新玩具2

忙到爆，我會晏d覆留言，等等啊~

話說早幾日買新玩具，今次買buffet casserole

之前我一直只會諗買鑊，因為我好少炆嘢

不過....又好身痕想再買

之後星期五買牛肋條時，諗點煮法、再諗用乜炆呢？

就行過去睇LC，再然後咪買咗囉

呢個款我好鍾意

琴日就試整紅酒炆牛肋條，噢！實在好味

用大量洋蔥、紅蘿蔔、西芹、basil去炆，又再用蔬菜去感動牛牛

炆完可以原鍋上，連碟都慳番唔駛洗啊！哼~

不過...影相時個鍋邊太熱抹唔走d汁添！

忍唔住 @ Dan Ryan's

今日約Fiona去行陣街
買番skin care，仲想買對鞋做姊妹著
但買唔到啊！
當你有目標去買，就會買唔到

Fiona要返娘家食飯，我就等大少爺放工陪我晚飯

噢！如果我屋企放得落呢set嘢就好喇

同大少爺去Dan Ryan's晚餐，要快快食，因為要睇麥提爽

個muffins真係好好味

叫兩個晚餐

頭盤：有caesar salad

啤酒蝦

主菜：肉眼扒

good~

白汁煙肉意粉
個意粉食唔晒，淨成大半碟，結果包起拎返屋企

甜品：
brownie配雪糕

今日同Fiona行完街，陪佢去city's super買d嘢
之後見到牛肋條好吸引，我就買返屋企


因為個牛肋條...................................我就忍唔住又去Le creuset買隻連蓋鍋

明明下星期有清倉
但我唔爭氣，等唔切咁
又係買橙色，我第三本書分分鐘成本都橙色
下次再買要買第二隻色，雖然我勁憎橙色同食橙
但呢個品牌既橙又鍾意喎

聽晚既晚餐就用呢個新玩具整

仲有呢個
大少爺猛問係乜？
係我成日去去city's super買餸，次次都會望下
每次燒雞就會問自己點解無買
今次記得一定要買先
係燒雞時，流出既汁，用呢個吸吸去吸起d汁
然後再淋番上雞面，咁樣焗隻雞就唔會焗乾
仲可以將精華淋番上去呢

$42咋，好好用

Le Creuset 9月12至18日清倉大減價

銅鑼灣怡和街88號3樓富豪香港酒店維多利亞會議室，上午10:00至下午6:00

不過…次次佢做清倉都會人頭湧湧架

again again

今日又再整口水雞
事緣上次整過後，大少爺經常都提起
趁有時間就整啦

其實唔難整，好快手就整好喇！

今次加多辣油，又加多辣椒，然後當然辣過上一次
哼~既程度都增多呢

斬隻雞比上次易，因為有經驗嘛
而且我開始唔怕無頭雞
但有頭既依然怕呢

早幾晚去食姊妹飯
我依然見到個"咦"頭，同雞頭都不由自主大叫
仲伏落vanlily樹啊

食譜：

浸雞料：

花椒    2湯匙
紹酒    2湯匙
薑        3片
鹽        1湯匙
蔥        2條

雞洗淨；煲滾約1,000克水（以蓋過雞面為準）
水煲落薑蔥、花椒包、酒及鹽，水再滾落雞，雞胸向下
水再煮滾後轉細火，蓋蓋焗煮約15分鐘至雞熟。
大盤內加入冰水及冰塊，移雞至盤內，擱至冰溶及雞身變冷。

辣汁料：

油              2湯匙
花椒          1湯匙
紅尖椒      3隻 (去核切片)
蒜頭          4粒 (剁茸)
頭抽          3湯匙
芝麻醬      1湯匙
辣椒紅油  3湯匙
糖              1湯匙
白醋          2湯匙
麻油          2茶匙
鹽              1茶匙
冷開水      1/4杯

辣汁做法:

