餓底

琴晚去飲宴前，大少爺返屋企換衫

仲有大少爺一個同事上我地屋企休息一下再到飲宴場地

我叫佢哋食整好既咖喱蘿蔔、魚蛋

大少爺突然想食西多士，仲話已經好多年無食過

心軟既我就自已整比佢食

如我唔整的話，佢出去食茶餐廳用萬年油整既更加唔健康

何妨佢唔係成日都會食就整比佢啦！

蛋要用打蛋器打到起泡，將麵包沾上蛋泡，用蛋泡會較輕身

用半煎炸方式至金黃色

大少爺個同事話好食過街外既呢

好熱氣？唔怕！

我琴日煲咗海帶綠豆沙呢

飲宴前食到咁多嘢，大少爺的確係【餓底】

但佢仍然能夠保持標準身型係好奇既事

*今晚繼續飲宴，又係一樣菜式...........

春田

呢兩晚都要去飲宴，但好開心天氣凍著新衫~~哼！

雖然唔煮飯，我仍然整小食比大少爺，我唔會懶

今次整咖喱蘿蔔魚蛋+齋、仲有酸齋

因為買多咗齋根就整酸齋

個酸汁係用整咕嚕肉既方法(要減去些少粟粉份量)調較 --->   咕嚕肉

自從睇完"春田花花同學會"後

每次見到齋鹵味內心都會哼起呢首歌--->按此觀看

齋鹵味 齋鹵味
齋_鹵_味_          散發著鹵味味
齋_鹵_味_          夠似0舊鹵味未?
明明係鹵味         原來係0舊齋
明明係0舊鴨       原來係面筋
明明係切雞         原來係腐竹
明明係0舊腩       原來都只不過

齋鹵味                細個就已經食
齋鹵味                至正係拜山食
明明係鹵味         原來係0舊齋
明明係0舊鴨       明明係舊雞
明明係鹵味         原來係0舊齋
原來都只不過...  齋鹵味 齋鹵味 齋鹵味

一家

今朝七點幾醒咗瞓唔返，但仍然心情好好

因為【我們這一家】相聚，有我敬愛的菇奶奶、十分乖巧既立春妹diana

因菇奶奶下晝有要事，所以約10:30am

本身去九龍灣大榮華飲茶似足一家人，但唔識去啊

結果先相約去我喜愛既supersandwich食早餐，再去starbucks飲嘢

噢！我份早餐有蜜味火腿、鹹牛肉薯粒、磨菇、炒蛋

仲有好好味既牛角包啊

表弟成日同我講：表姐你乜都有得食，唯獨是早餐你無得食(因為我出名晏起身)

今日食到早餐喇！哼~~~

早餐後到starbucks飲嘢！我要choco Frappuccino 

仲有 blueberry cheese cake

晌starbucks期間轉兩次位，我個好乖巧既妹妹diana幫我買飲品

每次一拎轉頭就發現我同菇奶奶唔見咗

會突然0彭一聲見到我同菇奶奶拎住所有袋喪走去第二張枱

仲將餐廳內既櫈搬來搬去、移走人盞燈、擰轉人哋張枱

不過…傾到接近2點就要走喇！去買蛋糕材料後就各自散去

雖然感覺好短暫聚會，但都好開心

要等Diana再返香港，一家人先再齊人啊

妹妹既薑味咖啡

To:菇奶奶、妹妹

其實真係好奇妙地做成一家人，而且好強烈有一家人、好親切既感覺

好開心既相聚，亦全無顧忌地對住你倆個

原來我地一家人既另一半有著共同嗜好，哈哈！

亦因為一家人所以無論發生乜事我都會支持你哋(甚至遲到)

我會繼續愛你倆的~

好行

超鍾意Elements啊！人流少又夠集中而且較IFC多選擇喎

如果去bobbi brown修眉，圓方分店係好選擇

今日行足4個鐘，對新高跟鞋著到腳痛，但都好開心

不過…無我心水既食店啊！無野好食咁太多中餐喇

如果Harlan's開分店晌elements就好喇

同朋友出街甚少影相，但都影低聖誕樹

我覺得Elements既聖誕裝飾好肉酸，呢兩棵已經算好

↓好似著絲襪的甜筒

但係

我極懶做運動...但係..行街就行足一日都仍然覺得開心

我極唔鍾意拎重野...但係...拎戰利品就十足奧運【抓舉】冠軍上身

我極討厭重複做同一動作...但係...鍾意食蝦膠既我就好有耐性地重複順一方向攪蝦膠

蒸豆腐唔難，打蝦膠就較麻煩

但我偏偏鍾意食呢個"蝦肉蒸豆腐"

