我的郵輪假期@皇家加勒比遊輪 (設施及備忘錄篇)

本身我幾抗拒遊輪，要困住晌隻船又怕暈浪又怕悶

但今次之後我會覺得開心，原來郵輪就係會玩得開心

船上設施無論免費或付費都同樣出色，仲有不同表演睇

首先好多人都會怕暈浪，但我上船第一日香港好大風雨，都只會感覺到隻船郁但唔會暈又唔會企唔穩

只會感覺得有少少郁動

到今日返來3號風球都無搖感覺，當然你要上甲板吹風又另計

但十分穩陣

錢錢錢
晌郵輪碼頭寄行李後就過關，然後會有兩排櫃檯幫你做登記手續
咁登記信用咭後，你食幾多使幾多就會自動幫你扣數
呢個方法有好處，當你走時唔需要排隊結算
同埋…船上係唔會用任何錢同現金，一咭在手全船通行
如果唔見就記得去補領，唔使錢的！點解我會知…我咪就係跌過去補領囉

Wifi 船上係要比錢，第一晚好唔穩定但之後幾日又幾ok，US$75 包6日

一日賣US$30，尾二日有優惠就US$18

咁中間有兩日上岸或晌越南內呢就買定電話咭

我呢種每日在公在私都要上網，所以都無辦法

飲用水

船上面有幾個地方有水飲，但樽裝水只得頭一日有

大家要買定或帶定咖啡杯(星巴克)有蓋那種就方便斟水

因為唔可以用水樽去斟水，因為衛生問題

所以帶定隻杯啦

日用品

船指引話要帶牙刷牙膏，呢樣我每次旅行都自備

但原來shower gel同shampoo都最好帶定，船上有二合一

我呢類奄尖人最後去船上商店買loccitane套裝 US$39

另外都有間店賣平d牌子，我自己比較挑剔想用好d咁囉

今次搭係皇家加勒比遊輪海洋航行者號

隻船其實係比較有年資，所以又唔係最新

但設施各樣都好好，而且職員都好好

我唔見了房咭補領唔使錢，大少爺跌埋電話都晌 Lost & Found搵到

職員個個都好友善，我都好配服佢哋，工作量都唔少但仍然好好禮貌同笑容實在唔容易

有15層，但放心好快就會熟習呢

我住露台房，有床有埋梳化同露台

呢張床我一家三口都夠有餘

有泳池有按摩池

第一日天氣好差，第二日天氣好被海洋包圍感覺好好

有教堂，有人會晌度行婚禮啊

有golf場

臭包掃地式打golf

每晚都有唔同表演，例如魔術、歌劇 

有得唱卡拉OK，又會有人唱歌你聽

又有溜冰同ice show

有攀石及籃球場

有電子遊戲，大約 US$1.5一局

臭包最愛碌波波

電子遊戲室側邊有個兒童托管中心(唔影得相)，分唔同年紀

咁就可以放低比小朋友玩玩具、畫畫同睇電影

咁家長就會有部 call機，如果小朋友喊或者有乜急事想搵你，就會call你

結果…我放低包包後15分鐘就收到call

包包喊喊話好掛住媽咪同daddy 2個，唔見媽咪好唔開心

其實我聽到有偷偷笑過，原來我咁重要

樓上有酒吧

樓下都有小型酒吧、有畫廊

包包仲有得上 drama class，個老師好好心機同耐性教小朋友

小朋友一時扮船長、一時扮海盜

包包上成2個鐘都好開心

仲有下午又去整cupcake，大約 $20-22美金

其實係教做裝飾

最後就整了隻馬騮同埋汪汪喇

我仲會後補船上飲食篇同埋上岸越南篇，不日放映

大少奶's Delicatessen

宣傳你的專頁

冰冰

呢幾日七國咁亂，最亂係又要執行李，一執仲要執3個人行李

一邊執臭包一邊去攪攪震

不過我相信旅程係美好，今次我唔係搭飛機係坐郵輪

一切都新奇剌激，而且目的地係去我一直都想去但又唔會的起心肝去嘅地方

一向夏天我都唔去旅行，今次由一個熱地方去另一熱地方，希望我唔會發癲啦

晌熱同熱之間就放個凍食譜晌個blog，感覺涼快d

大家要等我返來寫郵記啊

言歸正轉，呢個係楓糖乳酪士多啤梨雪條

晌咁熱天氣小朋友喜愛雪糕雪條係正常，但雪條好多色素

自己整真係全天然呢

士多啤梨   180g(可用其他生果)

