琴晚都瞓得唔太好，好早醒
不過...都算係好事，因為要準備今晚Gathering既嘢
焗咗幾轉蛋糕帶到飯聚地方，用作各朋友食飯前打麻雀既小點
因為要等到晚上9點先開始食，為免各人餓親整定小食
尤於要晚上九點先食飯，決定下晝食飽啲
傾盡全力摷嘢食，結果就整咗一份三拼午餐
分別有.......
大少爺今早食剩既青瓜雞肉三文治一件、粟米蛋白沙律、同埋司華力腸一條
我絕對相信我係能夠捱到今晚九點既！因為呢份午餐令我好飽肚
2006年9月28日 星期四
2006年9月27日 星期三
抗氧化的午餐
瞓得唔好，比平時早醒！
聽晚有gathering希望今晚瞓得好，聽晚個樣好啲啦！
我一唔夠瞓好易睇得出！但我又一定要睇完棟篤神探先瞓
唔好勸我早啲瞓，我早係瞓唔著既~
琴日臨返屋企前買定今日午餐，因為鐘點女傭上來工作，費事落街
晌italian tomato買定心頭好 blueberry chesse cake！
我鍾意佢係新鮮藍梅，因為大少爺唔鍾意chesse cake所以我唔會整
大少爺唔會出聲話唔食，佢仲會逗我開心而食，但我唔想佢為了逗我而勉強去食唔鍾意既食物
所以我唔會整，而且我無可能鯨吞一個芝士蛋糕
記得Cova初開業既時候，Blueberry chesse cake做得好好，濃濃既芝士味
但近年已經水準下降
Italian Tomato都唔算太好，不過佢既新鮮藍梅吸引到我！鍾意有藍梅抗氧化作用
無錯！我開始要抗氧化
2006年9月26日 星期二
晚餐& 早餐 (muffins 食譜)
今日自已出銅鑼灣買紅酒用作星期四既gathering
原本打算買支紅酒就返屋企，結果......變咗自已行完街先施施然到citysuper買
我唔識紅酒
，只係揀支唔太貴又唔太平既~跟住見到免治牛肉好靚，就買包返屋企整今晚既晚餐"蕃茄栗米磨菇牛肉飯"
我好鍾意食呢個飯，但我睇得出大少爺唔鍾意快餐飯，所以好耐先整一次
大少爺無講出口，但我只鍾意整大少爺鍾意食既嘢
我趕返屋企整番樣大少爺鍾意既muffins比佢聽日做早餐
佢鍾意呢個 "jam muffins" ，其實只係將原味muffins中間加藍梅jam
我成下晝四點先返到屋企就可以焗完蛋糕兼煮餐飯，都算勤力啦！
聽日第二個鐘點女傭來工作，我都係諗唔到有乜比人做
再係咁我唔請喇！
基本muffins 做法：預熱180度
牛油 80g (室溫)
糖 70g
自發粉 100g (如做朱古力味，就20g可可粉+80g自發粉)
牛奶 50ml
蛋 一隻
雲呢拿油數滴
1)將牛油同糖打至淡黃色，加入蛋用低速打至鬆發
2)自發粉篩入蛋糊拌勻
3)加入奶攪勻
4)放焗爐180度焗15~20分鐘，視付焗爐火力
如果要做果占muffins就晌入杯模時先加入一半份量既麵糊，再加入一茶匙jam，跟住再加多一半麵糊
2006年9月25日 星期一
簡單之選....滷水三拼
大少爺放完假後............今日唔見咗電話
不過，我同佢係唔會晌電話內放照片既~恭喜晒大少爺又換電話喇！
今日我整滷水三拼，滷水汁我自已整既~身為潮洲新抱點都要識整滷水
而且樽裝現成滷水汁唔夠香
首先買花椒、八角大約$3已經夠、跟住老抽、生抽、冰糖、少少鹽、水、薑、蔥
咁預備你想滷水既肉類例如雞亦、蛋、豆腐之類
如果用雪藏雞亦唔駛溶雪，開一鍋水放薑、蔥直接將雞亦放落鑊煮到溶雪同5成熟備用