女人為自已既喜好不惜一切，哼！

繼續出街、繼續用【出blog隨意門】

追問

原本煲湯既例行公事好普通

但琴晚煲既【南瓜栗子紅蘿蔔粟米南北杏蜜棗煲西施骨湯】

我最愛既南瓜栗子同粟米啊！

加重栗子同南瓜份量，好甜既湯，好好好好好好味呀

原本好多南瓜但煲到溶晒，好似南瓜精華咁啊

只搵得番相中果一件，飲完好開心

晚飯途中既對話：

我：點解你唔鍾意食粟米既？

大少爺：唔知啊！唔鍾意食囉！

我：你知既，你知點解你唔食粟米，不過…你唔肯講呢

大少爺：(笑)丫！你又問怪問題啦！

我：咁邊方面令你唔鍾意既？

大少爺：唔太鍾意囉！

我：咁你食落去有乜感覺令你唔鍾意呢

大少爺：粟米既感覺囉

我：咁佢錯晌邊令你唔鍾意既？

大少爺：(忍唔住笑)唔夠甜啊

我：苦瓜都唔甜你又鍾意既

大少爺：我鍾意苦瓜既苦

我：咁點解你鍾意苦又唔鍾意飲廿四味，但鍾意飲可樂既？

大少爺：(笑住撇我塊臉)

由於經驗上得知我會永無止境追問落去，佢笑住行開飯枱

而我就最鍾意見到佢無晒符既樣，通常我就會大笑

可憐大少爺每日都被呢種無聊問題包圍住！

*出blog隨意門又啟動，終於有得去行街喇！

夠班

今日後就會唔多得閒，要飲宴、要聚舊、要買嘢

不過...自從上星期去別墅(vanlily屋企)，開始對mousse cake產生興趣

又應承表弟整榛子mousse cake比佢食，更加要整生日蛋糕比自已

今年大少爺禁止我自已整生日餐，要出外慶祝

生日蛋糕要自已整比自已，哼！

為著唔想失手下星期將會晌屋企練習mousse cake

會更加少戚風啊！所以今日點都要整個班蘭蛋糕

焗緊既時候整個廚房彌漫著班蘭香味~噢！

個蛋糕當然夠晒班蘭香味啦！

班蘭蛋糕要

講多次：

班蘭要出味首先將新鮮班蘭葉榨汁

班蘭葉要剪碎，4條班蘭葉最加只可加50ml水入攪拌機

攪既途中要停機攪一攪徹底令班蘭葉攪碎

之後隔渣，班蘭水要座熱先會出到味香味

否則只有草青味架！

班蘭汁隔水座熱中

蛋白打得好的話

就算fold in完仍然夠企身，做出既戚風蛋糕先會軟熟

而且夠乾身又企身

 

其實我真係好掛住新加坡既一切

3月去完日本要修心養性，9月必定到

犧牲

晌屋企就地取材整糯米釀雞亦比佢再個食

其實將雞亦拆骨唔難，反而炒糯米飯嘥功夫

最重要將雞亦醃好後風乾，我當然唔會炸啦

我係焗既，皮好脆、又香！

同大少爺最鍾意既既--->農圃 差唔多啦

唯一唔同，特首食過農圃未食過我整既囉！哼！

我知自已應戒口，But......唔試味，點知好唔好食呢？

我壯烈犧牲自已個喉嚨試食一隻，噢！

泰甜

當大家見到呢個post既時候................

其實又係出blog隨意門功能啊

相信而家我好開心當中~

以下既甜品欲令大少爺好開心，前晚我摺定盒仔時

佢已經話：嘩！泰式果個甜品啊

因為佢好鍾意食呢款糕點

我要學識整大少爺所有鍾意既食物，哼~

 (好彩佢唔食豬大腸)   

↓第一次整，表面唔夠平滑，但食落又滑又好味啊

      

 

  

隨便

琴晚既晚餐，隨便既配搭

但3樣都集結大少爺鍾意既食物，佢食得滿足既樣令我好想.......

