鹹蛋之育成

早晌一月底已經醃鹹蛋，希望今年端午包粽時可以自己做鹹蛋去包

聽落好不可思議嗎？事實係我覺得自己醃鹹蛋安心好多

雖然未必會漏油但工序少材料少就做到，當然自己做的好

而且人我好鍾意收成的感覺，哼

加八角落去多一份香味，但唔好落太多香料

我試過一次加埋得多香料隻鹹蛋有跌打酒味，所以 Less is more

食譜：

鴨蛋    6-8隻(隨你喜歡)

粗鹽    半杯

水    500ml

八角   3粒

香葉   1片

玻璃瓶    1個

八角、香葉、鹽、水煲滾後放涼

將鴨蛋放晒入玻璃瓶、加倒入已經煮過又放涼嘅鹽水及八角等香料

由於蛋有浮力所以晌最頂放一塊沾濕鹽水嘅廚房紙便可以

否則最頂隻醃唔到，將玻璃瓶蓋實，一個月後拎鹹蛋出來搖下

如果個蛋黃實了便完成(即是你平時搖街外鹹蛋會感到裡面個黃成型感覺)

防敏攻略

寫咁耐防敏其實敏感對小朋友影響有幾大呢？

首先如果腸胃中有奶蛋白引致敏感，首當其衝就係皮膚

好容易會有濕疹或者其他敏感！例如好似包包當時咁起到紅色一撻撻又痕又腫

然後唔處理佢小朋友一痕就會抓，日間可能仲有家長睇住可以搽藥膏止痕

但到晚間睡覺時就好難忍，然後又不停會抓，抓到流血，而且會令小朋友睡不穩精神差

加上香港天氣、空氣等都好容易引起皮膚敏感發作

從BB一出世開始，腸胃就係小朋友防敏重要嘅一環

包包聽從醫生建議，轉食有助防敏嘅pHF解蛋白成份配方奶粉 https://goo.gl/gzEGnN 

睇住佢皮膚紅疹減退甚至靚返，呢種心情實在難忘

當時我好小心，雞蛋、牛肉都逐少逐少比佢試，無鱗魚類都少食，因為呢類食物中醫會稱為「發物」！而雞肉初初都會選擇有機，因為雞內激素都容易令BB敏感，包包以前食雞肉皮膚都會有紅印出現

還有乳製品都係要小心選擇，我當時如果整麵包或餅比包包食有用到奶，就會用佢飲開嘅奶去整，咁就減低敏感機會

各位新手媽媽喺BB開始食固體時要小心選擇，當比BB食新食物時唔能夠一次過太多呢
仲有冬天沖涼水不能太熱，沖完後趁皮膚有濕氣就搽上保濕cream，沖涼最好用清水，清水唔會沖走皮膚表面天然油脂呢
媽媽們加油啊！

#資料由雀巢防敏1000天計劃贊助 #腸胃係小朋友防敏重要一環

未諗到

是咁的…天氣踏入三月後又焗又濕又熱開始令人煩亂甚至有點失心瘋狀態

一下子唔想再食熱食物，雖然呢兩日又話會轉凍

但係人要面對現實，現實係好快又再濕濕焗焗然後就九個太陽的夏天

所以家下開始冷盤都不失為過

今次呢個冷盤係"酸辣金錢牛筋配萵荀麵"

牛筋天生唔係咁樣樣，而萵荀麵亦都唔係真係麵，真亦假時假亦真實在係十分配合世情的

牛筋做成圓片質感更彈，加埋萵荀配上酸辣或麻辣汁

萵荀做冷盤比青瓜好出水少又清新，哼

用急凍牛筋，唔使煮咁耐，急凍牛筋磅半整兩條

牛筋出一出水

然後呢就預備一片桂皮、2片月桂葉、4粒八角，加1500ml水、生抽兩湯匙、鹽1茶匙、冰糖1小粒，花雕酒1湯匙總之唔需要滷水咁鹹，淡淡既滷水味便可以

跟住放牛筋慢火炆半個鐘

然後瀝起放涼

(如果用新鮮既，就要先出水，然後炆3個鐘，用高速煲都要45分鐘，所以整小食用急凍既就慳功夫，急凍既係已經出左水，炆半個鐘已經好稔)

