加雞柳肉及肉片卷起去焗到

肉片用鹽同蒜汁醃一醃再用鮮茄做成醬汁,呢個多功能集於一身既乜乜物物卷就完成

包包吃了一整件同大半碗飯,胃口都返來囉返來囉 ~同埋我覺得好好食,就快聖誕叫學定開party亦得呢

哼~                                                                         



食譜:4件份量

火鍋肉片    12片
(如果只可大人食可以用煙肉)

雞柳   4件

cream cheese   100g

菠菜     5-6小棵

番茄   2個

蒜頭   1粒

鹽、胡椒  適量

手   1對

做法:

先做cream cheese部份,指定動作:將菠菜放落滾水灼唔超過1分鐘就撈起浸冰水再榨乾切碎



cream cheese放至室溫就可以加菠菜碎打滑備用

雞柳用刀或食物搥仔拍成薄片,蒜頭磨蓉

火鍋肉片或煙肉片盡量剪走肥既部份 ,火鍋肉片及雞柳都灑一層鹽及掃上一層蒜汁

火鍋肉片放最底(大約3片)然後放上薄雞柳

方向如圖中一樣火鍋肉片打橫放雞柳打直放後卷起

放上焗盤上用200度火焗大約20分鐘或以上,焗既時候可以做番茄醬汁

番茄2個加1碗水煮呀煮呀煮呀,煮到番茄溶後加少許鹽少許糖,自己試味ok後慢火煮成醬汁

*如果呀包食我唔會加現成茄汁,只會用番茄煮成濃汁比佢

焗好肉卷後就放上碟再淋上醬汁便完成



大少奶's Delicatessen

宣傳你的專頁