任性的番薯

呢幾日好忙又週身骨痛，但來緊半個月我又要積極還稿債

要寫好多稿然後安心放我既假同享受12月，積埋既稿真係好多相都有排去執呢

今日做了一個番薯，做一個番薯唔一定要成舊番薯咁

番薯可以好任性的，點解佢係任性既番薯？

佢係焦糖脆番薯，我去日本好多時都會食，日本係會每炸一炸個番薯

但我就只係蒸過就算

有一層脆糖包住，個番薯又夠香甜加上層脆糖係令你想不顧一切同佢遠走高飛

所以你要有足夠任性去整，然後好任性咁不停食囉

日本番薯  3個(一開四件)

糖    90g

水   30g

做法：

番薯蒸20分鐘，其實日本做法會炸，但免得過都唔想炸囉

糖加水用慢火煮，佢就會起泡泡

慢慢就會結晶好

再慢慢煮就會溶化，然後就變色

呢個時候就可以放番薯入去同糖撈勻

放上牛油紙上等佢攤凍就會變成脆糖架喇

大少奶's Delicatessen

宣傳你的專頁

爆辣

是咁的…個gathering未寫完

話明upgrade版街邊貨式，當然唔會無魚蛋

但我唔會甘心做咖哩魚蛋，於是諗到整麻辣沙爹魚蛋

下午試味時只係微辣，到夜晚就浸到爆辣，辣到好...好...rock n roll never die 咁

由於我今日好忙所以要快快寫食譜喇

魚蛋做法：

魚蛋   1.5磅

花椒   2茶匙

辣椒乾   3-5隻

洋蔥    1個

沙爹醬    1湯匙

生抽    少許

糖   2茶匙

水   1碗-1.5碗

做法：

將花椒加辣椒乾爆香、加洋蔥繼爆炒至出味

加入沙爹醬再加生抽、糖、水

滾起後試味，然後就煮到魚蛋發大後就熄火浸一個下午就done~

還有…一個聚會由朝煮到夜，所以個麵就簡單地整薑蔥油撈鮑魚麵

好易煮： 用大量既蔥切絲(不可以切粒)，薑又係切幼絲

將鮑魚麵煮好後瀝乾水備用

用隻鑊加油燒到好熱放薑蔥兜勻，然後連油帶薑蔥倒落麵到，加少放生抽瘋狂地撈勻就done

大少奶's Delicatessen

宣傳你的專頁

發花................

 上星期六繼續party，今次係我一位好朋友生日

佢成日話自己係劣食會長，我同其他朋友都諗過好多不同主題

最後決定個主題係：upgrade版既街邊貨

咁碗仔翅係其中一樣，其實我之前都有整過但唔記得有無寫過

今次我用雞殼去淆湯，再加其他材料，因為咁個湯底本身已經帶甜味

又發現原來無加醋、胡椒粉及麻油既話…碗仔翅其實好似蛇羹，哈

星期六晚大家都好開心，我屋企總會熱熱鬧鬧

發花膠

其實都好睇你隻花膠係有幾厚，如果係花膠筒功夫少好多

花膠筒有大有細，有d細隻薄身既就唔使點發

但呢種size唔太薄既呢都好容易，將花膠浸水過夜

一晚之後就用薑、蔥、少少酒，煲滾後就蓋上蓋熄火焗浸

如果你用既厚花膠就要重複幾次

呢種花膠筒兩次都ok，再薄d就一次

一次過發大份量，然後就分幾份包好放冰格 

碗仔翅

雞殼    2隻

冬菇    4-5隻(我用新鮮的)

粉絲   2扎(浸軟剪碎)

木耳絲    1碗(浸軟)

瘦肉    1塊  (先烚熟再撕成肉絲備用)

花膠    隨意(我用大約1.5隻花膠筒)

老抽    少許

鹽    少許

另備生粉水

做法：

雞殼2隻洗淨出水再加2.5公升既水煲3小時以上，我用高速煲就用大概 45分鐘

將雞湯翻滾，除粉絲外放入所有材料滾大約30分鐘

最後放粉絲滾一陣就落少放老抽、及鹽做調味

食既時候加紅醋、。麻油及胡椒粉便完成

*將花膠剪碎

大少奶's Delicatessen

宣傳你的專頁

癲了

上文講過…呢幾星期都好忙

終於手頭上工作做好既時候就覺得自己好累

昨晚又凍又累既時候打算倒頭大睡

點知覺得好凍，凍到我頂唔順去搵暖水袋

十多年來即使有暖風機我一凍就想要暖水袋，到個人暖番時…臭包就叫

然後個幾鐘就叫一次，佢會叫：媽咪媽咪、又無啦啦自己話：我發燒 

跟住又會大笑下、得閒又鬧下人

總之就無覺好瞓 直到今早，午睡又再玩玩貢到剛剛先瞓著................

