勞斯動眾

咁又過了一個星期，來緊有太多事要忙

其實今日唔係好得閒，但我都用了一個下午煮晚餐

從來對大少爺既晚餐好著緊，返工辛苦一日晚餐好重要，可以煮可以做既我都好認真去做

昨晚朋友GiGi為我補祝生日晚飯已經出街無煮過

今日就想煮得好d，我親自入街市買材料通常一定有海鮮

見到有龍蝦賣價錢又合理於是買夠兩隻回家去煮"乾爆龍蝦粉絲煲"

大少爺喜歡食粉絲煲，而粉絲煲唔要一大煲汁浸住粉絲，我做既係乾爆粉絲

將兩隻龍蝦既頭淆個湯底，然後去煮粉絲

粉絲吸晒鮮甜咁味之餘，龍蝦又唔可以就咁放入去煮，要煎一煎令肉同外殼都有香味

勞斯動眾煮一個晚餐係我最開心既事，有人值得你勞斯動眾係一種幸福

哼

好有滿足感

叫海鮮檔幫我開邊，我回家自己"將冰山劈開"咁斬件

做法簡單：

龍蝦   2隻

粉絲   2小札

薑、蔥、乾蔥頭(切片)各適量

調味：

生抽  1茶匙

鹽    少許

糖   1茶匙

老抽   少少

酒   小許

龍蝦兩隻切件，將頭同其他殼一齊爆香，爆到連殼都有香味時就加 水蓋過面

水蓋過面然後用細火 煮1.5小時，直至水都濃縮了到大約2碗

夾起蝦殼再隔去碎渣 

另一邊箱，龍蝦切件後索乾水，然後撈生粉去煎(街外既會泡油，自己做就煎吧)

最主要係煎至蝦肉少少金黃色(不需要熟)，反而殼煎香d

收龍蝦肉夾起

煎完龍蝦既鑊唔好洗住，加多少少油再爆香薑蔥及乾蔥頭

加入龍蝦湯，加生抽、老抽、鹽、糖煮起(可以試下味)

放粉絲邊煮邊兜

當粉絲開始索汁時龍蝦回鑊兜一兜，晌鑊邊贊酒

蓋上鑊蓋 1分鐘，開鑊蓋後打手兜勻可以上碟

*我預備另一煲仔燒熱再放上粉絲龍蝦

>

大少奶's Delicatessen

宣傳你的專頁

二寶

本身唔算太懂得"調理"既人，我每次病完老虎都打死幾隻時就會上山打老虎

跟本無諗過要自己調理

但包包早前病了好幾日後，我總發覺佢好蒼白手仔總係凍既

而且即使跑跑跳跳佢手仔仍凍，晌FB曾經有位朋友留言話：佢好返燉肉汁比佢吧

於是我就燉肉汁，臭包飲得半碗但居然佢手仔回暖臉色都好好多

我簡直覺得好神奇，另一個朋友佢係一個營養專家及我顧問

佢話可以煲一個湯水比包包飲，用烏雞、栗子、合桃、紅蘿蔔及粟米去煲

煲出來有營養又合時，於是我今日試煲

煲完我覺得好好飲，希望佢會肯飲(唔肯飲的話我明天會用湯去煲通粉佢食)

我上網search烏雞資料時都見報章有介紹呢個湯

呢個湯有補腎益氣及健脾養胃的，但記得清晒感冒先可以飲

食譜：

烏雞    1隻

粟米   1條

(記得用非基因粟米)

紅蘿蔔   1條

栗子   1磅

(通常搣埋都唔會有1磅，好多爛的)

合桃    半小碗

將所有材料切切洗洗後煲3小時熄火加鹽

*栗子補腎健脾、合桃溫肺虛寒咳、腸燥便祕適合食

 介紹埋燉肉汁，呢個估唔到燉完咁清

大人、小朋友病後飲都可以

買$25瘦肉切片，用個燉盅或者小煲中間放個碗再放肉(令肉汁流入碗內)

