荷花

話說近來宮廷劇大熱，但我居然無睇過

因為我連追劇時間都無，不過呢幾日包包病病我就無無聊聊上下台灣網睇睇

見到呢個宮廷甜點，佢絕對可以代替月餅

而且做出來又幾架勢咁，做唔難要寫返個食譜先最難

中秋我終於都有返d作為喇

其實我估我寫完個食譜都唔會有人跟住做，因為材料有豬油又一定要炸

我係寫食譜嘅人當然乜都要試做，但大家就要考慮下喇

以我一對粗手居然做到，大家都應該做得到，哼

食譜：

水油皮：

中筋麵粉    100g

紅麴粉         1g

豬油           10g

水              45ml

糖              12g



油心：

中筋粉       65g

豬油           35g


餡料：

豆沙餡          72g



做法：

先做油心，將豬油+中筋粉搓勻

再分成6份

做水油皮：將中筋粉、豬油、糖、水、紅麴粉加入盤中搓勻

再分成6份，記住無論點都要用保鮮紙包住免變乾

將水油皮攤開，然後加入油心包實

用麵棍碌平至長方型

摺三摺(如圖中向上捲)，然後重複做三次

做完第三次用保鮮紙封好靜置15分鐘

呢個時候可以將豆沙餡分成6份，每份12g

15分鐘後就將酥皮打直放(企起身)

再按扁

包入豆沙餡再封口做成圓型

用刀界三刀做成 6瓣(如下圖)，要界得好先會靚

油溫120度去炸，如果無溫度計就用木筷子試油溫，有小泡泡便差不多

油要蓋過面，否則唔開花

Remarks：

紅麴粉、豬油烘焙店有售

唔焗得，焗完如下圖，唔開花之餘仲變成宇宙大王咁款

其實昨晚第一次做，似中了幅射

我死唔忿氣今日下午做多次先有個靚版本

所以失敗真係成功個媽媽來的

大少奶's Delicatessen

宣傳你的專頁

各位同學，午安

各位同學午安！今日係開學日

好榮幸我的兒子臭包明天先開始返學，所以我可以晌呢度向大家訓勉

我想向各位同學講：即使晌上學時面對個"飯盒"感到困難都唔使怕

正所為在人生上好嘅一餐、唔好嘅一餐，人生的確如此啊

只要叫媽咪跟住食譜做夜晚煮餐好嘅比大家食，咁就充滿意義啦啦啦

今日包包仍然放假，我就仍然帶佢出街

但出街前都寫定個"法式白酒忌廉蘑菇燉雞"食譜

近日經常會整不同雞類菜式，因為大少爺要戒口而買無激素雞比較方便

今次用無激素雞下脾做貪其方便呢

呢個菜式可以配飯、配意粉、配麵包，有汁有肉有蔬菜

重點又唔係難整，而且加過白酒特別香

食譜：

雞下脾   5隻，大家可以用全雞、春雞等等

白蘑菇    10-12粒

紫洋蔥     半個

淡忌廉     80ml

白酒      50ml

雞湯      100ml

鹽        少許

做法：

雞下脾用鹽及胡椒略醃

白蘑菇抹乾淨，蘑菇正常係唔好洗用少少濕廚房紙抹乾淨，當然你真係好想洗都可以的

紫洋蔥切粒粒

雞下脾煎香備用，可以晌鑊另一邊炒蘑菇

紫洋蔥炒香後加入蘑菇

淡忌廉及白酒，最後加雞湯煮滾轉細火

*白酒我只用那些細枝平價貨，因為我又唔會飲無謂浪費呢

煮滾

然後加入雞下脾蓋上蓋煮5分鐘便可以上碟

大少奶's Delicatessen

宣傳你的專頁

動人時光

有無試過…面對面望住一個人但仍會有掛念感覺？

眨下眼暑假尾聲了，初初包包放暑假時我就諗：失自由了、我無得週圍走無得輕鬆食個afternoon tea

但慢慢我發覺原來佢晌我身邊我係最有存在感(佢由朝到晚都媽咪)