好彩昨晚做了焦糖雞蛋布丁去為自己打氣，呢幾日好想食呢個甜品

好多年都無整了，於是想做就做，不過我那盒淡忌廉發生意外，攪到我試下只用鮮奶去整

結果係成功，質感都無太大分別

整呢個最難係煮焦糖，然後座水焗都無乜難度的

食譜：6杯

雞蛋      1隻

蛋黃   2隻

糖    70g

雲呢拿籽    半條或用雲呢拿油 1-2滴

鮮奶   300ml

先煮焦糖，我本身唔用白糖用 raw sugar所以煮焦糖難煮d

如果我再整會買包白砂糖去整，因為做出來個焦糖香d同易煮d

焦糖做法：

糖     100g

水 50g

做法：

先煮焦糖，將糖加水用中火煮，煮到金黃色後熄火，鍋既餘溫會食焦糖自己慢慢更深色

但大家要留意火應該要細，否則好易煮到燶

煮好後就入杯，佢會凝結成脆糖咁既

煮個布丁漿，先預熱焗爐 160度

奶同糖座熱水至到微暖，先放一隻雞蛋、再放兩隻蛋黃輕看拌勻

加雲呢拿油或籽輕力攪勻後過篩兩次就入杯，160度座水焗35-40分鐘

如用鑊蒸就蓋上微波爐保鮮紙，大火蒸20分鐘，熄火後唔好開蓋焗佢2分鐘

蒸爐就用100度蓋上蓋蒸20分鐘 就done呢

放涼後雪入雪櫃便可以

大少奶's Delicatessen

宣傳你的專頁

it's so high high high

近幾星期都好忙，忙到個人無晒精神

今日天氣凍了，我乜都唔做翻睇完創世紀後就陪包包午睡

佢要我攬住佢瞓，我動彈不得情況下決定專心陪瞓

瞓醒就諗夜晚煮乜好，最後決定整麻辣牛仔骨

逢係天氣凍我就好想食辣，所以冬天我d朋友成日比我逼食雞煲

但整麻辣都唔能夠太辣，因為大少爺唔太食得辣，麻辣我怕佢反眼會反到後腦

唔甘心就咁整麻辣牛，加了之前剩下既日本腐皮"油揚"，加埋落去索味係最高境界

包包當然唔食得，我另煮了湯粉比佢食呢

食譜：

牛仔骨   4-5件切件

洋蔥    半個

油揚   2件(可以skip)

花椒    1茶匙-2茶匙

辣椒乾    4隻

蒜頭   3粒

另備汁料：

生抽   1茶匙

糖   半茶匙

水  半湯匙

酒   半湯匙

做法：

牛仔骨先用少少生抽、糖、生粉去醃

油揚切條、洋蔥切條、蒜頭切厚片、辣椒乾切開一半

牛仔骨先煎至半熟

鑊會剩下好多油，將油倒走(但唔好洗鑊)

爆香花椒及辣椒乾至出味再倒油揚、蒜頭、洋蔥等等落鑊，再加少少鹽

(麻辣既材料要加少少鹽才惹味)

牛仔骨回鑊兜勻 後再落汁料

兜至收汁便完成

大少奶's Delicatessen

宣傳你的專頁

大爆炸

星期六個gathering空前成功，成功研製新食物

老老實實就快聖誕又係party既高峰期

(其實我屋企基本上無分，成日都係咁多人上來食飯)

