2009年3月31日 星期二

變身~


弊喇!我玩pet pet不特止,近日仲玩埋 restaurant city

琴日仲兩個game一齊玩,攪到今日又要忙本書

本書我仲有食譜未做啊!

我話過自己未做晒本書唔准行街買嘢敗家

但留晌屋我又掛住打機,噢


今日繼續係流質,碗仔翅啊
哈~事緣呢.......
我本書有個食譜既材料,係可以變身碗仔翅
只係加少少乜乜材料、又減去物物材料撈勻就做到碗仔翅

哼~~~~~~~




2009年3月27日 星期五

好糯


明明我個blog係鹹blog (鹹點唔係鹹濕啊)
但近日要做書菜式類既食譜
每日煮完既菜式都唔可以上blog

容乜易比你哋睇晒,唔買架? 哼~

今日又係甜既!係芒果紫米露

大少爺好鍾意食呢個甜品,每次佢去甜品店都會食

但我麻麻地,我總覺得會有跌打酒味

不過…唔知點解連忌廉汽水、沙士,我都話有跌打酒味呢!

就等於炆冬菇我覺得係漏媒氣味

一樣無辦法解釋呢




食譜來自:Shirley@原味生活

黑糯米 (紫米)        150g

水                  1200ml

片糖 

烹調步驟:

(1)    黑糯米略沖洗淨, 用水 (份量外) 浸l小時.

(2)    煲滾水, 下黑糯米, 蓋上煲蓋, 大火滾起後轉慢火, 煲30分鐘

(3)    熄火焗1小時

(4)    大火滾起後下片糖調味即成

(5)    吃時淋上椰汁


小貼士:

(1) 黑糯米和水的比例為1:8, 即1碗黑糯米加8碗水, 如此類推.

(2) 煮黑糯米要靠焗才可做出煙靱軟糯的效果, 所以切記煲的過程不可開蓋, 否則熱力會不夠.

2009年3月26日 星期四

一次


一直以來我都唔鍾意日式芝士蛋糕
只愛N.Ycheese
所以一直無整過

琴日終於整喇!整個4"版
因為今日Kathy生日呢
我搵專人送去機場比佢,佢又鍾意呢個蛋糕、又唔駛放雪櫃啊
今日佢要返工,要補食飯
自從呢個月我忙本書後,都無同佢去行街
Kathy 你要等我!等我!等我啊!等呀等呀等

食譜(份量: 8") copy 餅神vanlily
材料:忌廉芝士 190g

淡忌廉 200g
糖 150g
栗粉 30g
麵粉 54g(可加至64g,減少粟粉至20g)
蛋白 5隻
蛋黃 5隻
檸檬汁,檸檬青少許

焗模底包錫紙(如果是甩底模).

1.忌廉芝士坐熱水(攪)打滑,分4次加入淡忌廉,留意起粒.

2.離開熱水分4,5次加入蛋黃攪勻,再篩入栗粉,麵粉,檸檬汁,檸檬青fold勻.
3.蛋白加糖打起至7,8成,把1/3加入芝士糊fold勻,再加入其餘蛋白fold勻.
4.放入有熱水的焗盆中,焗160度60分鐘
見面有微黃色,轉150度焗,最後10分鐘倒走熱水,拿走錫紙再焗




點解要包住佢呢…因為我甩模放涼後先到佢向下墮啊!




聽日編輯小姐回歸,我要交晒文家部份比佢喇
今日要努力啊!
之後都仲有排整食譜
努力呀!唔好掛住玩、唔好心散、唔好出街、唔好乜乜物物喇喇喇喇喇

2009年3月25日 星期三

扮得


近日我另一個細舅父由加拿大回港探親
細舅父一家四口,包括我小表弟及小表妹一齊返香港
細舅父買大包煙三文魚比我
無錯!任何從加拿大返來既舅父都會買煙三文魚比我呢!

琴日拎左煙三文魚返屋企後
不停think 、不停think、think來也think去
終於諗到今日午餐

就係................

