經理，早晨！

話說教會遲d有個活動要做個早餐會

咁大家開會時都頭痛茄汁豆問題，一來難預份量二來成本

咁開會期間我心裡面就諗：其實應該唔會難丫

於是我昨日就買黃豆去試整，其實用高速煲分分鐘就好快整完

但我今次無用，因為我好想大家會做，無高速煲其實都唔難做只不過係煮既時間耐d

而且佢係用新鮮番茄去煮，同罐頭近乎一樣味道但無咁咸

比小朋友送飯就安心好多呢

我參考過唔同食譜去整，事不而遲睇食譜，哼

有機黃豆  150g(其實普通都可以，我晌超市買就買有機)

大番茄  3個

檸檬    半個

鹽    少許

冰糖    1小粒

做法：

將黃豆浸過夜，然後就加冰糖同1茶匙鹽去煲佢60分鐘

番茄界十字，然後放入滾水大約30秒

再浸冰水起皮

咁樣就可以預備做喇

將番茄切粒，然後加500ml水、放埋黃豆入內，加半個檸檬汁及少許鹽

用中小火煮一小時 (如果唔夠鬆化可以煮耐d)

當豆去到你理想軟度，汁又濃晒後再試味

味道都夠時就加生粉水再煮至杰身 

大少奶's Delicatessen

宣傳你的專頁

未諗到

包包今星期仍然係返一小時，但又未有校車，間學校位置有唔太方便

車只可以停到下面個停車場再行上去，所以今星期每日湊佢返學等一粒鐘然後湊佢放學都幾麻煩

仍然騰來騰去一星期

上星期忙住陪包包去吃喝玩樂，都無乜點煮過飯

係昨晚留晌屋企晚飯先叫有得post下，呢個係大家都熟悉"斑蘭葉包雞"

食泰菜都會見過，通常一個拼盤裡面最後先食嘅

一直都想試整，直到上星期買斑蘭葉焗蛋糕後就一次過整埋

佢唔難整但又唔會係特別好想食，但當斑蘭葉一遇熱傳出香味就已經神魂癲倒

好鍾意斑蘭味道呢

雞扒   1-2件(視符你需要)

香茅   1枝

黃薑粉   2茶匙

鹽    1/4茶匙

魚露    1茶匙

斑蘭葉    8-10條(印尼或泰國材料店有售)

做法：

香茅要拍薑咁拍佢先會出味，所以要拍佢，狠狠地拍再切段

雞扒索乾水切件再將所有調味料加入去雞中撈勻醃1小時以上或過夜

斑蘭葉屈曲成咁樣

葉尖向下屈做成一個結咁

變成一個小兜

再塞件雞入再用另一邊葉封口，如果雞太大件就將葉捲多一圈

總之四邊都封實便可以

有d唔實就可以用牙簽拮實

我用半煎炸方式，大家可以炸，但落鑊之前要用再將葉抹乾否則會彈油

都可以焗得無咁好食

醬汁可以就咁用泰式雞醬，但我好怕雞醬

所以就自己用青檸、魚露、糖、辣椒、芫茜做成酸辣汁伴食

大少奶's Delicatessen

宣傳你的專頁

明閣

早幾年經常晌唔同餐廳做試菜，有一段時間東跑西跑

當然而家我將心力都交比包包，甚少出席食友間飯局，但好朋友叫到就一定到呢

今次食午餐地點：明閣

明閣晌康得思酒店內，康得思酒店好陌生嗎？其實係從前朗豪酒店(我自己都要習慣下新名呢)

對上一次去明閣都已經相隔差不多兩年，但味道依然有水準

先來明閣三小碟，有至尊蜜汁叉燒、金箔銀稔千層豆腐、芹香海蜇頭

金箔銀稔千層豆腐 呢個豆腐特別之處係裡面其實一層一層

中間夾住銀稔醬，稔醬係開胃之選加上清清地豆腐係炎夏恩物

點心有帶子羊肚菌紅菜頭餃

呢個個皮顏色做得好靚，羊肚菌配帶子互相唔會搶走本身鮮味，但又有唔同質感

蝦餃及春卷

茶壺松茸竹笙清湯

松茸+竹笙+清雞湯睇落真係好清，但味道係好鮮甜，松茸香味係香得來唔會好搶味

湯真係法而鮮甜

龍皇披金甲

呢個係我覺得好好食菜色，將蝦膠釀晌魚肉上再煎香

面香脆內有彈牙蝦膠再有嫩滑魚肉，要將佢做得好唔容易！但師父當然可以掌握得好好啦

拍蒜白菜苗配窩燒滋補竹絲雞炒飯

細個時，爸爸帶我去爸噴煙雪糕，當年餐廳好興用乾冰做雪糕裝飾

我每次都會"嘩"

