薯.............................

今星期好努力煮飯比包包食，因為之後去一星期旅行佢就要食街外食物

每次帶佢出遊前前後後我都會煮多d住家飯比佢

其實要堅持日日夜夜咁煮唔容易，煮…係幾累既事

而且我仲要兼顧寫食譜，所以每日都要諗唔同食物但又要適合個仔食既

今日整蔬菜薯絲蛋餅集雪櫃之剩餘蔬菜

佢味道幾好，如果可以再煎香d更好，但比包包食就低調d好

呢類菜式好難影相，呢幅相無乜層次可言的

由飯桌影到露台門，借用包包玩具檯去影

佢係咁攪攪震，最後佢望住個薯餅入晒神，我就影到呢張

食譜：

薯仔   1個

紅蘿蔔、菜、粟米隨意

(可以自己揀菜蔬，我就用菠菜)

蛋  1隻

麵粉   45g

鹽   1/2茶匙

胡椒   隨意

水 1湯匙

做法：

將薯仔切幼絲，其他菜蔬都切幼絲，薯絲及紅蘿蔔絲要蒸5分鐘

*如果好似我咁用菠菜就先灼一灼，再切碎

麵粉、鹽、胡椒放入盤再加入蛋同水

做成蛋漿

將蛋漿倒入薯絲、及菜蔬中攪勻就可以煎

最好每一份都唔好太多，否則賣相無咁靚

大少奶's Delicatessen

宣傳你的專頁

開心share 足輕鬆

開心share，如果你既BB係食雀巢®超級能恩®2、3號、雀巢®超級兒童能恩®4號奶粉及/或雀巢®嬰幼兒米粉產品的話

一次買夠$1400或以上加$188就有部足輕鬆

買夠$1800或以上就可以免費換領

呢個【防敏媽媽專享禮遇 換OTO足輕鬆 】既禮遇要先到先得，換完即止

名額共500份

大家真係要快d跑去買喇！(跑得累都唔怕有足輕鬆嘛)

詳情：https://goo.gl/i7V77j

#資料由雀巢營養天地贊助

福利

為包包肚皮謀福利，星期六日包包多食街外食物，平日就要堅持煮

其實堅持煮都唔係容易，有時我自己都會累會懶

而且煮就煮有質素既比佢食，希望佢美味與營養兼備

如果我自己都覺得難食或唔好食既話，更加唔會煮比佢食

今日整日式汁煮三文魚加滑蛋飯比包包食，佢其實唔鍾意食蛋、唔太鍾意食紅蘿蔔

但煮得好味佢又會肯食，不過佢鍾意食洋蔥既所以蛋都有加洋蔥

三文魚我用剌身去煮，剌身多魚油又會軟身d又唔需要驚有骨呢

包包午餐都食得多，呀媽當然要...哼~

食譜：

三文魚剌身   6片 (或自己所需份量)

蛋    1隻

洋蔥、紅蘿蔔  適量

汁料：以下調味可以自己調節，尤其鹹味

醬油或生抽  1茶匙

味醂    1茶匙

鹽    1/4茶匙

糖   1茶匙

水   1/4碗-1/2碗(視符你隻鑊有幾大)

