涼

以為打完風無咁熱，但今日落完雨後d蒸氣實在無得頂，直頭好難頂

所以都係整d可以涼浸浸食物實際d

近日見到好多小圓茄，忍唔住買d返屋企

而且大少爺有講過想食"話梅小圓茄"

呢個雪凍食係慾罷不能，佢比美西瓜……

今次整仲加d薄荷葉令個冰涼指數上升

我的熱情 好像一把火 燃燒了整個沙漠))))))))))))))))))))))))))

500ml水+2湯匙白醋+3-4茶匙糖+8粒話梅、杞子少許

煮滾後熄火至水涼就可以加圓茄入內放雪櫃浸過夜

如果喜歡薄荷味就放幾片薄荷葉入去，但唔好放牙膏呀

小圓茄去皮好容易，晌呢個頂位輕輕界個十字或戀愛交叉

然後煲滾水熄火放小圓茄，跟手就盛起放入冰水，d皮就好易甩

但記住唔好放入熱水太耐、唔好整熟佢啊！一放入去數3秒就盛起

點解？點解會有一個搣唔晒d皮，仲要我睇相先見得到

原來有相有真相係真的

大少奶's Delicatessen

宣傳你的專頁

未諗到

朋友，你係咪諗緊今晚有無得食午餐肉呢？

我認！我係諗緊會唔會有個做時令菜，即係打風食罐頭

不過…係咪都好，我都係要出個食譜

呢個係鍋貼小棠菜，早前我出街食過一個非常唔好食嘅版本

於是就的起心肝自己整，大家都應該知我好鍾意食蝦膠等等食物

所以自己識打蝦膠後就更加鍾意整

街外買蝦膠用機打，打到散晒一d彈性都無

自己整就好彈，但又無彈床咁彈咁囉

本身鍋貼小棠菜有個脆皮，個脆水係可以用麵粉水整

但我穩陣d，晌未有把握前都諗過保守方法就係用春卷皮包住煎

唔使炸煎就可以，因為唔係要玻璃咁脆脆皮，用春卷皮微脆效果已經可以喇

你睇佢都幾靚仔，小棠菜都幾甜呢！臭包都有食

食譜：

蝦肉   300g(我用冰鮮蝦)

調味：鹽、生粉、麻油各少許

春卷皮   3片

小棠菜  6條

做法：

將蝦去腸後就用一茶匙生粉及鹽撈落蝦中，然後就輕力摔蝦肉

摔到感覺有d潺，然後就沖水，之後要完完全全索乾水份(呢個做法可以令蝦更爽)

跟住就用刀拍扁d蝦，再剁幾下

放落盤中，加鹽、生粉同麻油，然後順一方向攪，攪至有黏性

跟住再撻佢30下咁上下

用保鮮紙包好後就放入雪櫃半小時或以上

小棠菜先灼一灼，再浸冰水令佢保持嫩綠

然後就榨乾水份，切粒粒後可以放入蝦膠中撈勻

春卷皮攤開，放上蝦膠，然後對摺

放入熱鑊熱油後轉細火煎至金黃色便完成

大少奶's Delicatessen

宣傳你的專頁

天平生活食譜頻道

【天平生活食譜頻道】其實大家仲有無 happy hour習慣呢？

從前出外工作時有一段時間有的，日日與同事好似講極唔完，大家各自有一桶苦水未呻完，於是搵個地方繼續講落去。

至於現在，我工作崗位就係晌屋企，而happy hour該就係大少爺放工之時，我同包包見到大少爺回家都會好開心，包包開心來自daddy回家可以有人砌火車軌，而我開心因為臭包終於轉移視線，我可以有停下來之時。

當然現在happy hour係食晚飯，與從前happy hour食炸物飲mocktail大大不同，唔知點解我對洋蔥圈情有獨鍾，試過好多個洋蔥圈食譜，發覺個炸漿用啤酒去做好鬆脆呢！
天平生活: http://blog.mreferral.com/lifechannel/