純乳酪    140g(一杯)

楓糖漿或蜜糖    2湯匙

雪櫃   1個

做法：

將士多啤梨或各生果打成汁

加入乳酪、糖漿輕手攪勻

放入雪條模中，放入冰格雪至變雪條(你記得唔好自己都走入去避暑)

大少奶's Delicatessen

宣傳你的專頁

麻麻腐

呢幾日好忙，在公在私都係忙

仲要處理某些事聯絡律師傾下野等等等等

仲要預備一長一短 trip其實一頭煙

今日反而感覺到點點relax感覺，係星期五效應感覺開心d呢？

話明今星期要將健康食物變得無咁健康，豆腐走唔甩

好想食皮蛋豆腐配我自家製醬汁，食完大滿意

唯一係…我只叫人匆匆去超市買盒裝皮蛋，隻皮蛋唔靚…so sad

話明祕製醬汁，我唔會話比你知點整！哼

呢得醬汁又兩種麻味，就係…麻辣同芝麻囉

個汁可以配冷麵及雞絲同呀粉皮的

食譜：

盒裝豆腐   1件

皮蛋   1隻

醬汁：

魚露   2茶匙

白醋   1湯匙

糖  2茶匙

熱水   2滑匙

中式芝麻醬   1湯匙

花椒粒   1茶匙

辣椒   隨意

麻油   少許

做法：

將花椒磨碎

將魚露、白醋、糖、熱水、中式芝麻醬撈勻

加入花椒碎及辣椒撈勻，最後加少許麻油就可以淋上皮蛋豆腐上

加上芫茜、蔥就更好呢

大少奶's Delicatessen

宣傳你的專頁

小牛蛋

話過今星期做魔鬼食物，今日第三擊：牛油果雙重芝士洋蔥烘蛋

但諗諗下…芝士、蛋、奶都係有營養價值，都唔係好魔鬼丫

味道的確好好！因為牛油果同呢幾種材料好夾

今日心情麻麻長話短說了，就去食譜吧

牛油果    半個

洋蔥  1/4個

蛋    1隻

奶   70ml

鹽 、胡椒   少許

巴馬臣芝士粉     2茶匙(或更多)

mozzarella cheese   隨意

*紅椒 或車厘茄粒   隨意

做法：

牛油果切片、洋蔥切幼絲、紅椒 或車厘茄粒放入焗碗

蛋同奶打勻，加入芝士粉、鹽、胡椒攪勻例入焗碗中

再加mozzarella cheese上面，用180度焗20分鐘或轉金黃色便完成

大少奶's Delicatessen

宣傳你的專頁

爆

我話過今星期我要將所有健康食物幾邪惡

今日主角白粥同佢個friend

白粥唔一定係：無味的

你可以整定一個爆辣菜甫魚乾，隨時食

可以撈飯、送粥、配麵、搬廠搬屋搬寫字樓.....時食

而且一整整多d隨時食得，食幾多夾幾多一切皆是整定...放入雪櫃

辣度可以自己調較幾方便

我買了$10菜甫切粒粒

$10魚乾

用5粒蒜頭、5隻小辣椒、1隻青辣椒

另外   1茶匙豆豉

汁料：

生抽    1湯匙

糖   1茶匙

酒   1/2湯匙

做法：

菜甫切粒後浸30分鐘，魚乾就用水沖淨後瀝乾水份備用

蒜頭切碎、辣椒切粒粒

先落油，落多少少然後先放魚乾炒香就放其他材料炒勻

醬汁材料攪勻後就放落鑊再兜勻便完成，放涼後可以放晌密實樽內及放雪櫃

【天平生活食譜頻道】麻辣牛肉炒雲耳金菇粉絲

私竇文章
除了落雨想買鞋外，落雨想食辣

唔知點解逢係落雨我都想食辣。
我食辣係食有層次辣味，泰式辣、麻辣都好鍾意，泰式辣比較多功夫
但麻辣只要有包花椒就可以，而且花椒唔係隻隻都有麻辣效果，我係要麻辣花椒。