煙三文魚磨菇湯

and

煙三文魚扮peter (pizza)

個peter唔係真peter,係乜呢?




呢個係用墨西哥薄餅,加小少醬汁
我用小小wasabi加沙律汁,再加小小芝士放入焗爐焗
會做成pizza薄pie既效果
方便又好味!勁推介啊!
試下啦!唔駛搓一焗就食得!得咗!哼~~~~~~~~~

小冬下次上蛋糕堂整比你試丫




用呢隻tortillas




2009年3月23日 星期一

久休復出 @ L'Atelier de Joel Robuchon


我已經好番8899,個鼻終於正常呼吸
甚至開始努力為新書埋尾

星期日我要去搵烏GG借鏡頭
呀茄就星期日無乜野做,R爛腳
我就趁機會見埋呀妹
跟住就滕瓜滕滕瓜滕滕,四個齊腳去high tea

出門口前我食藥,起初仍呆呆滯滯
之後經佢三人努力下,我終於有起色
今次high tea並唔係Harlan's
係L'Atelier de Joel Robuchon
佢既high tea set好精緻呢~

首先~

鹹點,噢!好味
我覺得最好味係左手邊第二件既parma ham三文治同煙三文魚啊










甜點
件件都係細細件,佢既macaroon好好味啊
再份set既 macaroon都唔同,有迷你版同正常版


我始終最鍾意白古力配熱情果呢


當然有scone啦!呢度scone都好味
長方型既仲係檸檬味呢




佢三個要latte,我要熱古力

杯熱古力好濃,飲完覺得開心番!




走前我買4個macaroon比大少爺食
大少爺好鍾意食macaroon
呢間macaroon好好味,尤其係raspberry同焦糖味啊




之後我去呀妹樹煮飯仔,烏GG個男友都有上黎食
我只係簡單地滾蕃茄牛肉湯、煎牛扒同煙三文魚pasta

只得牛扒影得靚呢




病成個星期,出外行下真係好好多,加上行過連卡佛更精神爽利
呢個星期要努力為新2書埋尾喇!

2009年3月21日 星期六

心情低落


繼續搵番之前影落既相去餵飽個blog

白酒菠蘿果凍配椰子沙冰
本來影左打算放新書
不過…最後我無揀入書
因為唔太match其他既食物


就將呢個棄嬰放blog吧~~~~~~~

做法:

菠蘿汁  100g

白酒       10g

糖          30~50g (視符你用既菠蘿汁甜度而定)

魚膠片  4g

菠蘿粒   隨意

椰汁      50g

糖          2~3茶匙

1)將菠蘿汁與糖座熱直至糖溶掉,魚膠片浸軟後放入熱菠蘿汁,加白酒放涼

2)放涼後倒入杯加菠蘿粒

3)椰汁加糖攪勻,座暖水直至糖完全溶掉,放入冰箱雪至半個鐘,椰汁成沙冰狀

4)食之前將椰汁沙冰倒入果凍面




今日極度情緒低落,有gathering都唔去得啊

今日minicorgie生日會啊!

但我就算精神尚可,都怕傳染其他人啦!嗚~~~~~~~~~~~~~`

起身後見到大少爺幫我將藥放入呢個盒
呢個盒係我買來放蛋糕影相架
蛋糕未放,先放藥!

不過仍然感謝大少爺既細心呢




2009年3月20日 星期五

每90分鐘鼻塞扎醒一次


好辛苦啊!嗚~~~~~~~~~`

有無人可以話我知感冒有乜唔食得?

之前有一個廣告,佢內容係....每十五分鐘去一次廁所、每十五分鐘去一次廁所、每十五分鐘去一次廁所

而我琴晚就..........

每90分鐘鼻塞扎醒一次、每90分鐘鼻塞扎醒一次、每90分鐘鼻塞扎醒一次、每90分鐘鼻塞扎醒一次

仲兩個鼻都塞晒,滴完鼻藥水通番、但個半鐘就再嚟過

我用盡晒所有薄荷用品、食埋藥都唔得

聽日仲要缺席gathering,我就快發癲喇!