蛋就先煲熟、豆腐就買滷水用既炸豆腐，略洗
汁料做法:
先將薑、蔥、花椒、八角爆香，加生抽、老抽、同水，份量就視符材料幾多，滷水要高過材料
當你發覺水份唔夠加水、唔夠色加老抽、唔夠鹹加生抽同少少鹽
最後加冰糖試味，調教到自已口味就放材料煲滾、熄火由得佢浸
因為長期開火滷會令材料爛，例如雞亦會甩皮甩骨
到食時再加熱，豆腐就只需要臨食前滷十分鐘就夠，否則會吸味吸到變鹹
我鍾意滷水帶甜味，會加多些冰糖
無一定份量係因為滷水可以調較自已喜歡既味道，而滷水汁可再用
將所有材料盛起，返滾一次就可以灘凍入樽留下次用
記得份量由自已調教，初初可以先試一碗生抽、兩碗水、老抽就視符夠唔夠色
冰糖最後落，用自已味覺去調味
一個人的午餐返來囉！
噢！琴晚我問大少爺點解放完假返工既係佢，但係假期後綜合症既係我呢？
終於再一個人的午餐
每次大少爺放完大假都難免失落(大家要開始習慣我半年一次既"丈夫假期後綜合症")
今日一個人的午餐係.........香煎銀鱈魚沙律
我其實唔太食魚，尤其係中式煮法既魚
我係瘋狂既三文魚fans，其次銀鱈魚我都食，銀鱈魚我鍾意加日本燒魚汁煎
2006年9月22日 星期五
開估喇！
經過唔踴躍既競猜後...............急不及待開估
就係...咖喱麵包雞喇！我一向好鍾意咖喱配法國麵包
去過一間泰國餐廳食麵咖喱包雞，用鴨子造型既盤盛著咖喱面層有麵包
當時覺得好靚，心諗如果我識整就好喇！去馬來西亞旅行都會食到咖喱麵包雞
整既途中真係擔心唔成功，好彩出爐後好靚
甚至唔捨得切開麵包，但唔切麵包又食唔到咖喱喎！噢！I'm soooooooooooo sorry！
我覺得麵包點咖喱汁係 perfect match！今次特別做多 d 汁添
↓本來要做圓形但無圓形錫紙盤，唯有用方形
麵包之下其實有錫紙盤及錫紙包封好咖喱雞，所以唔會整濕麵包
睇完
流浪影子 既魚露炒飯，勾起我想食既椒絲魚露炒通菜，今晚就整咗 喇！
2006年9月20日 星期三
白白滑滑
今朝培訓局鐘點女傭試工，Um..........我發覺我無乜嘢比人做
因為一向都keep到屋企乾淨，我解釋自已既要求已經浪費好多時間自已動手做仲快
買餸我又習慣去完街到supermarket買，大少爺又奄尖怕女傭煮既唔合佢口味
打掃我就日日做，洗衫我本身又麻煩要分類，今日都只係叫佢抹下野、唯一幫到手既係抹窗
跟著我就自已動手整豆腐花，唔難做
我用豆漿機做豆漿，再加落石膏粉、栗粉水等20分鐘就攪掂
自已做比街外買更濃豆味，加上自已用冰糖做既糖水、同黃糖
大少爺好鍾意呀！猛讚好滑！知道方法就隨時做就得
做法：(因為睇過好多做法、但唔記得自已跟邊個食譜，請見諒)
熱豆漿 500ml
石膏粉 1/4茶匙
粟粉 1.5茶匙
飲用水 100ml
另外…用冰糖加水煮成糖水，黃糖隨意
1)將石膏粉與粟粉混合加入飲用水攪勻
2)將熱豆漿撞入粉漿，撞入時盡量舉由高處撞入，好似拉茶咁
3)撞入豆漿後盡快蓋上蓋子等20分鐘即成
石膏粉藥材舖有售，我買$5已足夠做好多次！
********************************************************************************************
今日發現已經有605訂閱者喇！
就用呢碗豆腐花同605個訂閱者一齊白滑啦！多謝你地呀！
