淆雞

煮兩餐比小朋友其實幾頭痛，包包開始一餐粉麵、一餐飯咁

如果兩餐飯佢就會唔多想食

我帶佢週圍去街去食，出街食我就由得佢食

但食完一或兩餐街外餐後，我就要自己煮多d比佢，因為味精對小朋友唔太好

問題就來了…煮湯麵通常用番茄湯最易煮，但煮得多我都悶

又唔想晌屋企都用盒裝既雞湯繼續比佢食味精，所以我會自己淆個雞湯

等佢即使飲埋個湯都係有益

用雞殼去淆好處係骨有鈣質但唔會似全隻雞咁肥咁多油

再用兩粒瑤柱吊味，當你煮完個湯你會覺得無乜味，但當用來煮粉加其他配料及鹽，你就會飲到雞既甜味呢 ,Magic

煲落一大煲分幾個盒入起，然後放冰格要用既時候拎出來煲熱

而今日包既午餐係紫菜魚卷雞湯米線

魚卷做法：

買鯪魚肉大約$15

壽司紫菜  1塊

用個保鮮袋袋住魚肉，撻20下等佢有彈性

紫菜放底，鋪上魚肉卷起，再蒸8分鐘

放涼後切件，食之前再煎一煎呢

雞湯做法：

雞殼   2隻 -3隻

瑤柱   2粒

做法：

雞殼洗淨後就飛水，咁煲出來既雞湯就會好清

瑤柱浸軟

用2公升水煲滾，加入雞殼及瑤柱

我用Fissler高速煲2號速就只需要煲45分鐘，明火就煲3小時

*煲完出來無乜味是正常的，正如你買盒裝既都無乜味，但盒裝既鹽份高

自己煲完自己調較個鹹味便可以，只要加少少鹽就會變得好夠味

大少奶's Delicatessen

宣傳你的專頁

夏日五花腩

每年夏天我都會整"夏日五花腩"

通常都係椰汁配桂花咁既，但近日眼見荔枝出現了

我呢個荔枝控不顧一切三斤三斤咁食

食食下…覺得可以整呢個甜品喎

深得我心既甜品，基本上愛椰汁味既都會愛佢

呢個組合整出來有百年好合、永結同心既感覺

你信我…我每年整都要整得既絕非手痕之作

今次配荔枝都係好夾既，椰汁絕對平易近人，好多味道都夾得到呢

椰汁層

椰漿  400ml

奶    100ml

冰糖    100g咁上下，其實多與少大家可以試味，我自己試到合適為標準，唔會度到好準

魚膠片  25g (如用魚膠粉用同一份量)

做法：

魚膠片冰水浸軟

椰漿加奶加糖，座水整熱，直至糖溶便可以，加入魚膠片待溶化

放涼備用

荔枝層

荔枝    20粒剪碎

水      500ml 

 (剪荔枝時會有汁流出，可以用荔枝汁+水，總之加埋有500ml便可以)

冰糖     100g咁上下

其實多與少大家可以試味，我自己試到合適為標準，唔會度到好準

魚膠片  25g (如用魚膠粉用同一份量)

做法：

魚膠片冰水浸軟

水加荔汁煮滾加糖，加入浸軟魚膠片

將椰汁層放底，雪至凝固(可以放入冰箱急凍，但要留意唔可以結冰)再加荔枝層梅花間竹去做便完成

大少奶's Delicatessen

宣傳你的專頁

韓戰

是咁的，近來我無乜心機，因為好熱

個人又勁燥，曾經懷疑自己更年期

最後發現只係天氣令我燥底導至後天間竭失心瘋

無心機都要煮，因為我成個6月都好忙，既然終於得閒少少無奶油唔煮

所以決定今星期全部一碟過，昨晚韓式炒粉絲

個重點係一味兩款，有辣同唔辣

辣既係比自己唔辣既係大少爺兩父子

包包居然喜歡食，因為鹹中帶甜，有佢喜歡既蝦、同牛肉，佢又肯食翠玉瓜

個翠玉瓜我用韓國貨，果然係好味d

呢碟係我既加辣版

包包同大少爺既唔辣版.