為免我個blog跟埋我一齊戒口,我決定比個blog食海南雞飯

呢碟海南雞飯係唔知幾時影既,絕對唔係呢幾日

如果落開北角,可以去和富道 勝利小廚試下無骨海南雞飯,佢既飯唔油
雞又好滑,仲要無骨架!

呢間小菜都好味架!




我病都唔想令個blog陪我食淡而無味既食物呢

2009年3月19日 星期四

與鼻塞博鬥12小時


琴晚我臨上床想瞓時
無啦啦又鼻塞

無語問蒼天又再出現喇

連萬試萬靈醫生開比我既薄荷crystal開熱水吸強勁薄荷蒸氣都通唔到
仲令到無塞果一邊"乸"到標眼水

跟住我用盡上一篇blog友提供既方,遂一試

好景不常.........一邊通左,十分鐘後另一邊塞塞地

無...語.....問.....蒼...天.........呀

成晚都瞓唔到,等天光再睇醫生,再沖涼希望瞓到

以前我鼻塞坐起身都可以通到,今次就算我坐都塞

為怕令大少爺因為我輾轉反側瞓唔到

又唔想坐晌樹上網,所以有半晚我晌廳到行來行去


琴晚飲熱檸樂煲薑真係令個人舒服好多




睇完醫生,今次有通鼻藥水,段估都通到呱?

是日午餐:皮蛋瘦肉粥




P.s 多謝你地提供既方法啊!我無辦法遂一回覆你地留言,多謝你地呢

2009年3月18日 星期三

尋通鼻塞方法


琴日我一直以為自己傷風,但最後係...感冒
結果....又係睇醫生

頭先打比舅母,舅母唔認得我把聲咁滯喇

夜晚兩點幾,開始鼻塞
鼻塞我完全瞓唔到
我好怕鼻塞
琴晚嚴重到我聞醫生開既薄荷crystal都唔得,發燒最想瞓但因為鼻塞而失眠好痛苦

有無人可以提供快速通鼻塞方法啊?

睇醫生前我去超市買定即食通粉、火腿、粟米
預備今日仍然唔好番時,起碼都有快熟既食物
我決定係正確

大少爺要返工,病到五顏六色都只得自己照顧自己吧.........吧........

每次病得自己晌屋企就會覺得孤獨

每次病我都會飲維他奶,亦都會好想飲維他奶
我一熱烈地渴求維他奶既時候
大少爺就會不停問:你唔舒服?




2009年3月17日 星期二

翻版


唔好意思,因為流感,加上趕稿,留言要遲少少覆啊!

上篇講到去食鵝肝
我覺得烏GG個吞拿魚長通粉好味
之後既星期日我試整
um.........味道都差唔多,但仲爭少少
又講唔出爭乜,不過講得出我就可以開舖啦!係咪?

我加入南瓜一齊去焗,顏色好橙呢
但多份南瓜甜味

記住…唔係今日整,係星期日、係星期日

點解我強調星期日?因為我今日要停工

我真的傷風了~ 仲要係大傷風

喉嚨好痛,無咩樹唔好打電話比我啊




講下pet pet先
勁啊!我同大少爺琴日見到出左扭蛋機
我同佢各自狂扭,我同少爺兩隻pet 用2個幾鐘儲齊3 set

大少爺隻pet仲擺晒晌廳添!大少爺都沉迷玩pet

扭蛋玩具唔係就咁放晌樹架!你儲齊連埋個座
一click佢會有情節架!↓睇下幾得意,最鍾意呢set!