1700hrs：↓轉下眼又608位訂閱者喇！多謝你地呀
！
2006年9月19日 星期二
簡單唔容易
聽日有培訓局既鐘點女傭試工，趁大少爺一齊晌屋企睇下鐘點女傭試工試成點
我咁奄尖聲悶既人要請合適既女傭唔係易事
貶下眼大少爺兩星期既vacation完結
每半年一次既vacation，今年三月放頭放既vacation去旅行
今次因為有特別事所以留晌香港，但反而比平時忙
短短兩星期之內與舊同學、朋友、舊同事仲有親友晚飯聚會
所以有空閒既晚上反而想晌屋企食飯，老實講我真係好攰
今晚煮簡單既晚餐，但大少爺又唔鍾意太快餐式既，佢好似唔勞役下我會身痕
芝士焗蕃茄、黑椒洋蔥烤雞，磨菇肉醬意粉
發現晌 citysuper買日本蕃茄超多汁令身為蕃茄迷既我好滿足
仲開咗支蘋果酒，再加一個唔多match既雪耳蓮子蛋白杏仁露
始終都係要攪一大輪
但晌屋企可以著得隨便，唔需要禮貌公式化既笑容、更唔需要祈求今晚對高跟鞋唔會令我腳痛，更唔需要特別打扮
仲可以睇重播既金枝慾孽！good~
↓呢份大少爺既，大份啲post出來靚好多
2006年9月18日 星期一
2006年9月17日 星期日
香港特產.......蛋撻
下晝整蛋撻只做4個，原本份量係7個唯有剩低材料留番聽日再焗
估唔到原來蛋撻用蛋量唔多，兩隻蛋足夠整7個包括撻皮添
整完個蛋漿覺得好淡色，懷疑到底係唔係咁架？但焗完就同街外賣既無分別
味道無街外咁甜，但當焗好既時候覺得好奇妙，自已居然識整蛋撻
蛋撻做法 預熱180度
撻皮做法
低粉 100g
吉士粉 10g
牛油 70g
糖霜 35g
蛋 半隻
1)將牛油同糖霜打勻加入蛋攪勻
2) 吉士粉、低粉篩勻加入蛋糊，拌勻放雪櫃30分鐘後入撻模備用
蛋漿做法
暖水 110ml
糖 30g
蛋 1 1/2隻
奶 30ml
雲呢拿油數滴
1)將暖水加糖溶解做成糖水放涼
2)蛋同奶攪勻加入雲呢拿油攪勻，慢慢加入糖水
3)將蛋漿倒入預先做好既撻皮內，大約8成滿入爐焗20分鐘(需視符焗爐火力)
我覺得個皮做厚d比較好，因為脫模會易爛
↓蛋漿
↓before baking
↓出爐喇！
2006年9月15日 星期五
話做就做.....椰汁千層糕
早幾日食過椰汁千層糕，好想學整
整咗喇！好得呀！我用muffins盤整既，做成一個個
因為個盤唔深，所以做唔到9層，但味道同早幾晚食既一樣好味啦
同埋唔需要用油，我用muffins盤既原因怕黏住個模
但係有食譜話只要放涼就可以脫模，好易做又好好味呀
我用食譜份量減半做咗6個
千層糕 木薯粉 300 克
粘米粉 40克
椰漿 (1大罐) 400克
砂糖 250克
暖水 200克
班蘭葉香精 半茶匙
用具:
1. 9cm x 18cm 長形模2個。
製法:
1. 暖水溶解砂糖，備用。
2. 木薯粉、 粘米粉混合，加入椰漿，砂糖液拌勻。
3. 糊漿分為兩份，其中一份加入班蘭葉香精。
4. 先倒一層糊漿入蒸模內蒸3-4分鐘(熟透)，其後兩種糊漿。
5. 重複交替用完為止， 製成品放涼後切開享用。
我用班蘭葉榨汁做綠色部份既，但街外賣既多數用綠色色素，所以比我做既翠綠
報時1855hrs：大少爺激讚呢個椰汁糕呀！哇哈哈！
2006年9月13日 星期三
2006年9月12日 星期二
住得舒適、食得招積、老婆超值！
其實煮一餐晚飯可以好快、又可以好慢