肉要升高唔好掂到煲底否則肉會吸番d肉汁，我放入蒸爐燉2小時

用明火都係燉2小時，燉好後就係好清既精華肉汁，唔需要加鹽都有味的

大少奶's Delicatessen

宣傳你的專頁

2017的第一

新年快樂~假期一眨眼就過去

我昨日已經為接咗既工作開工，做了一個下午

大少爺真係好好，佢獨自帶包包去玩等我可以專心工作

大少爺絕對係 Happy daddy負責包包娛樂，昨日早上佢同我講：包包講話想搭巴士講足幾日，我帶佢搭巴士吧

包包唔肯係私家車、的士、小巴係都話要搭巴士，攪到大少爺忍唔住還佢心願

除了工作就係預備晚餐，昨日決定晚上食清d就煮豆乳鍋

個豆乳即係豆漿，我做得當然唔會就咁買盒豆漿就算

我係自己去整豆漿再整個鍋

加上非基因改造既粟米，近年我只會買非基因改造粟米

食過就會知分別，真正粟米係爽甜帶有粟米香既呢

再加上娃娃菜、魚卷、大蔥、紅蘿蔔，再加火鍋肉片菇菇卷，火鍋肉片夠瘦無肥油呢

新一年第一篇blog做顏色豐富既菜色，而且之前一篇冬甩太有罪惡感攪到個blog好油膩

用呢個去平衡一下來個 refresh~~~~~~~~~~~~~~~

哼

材料大致上係咁，大家可以用雞肉或海鮮都可以

先講煮豆漿，以前我有部豆漿機後來就掉了

呢部係 Bosch送我廚師機，不過呢篇blog同部機或品牌無關

純粹話比大家知…先將黃豆浸大約8個鐘或以上，再加水去打成豆漿

+

部機真係幾靚，估唔到第一次用唔係整蛋糕、麵包或切絲

但都係與本篇無關影開就放埋post

我用 160g黃豆浸8小時以上加 800ml水去做濃豆漿

如果大家做豆漿飲，其實可以用160g黃豆加1000ml-1200ml水去打

黃豆同水打勻後就倒入煲湯袋內隔渣

隔出來有大量泡泡，就要隔去泡泡

開始煲時用中火邊煮邊攪，當滾起時就用慢火煲20分鐘

點解要煲多20分鐘呢？因為如果豆漿唔煲透就會有草腥味同埋會有機會令到腸胃不適

所以要煲就要煲透佢，一定要得閒攪一攪同埋小心煲燶有燶味

咁煲好後熄火可以加冰糖做甜豆漿，或者好似我咁做火鍋也可以

首先收蔬菜放入去煲同煮熟，然後加鹽

我呢個LC太大所以煮好後就轉去細個d既煲

咁最後先加肉就完成，呢個豆乳鍋都可以當火鍋食

送上包包2017年新相片，星期日一家人返完教會再帶佢去海濱公園玩

感覺真好，我細個都好鍾意去公園

爸爸每星期帶我去銅鑼灣行街，然後都會帶我去維園玩

我知道那種去公園既開心感覺，所以堅持帶包包去公園

雖然樓下 club house有遊樂場，但我會帶佢去遠d讓佢接觸不同世界

昨日大少爺自己帶佢去公園玩，我雖然晌屋企忙著

但見到相片都感受得到開心

大少奶's Delicatessen

宣傳你的專頁

2016完滿禮物

呢個應該係2016年最後一個食譜，我對今年成績都幾滿意

起碼都做到好多大家都喜歡既食譜

工作上都算順利(除了成日為追稿費勞氣)，出埋暫時最後一本書

包包又算健康又考得入理想幼稚園

你問我今年有無唔開心？當然有啦！但總括來講無乜唔開心係值得我帶到明年的

今年最後一份食譜大家未必會跟住整

一來唔係個個識整麵包、二來唔係個個都會肯去炸、三來唔係個個喜歡donut

冬甩/甜甜圈對我來講係滿有回憶，爸爸有下午茶習慣，每次去街到下午總會去飲咖啡

佢帶我去中環間 Furama富麗華酒店(已結業)飲咖啡時就會叫 冬甩比我食

間酒店有條長樓梯，我就晌樓梯玩直到有冬甩食就會乖乖返埋位

其實我已經忘記那冬甩既味道，只知道…長大後從來都無乜食過好食既冬甩

大少爺都喜歡食冬甩，不過…佢當然無我咁好彩能夠食到當時來講好架勢既酒店冬甩

但而家我終於做到滿意既冬甩，剛做起鬆軟得來又帶有香氣，不枉我堅持做一次

就當係2016年比自己既禮物，願我2017年繼續開開心心，我既家人健康快樂

無論自己與家人都工作順利吧~

大家都新年快樂~

食譜：

高筋麵粉    112g

低筋麵粉   13g

奶    45ml

水   25ml

糖   15g

鹽   1/4茶匙

牛油   12g

蛋黃   1個

酵母   2g

*我將所有材料放入麵包機搓，完成搓麵糰及發酵後取出

如果無麵包機就用手搓至光滑便完成，用手搓鹽同糖要先放麵粉底，避免直接接觸酵母

而奶及水最好分幾次加入就會容易搓(起初好黏時可以撻下佢)跟住就用乾布蓋著發酵大約30-40分鐘(視乎天氣而定或發大兩倍為準則)

無論機搓或手搓完成第一次發酵後就分成6份，每份大約40g

滾圓後壓平再捲起(如下圖)