如果有壽司蓆就鋪底，然後一層錫紙、一層保鮮紙，用力卷實佢，然後札實

放入雪櫃一晚，第二日就可以切片喇

萵荀麵做法

將萵荀去刨皮

再刨片狀

煲滾水放入萵荀灼大約20秒，再浸冰水

當荀完全涼透後可以瀝乾水上碟，再配上牛筋及及淋上酸辣汁

酸辣汁做法：

白醋   2湯匙

生抽   半湯匙

鹽   1/4茶匙

糖 半湯匙

辣椒油 2茶匙

小辣椒 3小隻

麻油    少許

將佢 攪勻，辣味隨個人喜歡加減！然後可以淋上牛筋片伴食

*我有加花椒粒，將花椒粒打碎成粉狀加入汁內多份麻香

大少奶's Delicatessen

宣傳你的專頁

大蓉

包包今日又病假，係病假

於是我問佢：你今晚唔好食飯喇！你想食乜？粥？麵？

包包：我想食雲吞麵

我：好呀！

佢夜晚的確食雲吞麵，但連雲吞都係我自己包，佢係麵店賣果種廣東雲吞

再用大地魚淆埋個湯底，完完全全街外味道

呢個雲吞我其實寫過，但有d食譜的確值得重溫的

食譜：

冰鮮蝦肉    1斤

*我用冰鮮蝦肉整，因為我試過用鮮蝦做出來反而唔夠爽，如果用鮮蝦肉都要雪到佢冰再融雪

反而用冰鮮蝦肉方便又爽

梅頭肉   $10-$15(視乎你喜愛蝦定豬肉)

大地魚   1塊 

*也可以用蝦籽代替

鹽、生粉、麻油、胡椒粉  

韭王   少許

蛋麵   2個

做法：

分開幾個步驟

將蝦用生粉及鹽撈勻再摔，摔到表面有潺就可以沖水，完完全全索乾水，然後拍扁剁10下但唔好剁到完全爛

半茶匙鹽、2茶匙生粉、胡椒粉及麻油撈勻，放回雪櫃雪2小時

大地魚洗淨，索乾水半煎炸到金黃色

去骨剪碎用用攪拌機打成粉備用

豬肉，正宗既點心或雲吞並非用肉碎做，係將肉切到好細粒再攪至起膠

但我用快方法，將肉切細粒，用手提攪拌棒打幾下再攪就會慳功夫d

攪到起膠

將蝦粒加入豬肉中，加 1湯匙大地魚粉、鹽 1茶匙、胡椒粉、生粉 1茶匙及麻油(落多d)

再攪勻後放雪櫃半小時以上

攪至起膠係有點吃力，其實可以撻

我撻幾十下後就容易起膠得多

我喜歡蝦多過肉，所以用咁上下份量包起

用清雞湯(今次用盒裝)+大地魚骨滾起加鹽試味

再雲吞再放蛋麵(麵檔同佢講要雲吞麵既麵)就煮好就done~

大少奶's Delicatessen

宣傳你的專頁

早晨全餐

我個心仍然在假期中即使包包都已經返學

假期太開心就比自己繼續放假，應該話個腦在放空中

不過遊戲規則係你要努力，所以都要收拾心情

今日寫個脆薯餅，每次食快餐店早餐見到塊薯餅都有d不安

不安係人生係咪值得放Quota落塊薯餅中當然呢個都只係一剎那念頭

薯餅好快就比我鯨吞

有時都諗過到底點可以自己整，終於我見到"玫瑰小姐"個食譜於是就跟來做

一試就覺得有驚天動地感覺，自己整原來可以好食得多而且用自己屋企d油去做都安心好多

佢容易整，一整整到5、6塊可以雪晌冰格，你唔想炸可以半煎炸(但焗就唔太好)

