2017年7月31日 星期一

扮巨峰


好熱呀!熱到不得了,所以我只想整冷盤

感覺活晌蒸爐之中,同埋我測試過天氣熱到咁游水係唔能夠降溫

樓下個泳池曬到d池水滾咁滯,似人肉打邊爐多d

既然熱到咁無奶油唔整凍食物

今次整扮晒巨峰提子,佢係乜?係藍莓冬瓜

以前我整過白玉葡萄,今次整巨峰提子,個idea係我有個教會好姊妹"姑姐"

佢有一日whats app我話晌龍麵館食到呢個藍莓冬瓜感覺良好,所以叫我試下整

咁我咪試下囉!呢個雪凍食好好味的

做法又簡單,只需要做個藍莓醬同埋冬瓜粒就得,你睇佢呃得下人呢!哼

我是葡萄樹、你們是枝子. 常在我裡面的、我也常在他裡面、 這人就多結果子.因為離了我、 你們就不能作甚麼。 約翰福音15章5節

冬瓜   1斤(其實唔需要用一斤,用淨記得煲冬瓜水啊)

藍莓    1盒(120g)

檸檬汁    少許(唧少少便可以)

糖   2茶匙

做法:

將冬瓜用粒粒器做成粒粒狀,跟住去蒸10分鐘


藍莓加糖加檸檬汁用小火煮到變成汁


再煮到變醬就可以



將冬瓜放入藍莓醬中撈勻,然後就雪凍食就可以





大少奶's Delicatessen

宣傳你的專頁

2017年7月28日 星期五

韓式翡翠螺

今個星期拼命趕返一星期要做嘅工作,好快就過了七日

又好快到八月

然後好快包包又返學,感覺都好剌激

今星期個FB page好多廣告,所以都好努力寫食譜

今日個食譜我好鍾意,係韓式翡翠螺

翡翠螺晌一田買,價錢居然平過其他超市,而見味道不錯

但我唔係就咁食,係用韓式做法

除了韓國辣醬外、仲有少少魚露、同埋蘋果蓉做出來味道辣中帶點甜味

不過…大少爺唔爺得辣又唔食螺,平日我好少整佢唔食嘅食物

今日整因為…我今朝發夢夢見佢去滾呀!個夢中仲要唔答我任何說話

我咪晌現實中折磨佢,等佢有得睇無得食囉!哼


一田賣$50一pack,每pack有半打咁上下


食譜:

翡翠螺  12隻

韓國辣醬   1.5湯匙

魚露   `1茶匙

蘋果   半個

蒜頭   2粒

大蔥  半條

將翡翠螺金蟬脫殼後備用

蘋果同蒜頭磨蓉,然後混埋所有醬料 


加埋大蔥同螺入去撈撈撈,放雪櫃兩小時以上就得喇




大少奶's Delicatessen

宣傳你的專頁

2017年7月27日 星期四

【天平生活食譜頻道】之法式多士

剛完成一個旅程身心放鬆後回到香港又再墮進一頭煙中

今次旅程坐郵輪,身心放鬆狀態比一般旅遊更多

香港人去旅行感覺人家做事好慢、你有你心急但佢有佢繼續慢,慢活對於香港人來講係奢侈的
所以今日就寫一個最想快手就做到嘅法式多士吧!




大少奶's Delicatessen

宣傳你的專頁

份子料理

今日包包午餐汁煮豬大腸

係咪好驚,我見到都驚

當然唔會真係豬大腸啦,你家陣當我傻架咩

呢個係用豬肉片卷紫菜再做個燒汁之嘛

上星期包包突然同我講:媽咪,你煮芝麻、肉肉同飯比我食

佢家陣係會向我點菜,佢想起一樣食物就會叫我煮

而且佢覺得我係有求必應,絕對無托手

其實呢個都似波板糖丫,有時要令小朋友感覺新鮮先會食得好d



食譜:

火鍋豬肉片  1盒(自己預份量,因為每一件都要預2-3片)

壽司紫菜  2-3片

醬汁:

醬油或生抽  1/2湯匙

味醂        1/2湯匙

水          2湯匙

糖          1茶匙

做法:

