炸炸

個個都鍾意食軟殼蟹，唔通個個都食軟殼蟹咩

我一直都覺得軟殼蟹好得意，佢又幾好食

又可以成隻食，咁佢到底點整

世事就係唔知比你嚇死，知就笑死

原來軟殼蟹只不過要加個粉漿然後炸，連鹽都唔太需要，因為佢本身咸咸地

軟殼蟹晌AEON個冰鮮櫃到見到，佢溶雪後就去除蟹既鰓同埋那個肺(食過大閘蟹就會識)

其實街外無人會幫你清走，因為炸埋一舊就唔會見到，但自己整無理由見到都照食

呢個軟殼蟹係我趁昨晚朋友來晚飯整，分享膽固醇丫嘛

*其實諗諗下

大家都可以買盒炸漿粉加水加少少油去用，唔使咁大陣仗

麵粉   1杯

泡打粉 1/4茶匙

鹽    少許

啤酒   1/2杯

冰水  1茶匙

做法：

將鹽、1杯麵粉(只取其中一杯份量)、泡打粉撈勻

分次加入啤酒及1茶即冰水冰水攪勻

軟殼蟹清理肺及鰓後就完完全全索乾水，再放入粉漿浸浴

熱鑊熱油大爆炸(圖中見到一片野嗎？我拎紫茶上粉漿炸)

大少奶's Delicatessen

宣傳你的專頁

自醫

早幾日包包病

有位朋友 Shirley mak教我用紫洋蔥、蘋果、獨子蒜燉汁比包包飲

可以增強抵抗力、及舒緩鼻敏感

我當然試整比包包，本身洋蔥、蒜頭同蘋果都係對身體有益處

每次我咳都會燉洋蔥，所以我相信呢條方係得

希望每星期整一次比包包，包包就算返學都無咁容易受感染

1個紫洋蔥、1粒獨子蒜、半個蘋果隔水蒸1.5小時

或

放入小飯煲 slow cook 2小時，隔渣飲洋蔥汁

燉好後將所有材料夾走，拎起水間隻碗，裡面d汁就係精華所在

我信偏方食療至少合邏輯

唔使加水_唔使落其他_味道係甜的

大大力share出去

睇少d醫生當贏

大少奶's Delicatessen

宣傳你的專頁

飄飄

又到最開心星期五，今星期比較得閒所以都叫做無咁累

不停諗星期六、日family day有乜節目，好想帶包包去公園但唔想佢中暑

好想帶佢落樓下游水但泳池d水曬到似打邊爐

乜都未諗到但就諗到個食譜

話說 日本recolte sponsor我一系列小家電，昨晚試用BBQ爐時發現

個易潔盤可以做呢個疏乎厘鬆餅，因為我一直用鑄鐵鍋整呢個有d冒險

呢個係前年我一家三口去台北時食過味道，超好味但香港又食唔到

今次比我搵到個食譜，原來好容易咋，但幾樣材料同步驟之嘛

呢個直頭一定要試，好好食，哼

那種輕柔如水清澈...質感，令我心寧回復恬靜~哈哈

食譜：MissQ My Little Kitchen改編

蛋黃      1隻

蛋白      1隻

低筋麵粉  15g

牛奶      10cc

鹽        少許

砂糖      20g

泡打粉    1g

牛油      少許

水      2湯匙

做法

將奶同蛋黃打勻

篩入鹽、低粉、泡打粉輕手攪勻

打蛋白加糖打起

輕力 fold in

牛油放落易潔平底鑊，記得要用小火

將蛋糊放入平底鑊中，可以晌面加多少少做得更鬆厚

兩湯匙水沿鍋邊倒下

蓋上鍋蓋，靜置4-5分鐘(記得一定要用細火)