薯仔固然新鮮、味道差不多但重點佢厚薄由你話事咁囉

哼

一個大薯仔大約200g，切正方型粒粒

然後蒸15至20分鐘

將薯仔粒輕輕壓，但唔好全部壓爛要保留返d粒粒

加鹽及胡椒適量，可以自己調較

加生粉大約半湯匙，如果你覺得薯仔唔夠黏可以加多少少

整造型自己整想要size、厚薄等等

放入冰格30分鐘或以上定型

可以炸或半煎炸至金黃色便完成

大少奶's Delicatessen

宣傳你的專頁

圓圓

貶下眼農曆新年都好快就過，今日初十二過幾日就元宵節

每年年宵節前幾日我情緒或心情就會自動有失落感

元宵節就係我爸"星星忌"每一年我都會有d傷感

不過人總係要向前望，我覺得唔可以因為咁而意志消沉

最好方法就係：面對

最好面對方法就係出個元宵食譜，哼

元宵大家都會想起湯圓，剛過去新年每逢同朋友食飯無論晌我家定係出面食都係食湯圓

但今次係做一道客家菜式"鹹湯圓"，我唔係客家人唔知係點但我憑自己想像做出一個湯底

再自己搓湯圓做出來大少爺同包包都鍾意證明成功啦啦啦

食譜：

蝦米     半碗

鮮冬菇    4隻切片

瘦肉    $20切絲

菜     適量(可以選擇白菜、娃娃菜等)

雞湯     750ml

油蔥酥、菜甫粒、芫茜等       隨意

糯米粉   100g (可以做20粒)

暖水  80ml

紅麴粉    少許

做法：

瘦肉切絲再用少少糖及鹽、生粉少許撈勻

蝦米浸軟

冬菇我用鮮冬菇，大家都可以用乾貨

雞湯滾後放蝦米、瘦肉及冬菇

如果用盒裝雞湯就加多少少水否則好鹹

滾大約半個鐘

最後先放菜 然後試味，如果覺得唔夠鹹就加鹽

再滾起時就放湯圓，湯圓浮起時滾多兩分鐘便完成

食時可以隨意加少少芫茜、油蔥酥、菜甫粒

湯圓係自己搓無餡的，我整了紅色同白色

白色忘記影相，其實步驟一樣

糯米粉加大約80ml暖水，用暖水質感係最好

水要慢慢分次加，因為每隻粉受水都唔同

(如果你覺得濕就補少少糯米粉，如果太乾就補水)

搓成糰後就可以搓圓做湯圓，下圖係加了紅麴粉做紅色的

old dish is so............... exciting

開始一連幾日都有朋友上我家吃飯，所以諗菜式都要諗d方便我煮又時間剛好

昨晚煮四道菜但我好似好悠閒咁

其實望落好似好勁，時間配合得好跟本就唔會似打仗呢

有一味不得不提就係焗魚腸個friend 焗蠔砵

係用焗魚腸做法但換上蠔仔，呢味菜式其實我久唔久就寫一次，書都寫過

但佢真係好值得寫，因為好多朋友都會鍾意

old dishes is so............... exciting,、哼

蠔仔    1斤(我今次用韓國蠔)

雞蛋   4隻

油條 半條(切塊)

果皮 1片 (浸軟切絲)

芫茜   1小札

鹽 半茶匙

水 100ml

胡椒粉   少許

做法：

蠔仔用粟粉摔，摔完後沖洗，然後煲滾水放蠔仔略灼至半熟後索乾水放入砵中

將蛋打勻加入水、芫茜、果皮絲、鹽、胡椒粉打輕輕打勻倒入砵中

再收切塊油條放入砵裡，面層鋪上微波保鮮紙，大火蒸  15分鐘，熄火唔開蓋焗5分鐘

取出蠔砵，在蛋面上均勻搽上一層油，薄薄地搽一層

焗爐預熱220度，將蟹砵放入焗爐焗 10分鐘或表面呈金黃色

昨昨其他菜式有近來至愛整燒乳鴿

蒜蓉蝦

瑤柱扒豆苗

大少奶's Delicatessen

宣傳你的專頁