天平生活: http://blog.mreferral.com/lifechannel/

奀咕咕

下星期就去旅行，今星期要努力做多幾個食譜

今星期我打算做魔鬼週，將明明健康食物用最唔健康做法做出來

通常…呢類食物都比較好食，哈

上星期整南瓜湯時，有朋友仔留言講用鹹蛋做呢個金沙南瓜

佢勾起我條筋，仲要唔係普通筋，我又再買南瓜返來即整

今次試另一個炸漿方法，較輕身脆漿

加埋鹹蛋黃直頭將膽固醇推到最高點，但你唔好理只要我維持晌正常水平就有本事食

因為我平日會食健康食物，例如用藜麥代替飯、每日飲黑豆水，如果餐餐都蒸會好乏味的

你睇佢個樣都好奀咕咕咁，就知佢好好食

食譜：

南瓜    半個至一個

鹹蛋黃   2隻

脆漿：

中筋麵粉   150g

生粉   10g

泡打粉    1茶匙

鹽   少許

水   200ml

油   10ml

做法：

鹹蛋黃先蒸熟備用

將南瓜切件，大約半cm至1cm厚

粉漿所有材料撈勻備用

南瓜沾上粉漿然後炸

要熱鑊熱油放南瓜，先中火炸，炸到最後較大火逼出油份就會乾身同脆

炸好南瓜(當時忙於炸瓜無影相)後就開始炒鹹蛋

加油入鑊放蛋黃，用慢火炒至起泡後就將南瓜回鑊輕力兜勻，直至南瓜沾上蛋黃便完成

大少奶's Delicatessen

宣傳你的專頁

太陽像個.......

得到前日就寫過南瓜燉飯，但個南瓜好似太陽咁大個剩下既點算？

我見過有人將一個南瓜食足一個月，當然我唔會咁做

只要煲個南瓜湯就KO得到

而我近來轉食藜麥餐，即使個南瓜湯較濃都唔怕

因為一餐裡面只飲一碗南瓜湯及食藜麥應該可以平衡到

南瓜要十月先真正當造，所以唔太甜呢

不過我好鍾意呢張相，好陽光感

太陽像個大南瓜…在那高高天空掛 照得滿山歡樂融融 草兒發嫩嫩芽.........(其實每次我聽呢隻歌都會喊，自己都唔知點解)

南瓜   大半個

洋蔥   半個

煙肉    1片(可以skip但我鍾意佢香味)

水  1000ml

麵粉   1湯匙

淡忌廉   80ml

做法：

將南瓜先蒸20分鐘再起肉，然後加水打滑佢

洋蔥切粒、煙肉切粒

放入煲內炒

分幾次加入麵粉再炒勻，分幾次加埋淡忌廉炒勻成膏狀

南瓜蓉放入煲後再攪勻

然後加入水

滾呀滾呀滾，試味唔夠味加鹽

然後滾到creamy就可以

大少奶's Delicatessen

宣傳你的專頁

隱瓜術

由6月開始直到而家都係忙，月中去旅行更加忙

大家都以為包包餐餐都精美，其實唔係

有時佢飯餐都會有d Hea，不過…當我稍有時間就會煮得好d比佢

佢可能由晌我肚內開始都食慣好東西，對食物有要求

每次午餐佢都會先望下食乜，佢喜歡同唔喜歡好容易知

今日呢個"南瓜燉飯"佢就"嘩"一聲

我好少比南瓜佢食，因為南瓜比較濕熱

久唔久先會煮一餐比佢，當然佢唔會特別喜愛南瓜所以我都要想下法子

我用南瓜煮醬汁後就加入煮好白飯咁就方便好多

唔會用煮意大利飯方法，因為跟本呀包未懂得食

佢見到都已經開心就代表我成功了一半，哼

食譜：份量可以自己加多減少

南瓜     1/4個

煙肉   1片(可skip)

洋蔥   半個

蒜頭    1粒

蝦或雞肉隨意

雞湯   500ml

水  200ml

飯   1碗

做法：

今次用虎蝦配，先將虎蝦剝殼去腸起肉，蝦殼同蝦頭留下

煎完蝦就爆香煙肉同洋蔥，煙肉可以唔落的

加埋蒜頭同露筍，大家可以加其他蔬菜

呢個時候加入雞湯去炆煮直到南瓜融化(有個快方法，先蒸南瓜20分鐘就快好多)

正常唔使落鹽都夠味，唔夠先加鹽，煮到南瓜成濃醬汁就將蝦回鑊電倒入白飯撈勻直到飯粒沾上南瓜便完成

大少奶's Delicatessen

宣傳你的專頁