將豬肉片兩片駁長,放上紫菜然後卷起用竹簽拮實

邊位肥肉唔好切走住,將肥肉向外煎好後先切走




將豬肉卷煎香

所有醬汁材料撈勻放入鑊,蓋上蓋煮2-3分鐘便完成

*個頂同底煎完收縮無咁靚,煎好後輕輕切走面同底就會呈現靚靚豬大腸喇


大少奶's Delicatessen

宣傳你的專頁

2017年7月26日 星期三

實現

話說晌越南超市睇食材時見到蝦片

我意思係未炸蝦片,當時就記起老豆去食越南菜鍾意食蝦片香茅牛肉

有一塊蝦片、上面有一片粉皮(一片唔係一個)再鋪上香茅牛肉等等

每一次去金牛苑佢就會叫,但越南小店又唔多覺會有

呢種食物、情景、味道一直刻晌我腦裡面

所以一見到蝦片二話不說就買,老實講每一次煮食物我都希望所有程序都係自己做

所以開鑊油開蝦片對於我來講係必定會做,加上我整粉包有材料做埋一片粉皮(一片唔係一個)

好快就整得好,我唔算太喜歡食呢個,但我太懷念喜歡蝦片牛肉的人

思念是一種很玄的東西 如影隨行,無聲又無息出沒在心底 轉眼 吞沒我在寂寞裡


就係呢包,佢本身味道都幾好味

要炸的確唔係個個做



炸蝦片感覺幾治癒,開花感覺


食譜:就算唔做呢個都可以只做香茅牛肉或豬肉,好味的

牛肉    300g(其實視符自己需要份量)

香茅   1條

蒜頭   2粒

魚露   2茶匙

糖   1茶匙

生粉   少許

油   少許

做法:

將香茅拍扁再切成段,蒜頭拍扁後切碎

牛肉醃之前加少少水,等牛肉吸水後就加糖,魚露、香茅、蒜頭、生粉、油

撈勻佢醃一小時,臨炒牛肉之前將香茅及蒜頭揀出因為易焦

熱鑊好熱油放牛肉,炒熟為止備用

呢個就係蒸好粉包塊皮,我晌越南買包粉開水及加油便可以

大家都可以用腸粉皮代替


吸出同蝦片一樣大小


粉皮放上蝦片之上,再放牛肉、蔥及炸乾蔥,及少許花生便完成了














大少奶's Delicatessen

宣傳你的專頁

2017年7月24日 星期一

像樣

上文提過我愛上越南粉包,原來個皮非常好味

薄得來帶點煙un,晌短短上岸時光我去超市集中精神搵呀搵

比我買到整粉包個皮材料,看圖識字發覺唔難整就整,仲要昨晚去買材料今日整

你睇,佢好好食呀!

如果無果包粉都可以去買粉皮或者用腸粉拉開做皮,當然無咁正宗啦

好開心呀!越南食譜我又儲多樣


呢包就係,加水同油就得


蒸完是咁的


餡料:醃料只用魚露,真正越菜無雞粉無生抽只靠魚露醃

豬肉碎   $15

雲耳    浸開半碗切碎

紅蘿蔔   半條切粒

沙葛    半個

芫茜莖    少許

乾蔥   2粒切碎

另備炸乾蔥及炸蝦粒、蔥粒

將以上材料撈勻,加魚露2茶匙、糖 1茶匙撈勻醃30分鐘

熱鑊爆香所有材料,再加少許魚露兜勻上碟


將粉皮切開4個正方型包餡就done




仲有呢個魚露汁,越南話是"碌霖"

魚露  2茶匙、白醋  2茶匙、糖  1茶匙、 蒜頭一粒切片、辣椒  1隻,熱水 2茶匙

撈勻就是了



大少奶's Delicatessen

宣傳你的專頁

我的郵輪假期之越南篇(峴港、芽莊)