鑊置中火上，落花椒炒至香氣散發
油２湯匙，加入紅尖椒及蒜茸略爆移至大碗內
按次序下頭抽、芝麻醬、辣椒紅油、糖、白醋、麻油、鹽及冷開水拌勻

將醬汁淋上已斬件及去骨雞件上，灑上蔥粒、花生、芝麻

四十九

大少爺好鍾意食銀鱈魚，我都係

自從某一日我愛上魚、就不停食魚

而家已經多數食魚同雞，比牛肉更多呢

銀鱈魚有個好處，放入焗爐焗都唔怕會overcook

絕大部份時間都能保持嫩滑呢

今次我用京蔥鋪底，用日式鰻魚汁去焗

焗到咁上下就掃汁，出來效果好好！

呢款做法又會比我整七七四十九次呢

哼~~~~~

沅紗街

寫新書前我要做多d想做既事，否則閉關時會籮籮攣

星期六同大少爺去敗家

敗完係時候晚飯，但星期六晌香港區好似週圍都人頭湧湧

噢！不如落大坑食晚飯

就去沅紗廚房

我鍾意佢有卡位，兩個人自成一格呢

白玉葡萄，係招牌菜

賣相都幾靚，但一邊食大少爺一邊講：冬瓜做成一粒粒再加獻汁

你都得啦！

哈！多謝晒喎！

其實我覺得佢幾好味呢

鮮拆蟹肉蛋白冬茸羹

呢個都幾好味，打算自己整既之一

蒜泥白肉，呢個都好味

尤其粉皮、夠薄、又滑

以後話人"粉皮"，都可能係讚美

你個粉皮又白又滑！哈哈

焗螺........都ok啦

煙燻豉油雞

好重煙燻味，如果唔受得煙燻味既話

就唔好試喇！因為實在太大煙燻味呢

落得大坑當然去埋小甜谷

我要芝麻糊拼杏仁露、大少爺要合桃露拼芝麻糊

都唔錯！唔太甜呢

降溫

大少爺有一日放工後同我講佢好想食綠豆沙
強調要凍既
噢！當然我明白夏天想食凍呢

呢幾日真係好熱
出到街令我覺得自己好似一塊曲奇餅
係晌焗爐焗緊既曲奇
好熱.....好熱

今次買齊香草(即係臭草)、昆布去煲綠豆沙
但唔知點解，我唔鍾意香草啊
唔鍾意呢種味呢

係乜？

以下既係乜呢？

答案：杏仁豆腐麵

係用杏仁豆腐做既，我睇跟甜品書整

我肯定！好肯定！絕對肯定大少爺就算食落口都未必知係乜

我唔明點解男人既味覺好似有問題

次次都要我講係乜先會知，永遠問佢都答錯！

佢地唔係用味覺去判定，係靠估呢！

吓??????????

從前........

有一位太太，佢知佢先生夏天唔願飲湯就煲涼茶，可以雪凍比佢飲

有一日，位太太煲五花茶

放涼後就同先生講：你幫我入樽丫！唔夠樽就入盒吧

之後位太太就無理過d涼茶

第二日，先生滿心歡喜地從廚房拎一個盒出來，另一隻手拎住一隻匙羹

然後...太太就問：咩嚟架？

先生答：五花茶沙冰

太太出現無語問蒼天表情！

就快連飯餸要先雪凍大少爺先肯食呀

加頂帽

話說....今日netvigator唔知係唔係又有問題
攪到朝早好多網頁都睇唔到
但上網上行網頁又唔見有告示喎
打去CS又無人聽
到底.....可唔可以改善下呢？
得個知字都好丫！

琴晚既晚餐係蕃茄牛肉飯+煎蛋，(vanlily話加煎蛋叫做加頂帽)
係大少爺話想食
整呢味蕃茄牛肉，我當然成機整碟頭飯啦啦啦啦啦啦啦
我問佢想要免治牛肉定係牛肉片
佢話牛肉片
最後當然整牛肉片啦

隻蛋用煎蛋既圈圈先煎得好

其實....我仲未識煎蛋架！

好咖

今日鐘點姐姐上來，托佢幫我買牛腩

好手痕想炆牛腩呢

炆定今晚有得食！

其實我鍾意食印度菜，重慶大廈果d呢

鐵板烤雞好好食，咖哩又重香料

不過....而家無人肯陪我去食啊！噢