哼！(<--超得戚既尾音)

碗仔翅....係因為有木耳晌屋企、又唔難整所以整，自已整可以唔駛整咁杰

干煎茄汁蝦碌...因為想食

干燒伊麵....大少爺好鍾意食伊麵

我今個月好唔得閒，就快專注陪朋友............行街、見面

仲有飲宴

所以一得閒我必親就自整晚餐比大少爺食呢！

碟伊麵好大碟，我食一碗

大少爺就成碟食晒！噢

祝福 @ 北京樓

*出blog隨意門又出動

11.13全日都好開心

出席一個祝福飯聚，主角: minicorgie

出席者：飛e、靚蝦吉、秋香兄弟、春桔同圓圓

原本仲有冬菇，但近日佢太忙，今日缺值

其實我足足傷風一個星期、加上勁忙

無乜心機一個星期，幸好…再睇醫生食新既傷風藥令我好起來

一個飯局加上飯前一個約會令我再度活躍(發癲)

希望無令坐隔離既春桔嚇親，期間一路食一路笑

*昨日大少爺又叫我睇相機(佢真的好討厭我部相機)

於是下晝就去睇，我真係去搵同一牌子、model、同一特別功能，只係個mon大一吋既相機

噢！我部舊相機真係以為我會拋棄佢而嬲攪到今晚影既相就十分差

飯前同靚蝦吉講：想飯後到佐敦一間糖水店買糖水比大少爺

飯後靚蝦吉真係陪我行返落佐敦買，買完之後就返屋企

多謝蝦吉陪我行去買啊

To:mini

祝你永遠幸福快樂！

好高興能夠分享喜悅，等你忙完後再約飯聚

我真係有諗過呢個星期煲湯拎比你飲架！可惜相隔一個海呢

認識到你同飛E確實係開心、娛樂無窮！

除咗@澳洲牛奶公司

我怕去茶餐廳，除咗.................澳洲牛奶公司

我唔太鍾意食炒蛋，除咗.................澳洲牛奶公司

我怕食得好趕，除咗.................澳洲牛奶公司

因為佢既厚多士、滑滑既炒蛋令我耐唔耐就會好想食

佢哋伙計勤快但又保持應有既禮貌、上枱速度好快

食物好食，伙計好一眼關七

你食完放低隻叉就會即時有人來收碟

永遠座無虛席、人頭湧湧

但因為佢既多士及炒蛋絕對留得住顧客既心

琴日同靚蝦吉行街，先到澳洲牛奶公司食lunch

帶住愉快心情，食咗一個想念已久既午餐，再行街

晚上再有一個愉快飯局，噢！

*出blog隨意門又出動

掂啊 (附酸辣湯食譜)

食譜：

材料：

冬菇(切絲)、木耳(切絲)、豆腐(切絲)、筍絲

雞絲(略醃)、海參(浸發後切絲)、蝦仁

蛋一隻

調味：

雞湯或水    1000ml

鎮江醋         4湯匙

豆辦醬         半湯匙

鹽                  1茶匙

胡椒粉        少許

麻油            少許

獻汁：

粟粉           2湯匙

水               2湯匙  

做出：

1)將雞湯煲滾加入冬菇(切絲)、木耳(切絲)、豆腐(切絲)、筍絲

雞絲(略醃)、海參(浸發後切絲)、蝦仁

2)放所有調味料煮滾

3)最後加入一隻蛋，做成蛋花

4)慢慢加入粟粉水，煮至微微杰身

*酸辣味道可以隨自已口味調較

睇錯

我又用【出blog隨意門】出blog

下圖係乜呢？

呢個絕對唔係壽司

係【紫菜墨魚雙椒卷】，白色既係墨魚打成既墨魚膠

用紫卷著墨魚膠、紅、黃甜椒，再蒸熟

我最鍾意呢啲睇到人一頭霧水既食物~哼！

*******************************************************************************************

傷風一星期，最痛苦莫過於"鼻塞"

就算瞓 得好，但一鼻塞我就會彈起

鼻塞好痛苦的~

呢個星期全靠醫生開比我既鼻藥 menthol crystal

我每次都好珍而重之放晌藥箱，因為佢係我既鼻塞救星

其實...呢隻藥要將1小粒入滾水中，再吸索發出既薄荷蒸氣

但我呢種非一般性格巨星，就懶到楂住一小粒放晌鼻到索薄荷氣味

聞聞下個鼻通番就隨即瞓著

圖中好似水晶既就係喇！我太珍惜佢，每次只會用最細粒既

大粒留番大鼻塞時先用

" Oh my crystal,它始終最好)))))))))))))))))))))) "