但我同大少爺都發現,每逢click到玩具郁既時候,隻pet會跑左去

你睇,佢今次搬埋桶金走




2009年3月16日 星期一

$78 $78 $78


呢個星期都會好忙,我每日都要忙本書
唯有post下堆積如山既外食篇

今次選中11號候選佳麗.......鵝肝

話說311同呀茄、烏gg食完Harlan's,之後行街、唱K
Yeah!!!!!!!今次唱K唱左好多新歌
當晚唱到8pm就要交房

But....我地唔願分開,就算當時我同呀茄仍好飽都話去食晚飯
原本目的係坐下或者食甜品
行到去厚福街,烏GG見到平價鵝肝餐,個心就飛左入去

呢個鵝肝餐實在好抵.$78

不過…只有主菜同湯 or 茶




烏GG鵝肝、吞拿魚焗長通粉
佢個通粉好好味,但鵝肝得一塊
搞到烏G依依哦哦話點解得一塊


呀茄鵝肝多士,一樣係兩片呢




我既鵝肝、芝士焗石班,鵝肝有兩片,味道都ok
最估唔到片鵝肝煎得好,外脆內軟




之後我地繼續傾,當然要搵個甜品食下啦
3個share 既士多啤梨芭菲
只係$28呢




就係咁過左開心既一日

餐廳係 厚福街 one cafe,我去睇食評大多都係話唔好
不過…唔同食物會有唔同質素,我既評語就ok啦
試唔試自己決定喇!



2009年3月13日 星期五

8週年~


哼~~~~
8年前既今日,我同大少爺開始拍拖
8年後既今日,大少爺簡直墮入陷阱方知太胡塗啦

8年來我都係笑著過,大少爺.....多謝你


今日大少爺放假慶祝
但我要做書中食譜,佢既午餐要食我整既書中食物

夜晚就出去食飯慶祝,不過.....又係去為書中拍攝既餐廳呢

相信呢8年前大家都估唔到,8年後既今日我係會寫書
連慶祝活動都要因為趕本書而設呢!

相信大少爺唔會介意啊

點都要整蛋糕,但又無乜時間
只有整最易既桂花椰子mousse cake
係mousse cake,唔係凍糕啊




食譜是跟 b女既!
呢個食譜好易做、又簡單
個mousse滑到不得了呢!

我無時間諗deco就插2支心型臘燭
噢!今日分秒必爭呢

多謝 b女 提供食譜
食譜 : (6cm模 4個)

海棉蛋糕一片

椰漿 140g

糖 20g

淡忌廉 75g

魚膠片 4g

做法 :

1) 先將魚膠片用凍水浸軟。

2) 椰漿和糖煮滾後加入已浸軟之魚膠片,待涼過篩。

3) 打起淡忌廉,將已涼的椰漿分5次加入拌勻。

4) 倒落已放海棉蛋糕模雪至凝固。

桂花Jelly : 水 120g , 糖 15g, 魚膠粉 3g, 桂花糖 2小匙 (可用乾桂花 1小匙,糖加至30g)

做法 :

1) 先將糖和魚膠粉攪勻。

2) 水煮沸後倒落魚膠和糖拌勻至溶解。

3) 後加乾桂花待涼。

4) 待涼後加落已凝結的椰子mousse上



2009年3月12日 星期四

半日安@Harlan's


琴日過左好開心既一日
呀茄(karen)同烏GG終於半日安喇
我當然用"寫書要抖一抖"做籍口去放自己一日假啦

Yeah!!!!!!!! Harlan's

我真係好鍾意Harlan's既lunch同high tea
Lunch既食物次次都咁好味呢


香港經常都好迷矇




當然要揀自助頭盤




在肚餓時影既相都唔會影得靚




噢!呢四款係我最滿意既

個pizza.................good~




我同呀茄都揀燒牛肉




呀G要魚




甜品,今次無上次去咁精緻,但都好味呢







之後我地過尖沙咀行街、行完唱K







對住呀茄、呀G一日,超滿足,佢地每個星期都有半日安......就好喇

唱完K去食鵝肝,下次先再post啦

2009年3月9日 星期一

玻璃


話說琴日去九龍城,行過一間零食店
見到有雜果味Fox's糖,之前搵過supermarket都無
見到即刻買

因為我另一個細舅父月中一家四口返香港一個月
我小表弟、小表妹得5、7歲
所以想買定罐糖整玻璃曲奇比佢地兩個

大少爺當時見到叫我買兩罐怕唔夠
原來佢鍾意食呢隻曲奇啊
今朝就開爐整比佢食,我下晝又要繼續做食譜呢


呢張餐墊係琴日晌吉之島$10店大少爺自己揀比我
我地晌店內分開各自睇嘢
其實我之前望左一陣,猶疑緊買唔買
之行去睇第二樣
大少爺好開心咁過嚟話我知:你睇!我見到呢塊啊!揀比你啊