我上晝去完尖沙咀行咗一陣、食埋Lunch下晝就買餸返屋企未停過整餸
今晚既晚飯我用好多時間
整咗清炒翡翠苗、金銀蒜蓉蒸開邊蝦、煎蠔餅
蝦要開邊去腸、蠔仔要清洗乾淨要花好多心機，今日買既蠔仔好肥美呀！
仲有好多蒜蓉、芫茜、蔥要切
加上我係習慣要個廚房乾淨、整齊，所以每樣都要好慢慢做
好彩…大少爺好滿意！都無白費心機
大少爺係潮洲人，我大約兩年前未學識煮嘢既時候，就已經學識整煎蠔餅
我人生目標係……大少爺住得舒適、食得招積、老婆超值！YEAH！
蠔餅食譜：2人份量
蠔仔 半斤至一斤
薯粉 2湯匙
蛋 一隻
鹽、胡椒粉少許
蔥、芫茜適量
水 大約1/4杯
粟粉用作洗蠔
做法：
1.蠔仔用粟粉撈勻洗淨，重複直至乾淨，再拖水(唔需要灼熟，此步驟以防萬一蠔仔煎唔熟怕肚痾)
2.蔥、芫茜洗淨切粒備用
3.薯粉加1/4杯水攪勻加入蛋、蔥、芫茜、鹽、胡椒粉、蠔仔攪勻
4.以半煎炸形式煎至兩面金黃
2006年9月11日 星期一
十年唔逢一潤
本來今朝早咗起身，又見琴晚既快餐大少爺唔多鍾意
就打算落街買蠔仔預備今晚整煎蠔餅，點知..............
大少爺打電話返來話某某朋友約我地食飯，所以今晚唔駛煮飯喇！
好彩未買咋！否則我都唔知蠔仔點算好
我自從轉職為【大少爺私人衣食住行家事管理雜費統計清潔聯絡小組社交娛樂駛錢健康關注行政專員】後，午餐係唔會食飯既~
但今晚飯局時間係8點下晝唯有食飽d啦！於是就用雪櫃既冷藏海鮮整白汁海鮮焗飯
再切埋原先打算伴沙律既煙鴨胸
做成煙鴨胸配海鮮焗飯喇！幫碟飯影完相後第一件事係.......將鴨皮去掉，我好怕食雞皮、鴨皮
食飯做午餐簡直係..........十年唔逢一潤
弊！飯氣攻心想訓覺添！正一懶蛇
2006年9月9日 星期六
Happy Birthday to 表弟
若干年前既9月9日當時個只有10個月大既我，從嗰日起多咗個玩伴
因為我表弟出世呀！
我一直好記得我表弟生日，因為細個有一次我問佢幾時生日，佢答：9月9號
跟著我話：咁咪即係重陽節？佢無咁好氣咁答：唔係呀！係新曆呀
到而家每年既農曆九月初九重陽節我都會夾硬祝佢生日快樂
佢就被我夾硬話佢有兩個生日，但佢都會默默承受
從佢出生開始，佢都好接受同知道佢有個癲喪表姐
To:表弟
在此我同大少爺祝你生日快樂、萬事如意、身體健康、福如東海、壽比南山、財源廣進、心想事成、東成西就、生意興隆、招財進寶、龍馬精神、聖誕快樂、如意吉祥、開工大吉、添福添壽、龍鳳呈祥、星光熠熠、年年歡樂、歡樂年年、百年好合、永結同心、添丁發財、發財立品、用後沖水、福有尤歸、善有善報、開張大吉、天長地久、前程錦繡、充撐場面、獎品豐富、七彩繽紛、感人肺腑、感同身受、感激涕零、歡天喜地、歡欣鼓舞、笑逐顏開、笑口常開、笑容可掬、樂不可支、眉開眼笑、眉飛色舞、喜出望外、喜不自勝、眉來眼去、情不自禁、以牙還牙、宮保雞丁、可口可樂、超級至尊、肉醬闊麵、重九登高！
Fr:表姐
以下呢個蛋糕唔係我整既，他日我學有所成一定整個更靚既比你！
2006年9月8日 星期五
勾起回憶的午餐
今日極盡忙碌，我得而家一個鐘既時間，就update 個blog啦
我今日要到時裝店取訂購既衫、趕返屋企等維修人員、又要出外晚飯
十點幾起身打算早d 出銅鑼灣食brunch，避開午飯人潮
可惜…傾盤大雨，等到細雨就即刻出門口，原本想食Delifrance