好多人知我去越南都覺得不可思議

其實我一直都好想去越南食越南菜,係真的

大家都有睇我blog知我曾經自己淆湯做越南粉、自己炸春卷等等

但總覺得我跟本唔知越南菜真正味道,從前住炮台山時晌北角或銅鑼灣有d細細越南菜館

我同爸爸經常去食,越南粉、春卷,甚至爸爸會食鴨仔蛋添

有時佢又會帶我去當年新世界中心金牛苑,從前金牛苑係食越菜,金象苑係食泰菜

但高級d又代表真正味道嗎?甚至現在某酒店高級越菜做得精緻我仍然想食越南正宗味道呢

不過我又怕熱又怕曬又奄尖真正要去越南旅行又有點困難

今次郵輪順利成便去一次,第一日上岸係峴港

記住越南係要簽證,上網睇來睇去價錢都唔同但又唔平

船上代辦就會平好多,唔使US$10,船上都有tour參加

第一日峴港就跟船團,早上7:30可以上岸,當日早上去拎車票簡直萬人空巷咁

上到岸過關,一個簡單到不得了關閘就可以行去旅遊巴車站,搵番個號碼就上車出發

當日行程,但要記得…跟團就係鴨仔,鴨仔團就係會趕的




坐1.5小時車就到




超喜歡包包造型,我細心襯過的,哈



行入古老大街內,各處都係餐廳,呢度每間門面都幾靚架











行完就午餐,本身對團餐無乜期待,甚至諗:唔好食的話就浪費我來越南機會

但最後味道都不錯的







越色串燒牛肉,味道幾好而且佢係用一竹枝中間門口夾住牛肉燒的


我最喜歡炸春卷,真正越南春卷

如果可以我想再食得到,佢好好食,其實餡料好簡單但越南菜精彩之處就係醃料香味


蒸粉包,我見街邊都有!同香港好唔同

香港係用粉皮包住,但越南係做得薄身好好食


呢碟係有九層塔、香料、牛肉同幼粿條,係好食的


煮魚!包包鍾意食


呢個睇樣以為好辣但其實科甜地既


呢個係甜品糯米糕,但唔甜的



之後來到沙灘,一個椰林樹影水清沙幼沙灘

可惜…情深緣淺只逗留了15分鐘,影幾張相買個椰青就完了


Shopping mall,um...買了部玩具車比包包就走了

上回車又坐1小時返上船…睇blog都覺得行程好趕嗎?真係到此一日呢


但不得不提晌越南呢間咖啡店杯朱古力沙冰同後面話梅青檸茶非常好味

我兩日都有飲杯古力,佢裡面有jelly,好好味啊


第二日行程:芽莊

今次自己包車,隨行都有個領隊帶路,相比之下芽莊比較繁榮

當日9:30上船,芽莊無得直接上岸要坐遊輪上小船

放心好安全,而且上落船都係穩陣既,大約10分鐘就到



包包好開心,小船好接近個海


上到岸就上車開始一日遊,原本行程先去占婆塔、再去食粉行小街

再去shopping mall跟住去情人石飲咖啡,但係…最後趕唔切去情人石,囧


占婆塔就係一個石塔,有好多人參拜

但對於身為基督徒來講呢…就係參觀咁囉





包包另一造型


當地領隊帶食pho,即係牛肉粉

我終於食到越南真正牛肉粉



呢碗係熟牛河,你睇佢清清地實則甜到不得了

係真正用牛骨淆無味精,好好食!

Hi PHO,你好嗎?我十分掛念你 


晌FB有人問:包包上岸食乜?越南咁污糟?

我覺得去得就預了,既然預了就做好安排

湯粉咁熱就唔太怕,包包用自己餐具,飲品飲罐裝或自備水

呢間蔗汁我有飲,但無比包包飲

如果下下都要驚就睇唔到美好一面

之後就週圍遊下,再去shopping mall,但只夠時間買一堆食材、咖啡咁

連影相都無時間再影了




老實講:我最想試街邊食物,不過無機會呢

越南比我印象都不錯,商店職員都好友善! 


今次郵輪假期玩得開心,我有掛住郵輪上日子

郵輪假期係美好的,但當然都要睇你乜心態

下下都要去計到盡所有食物都出色、所有活動都要合心意的話你會無盡挑剔

用開心心情去享受一切同工作人員努力,你會得到更多快樂

郵輪先生,再見了!謝謝你給我一家快樂回憶

我可能會望到你、你可能會忘記我,但感謝船上每一個笑容、每一個服務

有機會再見~




大少奶's Delicatessen

宣傳你的專頁