預備

沙爹伴醬都係我整既，不過我覺得略欠層次感

就快聖誕做嚟招呼朋友都好呀

食譜：

鹽1/2 茶 匙
糖1 茶 匙 糖
生抽2湯 匙
沙 爹 醬1茶 匙
黃 薑 粉1/2茶 匙
水1湯 匙
香矛2條切片、乾蔥切粒

做法：

將竹籤浸水備用(防止黏肉及籤既尾部燒黑)，雞肉切條

將醃料與肉類撈勻，醃最少2個鐘、醃過夜更好

將雞肉(或自選肉類)串上竹籤 *將香矛同乾蔥粒取走，因為易燒焦

放上焗爐230~240度焗熟、搽上蜜糖再焗至金黃。

指南@ Red Stone Bar & Grill

琴晚半夜鼻塞令我紮醒，要用醫生開既menthol crystal 整通個鼻先再瞓得番

我人生最怕鼻塞，一塞就輾轉反側又紮醒

加上早起身精神狀態唔太好

好彩約Amy、Cindy 食lunch時，好快我又再開動引擎般

而且今日比我搵到人生育嬰指南Amy

面對Amy令我消除好多顧累，對佢同劉小姐既生活趣事好感興趣呢！

今日到 Red Stone Bar & Grill午餐

Focaccia好味呀！

Appetizer :木瓜律沙配薄切烤牛肉

牛肉好嫩加上微酸既木瓜，噢！

香煎鯛魚柳煙肉卷配鮮菠菜及炒薯仔，伴忌廉酒汁

今日放棄牛肉，因為仍然唔舒服，想食清啲

好味！

呢個係Amy同Cindy既甜品士多啤梨吉士批

因為想食雪糕我揀蘋果酥卷伴雪糕

一個愉快相聚，Amy送比我既毛巾蛋糕

To:Cindy

你講既：落7-11叮薯片係我開動引擎既源頭

To:Amy

多謝你既禮物，大少爺對份禮物十分好奇啊！

你係我御用育嬰指南、媽咪信箱，他朝有日希望用得著

你搬好後快快再聚！

P.s 你保養得好好啊

8時

晌大家睇到呢個post既時候........我已...........經

出咗門口，並午餐當中~

非常鍾意Y!Blog呢個【出blog隨意門】功能

呢個蛋糕係送比 AMY既

佢9月生日，但一波三折到今日先見到面

因為今朝先整，所以我08:00am已經起身喇

約AMY由3月約到而家，終於見到見

相信你哋睇到時我正愉快地午餐！

今次用原食譜既蘋果做，希望Amy鍾意！

係囉 (附食譜)

正所謂.......世上無絕對、只有真情趣

聰明仔食聰明豆

自已都唔知自已講緊乜，但一直想學鎮江骨

係第二樣我會食豬肉既菜式

又一直以為好難整，我又唔係咁食豬肉萬一整得唔好食就弊喇

點知原來唔難做，又好味！大少爺話難得我肯食豬肉

其實...我係鍾意食酸甜味菜式，咕嚕肉一定要炸唔可以成日食

但呢味唔需要炸呢！下次用黑醋整~

好熟面口嗎？咪就....係囉

咪就係今日午餐同一煮法換走伊麵，變成豆腐

同一樣材料、同一煮法但變出兩樣唔同既嘢

哼！

鎮江骨食譜：

材料：

腩排 (切條狀) 或金沙骨 6件 

薑片、乾蔥  、蔥段 、 八角  6粒

醃料：

生抽    一湯匙

糖       1 1/2茶匙

薑汁酒   半湯匙

麻油     1茶匙

粟粉    2茶匙

胡椒粉  少許



獻汁：

鎮江醋  4湯匙

生抽     2湯匙

老抽     2湯匙

冰糖     適量

雞湯     100ml

玫瑰露酒     30ml



做法：

1)腩排先醃  1小時，醃好後加少少油落鑊煎香表面、大約6成熟備用

2)將薑片、乾蔥  、蔥段 、八角 爆香，落獻汁煮至滾起，腩排回鑊細火炆1個鐘

3)臨上碟開大火不斷兜煮直至收汁

* 腩排買帶少少肥肉較好，防止炆到變韌

*用冰糖比較好，每人口味及冰糖份量大細都不一，所以自已調較試味，就能做出啱自已口味既

*豬肉用薑汁酒醃可辟搔味，薑汁酒只需用薑磨汁加醃肉用既酒