2017年4月1日 星期六

Star Journey at Wynn Macau

 早兩星期一家三口去澳門係應邀永利澳門 http://www.wynnmacau.com/tc 邀請一個名為Star Journey at Wynn Macau旅程

當日有另一間酒店同樣邀請去體驗但我仍然揀去永利

而事實證明我無揀錯

好老實生包包之前我去澳門tasting及住宿多到我都忘記有幾多次

但生完包包後我就好揀擇

Wynn Macau好幾年前住過,無論房間或餐飲都係好出色

而大少爺之前跟我去過永利皇宮都留下好印象,否則佢唔會去請一日假陪我

老實講…呢個旅程帶比我一家都開心,包包雖然細個但佢晌酒店房跑來跑去都樂足半天

今次除了食、住外,我仲體驗了修甲同做spa以及一個facial treatment

而食方面我今次去摘米芝蓮星,品嚐各餐廳米芝蓮餐牌菜式

短短三日既旅程都好精彩,大家亦可以睇下個優惠:

至到5月31日賓客可以澳門幣1,800 元**起入住永利澳門酒店豪華房間一晚
及享有澳門幣1,000元的餐飲禮遇,賓客可於旗下得獎餐廳品嚐多款星級品味套餐。
(注:澳門幣1,000元的餐飲禮遇不可與其他優惠同時使用,如「泓」日本料理的微信粉絲獨家禮遇)


好!先睇下我行程,當日check in後就上房,感謝永利澳門為我安排一房套房

包包呢三日就係晌呢間房走來走去,又不停望窗睇船睇車




我最喜歡有jacuzzi


有水吧!好方便....沖奶,哈


間房仲有間按摩房呢


check in 後稍作休息大少爺同包包就自己出去食飯,因為酒店內 fine dining餐廳5歲以下唔入得

包包樂得跟daddy出去玩

我就去永利既salon修甲


我一向都有gel甲,所以就去做soft gel

睇番張單做soft gel連手部磨砂都只係$528

同我平日做差不多價錢,所以大家有興趣都可以試試


做完甲後去 Mizumi泓食日本菜

其實上年我即日來回食過一次,那一次印象極好

今次再訪永利慶幸可以食多次

以下係Mizumi米芝蓮 menu,呢個價錢比起同類型餐廳係平咗

而且一個價錢可以食晒壽司、天婦羅及鐵板燒呢





先來前菜






這是什麼?