生粉水   少許

做法：

先爆秀洋蔥及紅蘿蔔

倒入生抽、味醂、鹽、糖及水煮滾

放入三文魚煮到熟就夾起d魚

倒入少少生粉水令佢開始少少杰身

倒入蛋，然後…咪郁，雙手放上頭度

較細火，蓋上鑊蓋煮 2分鐘，打開鑊蓋蛋已成形，未成形既話就煮多陣

將蛋放上飯面便完成

大少奶's Delicatessen

宣傳你的專頁

白髮齊眉的佬味

今星期個blog好有佬味，我注定要與佬味白髮齊眉

當決定選擇另一半時，就要預了接納佢喜好

即係話…我注定要與"佬味"菜式並存直到白髮齊眉

繼紅燒牛肉後，今次係炆咸豬手

事緣係…我帶包包去上英文班，佢上課一個鐘我就週圍行

入到超市見到咸豬手就諗：其實佢可以有一番作為

我二話不說咁去買，買完就諗：點整好？

其實我好想整黑椒汁咸豬手，但整黑椒汁包包就唔食得

最後決定用蔬菜加生抽同味醂去炆，仲專登煎d薯仔放入去

加洋蔥、紅蘿蔔同西芹做出來帶有甜味，不過炆時就唔好落鹽

因為隻豬手會越煮越出咸味既呢

食譜：

咸豬手    1隻

洋蔥    2大個

甘筍   2條

西芹   2條

生抽   80 ml

老抽   少許

味醂   50ml

糖   2茶匙

酒   1湯匙

黑胡椒   少許

水蓋至豬手  750ml

做法：

將咸豬手出水，大約出20分鐘將佢既血水逼出，然後沖水喉水，後抹乾水

鑊加少少油，將豬手煎至金黃，前劣後後左左右右咁煎

將蔬菜加少許胡椒爆香，炒炒炒

加入生抽、味醂、糖兜勻後加水煮滾

放入咸豬手，汁料再滾後加酒蓋上蓋用細火炆佢大約2小時就會軟化晒

炆既期間幫佢反下身，炆到化骨綿掌咁就 done

*正常炆好後係唔使加鹽

*我將薯仔切件後煎至金黃色，最後炆既20分鐘先放入去呢

大少奶's Delicatessen

宣傳你的專頁

男人的浪漫

男人的浪漫  豆腐火腩飯

大少爺係完全佬味既 expert，睇佢斯斯文文但口味就佬中之冠

佢認第二無人會認得到第一

我每次問佢想食乜，佢既答案都令我搖頭嘆息，因為同我完全相反

我唯有煮d中和既食物，合我口味但又不失佬味

早幾日突然好想整紅燒牛肉，之前每次整都會配麵但今次配飯

大少爺食得好開心仲提出帶飯，不單止咁連臭包都好鍾意食，佢平日最憎紅蘿蔔都不斷食

牛腱炆到膠質層都成啫喱狀係成功既，尤於今次比埋臭包食所以無加豆辦醬

不過有大量蔬菜既關係所以一樣好味

牛腱     2條

番茄      2個

紅蘿蔔   2條

洋蔥       2個

蒜頭        3粒

八角       3粒

薑           3片

蔥段      幾條

香葉   2片

調味：

沙茶醬        2湯匙

五香粉         1茶匙

生抽            100ml

水              1000ml 或蓋過面既份量

米酒              50ml

冰糖             2小粒

做法：

先將牛腱解凍水落煲加薑蔥，煲滾水後滾佢20分鐘，牛展撈起切件備用

先爆香番茄、洋蔥、蒜頭、八角、香葉，加入牛腱同炒，加入沙茶醬及生抽、老抽、酒兜勻

慢慢加入水後就等佢滾起

滾起後加冰糖兩粒，大約下圖份量大小 

加水然後轉慢火炆大約2小時，牛腱淋便可以

最後試味唔夠鹹可以落鹽，但一定一定要最後先加

*另外煮米粉、米線或麵，煮牛肉既汁做上湯

大少奶's Delicatessen

宣傳你的專頁

情人節快樂~

謝謝大少爺

突然包包大叫：Daddy,有花~

我從書房行出廳見到大少爺突然回家，好感動

要將呢一刻記下

由拍拖至結婚足足16年，我同大少爺仍然如一地視對方為第一位置

人與人相處尤其係夫妻，只要對方覺得值得對你好就會無條件對你好

即使旁邊有壞心地既人胡說八道都無阻對方待你好，像葡萄球菌既人真的可以不理

值唔值得？有無Taste 去選擇你？大少爺自己比任何外人更清楚

16年感情係雙方都好好維繫而來，大少爺覺得我係值得去寵愛便可以~

魚肚情未了

今次輪到雞扎，我係好變態會徹底去運用食材

所以呢個雞扎又出現，其實早兩年我整過一次但總覺得爭dd

今次我用雞湯去餵魚肚，當然雞湯唔係自己淆只係上次用淨有機雞湯

然後今次個味終於同街外一模一樣

而雞呢係鮮雞，我前晚煮煲仔飯買了隻鮮雞然後就留起幾件

大少爺好開心，因為佢又係好鍾意食雞扎既

不過晌FB，好多人話…食雞扎只食腐皮同棉花(魚肚)，點解點解會咁揀食，哈

食譜：

雞件   5件(可參考之前棉花雞篇，有講點醃雞)