用一塊乾布蓋著，再蓋上一塊濕布靜置15分鐘

15分鐘後就用手壓平(如下圖)

再卷成條狀(如下圖)

跟住就做成個圈型，再按實個封口，進行第二次發酵

用乾布蓋著大約發酵30分鐘(視符天氣溫度)，總之夠2倍大便可以

拎起毛巾再靜置10分鐘，等佢表面乾身便可以

油去到一半便可以，炸至金黃色

都係果句，油並不可怕但要視乎你用乜油，呢幾年用米糠油我就放心去炸呢

密實袋放入白砂糖，放入冬甩圈搖呀搖搖沾滿砂糖便可以

大少奶's Delicatessen

宣傳你的專頁

極度出色 @萬豪中菜廳

早陣子食界有位總廚Jayson爆紅，當時佢剛轉到萬豪中菜廳

而我早於晌國金軒已經認識佢，當時已經覺得佢做既菜式好出色

最深刻係佢用個白粥底去煮蔬菜、同埋個椰皇燉湯

所以知道佢轉去萬豪中菜廳後我都有去捧場

識我既人或睇咁多年blog、FB既都知我係多年JW既捧場客

大住個肚既時候試過一星期去兩日JW食Tea，當年我介紹完大長tea好多人去訂位試

但近年無論cafe或lounge既自助餐、Tea等等都未再見進步，相反退步了

估唔到因為鄧師傳令到JW又再變得鬧哄哄

無論點心或主菜都出色，我一直想帶大少爺同包包去食

終於book到新年會同兩父子去食飯呢

前晚好友 Belle為我慶祝生日，我同佢都一致想去捧Jayson場

我近年唔係餐餐飯都寫blog，只寫值得寫既

也謝謝Jayson為我倆設計餐單，呢一樣的確大滿足呢

先來點心：一品野菌餃、萵荀及蟹肉紅菜頭粿

點心皮做得又薄又滑

"金池玉枕"呢個用大量蝦、龍蝦、蟹殼去淆汁

個湯汁又鮮又濃，加上陳村粉已經好好食

隻大蟹鉗又鮮甜，我第二次食依然有感動既感覺

繡球蟹肉清湯

繡球內係大量大量既蟹肉，個清湯望落好清

但內裡係用蟹、田雞、雞蓉、海帶等等去淆做出來既湯清到不得了

鮮甜味又甜到不得了

鄧師父人好年輕但卻掌握到做湯既技巧

濃湯酸菜魚

係新既菜式，晌FB都見過人提過，前晚終於自己試到

呢個酸菜魚除了酸味仲有花椒既麻香

舌尖被麻香充斥，個酸菜配鮮甜既魚令魚更甜

雖然個湯底係濃但又唔會漏的確出色

香醋蟹肉糯米飯

呢個先不可思議，我同belle已經叫飽時仍然食晒成個糯米飯

飯頂既係份子料理常見既粒粒，咬開係黑醋

用蟹肉去配糯米飯感覺無咁油膩，就係咁…食晒

謝謝Jayson為我預備了壽包，個壽包裡面蓮蓉係軟心的並非硬掘掘

仲有葛仙米杏仁茶

呢個係我同belle額外order

呢個紫薯脆炸鮮奶配楊枝甘露

我上次食過勁想再食，紫薯包住裡面既係鮮奶，最頂癮係外層酥脆之餘仲有海鹽焦糖醬

呢個新年我一定訂定比大少爺食，佢一定喜歡的

起晒摃

一定要感謝天父即使包包一場病令聖誕變得靜寂，但包包最後都康復

祈禱唔係要天父有求必應你要乜就比乜你，而係有著信心去面對一切

天不會常藍但至少彩虹始終會出現~

終於晌平安夜當日包包退晒燒

三年零八個月抗戰終於勝利，由20號晚開始至到24號足足四日我都無覺好瞓

每日都睇住個仔退燒又再發高燒來來回回的確乜心情都無晒

到聖誕節當日雖然所有節目取消我覺得好悶，仍唔敢帶包包外出

最後有兩個唔怕傳染既朋友來陪我一家晚飯，我亦都可以過下手癮煮幾樣食物

叫做都有番d生氣丫

平日係唔會自己入街市，假日就會入去海鮮檔睇下有乜買，本身入去係睇下有乜材料煮比兩個朋友食

見到海鮮檔有一盤蟹鉗賣，呢d蟹鉗好明顯係d蟹哥蟹姐掙扎時留下的，然後店主集齊咁多一盤去賣

有成廿幾三十隻，當時望咗一陣到底可以用來做乜？無理由整西餐但加個蛋白蒸蟹鉗

如果整蟹餅包包見到又話想食，咁熱氣當然唔可以比剛病好既佢見到

最後不顧一切都係買完先算，邊行邊諗決定整意粉

用白汁去煮再加黑松露，用黑松露醬有個要袂就係其他材料既味道要夠低調唔好搶味

蟹肉甜甜得來唔會太搶味、配上日本本菇又唔會似磨菇咁濃味道

就係咁呢個"黑松露鮮蟹肉意粉"就成功了，哼~