#經絡按揭 #費用全免 #天平生活 #食譜 #大少奶 #happyhour呻苦成桶水 #炸物飲mocktail超正 #洋蔥圈

佳能迷你密實盒 x 槤榴木糠布丁

有一種生果你愛會極愛

不愛的...極討厭，就係榴槤

如果有家人極不喜歡榴槤嘅話，食榴槤真係罪大惡極嘅感覺

榴槤不單止當生果食，仲可以整甜品

用榴槤做甜品，整埋比朋友食就真開開心心坐埋食

"榴槤木糠布丁"一層餅碎一層榴槤忌廉，做法簡單而美味

因為用榴槤所以只需要加多一茶匙糖，榴槤香味不減之餘仲添上唔同層次感

用迷你佳能密實盒不但可以將香味封存而且仲方便帶出街與友共享

放雪櫃都不被察覺，整完食埋都無人知，呢d咪就係最高境界囉

哼~

食譜：

榴槤   2至3件

馬利餅  150g

淡忌廉  200ml

糖      1茶匙

做法：

先將餅乾放入攪拌機打碎備用

淡忌廉糖打至6成企身

將榴槤去核後加入忌廉中，再用打蛋器打勻

先將餅碎放入佳能迷你密實盒中

第二層放入榴槤忌廉，梅花間竹放餅碎及忌廉直至盒滿，然後蓋上蓋放入雪櫃冷藏

以示忠心

話說日日熱到好辛苦，我指因為熱唔去街晌屋企好辛苦

而且我感冒有返兜跡象，所以都係要休息

因為咁我今星期要交既稿都堆晌今日，今日係咁影係咁影係咁寫係咁寫

終於趕得及今日交晒

呢個幾星期都無啖好食，因為病同病同埋病

今晚又見精神d就即刻整好d

包包一見到呢個就開心，我兩母子最喜歡沙律醬啊

今晚整日式沙律照燒雞，即使唔加沙律醬都好味的

當然加了更好，其實沙律醬撈飯加蔥粒都好好味，哈

雞   半隻至1隻(用雞扒更好)

醬汁：

醬油    1湯匙

醋   1湯匙

糖   1湯匙

*以上撈勻

用1/4茶匙鹽、胡椒粉同生粉去醃，醃半個小時已可以

然後整之前再落少少生粉撈勻佢，煎至金黃色同埋熟晒

轉細火放入醬汁快手兜勻至乾身就可以上碟，上碟後加沙律醬

呢個係我至愛：芝士焗三文魚沙律通粉

唔知點解放兩次FB都無乜反應，把幾火放埋落呢個post，以對沙律醬表示忠心

食譜：

通粉   自己所需份量(一個大人同細路80g都夠)

三文魚   1件(先蒸5分鐘)

洋蔥    1/2個

露筍   隨意

醬汁：

沙律醬   1湯匙

淡忌廉   50ml

鹽  少許

胡椒   少許

芝士    隨意

做法：

將洋蔥、露筍爆香

三文魚回鑊炒一炒

沙律醬+淡忌廉+鹽+胡椒撈勻，倒入鑊快手兜勻

將通粉加醬撈勻，或者分一半醬撈通粉、一半放上面

再灑上芝士，焗爐 200度焗10分鐘或視符火力芝士融便可以

大少奶's Delicatessen

宣傳你的專頁

3歲的包包

包包3歲了，亦將會讀書展開佢人生既旅程~
生完佢之後我對佢講嘅第一句說話係：你要做一個好人
然後我決定入幼稚園前都要盡力令佢係開心嘅環境下成長
唔逼佢學習、唔逼佢去做唔喜歡既事，合理範圍內比佢自己做決定
呢3年來好多時刻都好似坐過山車，
養育一個小朋友最大前題唔係錢，而係心機同埋心血

包包一出世我就怕照顧得佢唔好，好彩佢都算係健康既BB
唔算多病，食得好又瞓得好
但到4、5個月開始穩定時就發覺佢有d皮膚敏感，即係濕疹。

其實我有上網睇過有關濕疹嘅資料，
當然第一時間就將可以試嘅濕疹藥膏都買回來，但每一款都只有短期功效
令我內心開始著急，直至醫生話：要轉奶粉！
雀巢®超級能恩®2號奶粉含pHF水解蛋白配方，能有助防敏和維持腸道健康。
(詳情：https://goo.gl/J8ZLuq)
我轉左雀巢®超級能恩®2號奶粉幾日後，包包就已經有好轉。

自此我唔需要再為包包皮膚、腸胃去煩惱
直至佢現時三歲，
依然係飲獲最多醫護人員推薦防敏嬰幼兒配方嘅雀巢®超級兒童能恩®4號奶粉。(https://goo.gl/o5k1BS)
呢個小小嘅經歷亦令我明白BB只要健康，其他事都變得不太重要
以BB健康為前題，做媽咪負擔都少好多