煎完一面再煎另一面便完成，可以加楓糖漿、忌廉等等一齊食

大少奶's Delicatessen

宣傳你的專頁

光復了

早兩日壞電腦，係突然壞然後我乜都做唔到

近年用慣電話或ipad睇嘢嘅我，呢一刻先發覺電腦都仍然好重要

因為無電腦我執唔到相、寫唔到文，一下子停下來有空虛感覺

原來我個人已經去到唔停得，一停一來就會感覺無所事事

幸好，一晚部電腦重回我身邊，好似久別重逢一樣咁可貴

今早即刻update個食譜，韓式翠玉瓜餅

瓜類中我喜歡翠玉瓜，無論味道同質感都喜歡

但翠玉瓜除了炒乜乜同炒物物外好似無乜選擇

但呢個韓式翠玉瓜餅味道多一份層次再加埋個沾汁好好食

望落清清地，但食落真係唔錯！

食譜：在台北的韓國餐桌

翠玉瓜    1條

雞蛋   1隻

麵粉   30g

做法：

翠玉瓜切件，灑上鹽靜置10分鐘等佢出水珠就可以沖洗然後抹乾水

*否則煎時會出水

先沾上麵粉

再沾上蛋液就可以煎，用中火煎香佢就可以

沾汁：

醬油   2茶匙

白醋   1茶匙

糖   1茶匙

熱水  1茶匙

辣椒粉   隨意

以上材料撈勻就done

大少奶's Delicatessen

宣傳你的專頁

扮巨峰

好熱呀！熱到不得了，所以我只想整冷盤

感覺活晌蒸爐之中，同埋我測試過天氣熱到咁游水係唔能夠降溫

樓下個泳池曬到d池水滾咁滯，似人肉打邊爐多d

既然熱到咁無奶油唔整凍食物

今次整扮晒巨峰提子，佢係乜？係藍莓冬瓜

以前我整過白玉葡萄，今次整巨峰提子，個idea係我有個教會好姊妹"姑姐"

佢有一日whats app我話晌龍麵館食到呢個藍莓冬瓜感覺良好，所以叫我試下整

咁我咪試下囉！呢個雪凍食好好味的

做法又簡單，只需要做個藍莓醬同埋冬瓜粒就得，你睇佢呃得下人呢！哼

我是葡萄樹、你們是枝子． 常在我裡面的、我也常在他裡面、 這人就多結果子．因為離了我、 你們就不能作甚麼。 約翰福音15章5節

冬瓜   1斤(其實唔需要用一斤，用淨記得煲冬瓜水啊)

藍莓    1盒(120g)

檸檬汁    少許(唧少少便可以)

糖   2茶匙

做法：

將冬瓜用粒粒器做成粒粒狀，跟住去蒸10分鐘

藍莓加糖加檸檬汁用小火煮到變成汁

再煮到變醬就可以

將冬瓜放入藍莓醬中撈勻，然後就雪凍食就可以

大少奶's Delicatessen

宣傳你的專頁

韓式翡翠螺

今個星期拼命趕返一星期要做嘅工作，好快就過了七日

又好快到八月

然後好快包包又返學，感覺都好剌激

今星期個FB page好多廣告，所以都好努力寫食譜

今日個食譜我好鍾意，係韓式翡翠螺

翡翠螺晌一田買，價錢居然平過其他超市，而見味道不錯

但我唔係就咁食，係用韓式做法

除了韓國辣醬外、仲有少少魚露、同埋蘋果蓉做出來味道辣中帶點甜味

不過…大少爺唔爺得辣又唔食螺，平日我好少整佢唔食嘅食物

今日整因為…我今朝發夢夢見佢去滾呀！個夢中仲要唔答我任何說話

我咪晌現實中折磨佢，等佢有得睇無得食囉！哼

一田賣$50一pack，每pack有半打咁上下

食譜：

翡翠螺  12隻

韓國辣醬   1.5湯匙

魚露   `1茶匙

蘋果   半個

蒜頭   2粒

大蔥  半條

將翡翠螺金蟬脫殼後備用

蘋果同蒜頭磨蓉，然後混埋所有醬料 

加埋大蔥同螺入去撈撈撈，放雪櫃兩小時以上就得喇

大少奶's Delicatessen

宣傳你的專頁

【天平生活食譜頻道】之法式多士

剛完成一個旅程身心放鬆後回到香港又再墮進一頭煙中

今次旅程坐郵輪，身心放鬆狀態比一般旅遊更多

香港人去旅行感覺人家做事好慢、你有你心急但佢有佢繼續慢，慢活對於香港人來講係奢侈的
所以今日就寫一個最想快手就做到嘅法式多士吧！

天平生活: http://blog.mreferral.com/lifechannel/

大少奶's Delicatessen

宣傳你的專頁

份子料理

今日包包午餐汁煮豬大腸

係咪好驚，我見到都驚

當然唔會真係豬大腸啦，你家陣當我傻架咩

呢個係用豬肉片卷紫菜再做個燒汁之嘛

上星期包包突然同我講：媽咪，你煮芝麻、肉肉同飯比我食

佢家陣係會向我點菜，佢想起一樣食物就會叫我煮

而且佢覺得我係有求必應，絕對無托手

其實呢個都似波板糖丫，有時要令小朋友感覺新鮮先會食得好d

食譜：

火鍋豬肉片  1盒(自己預份量，因為每一件都要預2-3片)