放入蒸爐蒸20分鐘放涼就拆得，我忍唔住食了不少

大少爺見到我瘋狂咁拆蟹肉覺得好不可思議

我個人最怕重複做同一動作，卻坐定拆晒蟹肉出來

個重點係....我真係好鍾意拆蟹肉，廿幾三十隻蟹鉗拆出來其實得一碗

新鮮蟹肉就係鮮甜，同罐裝蟹肉跟本不能相題並論

食譜：

蟹肉    大量

本菇    一pack

淡忌廉    100ml

鮮奶   100ml

雞湯    100ml

黑松露醬   1湯匙

麵粉    1湯匙

鹽    少許

意粉    隨意(視符自己所需份量)

做法：

意粉先煮至7成熟過冷河備用

先用油爆香本菇再加蟹肉兜勻，加入麵粉炒勻

分數次加入淡忌廉，每次都要攪勻防起粒

然後加奶及雞湯煮滾個汁，放入意粉兜勻，試味加少許鹽

最後熄火加入黑松露醬兜勻便可以上碟

*黑松露醬必需最後熄火先加

大少奶's Delicatessen

宣傳你的專頁

Merry Christmas

各位：聖誕快樂！

一如以往大家應該知道我會有豐富節目？去街、整聖誕餐、開party........

但今年取消晒

由做冬當日開始包包喉嚨發炎不斷發高燒，我已經3、4晚無乜好瞓過

即使佢即刻好番都要休息多幾日，所以我就將所有節目取消

加上我同大少爺都好累，相信咁多年以來最靜寂既聖誕

只要個仔好番，慢慢見佢再回復馬騮，我就心足了

願主醫治包包！Amen

以下呢張自製聖誕咭個cupcake係我整既，上面係栗子cream，但唔寫食譜喇因為唔算太滿意呢

大少奶's Delicatessen

宣傳你的專頁

Birthday brunch @ Amber

一 直都想寫番呢篇生日篇

其實係想記低今年生日，可惜…我由月頭病到連包包都病了，已經取消或改期幾個慶生飯聚

今年第一餐生日飯係好友 Joanne為我慶祝

佢兩個月前已經約定我仲book定位，久不久又會提我一次

哈~係人都知我生完包包後十分無記性

對上一次去Amber係六年前大少爺與我慶祝生日

老實講在公在私我都走訪過好多餐廳，你問我深印像既就幾間

Amber係其中之一，估唔到隔咁多年價位都只係加了百幾蚊

Fine dining既價值係大廚功架！所以無話值唔值的

6個 course $928一位，另外會幫你pairing酒

但我同朋友都唔飲酒，就有不同既果汁去pairing

難以抗拒既baguette bread

近年我唔喜歡食麵包，但Baguette例外，呢度同Hugo's既一樣好味

先來前菜：咸甜酸苦

從前我會話你知我只能吃甜不能吃苦，但人生苦與甜唔係自己控制得到

但沒有苦豈知甜？

頭盤我揀了生蠔

生蠔其實已經煮熟，面層有青蘋果冰及清酒

將青蘋果冰配上生蠔意外既夾及fresh

 Middle course我揀北海道帶子配紅脆米

帶子我覺得熟了點，如果中心位生少少會更好

主菜我揀了鱈魚

識我既人都知道我係牛魔王，但我無選擇牛扒

因為好既餐廳既牛肉一定係用最上盛

所以你要知個廚既功夫，就揀d要考功夫既，呢個油封鱈色柳係用油封既方式去slow cook

而slow cook既特色就係要令人感覺生與熟之間

呢個當然滿分啦

Cheese platter

較喜歡軟芝士，但我對羊奶芝士好抗拒，反而藍芝士我接受得到，但如果有蜜糖去配藍芝士會更完美

甜品

兩個甜品，一個係蛋黃蛋糕配梨汁

黑加侖子雪萉配朱古力mousse cake

petit fours 也絕不欺場的

呢餐後…就同一家幾口既好姊妹食生日晚飯

正日當然同我最愛既大少爺及包包過，多謝大少爺送既禮物、蛋糕同鮮花

幾乎每年我生日正日都入迪士尼，當日玩得好開心

聖誕後繼續食生日飯呢，得閒我會再報導

仲有早幾晚原本約了幾個朋友去食飯，卻因我又唔舒服缺值

結果…被供奉，哈哈~

宣傳你的專頁 大少奶's Delicatessen

宣傳你的專頁