食譜：

韓國粉絲       半包(大家可以自行加減)

西冷薄牛扒   1件

韓國翠玉瓜   1條

甘筍    1條

洋蔥    半個

木耳絲   隨意，浸軟

蝦       半碗

蒜頭   3粒

醬汁：

韓國豉油或普通生抽   1湯匙

糖         2茶匙

水    半碗

麻油     適量

如要辣就預備韓圍辣醬  半湯匙

做法：

牛扒先拍一拍再切絲，加入生抽、生粉、麻油撈勻

韓國粉絲先用滾水灼到軟身(大約6分鐘)再過冷河瀝乾水備用

先熱鑊熱油炒一炒牛肉至半成熟

所以蔬菜料倒入鑊兜勻

將醬汁所有材料撈勻，倒入鑊至滾起加入蝦

放入粉絲及牛肉兜勻直至醬汁收乾，如果加辣就晌呢個時候加入韓式辣醬兜勻

*我有煎定塊蛋皮切碎放上面呢

大少奶's Delicatessen

宣傳你的專頁

心亂如麻

其實好多人喜歡食麻辣既食物，我唔算太狂熱但又唔抗拒

真正麻辣係麻而不辣，而且有麻香味

麻香係花椒所發出，所以買到靚花椒做麻辣食物基本上無難度的

我喜歡呢個麻辣雞翼，幾麻幾辣自己控制

又易整，雖然晌FB無乜人理我，但我照寫，哼

雞翼   12隻

花椒   1茶匙(磨碎)

辣椒粉  隨意(我用一茶匙，唔知你需要什麼辣度呢)

生抽    2茶匙

老抽    半茶匙

糖       2茶匙

鹽       1茶匙

五香粉   1茶匙

紹酒     1茶匙

栗粉     1茶匙

將雞翼抹乾然後撈晒d調味醃最少兩個鐘，最好醃過夜

花椒我自己攪碎既，街賣花椒粉好流唔香的，自己磨最好

然後煎熟就done喇

奶仔酸辣米線

話說我晌深山久不久會想食譚仔

事緣我住舊屋時食過幾次，但住深山後就懶得去食

時不時諗：到底個酸辣湯點整？

我有諗過係咪酸菜，但應該唔係，酸菜點都會帶少少草腥味

咁個酸來自白醋嗎？今日即管試

得出結論：無論譚仔祕方係乜，我呢個簡易方法做到有9成似

我完全好認真咁加埋最喜歡腐竹、用麻油薑汁酒醃既豬潤同鮮牛肉

呢個真係可以頂住癮，我本身整過土匪雞翼，下次譚仔宴，哼

食譜：

清雞湯   250g(呢個一定要用)

白醋   2湯匙

辣椒   2隻

水   300ml

鹽    1/4茶匙至1/2茶匙(自行試味)

做法：

米線過冷河備用，預備你喜歡材料

如果用腐皮就先浸軟

煮湯底：

清雞湯同水煲滾，加兩湯匙醋及辣椒煮滾，加鹽試味

(想酸加醋、想辣再加辣椒、想鹹當然加鹽啦)

放入自己選擇既配料及腐竹，再滾起後就入米線煮至理想軟度就完成

信我！佢有90個%似，初初加醋及辣椒時我以為唔似，加鹽後就似更多

落埋配料借味就開始一樣咁滯

大少奶's Delicatessen

宣傳你的專頁

大蓉

我終於成功整雲吞麵，好成功好開心

包包人生第一碗雲吞麵係媽咪親手整既

大少爺食了10粒

雖然只有98分，有2分因為無肥肉少少美中不足

但我自己整當然唔想加肥吧

湯底用了雞湯+大地魚，當放雲吞後加埋幾乎做得出街外湯底

雖然我好想放假，但忍唔住寫，加上呢輪廣告多，都希望大家都開心就寫先

食譜：

蝦    1斤

梅頭肉   $10-$15(視乎你喜愛蝦定豬肉)