而且又發覺我同包包有點朋友關係，我會同佢商量去邊、食乜午餐

我會整蠱佢，佢又會諗計仔整蠱返我，我同一齊發明d只得我兩個先識玩嘅玩意

佢跟我入連卡佛、我跟佢入反斗城仲變成一個模式

佢同陪我遊歷去看風景、我陪佢去睇超人特工隊同鬼靈精怪大酒店

每日同佢一齊起身食早餐、一齊午睡、一齊改daddy花名

我同大少爺帶住忐忑忑忐心情帶佢坐15小時飛機去見我最愛嘅阿姨，包包用最大能耐去坐足呢15小時

佢一日一日長大，我將自己媽咪身份放下學習同佢做朋友

呢幾日望住佢會諗：我個好朋友要返學喇

今日特別post一個早餐：棉花奄列，將雞蛋打起令個奄列變得輕柔個質感反而有d似疏乎厘pancake

食個輕柔早餐去提醒自己懷著溫柔的心去面對挑戰，尤其呢個年代為人父母甚艱難

都讓小朋友有個新意早餐

也希望大家每日都有一個：Good morning

食譜：

雞蛋    2隻

鹽    少許

餡料：

火腿、洋蔥、粟米、芝士，大家可以隨意配搭

做法：

餡料材料切好粒粒備用

雞蛋放入盤用電動打蛋器打起

要打到淡黃色，大約打幾分鐘

平底鑊抹少許油再倒入蛋液，用中慢火煎

當開始定型後就加入餡料

蓋上蓋用慢火煎3分鐘便完成，將奄列對摺後可以上碟

大少奶's Delicatessen

宣傳你的專頁

15分鐘

就快開學個個家長都忙

忙帶小朋友出去玩、忙住睇下做晒功課未、忙住諗下點比小朋友適應

我唯一忙就係陪玩、諗下去邊同煮飯

有時我帶完包出街都會煮晚餐因為唔想包餐餐出街食

去街前我會諗定當晚食乜預備好晒然後回家就會煮

呢個醬燒南乳金沙骨係其中一樣，話說金沙骨唔係咁容易就淋身

所以閒時叫人買定一斤金沙骨，跟住出定水放冰格到煮時只需要15-20分鐘就煮好

又夠味肉質又剛剛好

雖然相片影得麻麻得佢真係好味又易做的

金沙骨買回來沖洗後就用凍水開始出水

將金沙骨放入凍水加蔥、薑開火煮滾再轉中小火煮1小時，最重要加一粒仔冰糖

1小時後就可以撈起瀝乾水放冰格，想煮時就拎出來解凍

*可以保存2星期

解凍後就可以煎一煎

醬汁：

南乳     半件

生抽     1茶匙

老抽  1/4茶匙

糖      2茶匙

將所有醬汁撈勻

另備冰糖   1小粒 

*用冰糖係可以軟化肉質，所以金沙骨炆完唔會變硬

再醬料倒入鑊快手兜勻金沙骨

再落  150ml水及冰糖，用中火邊煮邊兜勻直至收汁便完成

大少奶's Delicatessen

宣傳你的專頁

must try

由於大少爺今年濕疹不停發呀發，所以飲食上都要好小心

最要小心係盡量唔好比佢食牛肉，同海鮮類連魚都唔太敢食太多

呢個時候就係雞、豬肉、雞、豬肉無限輪迴

雞都要食無激素雞，網上訂送來就十分方便

不停蒸雞蒸雞就係蒸雞你唔悶我都厭，到最後我決定發奮圖強終於沖出蒸雞整"左宗棠雞"

呢個做法好好好好食，食到我一家都好開心又唔算難整

不過…大家可以用雞扒或者雞脾肉做，因為佢要先泡油後再炒

無啦啦泡油係好難過到心理關口，我就無泡油但就落多少少油用煎方法但雞骨位就比較難煎

用雞肉或雞扒做呢就方便整，咁當然你唔介意泡油就可以用鮮雞啦啦啦

個醬汁係靈魂所左，好好食呢

*左宗棠雞係一個台灣菜，亦可以講係一個官府菜式

食譜：

雞    半隻或一隻(可以用雞扒或雞脾肉代替)

醃料：

生抽    少許

雞蛋    半隻

片粟粉或生粉   2湯匙

蔥、青椒或紅椒  

醬汁：

茄汁     1湯匙

生抽     1湯匙

糖       1湯匙

酒       1湯匙

醋       1湯匙

蒜頭     3粒

辣椒      隨意(因為包包唔食得辣我無落)

片粟粉或生粉  1茶匙

做法：

將雞加入生抽撈勻，份量只需要夠撈勻便可以，再加入半隻雞蛋醃30分鐘備用

將蔥切段及紅椒切件

將醬汁材料撈勻備用

雞肉加入片粟粉撈勻再放入鑊煎或炸至金黃色撈起索乾油份

爆香蔥及紅椒後雞件回鑊，再倒入醬汁快手兜勻便可以上碟

大少奶's Delicatessen

宣傳你的專頁

講故

蔥油豬扒撈丁....自家製有段故

我本人好憎食公仔麵，禁止埋大少爺食

上星期日返完崇拜帶包包睇戲，由於無乜時間晌戲院隔離茶餐廳食飯

我見大少爺望住餐牌慾言又止心亂如麻咁，望一望佢眼睛望住撈丁

由於時間關係我話：你想食就叫吧！趕時間

到碟麵來到時，包包又想爭食

大少爺同包包講：你呀！知唔知我都唔知做幾多好事，你媽咪先比我叫咋

那一刻我真係忍唔住笑出聲，包包見到我又大笑又跟住笑

既然係咁…我自己整一次，仲要個豉油汁有祕方

出來效果色水夠唔太鹹又無咁油咁囉

哼~

今晚除了撈丁仲有一大碟菜同涼拌雲耳中和內疚感

大少爺又會沾沾自喜以為自己拯救了銀河所以得到公仔麵，銀河唯一的祕密 將惡人重罰~~~~~~~~~~~

食譜：

豬扒    2件

醃料：

糖    1茶匙

生抽   少許

蛋白   少許

片粟粉   1茶匙

*蔥油部份

蔥   好多條

薑   2片

油   適量

*汁料 

老抽    3湯匙

生抽   少許

糖      2茶匙

熱水   100ML

麻油     少許

另備

公仔麵   2包(出前一丁優先)

做法：

1.將豬扒順序加入醃料撈勻備用

2將蔥洗淨抹乾，切走蔥白位置(留用)，蔥綠色位置切粒粒再加少許鹽

油加入鑊燒熱，淋落蔥粒上做成蔥油備用

鑊唔好洗，將切出來蔥頭及蔥爆香

將汁料材料撈勻，再倒入鑊煮滾後便完成

一滾就熄火

豬扒煎香及熟後上碟

煮公仔麵(呢樣我唔太識教你，但唔好太淋)

當煮好公仔麵後就撈起瀝乾水份加入豉油汁撈勻上碟，跟住就淋上蔥油完成

大少奶's Delicatessen

宣傳你的專頁