雖然我偶然都會擔心包包嘅前程、學業、將來，但如果無健康身體就等於什麼也沒有

包包每年生日我都會祝佢身體健康及一定要珍惜生命！

我帶佢嚟呢個世界唔代表有能力照顧佢一世，但至少佢仍然係我照顧之下，我就要盡量做得最好

共勉之！

#資料由雀巢營養天地贊助  #3歲  #健康第一

偽利賓納

昨日我晌FB page post了鹹蛋魚皮，攪到大家心思思

又攪到個page好熱氣

其實熱氣係我一家，上星期病食過藥個人累到今日都未完

天氣又好熱好熱，我知道天氣一熱大少爺就唔鍾意飲湯

咁我就煲涼茶，佢話想飲"紫貝天葵"

"紫貝天葵"晌我未生包包時每年夏天都會煲

因為好飲又清熱但又寒涼，生完包包後我都唔敢飲太寒涼涼茶

我知道大少爺好喜歡，所以昨晚又再煲，加埋山渣一齊煲好好飲

呀包仲以為係果汁不停問我要，小朋友你墮入陷阱方知太胡塗，呢個係涼茶啊

你睇d色澤幾靚仔，似利賓納又似紅酒，你可以用來配牛扒

紫貝天葵晌藥材店有售，我買$20得25g咁上下

其實已經可以煲成2.5-3L水

用$20紫貝天蒸加 25g山渣，用水沖洗

然後凍水落，加大約2.5-3L水煲 30分鐘，然後加片糖便完成

大少奶's Delicatessen

宣傳你的專頁

偽炸

病完幾日，今日好似放完大假咁係咁補番晒d嘢

上星期發高燒乜都做唔到，好介意無得煮比包包食

攤晌床真係又辛苦又無奈，最慘係d皮膚一日內變差..............

幸好！呢幾日開始好番可以煮比包包食

今日整了偽炸雞，個偽炸雞最特別之處唔係炸係焗

以焗代炸我做過好多次，但色水要靚就係今次，真真正正金黃色

個祕袂係將麵包糠炒一炒，炒到微黃色焗出來就會靚呢

你睇下個臭包，d菠菜放晌個盤到...直到永遠

激死我

而我就食偽雞柳配 Caesar salad

做法：

用大雞柳切片(我買有機的)，然後加1/4-1/2茶匙鹽撈勻，可以加少少黑椒

我會用1粒蒜頭磨蓉去醃雞肉，做出來香好多

麵包糠大約半碗至一碗，用白鑊去炒

邊炒邊兜勻

預備 2湯匙麵粉及1隻蛋

先將雞肉沾上麵粉，唔需要多但要均勻

再沾上蛋漿，最後沾上麵包糠(無影到)

將雞肉放上焗架！然後用175度焗 20-25分鐘(。視乎焗爐火力而定)

大少奶's Delicatessen

宣傳你的專頁

意想不到

最意想不到係…居然FB多人留言想要呢個食譜

話說日日煮比包食有時真係好累

每日都要諗兩餐、再諗埋寫乜食譜，跟住有時幫d客做食譜，一諗就要諗起個比客去揀

真係更鋒利嘅刀都有生鏽一日

當我乜都諗唔到就會炒意粉，加上近來包包唔再喜歡什麼白汁、茄汁呢個乾炒又得佢歡心

我會炒起一碟比佢，然後再加辣椒比自己，咁就一個意粉兩款口味

上個星期病了幾日，個blog幾日無發市，所以就澎澎聲補番呢個免得你班曳豬詐型

食譜：

雞柳   1塊(大塊)

已經過冷河意粉    隨意

(你視符自己所需份量)

洋蔥   半個

露筍   隨意

蒜頭   2粒

鹽   少許

牛油    少許

做法：

咁記得意粉要過冷河因為係乾炒

雞柳切片然後用少少鹽及胡椒去醃大約半小時

先煎熟雞肉

再加入洋蔥、蒜粒及露筍兜勻

跟手放意粉入鑊，加少少牛油再不停兜佢，最後放少許鹽兜勻就可以

當然你都可以好似我咁加辣椒啦！雞肉也可以轉蝦的

大少奶's Delicatessen

宣傳你的專頁