大地魚   1塊

鹽、生粉、麻油、胡椒粉

分開幾個步驟

蝦…蝦要整得爽有方法的，先去殼及去腸

作將蝦用生粉及鹽撈勻再摔

摔到表面有潺就可以沖水

完完全全索乾水

加半茶匙鹽、2茶匙生粉、胡椒粉及麻油撈勻，放回雪櫃雪2小時

大地魚洗淨，索乾水半煎炸到金黃色

去骨剪碎用用攪拌機打成粉備用

豬肉，正宗既點心或雲吞並非用肉碎做，係將肉切到好細粒再攪至起膠

但我用快方法，將肉切細粒，用手提攪拌棒打幾下再攪就會慳功夫d

攪到起膠

將蝦粒加入豬肉中，加 1湯匙大地魚粉、鹽 1茶匙、胡椒粉、生粉 1茶匙及麻油(落多d)

再攪勻後放雪櫃半小時以上

我喜歡蝦多過肉，所以用咁上下份量包起

用清雞湯(今次用盒裝)+大地魚粉滾起加雲吞再放麵就煮好就done~

大少奶's Delicatessen

宣傳你的專頁

想當年之…戰勝濕疹

相信無人願意同"敏感"做朋友
"敏感"何處不相逢？
亦有好多人都會想問：點解我會同敏感遇上？

幸好！我個人除了"對人"敏感外，都無乜敏感既症狀
大少爺呢…個鼻有d敏感，皮膚平日好地地，潮濕天氣都久唔久會敏感既
所以我大肚時都會覺得BB就算有敏感都唔會好利害吧
加上我都無濕疹，咁應該安心....喇呱

到包包出世時，佢一直皮膚都好好雞蛋咁滑又彈手(媽媽好自豪)
直到4、5個月終於出現我接受唔到既"濕疹"
位置晌兩隻脾仔同頸仲越來越大幅
我呢種完美主義者當然係想發癲啦

於是就將坊間所有對付濕疹既cream、沐浴露買回家
每一款初初幾次有用，之後就又再翻發
每次見到紅紅既濕疹，身為媽咪既我就像天快塌下來既感受
最後當然問醫生意見，醫生就話：你試下幫佢轉奶粉，轉能恩吧！能恩可以防敏既
我見當時都六個幾月大就順便轉雀巢超級能恩2號啦
試了一日三餐後，開始退紅
我同大少爺都好開心，然後就心想：係咪架！
於是身痕既我又試一餐比包包飲回舊奶粉，點知…又紅過
那次我終於知道包包原來一直飲錯奶粉

再去做research先知…原來BB腸道健康會直接影響BB皮膚
奶粉中既蛋白有機會剌激BB腸而引起敏感
當時轉了能恩 1星期後頸上紅印幾乎退晒，從那時起我亦轉了用清水幫包包沖涼
好快就完全好番亦無翻發過

所以我極力去推介雀巢超級能恩
亦好明白能恩係含切割致敏原既pHF水解蛋白配方
更加親身體驗過奶粉對BB皮膚既影響

大家可以去下列網址玩遊戲有機會贏取豐富獎品呢
https://goo.gl/HUu5fK

感恩濕疹無再翻發皮膚都幾好呢

魔鬼身栽

之前整過蜜汁生蠔，可惜…我用了韓國蠔

個賣相又唔靚，隻蠔又縮水，So sad~~~~~

不過…卻不斷被問食譜，我又唔想將咁肉酸既野放上blog

終於…我再重做，今次用廣島蠔，脹卜卜

廣島蠔唔止身栽好，肉質同味道都唔錯

再配上不是冰島的冰菜，今次重做有100分，連進步空間都唔使

哼

廣島蠔…將佢沖水，再用廚房紙完完全全索乾水

灑上生粉，呢個步驟好重要

熱鑊熱油放入生蠔令佢煎封，煎封後就唔會出水的

蜜糖醬汁：

蜜糖   1湯匙(可以用燒烤蜜糖)

生抽   2茶匙

薑汁    半湯匙

水   2湯匙

生粉   1茶匙 

將汁料煮滾(有蜜糖要用細火)

