2020年9月29日 星期二

茶點

 紅莓杏仁曲奇

最終都係要我出手做埋茶點

事實係我好怕佢日日食一包二包餅乾、小食

雖然都有生果盒但佢見到同學仔有餅食都會想食

結果…我忍唔住自己焗曲奇比佢帶,包包好開心

好耐無整過曲奇,強逼症每樣都要整齊特登買個長型餅模去整

又香又鬆脆,至少可以減少佢食太多添加物

一份麵糰足夠焗兩次,下星期切片就焗得

紅莓杏仁曲奇


牛油.........100g

糖霜......... 55g

雞蛋..........一隻

低筋麵粉......175g

杏仁粉.......15g

奶粉.........1茶匙 (唔係用BB飲用既奶粉,都唔使問點解喇呱)

無鋁泡打粉.......1/2茶匙

鹽...........1/8茶匙

杏仁粒、紅莓乾適量

上以所有材料烘焙店有售,想做出相同效果曲奇就跟足以上!Thx

*杏仁粒用白鑊炒至金黃色,放涼就可以用!我會一次過炒晒放入密實袋存放

*牛油回室溫加入糖霜


*打至淡白色,曲奇要鬆脆第一牛油要打至鬆發

通常打到淡白色便可以


*低粉、奶粉、杏仁粉、泡打粉、鹽混埋過篩


*分三次篩入牛油中,每一次都輕手拌勻


牛油同麵粉混合過程一定唔可以大力,我見過無數人好大力攪勻再用轆去轆

然後又走來問點解點解咁硬?唔鬆?

因為太大力起晒筋就自然會硬

所以麵粉同牛油混合後要仍然保持鬆發狀態

*最後加入紅莓乾及杏仁碎,輕手拌勻


用手搓成糰,你想碌圓形或正方形都可以

我買呢個模去整就可以做出整整齊齊正方形

個模晌烘焙店有售,大家可以自己research邊間有

*將麵糰放入冰格一小時後取出,再切片


焗爐預熱170度焗15-20分鐘

*最好放底層焗否則好容易焗唔透中間就唔熟


Tip:
*呢個食譜做到20塊

*如分兩次焗麵糰放冰格可以保存2星期,焗之前略回軟(可以切到)狀況再切片焗

*焗好曲奇放涼入密實袋保存,可以放幾多日視符濕度自己視察吧






有youtube、IG內有不同東西









2020年9月28日 星期一

取西京

西京燒三文魚鮫

通常出去食係鹽燒,但用"西京燒"嘅方法去做真係一流

只需要三樣醃料醃一晚,然後放落個焗爐度焗20分鐘就搞掂

包包都好鍾意食,之前晌尖沙咀一間食京都菜日本餐廳食飯,發現西京燒做法其實可以用晌唔同食材之上

而我十分鍾意西京燒味道所以不停研究點配搭

最難得今次整西京燒顏色冇焦黑,如果中秋節BBQ整呢個都可以只要用錫紙包住佢放埋一邊就得

魚鮫真係好好食下次用油甘魚魚鮫,哼


晌賣牛扒同海鮮既凍肉店買到(唔係佳X)


食譜:

三文魚鮫    6件


味噌    1.5湯匙
(日式超市有好多不同款,去睇下自己揀,要學習同食材打交道)

味醂   1.5湯匙

清酒   1湯匙
(可以用日式清酒、韓國清酒也可)

做法:

三文魚鮫解凍去鱗同洗淨抹乾水




味噌、味醂、清酒撈勻

其實可以再加1茶匙糖吊味





撈勻醃一晚


焗爐預熱200度,焗15-20分鐘

如果想顏色靚d 最尾5分鐘可以用220度,但小心焦黑



有youtube、IG內有不同東西


 