今時今日我見到乾冰仍然會有呢種"嘩"一聲反應，係情意結

當一片乾冰煙霧完時，定一定神就享用甜品

呢個拼盤有

左手邊起：燕晶凝   上層透明層有燕窩，下層芒果布甸

菊花杞子糕、豆腐芝麻布甸最後有香芋水晶糕

各有特式及味道，但每一樣都會太甜又令今餐更加圓滿呢  

大少奶's Delicatessen

宣傳你的專頁

新開始

包包上學了，我成個星期都陪佢玩、陪佢去食等佢開學前開開心心

昨日第一日返學當然無問題，因為我可以陪上堂

下星期自己上堂都應該ok，佢平日學習班都自己上堂

我無乜大志，只希望佢開心！人生道路上帝自會安排，要明白人能夠掌握的好少

我自細被人睇小、讀書唔叻、單親又無媽咪照顧、唔識煮飯做家務

成日都聽埋冷言冷語但而家我起碼有自己事業、照顧家庭另一半好滿意，無長輩幫忙湊到包包

證明人只要肯努力，唔需要太過逼自己！加上信仰我知道上帝意念高過人

包包人生唔刻意做太多鋪排，我只能夠做媽媽本份，陪佢面對一切順逆

成個星期都無乜煮，唯一係斑蘭蛋糕，好想食就去煮

斑蘭葉           5條

暖水              50ml

糖(A)            45g

蛋黃             3隻

油                 35ml     

低粉            65g

泡打粉        1/2茶匙

蛋白霜材料：

蛋白            4隻

糖(B)           45g

做法：預熱焗爐 170度

先將斑蘭葉剪幼了碎，然後加入暖水打成汁

隔渣取出35ml備用

點解落50ml水只用35ml？因為水份唔夠，d葉太乾會打唔到成汁

用晒所有水份蛋糕會太濕

蛋黃加糖攪勻，加入油及斑蘭汁，攪勻後篩入低粉及泡打粉，輕手拌勻

蛋白企身後，放入麵糊中用Fold in方法輕手拌勻，倒入中空模中

模不能有任何油份，唔好無啦啦幫佢搽油

160度焗35-45分鐘(視符焗爐而定)

大少奶's Delicatessen

宣傳你的專頁

防敏之體驗

近日包包不停流鼻水又打噴嗤，每朝早都好似打仗咁
到中午會好dd，到晚上又再變鼻涕蟲
如是者已經成個星期
後來我每日帶佢落樓下個公園玩，比佢曬下太陽吸收維他命D
的確好好多，但仍然唔斷尾…
最後我將空氣清新機個濾網更換、再用鹽水幫包包洗鼻
包包就好返好多
其實屋企即使乾淨但香港都係好大灰塵嘅地方，只要稍為疏忽致敏源又會跑出來

還有大少爺爸爸，佢飲得太多咖啡的話頸上就會出濕疹
後來又試過每日都食糯米卷又會出濕疹
早幾年佢突然出濕疹，百思不得其解，濕疹唔係應該由小到大有先會有咩？
點解佢幾十歲人先開始有
後來我不停問人、做research先發覺濕疹跟本由腸胃引起
當腸胃唔好，益生菌唔夠的話，就會有機會引致濕疹

至於我自己…我有腸胃過敏的
好容易腹瀉，相信係遺傳的
我爸爸就係腸胃過敏，去街會經常搵洗手間
佢最喜歡行銅鑼灣及尖沙咀，每當吃過午餐或晚餐就會要找洗手間
所以我對呢兩區洗手間位置非常熟悉，加上我自己都係腸胃過敏
每次去街一feel到腸胃開始想呼叫時，就會行完目標洗手間位置
雖然腸胃敏感並未導致我皮膚出現問題
但我每逢荔枝、芒果季節就會瘋狂咁食，食到個人燥熱起紅點為止先停止

敏感其實無處不在，空氣唔好會鼻敏感、腸胃唔好就會皮膚敏感
但其實唔係完全無得避免，搵出敏感源頭就會容易處理
等於包包近來鼻敏感就要注意家居空氣及環境
大少爺就要注意唔好食太多糯米及咖啡

而我就要注意出外用餐唔好食太剌激或奶類食物，至於荔枝同芒果…我會義無反顧讓自己沉淪下去，直到紅點警告訊號出現(囧)