煎過既蠔回鑊至收汁(要手快)便可以了

大少奶's Delicatessen

宣傳你的專頁

包哥焗豬扒飯

我喜歡食大家樂焗豬扒飯，過去做過、寫過好多次焗豬食譜

但個汁都爭少少，又唔明爭乜

今日好認真去整焗豬比包包食，其實每一餐都認真

尤其假期我通常唔煮，比包包出街跟大人食

之後就要乖乖食屋企飯

又深明個仔喜歡濃味食物，我都唔會逼佢食無味食物

(朱古力、糖果、零食係禁品)

想佢食多d開心d煮得好d

估唔到今次個醬汁做到90%相似，原因過往我一直只用茄膏去整，但原來加少少茄汁(ketchup)，整體個味就不同了

同埋豬扒只需要用鹽、蛋白及生粉去醃，做出來豬扒較軟熟，又唔會過多醃料令個飯有其他味撈埋

當然…包包媽咪唔係流的，晌醬汁入面加入紅蘿蔔粒及洋蔥粒，佢唔覺唔覺就食埋

哼~

食譜：2人份量(我將個份量寫大佢，因為我相信通常一煮就一家大細都食)

豬扒   2-3件 (醃料：鹽少許、蛋白半隻、生粉半湯匙，順序撈勻佢)

飯   2碗

雞蛋  2隻

番茄  2個

洋蔥  半個

芝士   隨意

醬汁：

茄膏   2湯匙

茄汁   1湯匙

鹽   少許

糖    1湯匙

水    大半碗

麵粉   1.5湯匙

做法：

剩下蛋液用來炒飯，熱鑊熱油倒入蛋液，加入飯快手炒勻，可以加少少鹽

豬扒醃好後，沾上蛋液去煎，煎到半熟或微金黃色便可以

番茄、紅蘿蔔、洋蔥粒爆香，可以另加一粒蒜頭

然後分兩次加入麵粉兜勻佢，加入茄膏兜勻分兩次慢慢加入水煮滾

加入茄汁、鹽及糖，試味後煮至開始杰身便可以熄火

汁上豬扒及飯上，灑上芝士用200度焗爐焗10分或以上及芝士溶後呈金黃色

漏了影豬扒既相，我煎完後剪好晒成粒粒方便個仔食，最後佢只食淨番茄皮呢

大少奶's Delicatessen

宣傳你的專頁

防敏感BB包

好多BB 10個月開始會食少少麵包

甚至會好喜歡食麵包

麵包係BB副食品好重要既其中一樣

不過…街外麵包為了令其保持鬆軟就會落好多添加劑

普通一片方包裡面都已經含有大量添加成份

所以麵包都係自己整既好，當然好多家長都有麵包機

從前我係自己用手搓麵包既，但自從有了包大人都買了麵包機方便自己製造麵包

整麵包其中一個成份係牛奶或奶粉，因為奶會令麵包質地柔軟

但1歲前既BB用牛奶等等怕會敏感

所以當時我係用包包食開既能恩奶粉去做

能恩係pHF水解蛋白配方，咁就唔擔心佢會對麵包中既牛奶蛋白成份敏感

另外…麵粉最好都係用有機既

 食譜：4個
高筋麵粉    125g
水     100ml
能恩奶粉  2茶匙
糖    5g
鹽    1g
乾酵母    3g
牛油 5g(放室溫)

做法：
*如果用麵包機，可以在搓粉及第一次發酵後取出再直接做 step 4及以下步驟

1)鹽與糖放盤底，加入高粉及奶粉，然後加入酵母，最後分2次加水搓勻

2)搓3分鐘後將麵糰撻數十次至不黏手再加入牛油，再撻至有薄膜

3)第一次發酵30度以下60分鐘，排氣、搓圓

4)搓成一個圓球後分割相等份量，每份再搓圓，靜置15分鐘

5)整造型後35度發酵45分鐘，再入爐180度焗至金黃色

用180度焗15-20分鐘或呈金黃色便完成
PS: 如果擔心BB對牛奶等等有無敏感唔敢試住，可以花小小時間去呢度幫BB test左先: https://goo.gl/wUdMrx

#資料由雀巢營養天地提供 #能恩麵包 #

下圖：第一次發酵後整造型

第二次發酵完成

用紫菜做眼及鼻