開party一定要有炸物先開心，有d朋友好怕炸食物但又唔抗拒

又或者炸極都炸得唔好黑晒啦、吸晒油甚至散晒

半煎炸係自己呃自己，當你半煎炸有時未必能夠將油份逼出

炸食物同毒係一樣，以毒攻毒先係最好

要炸就要做得最好，用個小煲加至一半油去炸

炸食物唔一定油淋淋，炸到最後轉大火將油逼出係炸食物最高境界，炸完出來仲乾爽

乾乾脆脆不拖不欠，然後就同朋友同歸於盡咁食係最爽

今次呢個爆炸品係磨菇三文魚忌廉芝士春卷，佢好容易做但又易做得好

呢個絕對係上星期六最受歡迎既食物，大人細路風掃落葉咁去食

食完用怨恨我既眼神問：點解無晒既？

好簡單：你哋食晒囉

*特別鳴謝幫我拎住條春卷影相既乜乜，哈~

食譜：

磨菇    10粒切碎

三文魚    隨意，我用了大概5片剌身切粒

忌廉芝士   200g

春卷皮    12塊

做法：

將磨菇用白鑊去炒，炒至出水再收乾加入三文魚粒，灑少許黑椒及少少鹽盛起備用

cream cheese放軟身，然後打滑 

將三文魚及磨菇放入芝士中然後輕力攪勻 

春卷皮攤開再放入適量芝士再卷起就可以宇宙大爆炸咁炸

*油要燒到好熱，放入春卷後用中火炸至微金黃色

最後轉回大火逼出油份及變成金黃色便完成

大少奶's Delicatessen

宣傳你的專頁

珍真

近來成日見到"羽衣甘藍"呢種菜蔬

早幾日同朋友gathering就打算用佢配藜麥整沙律

但買兩小棵都感覺好多，咁就用一棵去整脆片(我買時個店員教的)

做出來好好食，做沙律你會發覺個羽衣甘藍好多纖維味道帶微微甘味但都接受得到

做脆片後呢就似紫菜

我就用呢個比包包食，佢居然肯食仲想食完又食

對於一個見到綠色都唔食既佢來講簡直係奇蹟

而朋友們都覺得好好食，我打算今日出開去會再買，因為大少爺都好鍾意食又做法簡單

係一個好好既小食

(網上資料)含有功效強大的抗癌和抗氧化化合物，可以清除身體裡有害物質。由於它纖維成分非常高，因些有助清潔腸道。羽衣甘藍含有一種物質，可以促進肝臟製造具有清潔功用的酵素

焗完個感覺似...燈影牛肉，一定要舉高影張

佢兩小棵就有無窮無盡既葉

將葉摘落嚟沖洗下再用廚房紙抹乾水

加少許橄欖油及少許鹽撈勻每一塊菜

用130度焗爐焗佢20+分鐘，期間要望下佢睇下佢焗乾未

因為每個焗爐都唔同火力

焗好後放涼就入密實瓶或者密實袋

大少奶's Delicatessen

宣傳你的專頁

BB飲食

出世開始，媽咪們就會開始著緊小朋友嘅飲食問題

初出世各階段嘅食奶問題包括一時食好多、一時就食好少，媽咪嘅心情簡直與BB食量掛勾

到6個月開始食糊仔又要面對另一問題，到底開始食固體時應該從何入手呢？

其實當你嘗試放糊仔入BB口，BB懂得吞下嘅時候代表佢已經可以開始踏入固體第一步

好多媽咪都好心急，到底要點去餵糊仔呢？加咩材料呢？甚至BB唔肯食可以點呢？又或者口味上嘅轉變令BB抗拒點算？

其實糊仔可以用食開嘅奶去沖，有熟悉嘅味道，等BB容易習慣

當時包包有濕疹，醫生推介雀巢超級能恩2號奶粉，所以一到6個月開始包包無論食奶或係食糊仔我都係用雀巢超級能恩2號奶粉

不但味道令佢唔抗拒，而且可以係煮食時避免使用普通牛奶，因為pHF水解蛋白配方奶粉已切割牛奶蛋白致敏原，唔會咁易誘發ＢＢ敏感
餵糊仔份量…
初初餵糊仔先從小份量開始，大約一湯匙份量逐小逐小去餵等佢學習吞嚥

慢慢將份量加大至到可以完全成為一餐嘅份量

習慣後慢慢加入不同材料、菜蔬等等，亦令BB對食物產生興趣

不過…BB成長階段裡總會有令你摸不著頭腦嘅地方，出牙仔、開始長大會厭棄無味嘅食物、甚至對食物無興趣等等

呢種情況你並不孤單，幾乎每個媽媽都經歷過

大家都可以Click 以下網址去參考下，睇完可能有點幫助呢

https://goo.gl/ffiaBl

秋栗

是咁的，今日栗子炆雞

本身我無打算寫因為太家常好多人都會識

但晌FB無聊做直播有會有人想要，咁又無奶油唔寫的

秋天好想食栗子用來炆雞最好味

好多人以為剝栗子殼同衣好難，其實好容易架咋

點剝？用手剝囉~命運是對手永不低頭...................