至於BB，我會建議要揀有助防敏嘅奶粉，因為奶粉中蛋白質有機會令BB消化唔到而留係腸胃中，久而久之就會由腸道誘發濕疹或其他敏感
幸好…自從轉飲含有pHF水解蛋白配方嘅雀巢®超級兒童能恩®4號奶粉後，包包腸胃十分好，直到家陣飲到雀巢®超級兒童能恩®4號奶粉(https://goo.gl/YnU1uL)仍然飲緊，皮膚及poo poo都十分理想呢~

#資料由雀巢防敏1000天計劃贊助 #敏感 #腸胃過敏

角煮

雖然昨日下午已經打完風，但我已經唔想出街

留晌屋企就係休息同埋煮

一直好想整豚角煮只因為買唔到d四四正正腩肉而未煮

雖然我並唔鍾意食，但呢個大少爺鍾意之外，對煮果一part我係好有興趣

一定要用腩肉去煮先做到似街食效果，同埋個汁配上蘿蔔、蛋又好好食

整定佢可以配拉麵或係飯都可以呢

食譜：

豬腩肉    1件(我用日本冰鮮既，佢有3條長身的)

大家如果鍾意食新鮮或老較厚身可以自行選擇

白蘿蔔    1條

紅蘿蔔  1條

洋蔥   1個

昆布   1大片(我一除4份打結用)

蒜頭    1粒

醬汁：

醬油    100ml(如果用生抽就用90ml+10ml老抽)

冰糖   1小粒

味醂    30ml

水        蓋過肉

做法：

將豬腩肉煎香

其他材料洗洗切切

洋蔥、蒜頭、其他蔬菜爆香後，豬腩肉回鑊兜勻

加入所有醬汁材料煮滾，如果想加蛋，可以先烚定蛋然後當汁料滾起時放埋入去

最後加粒冰糖，可以試味，唔夠鹹就落醬油

不過會越煮越有味，當水份收時就會濃，用中小火煮2小時或肉質完全軟身便完成

大少奶's Delicatessen

宣傳你的專頁

打氣

年紀越大空間越小，所有心思放進家庭、事業甚至生活鎖碎事當中

反而忽略了自己感受

適當時候為自己尋回快樂感覺亦是一種釋放

集中為自己做一份午餐，除了可以將腦內負能量釋出，還可以讓美味滲進味蕾當中

韓式芝士焗雞用甜甜辣辣的味道為自己打氣

雞扒   1件

麵粉   適量

蒜頭   2粒(切片)

醬汁：

韓式辣醬  1/2湯匙

蜜糖     1茶匙

水       1湯匙

(以上撈勻)

芝士     隨意

做法：

將雞扒切件用鹽醃一陣

雞扒沾上薄薄麵粉後煎香上碟備用

煎香蒜片加上撈勻醬汁，雞件回鑊兜勻

然後灑上芝士放入焗爐用 200度焗8-10分鐘

私竇文章：
個牛肉飯，呢個係可以做蒸飯或煲仔飯，最特別之處係將所有鮮牛肉南切成碎粒再攪到佢滑身做成牛肉餅，味道質感比用碎牛肉做牛肉餅好得多
雖然張相我影得唔好，但真係好值得推介
如果明天真係打風，大家可以買定鮮牛肉去整，咁就唔使食罐頭了(當然我例外，哈)
天平生活: http://blog.mreferral.com/lifechannel/

沙冷hea

早幾日招呼朋友及小朋友上我家，當日好匆忙地朝早先買材料整

晌一田邊行邊諗煮乜，直到見到韓國午餐肉於是就整韓式飯卷

因為比壽司容易整，而且個味就一定唔會錯

結果當日個個都食得開心，晌一田有韓國小童泡菜，大家可以用小童泡菜整又得

呢d正宗party food容易做之餘通常又唔會抗拒咁囉

據聞明天會打風，咁今次可以整飯卷唔使再食餐蛋飯啦啦啦

食譜： 1個(大家自己可以預份量)

飯一碗，最好當然用韓國米或珍珠米啦

煎蛋一隻

青瓜條   1條

韓國午餐肉  2片切成條

泡菜   隨意

紫菜一片

芝麻   少許

飯先用少少鹽(大約1/8茶匙)及麻油大約半茶匙及芝麻撈勻

*可以試味，如認為想咸少少可以再增加

*飯要放涼至微暖

放上紫菜、鋪上飯，手沾少許水將飯壓平

鋪上餡料，然後卷起再靜置5分鐘就可以切件

大少奶's Delicatessen

宣傳你的專頁