輕輕鬆鬆

之前胃病我戒好多食物，強制性地唔比自己食到會胃脹食物

即使康復後我仍小心奕奕去選擇

加上體質寒涼更加小心飲食

但如今我決定想做就做想食就食，只要唔係過量都比自己去食

所以昨晚我煮"松葉蟹豆腐羹"，蟹、豆腐、菇三樣都係要戒食物

不過我個胃明明都好返咁滯，仲戒乜呢？加上唔過量食物本身又有營養又做乜要逼自己唔食

煮完後覺得非常好味，最重要佢都好容易整

蟹肉本來我想買隻肉蟹拆肉，但又懶

又唔想用蟹柳，寫食譜既人就係要堅持食物質素同味道，但大家喜歡或者方便當然可以自己選擇用蟹柳

跟住我就買松葉蟹鉗拆肉整，咪以為佢無味喎！佢鮮味依然

用來煮呢個豆腐好好味

基本上煮呢個無難度一鍋就掂，你想做湯羹個獻就唔好打咁厚

想做配飯菜式就杰身少少都可以呢

人生已經好勞累，有些時候煮得輕鬆食得開心就可以

食譜：

蟹肉         適量

我用松葉蟹鉗肉、你可以用鮮蟹拆肉、又或者用蟹柳都一樣得

本菇      1盒

豆腐    1件

蛋白   1隻

薑   2片

清雞湯       500ml

水    250ml

鹽    少許

生粉水   少許

做法：

我晌一田買呢包蟹鉗用，佢仍有鮮甜味的

可以就咁食，方便又唔貴

日本滑豆腐

將雞湯加水加薑滾起，放入蟹肉煮一陣等佢出少少味

將蟹肉撈起備用

加入本菇及豆腐煮滾，加少少鹽試味，再加入生粉水令佢微微杰身時

最後放入蛋白做用細火煮到成蛋白

最後可以將蟹肉回鑊

 *蟹肉可以上碟時先鋪上豆腐面，再灑些蔥花

*如果做滑羹就唔好加咁多生粉水，食時落少少胡椒粉更好味

*做餸的話可以調少d水份同埋加多少少生粉水

先睹為快及生活雜粹粹
 Pls Follow My IG
 https://www.instagram.com/taisiu9_aubrey

/ 大少奶's Delicatessen

宣傳你的專頁

大少奶有禮 - 尚禮坊花店

當已經好忙嘅時候仲要諗下送花 送禮比親朋戚友實在係好一個煩惱
大時節送禮籃都係好選擇，又食得又睇得又夠得體
我收到 @尚禮坊香港花店 、果籃店個 禮籃 時都真係"嘩"一聲
一個禮籃入面有三間名店嘅朱古力、餅乾、紅酒、朱古力酒、黑松露醬、咖啡等等，價錢仲要好合理
大時大節好快就到我收到禮物時都希望送份禮物比大家：花藝禮品組合$390
參加方法：
只要like尚禮坊 FB page: https://www.facebook.com/givegiftboutique/  (記得cap圖比我睇)
再tag 3位朋友
再再回答一條問題：最想大少奶整的食譜，可以寫少少點解想我整(我想知大家喜好呀)
我會揀出最吸引到我成為優勝者