但見到super sandwich有位就食咗先！點咗 煙火雞芝士三文治 w/caesar salad，凍檸檬茶
大約1990年我係初初讀中學，金鐘 pacific place 開幕爸爸經常帶我去shopping。
當時…Pacific place有一間super sandwich
爸爸帶我到super sandwich食嘢我第一次覺得好新鮮、好新奇
因為當時既三文治係好大份量
餡料非常多選擇而且並唔係一般貨色，自此之後我就好鍾意到super sandwich食嘢
可惜…到而家super sandwich已經唔係以前模式，分店越來越少
而我已經長大、最愛既爸爸亦 pass away...................仍然令我傷心
聽日我將會第一次整栗子蛋糕，好緊張呀))))))))))))))))))))))))))))))))))))))))))
2006年9月7日 星期四
2006年9月6日 星期三
So what？？？
今朝睡醒時，大少爺打電話返來比我
佢好古惑咁講一連串令我開心既事，到我想收線既時候...........................
佢突然話：我有d野想同你講，今朝我刷牙梳洗時唔覺意將你支護膚精華素跌落廁所，仲沖走埋添
佢當然怕我大發雷霆，但我好冷靜！仲笑添！雖然支精華素用咗一個月唔夠
但我開心居然我廁所通水系統非常好，咁都唔塞？哇哈哈
何況…羊毛出自羊身上，我都係用你既錢買番之嘛！So what？
其實…我唔想為呢種小事而發脾氣，無可否認我重視大少爺多過一支護膚精華素！++++++++++++++++++++++++++++++++++++++++++++++++++++++
今日做Dark choco mousse，其實因為我想整一個特別既mousse cake
所以就預習下做mousse，今日無我認為最佳既裝飾品strawberry，所以就隨意切片橙
就咁既mousse太單調喇！加d我最愛既toast almond就完成喇！
2006年9月5日 星期二
好既開始
是日晚餐.....豉椒炒蟹、黃金蝦
其實我係第一次炒蝦、蟹，平時最多都係白灼蝦
蟹係未煮過，因為唔識處理
本來，今日去完街下晝5點幾打算去supermarket買生果，晚飯再出街食就算
但行到海鮮部突然想食蟹，就多口問職員可唔可以我揀兩隻蟹由佢幫我處理
佢話得，我就揀兩隻郁郁下再買多斤蝦
但買完先諗............點整呢？
結果返到屋企就搵現有料頭包括蔥、蒜、豆豉、辣椒、調味料炒
而蝦就用牛油鹹蛋黃炒，結果......出符意料之外既好味
兩碟都好惹味呀！係我學煮海鮮既好開始
大少奶提提你：
其實個蝦好易做，首先蝦走油，鹹蛋蒸熟去殼同唔要蛋白，將鹹蛋黃攤凍壓碎
將鑊烘熱下牛油、蒜頭、蔥粒炒勻，盡量炒鬆鹹蛋黃，再落蝦炒勻
加少許生抽，少少糖吊味，但因為鹹蛋黃本身鹹唔好落太多生抽，炒勻就OK喇！
2006年9月4日 星期一
出爐喇！出爐喇！
椰蓉包出爐喇！
我有d想喊！係開心到喊！因為無論口感與外型都係好滿意
點解又有椰絲？因為大少爺囉！
佢係我既big fans成日來睇我blog，梗係乘機擦佢鞋啦！
多謝佢...........................送我既shopping戰利品！Yeah!!!!!!!!!!!!!!!!!!!!!!!!!!!!!