我好日都唔會入街市，今日食完午餐就誓要去入刀山既決心去買栗子

呢種栗子圓姑碌，千其唔好買已經剝好晒殼既栗子，好多時都有陣怪味

原因係剝好既栗子好多時都係用藥水去整走d衣

所以殘留一陣怪味，所以寧願自己剝

將栗子放入微波爐叮40秒，用手指一摔就剝到

如果無微波爐就可以用一個煲仔煲滾水放栗子入去灼一灼後就用手巾包住一摔就甩

食譜：

雞     1隻 

(用少少生抽、胡椒粉、生粉去撈勻醃半個鐘或以上)

栗子    1磅

(要買多少少因為實有爛既)

薑幾片、蔥幾條、乾蔥頭   6-8粒、蒜頭  2粒，也可以自己配搭 

汁料：

蠔油    1.5湯匙

生抽    少許

糖   2茶匙

水    蓋過雞面

老抽    少許

麻油及酒   少許

另備生粉水少許

先爆香雞件至半熟盛起備用

將所有薑、蔥、蒜等等爆香，雞件回鑊兜勻

加蠔油兜勻再落生抽少許、糖、老抽兜一兜(也可以贊少少酒)

最後加水至蓋過雞面滾起後就轉中小火，呢個時候落栗子去炆

炆大約 30-40分鐘試一試味，唔夠味加多少少生抽，最後加生粉水兜至收汁

熄火後加少少麻油就done

大少奶's Delicatessen

宣傳你的專頁

未諗到

經過兩日澳門之旅再休息一日，終於又要繼續努力去做接了既工作

一諗到今日已經星期二，我要幾日內完成5個食譜去交，仲有其他宣傳稿要寫就想逃避現實

澳門之旅好美滿，美滿既意思除了住間好舒服又新既酒店之外

還有包包玩得好開心，佢亦都好乖！就算食fine dining都會坐定定咁食

喺酒店房佢又好開心咁不停走來走去感覺新鮮，又帶過佢去兒童樂園佢又玩得好盡情

所以我好期待帶佢再去九州相信佢會懂得享受旅程的

澳門最唔爭氣係我想去一間葡國餐廳但因為太老定無訂位結果無得食

又要趕返酒店坐纜車唔可以等位，於是去就近一間葡國餐廳食晚飯

那間餐廳可以用"唔好提"去形容，雖未到災難級但都極不滿意

一直想食葡國雞但無食到返屋企就自己整

從前整葡國雞會晌醬汁方面落手，所以雞肉本身未必可以太入味而炆得耐雞肉又變得唔好

而呢個做法就係先用黃薑粉、鹽等等去醃佢，煮既時候用椰汁、奶等等煮到佢出味

佢容易煮加上雞本身用麵粉去醃，個汁唔需要炒麵粉

還有黃薑粉不同咖哩粉，黃薑粉係唔辣既

下次我想試整非洲雞，哼

你睇下每件雞既顏色都好靚下

食譜：

鮮雞      1隻(切件)

醃料：

黃薑粉    3湯匙

鹽    1茶匙

糖   1茶匙

麵粉    2.5湯匙

油      半湯匙

汁料：

椰漿     200ml

鮮奶    200ml

水    100ml

鹽     少許

月桂葉    3片

另備：

薯仔    2個(切大粒再焗至金黃色備用)

番茄仔    6粒

洋蔥    1個切件

蒜頭    2粒

做法：

將醃料攪勻後再倒落雞件中撈勻醃3小時以上

煎香雞件盛起備用

原鑊爆香洋蔥及蒜頭

倒入椰漿、奶、水、加鹽、放入月桂葉煮滾後就放雞件及已經焗好薯仔粒及小番茄

炆大約20-25分鐘後熄火，可以分次或一次過放入焗盤灑上椰絲

用200度火焗10分鐘或以上便 done

大少奶's Delicatessen

宣傳你的專頁