笑忘書

好似好耐無過牛牛，人大了就唔想食肉

不過我唔食包包都要食，所以早幾日又再炆"味噌燉牛肉"比佢食

其實我唔鍾意食柱候味、或者中式味道炆牛

總覺得那些醬料太鹹同埋味道無乜變化

所以我用味噌、味醂去炆，炆到d牛肉鬆軟入味最好食，哼

唔知點解今日好想唱下歌，可能睇 kenny演唱會既片太多

擁有同樣寄望　彼此亦有苦況

棉花糖從成長中曾送你愉快天堂

經過同樣跌盪　可會學會釋放

童話　情書　遺書　尋找　答案

曾經...曾經...回憶當天三歲的波板糖

多謝各位~

食譜：

牛肋條      1磅

白蘿蔔   1條

甘筍    1條

大蔥     1條

洋蔥    1個

蒜頭    2粒

味噌    2湯匙

醬油或生抽    1湯匙

清酒         25ml

味醂    2湯匙

冰糖    2小粒

薑、蔥    適量

做法：

以上所有材料基本上一田有齊，日本蘿蔔好食

牛肋條加凍水落鑊、再加薑、蔥少少酒煮滾

滾佢20分鐘等佢釋出血水

爆香洋蔥、大蔥、薑蔥、蒜頭、甘筍就將牛肋條回鑊兜勻

加入味噌、味醂、醬油、清酒兜勻 

加入水蓋過面，再放冰糖煮滾後較細火

細火炆1.5後加入白蘿蔔再炆半小時，如果唔夠味可以再加味噌，全程唔好落鹽直到永遠

先睹為快及生活雜粹粹
 Pls Follow My IG
https://www.instagram.com/taisiu9_aubrey

/ 大少奶's Delicatessen

宣傳你的專頁

節二

花雕上湯龍蝦焗伊麵

大家係我動力，否則呢個時勢會無心機寫過節食譜

過節食譜要比較得體，雖然話就話一家人食飯但心理上都想煮好d

呢個一直都想整，其實我都幾鍾意食但大少爺敏感唔可以食太多所以少整

上湯焗做法最簡單但又叫做幾得體

如果唔係寫過節食譜，我會選擇用蝦球而不是龍蝦

上湯焗唔係真係要放焗爐，只係經過一個焗煮程序，比起芝士焗就少功夫

如果人少少整個龍蝦伊麵加個肉或蒸海鮮同菜已經好好，今年明白齊齊整整食餐飯已經幸福

食譜：

龍蝦  2隻

伊麵   3個

清雞湯   500ml

花雕酒   2湯匙

薑        2片

乾蔥頭    5粒

蒜頭      2粒

牛油     10g

鹽       少許

生粉水     適量

做法：

龍蝦可以叫海鮮檔代處理，自己整都唔難，我先將龍蝦頭同身分開，晌尾部挑出蝦腸再斬件

龍蝦沾上生粉再泡油，唔需要好多油，我只係比平時落多少少去半煎炸佢，唔需要熟只需要煎封肉質表面

伊麵先烚熟盛起備用

燒熱隻鑊熄火落牛油，牛油溶化後加入乾蔥、蒜頭同蔥，再開火兜勻

加入龍蝦兜一兜贊酒兜勻，再落清雞湯及鹽

加生粉水兜勻轉細火蓋上鑊蓋焗3分鐘便完成，將汁同龍蝦淋上伊麵上

先睹為快及生活雜粹粹
 Pls Follow My IG
 https://www.instagram.com/taisiu9_aubrey


/ 大少奶's Delicatessen

宣傳你的專頁

節前

本身唔想寫中秋節食譜心情上都有影響

但我諗到大家就打消呢個念頭，同大家一起渡過了13年

中秋節雖然大家各自食飯，但如果我既食譜大家用得著都叫做一起過節丫

過節我就諗起雞，富貴雞寫過好多次，白切雞、油雞又太普通

想整南乳吊燒雞，但唔炸又點可以脆？

想起早前我整燒鴨其中一個步驟就係風乾再搽上麥芽糖同醋

其實風乾呢個步驟我都會做，但整上皮水就中式先用個著

焗完出來個皮係又薄又脆，如果大家肯炸就最好，做出來就係街外炸子雞

不過連我都唔肯炸又應該無乜人會去炸呢

呢隻雞好好食，哼

食譜：

雞          1隻

雞醃料：

南乳    1件

生抽   80ml

糖    2湯匙

老抽   2茶匙

酒   2湯匙

薑蓉    半湯匙

蒜頭        3粒(磨蓉)

乾蔥頭       5粒(切片)

上皮水材料：

麥芽糖      1湯匙

白醋   2茶匙

熱水   20ml

做法：

預備配料

將雞醃料撈勻，加入配料備用

將醃料放入密實袋，再放雞入袋與醃料混合封好，放入雪櫃醃過夜

一晚之後就將雞放上架上，煲一小煲滾水

當水大滾時就直接淋上雞上(呢個係淥皮程序)

淋完滾水後將隻雞繼續放上架上靜置風乾

最好風乾到5-6小時

焗前一小時，將上皮水材料撈勻再搽上雞面

搽完一層上皮水靜置20分鐘，再搽多一層然後靜置多40分鐘就可以焗

預熱焗爐200度上下火，再焗佢30分鐘(或者隻雞完全轉成紅色)