0拿！呢d 咪大少奶祕技囉！比心機整嘢佢食，令佢覺得物有所值！哇哈哈！
Ps. 大少爺食後感：嘩！大少爺激讚好味呀！
+++++++++++++++++++++++++++++++++++++++++++++++++++++++++
↓正在進行 fermentation既麵糰
Chicken caesar roll
星期日大少爺陪我行街行足一日銅鑼灣、金鐘、尖沙咀
咁高興當然大包細包返屋企，而個衣櫃各自進脹新秋裝！！！
但快樂既一日後............今日覺得隻腳好攰
是日通勝：不適宜再週圍走
晏晝整麵包，而lunch又係自已手作仔Chicken caesar roll
個卷之前做過，但上次當作頭盤，而今次就係我既正餐
裡面有生菜、蕃茄、雞絲、 parmesan cheese 仲有 caesar dressing
卷埋放入焗爐，叮！得咗
好緊張！唔知等陣整既麵包會點呢？希望唔好再有怪包出現啦！
2006年9月3日 星期日
一個蛋糕的誕生 ( 戚風蛋糕食譜、做法)
其實初初開blog原意係記錄低自已學蛋糕既記錄、心情、特別事
但慢慢變成飲食、烹飪blog
其實我唔鍾意寫食譜，因為自已未夠斤量，而且我只係自已搵食譜照跟著做
同一食譜唔同人做唔同效果，通常失敗就怪罪於食譜既主人
有時失敗原因可能係某步驟錯，而我並唔係睇住做，係唔會知錯晌邊
我唔想負上責任，亦好怕被人質疑：點解我唔得既？
但blog友想知，又禮貌地問到，我都會加落去
今次破天方影過程係因為我覺得chiffon cake好味，但又容易失敗所以公開做法同要點
與一直支持同鼓勵我既各方blog友分享，共勉之
chocolate chiffon cake recipe(如果唔喜歡朱古力味可以唔加可可粉)
材料
蛋黃 3個
細砂糖(a) 30g
牛奶 45cc
橄欖油 35cc
低粉 60g
可可粉 15g
泡打 1/2茶匙
朱古力粒隨意
蛋白霜
蛋白 4個
砂糖 (b) 60g
做法：
1)將牛奶座暖
2)將蛋黃同砂糖(a)拌勻，暖牛奶及橄欖油
3)粉類過篩加入蛋糊直至完全混合
4)將蛋白加入砂糖(b)打至企身，將朱古力粒加入蛋糊再用Fold-in方法完全混合蛋白，入模以180度焗50~55分鐘，取出後要倒扣放涼直至完全冷卻才可以脫模
大少奶提提你
入爐時間長短視符你個爐火力，可以用竹簽篤落個蛋糕如果無蛋糕液黐住就
Fold in
Before baking
例扣放涼
Done！！！
訂閱：
文章 (Atom)