煙燻三文魚,經煙燻過既三文魚除了多份香味

我喜歡魚微熟嘅質感


壽司部份,師父係用日本傳統三握手法去做

一件成功壽司飯溫、軟熟度同埋黏度都要剛好


坐壽司枱福利,可以睇到師父刀功


上次食已經驚為天人

將拖羅切成薄片,入口即溶






身為海膽狂迷,你睇件海膽就知道佢既質素係好好



之後移到天婦羅 部份,我掛住傾計影漏了所以要用舊相呢


呢度天婦羅唔係一段大大炸漿做成

而且師父調較時係可以憑手感去知道個炸漿厚薄


呢個令我幾乎尖叫

紫蘇葉天婦羅配上海膽,堅好食


教我如何可以不愛牠.......................呢底海膽見到都開心


鮑魚天婦羅配上鮑魚肝既汁

鮑魚炸完仍剛好好,個鮑魚肝既汁係日本常用做法




因為個炸漿夠薄,所以做出來係唔會膩既


最後就去鐵板燒既部份,亦係我同 Serena傾計最癲瘋既時候,哈


我食呢個係八重山和牛,同menu個不同

雖然牛肉有分別但做法一樣



牛肉當然做得好,但配菜個番茄都不容忽視



最後有個蜜瓜,食完大約9pm我就回房間陪包包出去週圍行


一夜好眠後,我起身食完早餐後就去萬利做spa同 facial treatment


呢個既spa room私隱度好高

有個獨立既房間,有齊不同設施,可以自己一個好好享受


房肉有桑拿,我好鍾意




有一個好正 jacuzzi


因為我好怕按摩,所以揀做 facial

個facial係"活氧"護膚,全程60分鐘

有深層清潔、按摩同護膚既mask,好舒服呢

全程有一個技師貼身服務,做完有時間仲可以坐低飲下嘢休息下


 之後化番妝就落永利軒同兩父子會合

包包第二次去永利軒食飯,大廚特別為佢整炒飯同蝦球

感激



永利軒都有米芝蓮menu

留意番:湯品方面唔食魚翅係可以轉為"石斛天麻杞子燉響螺"的


茶香凍鵝肝伴話梅片皮鴨


珊瑚蟹肉水晶魚卷

個魚卷下白色既係蛋白,一道菜式有齊濃及清淡口味

好喜歡呢個呢


風味帶及香酥牛肋片

香酥牛肋片係炸過既,外層香脆內裡牛肋片仍保持肉嫩



藍腳磨菇配龍蝦及手打麵

藍腳磨菇係法國品種,佢本身個菇蒂係藍色

味道較清唔會似一般菇菌太搶味,而個手打麵係類係日本手打烏冬既做法

配上較惹味既龍蝦


甜品拼盤

其實每次去永利軒,我都非常鍾意個麒麟果非常清甜

今次雖然無奶皇卷但椰青焦糖燉蛋都好好味


同大少爺一齊帶包包出去遊樂場玩,玩完帶佢去永利皇宮睇新裝飾同食雪糕

我同大少爺都念念不忘上次去永利皇宮住

當時裝飾係音樂盒,今次變回木馬

同埋我上次覺得甜藝廊雪糕太好食所以點都去食多次呢


同包包玩完我又重回試菜工作,晚上連試兩間餐廳

當然我無可能 full menu咁食,只能食精選的

先食京花軒,京花軒係食譚家菜既

譚家菜係官府菜
從前一個叫譚宗俊既官研造既
後來因家道中落
所以便用作招呼客人
而漸漸得人賞識,及流傳後代


呢個係米芝蓮menu


先來前菜 

冷菜拼盤

個叉燒最特別之處係用上白酒去醃,食落除了一段香甜味之外還帶有酒香


譚府黃燜三寶

呢個係招牌菜式,魚肚用油去發,再用一個湯汁去燜豹

今次食仲配上鮑魚,用油浸發魚肚唔油膩之餘仲更加索汁


京城清真烤牛肉

個燒餅做得有層次帶香酥,近年香港食既燒餅大多數都缺乏香酥

配上惹味做法既牛肉,I like it


甜品有我喜歡驢打滾呢


之後食完就轉場去帝雅廷意大利餐廳 il Teatro

食完中菜食意大利菜

呢個對住個湖景既餐廳我係第一次嚟,坐晌度大約個半鐘

每次見到個表演湖開始表演時都忍唔住想叫

加上每一個表演時間配合不同歌曲,集視、聽於一身呢





米芝蓮餐牌中,呢度係最平

以呢個價錢、食物質素及環境係超值的


呢個麵包非常好食,我幾乎要用刀仔拮大脾去禁止自己去添食呢個麵包

總不能將個胃餘下位置被麵包佔據的


先來前菜,估唔到世間有白番茄而又比正常番茄甜美

白色層係用白番茄做的


我揀了北海道帶子配牛肝菌伴棕牛油醋

北海道帶子如一既大隻,個配菜同個汁亦係錦上添花的


甜品就係傳統的 Tiramisu

食完後我就返房陪兩父子呢


第三日食完早餐就走,寧願留晌房多點相聚時間

所以早餐叫 room service,而且房內有小飯廳呢



好鍾意呢張相 


包包走之前留倩影

非常感謝永利澳門Wynn Macau邀請,特別係 Serena、Sofia及 Aron

我令大家放假都要返工,謝謝熱情招待及美好體驗















沒有留言:

張貼留言

歡迎大家留言,但會先檢閱先會顯示,謝謝
此舉避免無聊九唔搭八人滋擾