2020年9月26日 星期六

痴線習作

鮮鮑灌湯餃 (浸餃式)
自從放寬4人限聚我一家都無時間去飲茶
無論高級定普通中餐廳有灌湯餃我都會叫
一直好想整,幾年前自己搓皮做但失敗
然後今次用現成餃子皮改良成功呀!個味係同出面差唔多
好開心!
每年中秋節都無乜貢獻,不如寫呢個灌湯餃?
拎出來每人一份咁 d人會覺得你好勁架~
餡料做完灌湯餃仲可以做福健炒飯個餡
真心勁!哼
#出街食灌湯餃國金軒同海景軒係最好食
#紅蘿蔔用來墊底防黏但浮了出來
#自己做個湯底都好易勁似


食譜:我係預備好多材料,剩下做福建炒飯的

4隻份量:

餃子皮   8片(2片做一隻)

瑤柱    2粒

鮮鮑魚   2隻

帶子粒   8粒

蝦      8隻

雞肉粒  少許

鮮冬菇   4隻

紅蘿蔔片   數片墊碗底防黏底

湯底:

瑤柱湯     1小碗

金華火腿   2片

清雞湯    500ml

水   200ml

鹽  適量

做法:

鮮鮑魚去殼再洗淨

最簡單方法:煲滾一煲水,放鮑魚即熄火

*鮑魚受熱後就會好容易離殼,再用牙刷刷洗乾淨


*瑤柱我會用一碗水去蒸1小時,蒸完後瑤柱會軟身又有瑤柱汁用


*雞肉我用鮮雞脾,成隻搽上鹽再蒸20分鐘,跟住就可以切粒

又會問點解要蒸熟先,雞肉比海鮮難熟呢個做法確保雞肉會熟又唔使蒸隻餃咁耐

*冬菇你否以用乾菇切粒

*帶子粒我用細粒既就可以

*蝦就用新鮮蝦去殼去腸,切一開二



餃子皮放晌帖板上,然後放材料,再搽少少水晌皮邊

用另一片餃子皮蓋上封邊


之後將餃子皮企起身再摺個邊,令個邊有花紋


放紅蘿蔔片晌底,再放餃子,因為我貪心一碗整兩隻,所以中間都攝紅蘿蔔


瑤柱水、雞湯、水、金華火腿、少許鹽放入煲煲滾



將上湯煮滾試味,唔夠味再加鹽


將上湯淋上餃上,再封錫紙蒸20-25分鐘便完成

有youtube、IG內有不同東西






 

2020年9月24日 星期四

Me time

包包返學都差唔多一星期
講真佢好乖好自律會自己做功課自己溫習同自己執書包
但係由年頭到家陣其實我都好累
雖然包包自理能力好,但幫佢跟功課、對功課、溫書都唔係容易

不過咁家陣至少我有幾個鐘可以休息
可以自己晌屋企彈琴、落會所游水等等
仲可以研究新食物
呢個"芝士忌廉菠菜煙三文魚焗淮山"係我自己整比自己食
好多時都係忌廉汁意粉、通粉、甚至薯仔,其實焗淮山好好食又健脾胃

今次想寫埋一個改善白汁做法,好多新手都覺得白汁好難做
又會起粒粒
我就會用熄火方法,先燒熱隻pan加油及麵粉,再熄火去推成粉糰
然後再加cream推滑佢先加雞湯或水
呢個做法唔怕手腳慢,用餘溫去做更唔會起粒粒






食譜:

鮮淮山     1/4至半枝

菠菜    1小棵

煙三文魚   數片

牛油   5-10g

麵粉   1湯匙

淡忌廉   50ml

雞湯或水  100ml

鹽   少許

芝士   隨意

做法:

鮮淮山先切件蒸 15分鐘備用

菠菜切碎

先燒熱個pan,熄火加牛油等牛油溶後落麵粉



將牛油同麵粉推至成膏狀


再加淡忌廉,再推勻


做成滑身厚忌廉咁


再加雞湯或水,再加菠菜及鹽


煮到杰身

你睇下好滑下


可以加入淮山撈一撈d汁再放上焗盤


加煙三文魚

再淋餘下白汁,再加芝士

芝士鍾意香同少少脆就用parmesan

想有拉絲感就用mozzarella cheese

放入焗爐 200度焗10-15分鐘



有youtube、IG內有不同東西
Follow and Subscribe YouTube: https://bit.ly/2Aa2c0R 









 