哈哈!咁無奶油唔買啦!哼~~~~~~




今次做雙色,但我掛住玩pet pet,過左時有bubbles啊





食譜 copy fr :Vanlily


印模曲奇食譜 (約20件星星/心心曲奇)


牛油 100g

糖粉 60g

雞蛋 40g

低筋麵粉 200g

泡打粉 2g

鹽 2g


1) 室溫放軟牛油, 加入糖粉及鹽打至鬆發

2) 逐少加入雞蛋, 直至蛋汁完全混入牛油糊

3) 篩入低筋麵粉及泡打粉, 以切伴方法伴勻,

4) 弄成糰放入凍格雪1小時以上, 取後後碌平, 用餅模印出曲奇




玻璃做法

Fox's 果汁糖 約15粒


1) 將果汁糖壓碎, 放在曲奇中央, 以160c焗15mins至金黃色及糖溶

2) 出爐後要等曲奇完全涼透便可取出


* 果汁糖可以不用壓得太碎, 否則會有很多汽泡的, 每粒果汁糖約分開一半就可以

* 曲奇可以印得厚一些, 效果會好一點

* 焗的中途, 留意每塊曲奇果汁糖的份量, 如果太少可以中途加上, 不要做到"穿""玻璃哦~

2009年3月8日 星期日

暢遊


終於都要面對第二本書既希望工程......做食譜
我享受寫散文、好想繼續寫
但都要開工喇

今日同大少爺落九龍城探親友,之後去行一陣
想買用具for書
我之前打爛左一隻好鍾意既碟,一心諗住臨時舖隔左一年都應該無喇
點知…仍然營業,比我買番我至愛隻碟啊!一買買定兩隻

我家中既碟有Franc Franc、有ikea、有由日本買番香港、有永安
更加有平到$10隻既
呢隻碟就係$10咋,但我好鍾意
當時打爛左,簡直.....你跌痛了....我心也碎了....


無印象?係呢隻啊

to my dear 碟:

往往仍記起你 過去共你一起
所經過多得可以編寫幾次傳記

分享我的興趣 分擔我各樣顧慮
在絕處一刻擁抱等於給我聖水
你去後令我發現 笑聲有罪 踏步也失據




跟住買雜物,九龍城有一間賣綿質睡裙,百幾蚊一套但唔起毛粒好好著既

仲有買一堆毛巾
唔知點解,一年總有2次去九龍城買雜物

總有吉之島$10店,九龍城呢間好似特別多野賣

之後一定係去金滿堂啦!居然有位blog友認得我,上次我去金滿堂,又係撞到佢啊
噢!我一年只落九龍城兩次,兩次到碰見呢!
Nice to meet you~~~~~~

2009年3月6日 星期五

與烏G午餐


今日約左烏G食 lunch
當然我一早就落中環行街,不過只買到skin care
一轉天氣就為要轉skincare而煩惱呢

琴日整既果仁就係送比烏G,咁就係佢呢個咁大膽既人
比幾包果仁我,簡接噴鼻氣去比壓力我,要我整比佢食呢

烏G話試呢間日本菜呢







我份商務定食,霸成張檯咁滯
結果每樣都分半比烏G,個set $168都好抵




除左天婦羅,仲有芝麻菜沙律、燒牛肉卷刺身同壽司

跟麵豉湯、白飯、餐飲




烏GG既牛肉鍋定食,當然仲有我分甘同味既食物啦




食完去有食緣、跟住去睇衫,我原本身痕到想求其買件衫

但比烏GG勸止左,好粉葛架佢

烏G,你包果仁食3年架!3年內唔好再叫我整喇!除非.............每100g收$88啦