火腿扒   1塊切件

蟹柳   5件

冬菇   5隻

魚肚   2件

雞湯     2杯(我用有機雞湯)

腐皮   1塊(剪開5塊長型既)

做法：

魚肚先沖一沖水，再用雞湯加少少水去出水，煮5分鐘咁上下就可以，然後榨乾水備用

將腐皮沾水令佢軟身，先放魚肚、再放上其他材料卷起

卷埋蒸20分鐘便可以，可以用魚肚出水時既雞湯加生粉水做個獻汁淋上去

大少奶's Delicatessen

宣傳你的專頁

ILprimo士多啤梨奶凍杯

就快到情人節，好多女生都希望親手做d又靚、又好味但又要簡單嘅甜品

遇著士多啤梨當造嘅季節，最適合做一個粉紅色又香甜嘅甜品杯啦

整甜品嘅士多啤梨一定要夠甜、夠香而且又要安全衛生

呢個甜品杯用咗100%韓國原裝進口嘅ILprimo士多啤梨

佢嘅特點係美味香甜，甜度高，酸味小而且飽滿結實，口感豐富

加上綠色栽培技術，遠離病蟲及有害物質，小朋友都適合食用

而且同韓國國民卡通Pororo crossover，包裝盒好易認

主角小企鵝PORORO(暱稱為「Po總統」或「企鵝總統」)套卡通幾得意，逢星期六早上香港都有得播呢 

每集都會帶著一班小動物進行不同的冒險，當遇上不同困難或爭吵時，佢地會互相幫助，共同解決難題

士多啤梨奶凍杯

士多啤梨 150g
鮮奶    100g
淡忌廉  50g
糖      25g
魚膠片  5g

面層果醬
士多啤梨  100g
糖   5g


1. 先煮面層果醬，將100g士多啤梨切粒粒再加糖，放入小煲用慢火煮成士多啤梨醬

2. 將150g士多啤梨打成汁用，魚膠片用冰水浸軟身

3. 鮮奶、淡忌廉加糖座熱水至微熱，放入魚膠片

4. 將士多啤梨汁加入步驟(3)攪勻，倒入杯中放雪櫃兩小時以上，食嘅時候面層加上士多啤梨果醬

哼~cotton 雞

話說我表妹同舅母好醒咁買包魚肚比我

我又好醒咁整過百花釀魚肚，再下一城整棉花雞，哼~

其實我唔知而家d酒樓仲有無棉花雞呢樣點心，但我記得大少爺係鍾意食的

無錯！我嘅世果裡面只有大少爺同包包係令我最上心

所以我知道呢個棉花雞大少爺一定喜歡，事實證明佢真係好喜歡

昨晚佢食得好開心，個臭包食雞肉又好開心

自己蒸雞我係會將所有雞皮去掉，而且蒸雞要滑都係我拿手

原本棉花雞會有隻冬菇，但因為我最怕冬菇味(尤其乾冬菇)，所以我唔用冬菇加上雲耳呢

做法簡單

新鮮雞半隻或一隻切件

魚肚   4件

雲耳 或冬菇   隨意

做法：

魚肚洗淨後就用薑、蔥、少少白醋出水，大約煮4-5分鐘

撈出來榨乾水放碟底

雞用鹽(多少少)、薑絲、蔥段、胡椒粉少許、生粉一湯匙、麻油

所有醃料要順以上次序，每落一樣醃料就要撈勻，麻油要最後落就可以包住醃料之餘，雞蒸完後可以保持滑身

如果好似我咁加雲耳或冬菇就先浸軟然後加入雞度撈勻，等雲耳或冬菇都入味

放上魚肚之上靜置30-60分鐘，等魚肚都吸雞既味，就可以蒸

蒸20至25分鐘(視符雞大小)，咁就done喇

另類