壽司紫菜  2-3片

醬汁：

醬油或生抽  1/2湯匙

味醂        1/2湯匙

水          2湯匙

糖          1茶匙

做法：

將豬肉片兩片駁長，放上紫菜然後卷起用竹簽拮實

邊位肥肉唔好切走住，將肥肉向外煎好後先切走

將豬肉卷煎香

所有醬汁材料撈勻放入鑊，蓋上蓋煮2-3分鐘便完成

*個頂同底煎完收縮無咁靚，煎好後輕輕切走面同底就會呈現靚靚豬大腸喇

大少奶's Delicatessen

宣傳你的專頁

實現

話說晌越南超市睇食材時見到蝦片

我意思係未炸蝦片，當時就記起老豆去食越南菜鍾意食蝦片香茅牛肉

有一塊蝦片、上面有一片粉皮(一片唔係一個)再鋪上香茅牛肉等等

每一次去金牛苑佢就會叫，但越南小店又唔多覺會有

呢種食物、情景、味道一直刻晌我腦裡面

所以一見到蝦片二話不說就買，老實講每一次煮食物我都希望所有程序都係自己做

所以開鑊油開蝦片對於我來講係必定會做，加上我整粉包有材料做埋一片粉皮(一片唔係一個)

好快就整得好，我唔算太喜歡食呢個，但我太懷念喜歡蝦片牛肉的人

思念是一種很玄的東西 如影隨行，無聲又無息出沒在心底 轉眼 吞沒我在寂寞裡

就係呢包，佢本身味道都幾好味

要炸的確唔係個個做

炸蝦片感覺幾治癒，開花感覺

食譜：就算唔做呢個都可以只做香茅牛肉或豬肉，好味的

牛肉    300g(其實視符自己需要份量)

香茅   1條

蒜頭   2粒

魚露   2茶匙

糖   1茶匙

生粉   少許

油   少許

做法：

將香茅拍扁再切成段，蒜頭拍扁後切碎

牛肉醃之前加少少水，等牛肉吸水後就加糖，魚露、香茅、蒜頭、生粉、油

撈勻佢醃一小時，臨炒牛肉之前將香茅及蒜頭揀出因為易焦

熱鑊好熱油放牛肉，炒熟為止備用

呢個就係蒸好粉包塊皮，我晌越南買包粉開水及加油便可以

大家都可以用腸粉皮代替

吸出同蝦片一樣大小

粉皮放上蝦片之上，再放牛肉、蔥及炸乾蔥，及少許花生便完成了

大少奶's Delicatessen

宣傳你的專頁

像樣

上文提過我愛上越南粉包，原來個皮非常好味

薄得來帶點煙un，晌短短上岸時光我去超市集中精神搵呀搵

比我買到整粉包個皮材料，看圖識字發覺唔難整就整，仲要昨晚去買材料今日整

你睇，佢好好食呀！

如果無果包粉都可以去買粉皮或者用腸粉拉開做皮，當然無咁正宗啦

好開心呀！越南食譜我又儲多樣

呢包就係，加水同油就得

蒸完是咁的

餡料:醃料只用魚露，真正越菜無雞粉無生抽只靠魚露醃

豬肉碎   $15

雲耳    浸開半碗切碎

紅蘿蔔   半條切粒

沙葛    半個

芫茜莖    少許

乾蔥   2粒切碎

另備炸乾蔥及炸蝦粒、蔥粒

將以上材料撈勻，加魚露2茶匙、糖 1茶匙撈勻醃30分鐘

熱鑊爆香所有材料，再加少許魚露兜勻上碟

將粉皮切開4個正方型包餡就done

仲有呢個魚露汁，越南話是"碌霖"

魚露  2茶匙、白醋  2茶匙、糖  1茶匙、 蒜頭一粒切片、辣椒  1隻，熱水 2茶匙

撈勻就是了

大少奶's Delicatessen

宣傳你的專頁