2020年9月21日 星期一

飯盒強

包包今日正式回學校上堂,真正小學生喇

不過呢兩日都只係返兩小時好快又放學

放學回家整午餐佢食,佢愛上用午餐盒食午餐

我用30分鐘唔使就完成佢個飯盒

佢一放學就問我今日會有乜飯盒食,佢好鍾意自己一盒飯咁

個雞肉酸酸甜甜又快整好

個粟一燒係包經理唯一期待想食既植物  粟米食譜: http://iamtaisiu9.blogspot.com/2020/07/friend.html

其實我好鬼眼瞓囉~~~~~~~~~~~~~




個雞好容易做

雞扒   2件(預備適量鹽及片栗粉或生粉)



蒜頭   1粒

醬油/生抽   1/2湯匙

白醋   1湯匙

糖   2茶匙至 1湯匙(甜度自己可以揀)

水   15ml

做法:

雞扒切件再用鹽醃,跟住加片栗粉或生粉撈勻

煎熟及金黃色


將醬油、白醋、糖、水加入鑊

再煮到收汁就得




有youtube、IG內有不同東西
Follow and Subscribe YouTube: https://bit.ly/2Aa2c0R 





 

2020年9月18日 星期五

習作

飯盒習作:汁燒牛肉飯卷
終於包包下星期可以返學,唔使再zoom上堂再加+無限瘋狂pop up交功課訊息
本身今日拎牛肉片出來整牛肉飯,突然覺得整呢個午肉卷飯都唔錯
用牛肉片卷住d飯再加汁去焗
雖然都係牛肉同飯組合但包經理食得開心
#屋企剩下菜心個款唔夾所以個飯盒無菜
#飯盒同手袋一樣最緊要新款



牛肉飯卷

飯    1.5碗(自己依所需)

牛肉片    16片(做8件)

醬汁:

醬油或生抽    1湯匙

糖    1茶匙

味醂   1湯匙

做法:

牛肉片先用糖撈勻,再加少少醬油撈勻



撈呀撈


將飯做成飯糰,我用呢個小神器

放飯入去搖呀搖就做到一個個飯糰


做成6-8個備用


用牛內片將飯糰卷起


排好後放入焗爐焗15分鐘

將醬汁材料攪勻,期間隔5分鐘搽醬汁一次



done



Follow and Subscribe YouTube: https://bit.ly/2Aa2c0R 








 

2020年9月16日 星期三

循環


最討厭煮早餐,我眼都未撐大煮乜鬼早餐先得架

但人生就係要食早餐

然後…好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->好憎煮早餐-->去煮早餐-->

這就是人生.................

同大家探討完人生後,又要寫早餐食譜.............


是日早餐:烘蛋多士

亦都可以稱為簡易 Quiche

有蛋、有蔬菜、有芝士、有多士

下雨天係好需要一個熱辣辣早餐

心情唔好都需要靚早餐~

哼~




食譜:2-3人份量

方包   3-4片

雞蛋   2隻

鮮奶   2湯匙

煙肉、火腿、香腸、雞肉、乜乜物物肉類適量

芝士碎   隨意

洋蔥粒或粟米粒、甘筍粒   少許

鹽及胡椒    少許


做法:焗爐預熱200度

將方包放入一個焗盤中,將中間壓平備用


雞蛋打勻、加入肉類、蔬菜、鮮奶、鹽、胡椒撈勻


最後加入芝士,芝士你鍾意及食開邊種就落,但唔可以落芝士片




倒入麵包中

首先蓋錫紙焗  10分鐘直至蛋差唔多凝結
再打開錫紙焗 5-10分鐘,麵包香脆便可

Follow and Subscribe YouTube: https://bit.ly/2Aa2c0R