今日已經年十一，十日前歡天喜地吃喝玩樂年初一

今日就回復平靜之餘，仲要埋頭苦幹要交既稿

呢個循環既殘忍又現實啊

成個新年都玩得好開心，年初九朋友們上我家團拜

本身想打邊爐，大家一鑊熟又方便，但上得我家打邊爐未免欠了點誠意

於是我又忍唔住出手做party food，其中一款係…另類鵪春蛋燒賣

其實係似蘇格蘭蛋咁有肉包住蛋既，之前我都做過

但通常都會再包麵包糠去炸，而我今次先煎後焗

做出來好好食啊，而且切既時候大家都有驚喜感覺呢！我用最快最方便既方法去焗

實在想再食，哼~呢個都適合小朋友食啊

用豬肉，大約$25做到10粒，鵪春蛋就每烚好剝殼

豬肉加洋蔥粒、鹽、胡椒、半隻蛋白、生粉一齊順一個方向攪

攪到起膠就可以停，然後放入雪櫃半個鐘以上

將肉分成10份，然後就搓圓壓平包入蛋，再包好

放入鑊略煎，唔需要熟表面金黃色及定型便可以

淋上日式意粉醬，再加芝士用200度焗20分鐘或至金黃色便可以

大少奶's Delicatessen

宣傳你的專頁

年初七

今日我正式開工了，又重回不停覆email、不停比人催交draft

大少爺都正式開工，我又再成為包包"日間唯一的玩具"

除了以上總總當然要正式煮晚餐，早幾日表妹來拜年，佢同舅母居然諗到買魚肚比我

我見到包魚肚當然不停去諗煮乜好

最後想整百花釀魚肚，個蝦膠都係自己攪的，因為出面買既蝦膠用機攪唔好食

有時間當然自己攪啦！再加個上湯獻汁

大少爺喜歡之餘，包包都話個蝦膠好食(佢人仔細細已經識分好食同唔好食)

食譜：

魚肚   4塊  另備：薑、蔥、少許白醋

蝦   半斤 +鹽 1/4、生粉 1茶匙、 麻油  少許

雞湯    250ml

鹽   少許

薑絲   少許

生粉水   適量

蟹子或紅蘿蔔蓉  隨意(用來裝飾)

蛋白    少許

做法：

1.先發魚肚，魚肚用水沖一沖，用薑、蔥、白醋加落水度煲滾，放魚肚入滾水3-5分鐘就盛起

盛起後榨乾水切件備用

做蝦膠，我本身會買定d游水蝦放冰格，所以將蝦解凍後就去殼去腸

大家可以好似我咁，買定d蝦趁佢郁時就放冰格，咁d蝦就會夠爽身

如果新鮮買回來去剁蝦膠就會無咁彈牙，用冰鮮蝦都可以的

將蝦完完全全索乾水

再用刀拍扁，逐隻拍到如下圖，將所有蝦拍扁後就用刀剁幾下(三兩下便可以)

加入鹽、生粉及麻油，用筷子順一方向攪

攪到咁上下就將佢撻30-40下，每次撻都用手先撈一撈，等佢唔同方位都撻得到

撻到起膠後就放入雪櫃再雪佢半小時以上

將魚肚灑上少許生粉，再釀蝦膠上魚肚面，又可以加少許蟹子或蘿蔔蓉做裝飾備用

(唔好蒸住，做埋跟住個步驟)

煮上湯獻汁

切d薑絲倒入雞湯煮滾加少許鹽，用少許份量倒入已經放了魚肚既碟中

等魚肚吸收雞湯味道後就蒸15-20分鐘

另外既雞湯就可以加入生粉水煮成獻汁，可以加少許雞白攪勻

最後淋上蒸好既魚肚上

*用雞湯，由於過年間無晒自己淆既雞湯，所以我買了盒裝有機雞湯(無咁多化學劑同味精)

大少奶's Delicatessen

宣傳你的專頁