*焗好隻雞後放涼15分鐘先斬或剪開

*焗爐有燒雞功能就最好否則放上架上面焗，你見我會將隻雞剪開一半打平放就係方便焗

*焗爐火力較大的話可以先蓋上錫紙焗佢15分鐘，再拎走錫紙焗佢15分鐘或變成炸子雞顏色

*雞翼尖最好先封上錫紙

*氣炸鍋都可以的

先睹為快及生活雜粹粹
 Pls Follow My IG
 https://www.instagram.com/taisiu9_aubrey

/ 大少奶's Delicatessen

宣傳你的專頁

繼續

繼續帶飯菜式，有一晚我又因為新聞畫面失眠

於是夜闌人靜之時就睇IG，突然見到有一個畫面吸引到我

就係一個韓式飯卷包住蛋蛋又包住唔同材料

由於夜已深我就無開聲睇，睇佢幾個畫面後就決定搵日整

我一見到個蛋就諗可以混入蔬菜，等"厭菜包"不能夠挑得到出來

話晒做人呀媽都應該要道高一尺 魔高一丈 ！哼

韓式飯卷同壽司唔同，韓式飯卷唔係落醋同糖係落鹽同麻油

加上佢係暖食唔使雪，所以帶出去野餐都得，帶飯都可以

所以一定寫比大家

食譜：

三文魚     1件

四季豆4條   或其他豆類 

紅蘿蔔         1/2條

熱飯           1碗

壽司紫菜      1片

雞蛋          2隻

鹽         1/2茶匙

麻油           少許

芝麻    隨意

做法：

先將四季豆、紅蘿蔔切粒、三文魚搽鹽

蒸 15分鐘        

將三文魚壓碎，再加入豆蛋紅蘿蔔撈勻

雞蛋加1湯匙水撈勻，再同三文魚等等混合(可以加少少鹽)

平底鑊搽一層油，倒入平底鑊內用細火煎

煎到半凝固後輕輕將蛋卷起

成為蛋卷後壓一壓實佢，再用小火煎多一陣

飯趁熱時加入鹽、芝麻、麻油撈勻

壽司墊放上紫菜再鋪上飯

放入蛋卷再卷起，卷起後靜置5分鐘就可以切件

切時刀可以沾少許水防止飯粒黏刀

先睹為快及生活雜粹粹 Pls Follow My IG https://www.instagram.com/taisiu9_aubrey/ 大少奶's Delicatessen

宣傳你的專頁

巨獻

話過繼續寫帶飯菜式，除了乾身既食物有時都要有d汁

尤其小朋友好難完全唔整少少汁菜式比佢送飯

同埋帶飯最難帶係乜？其實係菜

d菜 reheat又難、焗住又變色、質感又會變見到都唔想食

呢個時候就用d襟放菜蔬比較好，今次寫呢個 燒汁雜菜豬肉卷那個"厭菜包"都喜歡

裡面有四季豆、粟米仔同甘筍，煮得耐都仍然保持到顏色加上用豬肉片卷住佢跟本都費事同你挑走d菜

配上一個自製燒汁可以送到飯，帶飯帶呢個都幾型吧！哼

食譜：

火鍋豬肉片    1磅

珍珠筍    6-10條

四季豆   6-10條

甘筍    一條(切幼條)

生粉   少許

醬汁：

醬油    1.5湯匙

味醂    1湯匙

糖   1茶匙

鹽   少許

水   半碗

生粉水   少許

將菜蔬蒸 15-20分鐘備用

火鍋豬肉片，三塊排好再灑上生粉

放上菜蔬卷起

卷起後可以用保鮮紙包起定型10分鐘

豬肉卷煎之前可以灑少許鹽，然後煎香

跟住放涼少少切件備用

醬汁(除了生粉水)煮滾

放入切件豬肉卷，蓋上鑊蓋焗煮3分鐘

然後加入少話生粉水令醬汁微微杰身便可以上碟

先睹為快及生活雜粹粹
 Pls Follow My IG https://www.instagram.com/taisiu9_aubrey

/ 大少奶's Delicatessen

宣傳你的專頁