十號的二、三事(附鹹包食譜)

今早比平時早起，因為我本身開住收音機睡

聽到可能十點改發三號風球

我即彈起

因為要趕及8號風球食鹹牛肉

同埋整早餐比大少爺及住樓上的教友，因為我姊妹去韓國宣教，所以得兩父子在家

琴晚已忐忑忑忐地考慮整唔整定麵包，萬一今日打風(我好諗多左，以為打全日，都有麵包食

但我個人好衰，唔食隔夜包

於是…都決定搓，雪住個麵糰都好

跟住10號風球，又諗，應該都hold到朝早呱？

點知…扎醒比我聽到10am可能改掛3號風球，就即時彈起，好彩整得切

大少爺有新鮮出爐包包食，而我有鹹牛肉食，我教友兩父子都有早餐食！

好鍾意個包既造型



當最後發酵後，個包變成個牛肉盅

早餐仲有滑蛋


昨晚既打風晚餐

大少爺返到屋企指生晒，要燶邊流心蛋、又話餐肉要厚切

跟住又話打風食罐頭好有風味

大少爺，你出街食風仲好味，試唔試？

繼姐都買左我介紹本日本麵包書，佢都話好得

因為易做易明，d包每款都好鬆軟

我已經靜靜地整過多次，因為太正喇

呢款鹹包係乜呢？

肉鬆包



拎去送比人既腸仔包

晌包要加沙律醬去焗靚之餘仲好味

食譜：

高筋粉     250g

奶     80ml

水     80ml

鹽     3g

糖     25g

蛋黃   一隻

酵母   3g

牛油 20g

做法：

將奶、水、鹽、糖、蛋黃攪勻，加麵粉，加酵母，如用酵母

搓3~5分鐘，開始撻到光滑，加入室溫牛油

然後再撻至起薄膜

第一次發酵45~60分鐘，排氣(排氣後我會蓋上擰乾濕布放雪櫃2個鐘，會更鬆軟)

發酵完成將麵糰分成等份，搓圓，駁口向下，蓋上濕布靜置10分鐘，將麵糰反轉，唔需要再蓋上濕布，靜置5分鐘

放入喜歡餡料，整造型，可以搽上蛋漿(我今次無)最後發酵45分鐘

180度焗12~15分鐘

8號包(附日本黑糖合桃包食譜)

我知，我知大家趕車趕船趕飛機趕乜趕物

因為8號風球了

而我今晚終於有得食午餐肉了

如果聽日仍8號，我就可以食鹹牛肉三文治了

對於我，打風...係唔應該出街

但近年，總係會有朋友打風出去睇戲、去朋友屋企打麻雀、出去睇浪、睇風、甚至去滑浪

我堅持打風唔出得街，要食罐頭

無錯！唔知點解，我總係保留傳統文化，新年整年糕、端午節包粽、還有…8號風球要留晌安全地方

除了節憸外，我係好傳統既女性

今日咁遲post blog因為我搓包，可惜整好天都黑，影極都影得唔好

好彩有前包可鑑

日本既黑糖合桃包，同之前個唔同食譜，呢個更簡單

我發現將麵糰第一次發酵後，排氣，然後放雪櫃2個鐘，再整，會鬆軟好多

這日朋友丁丁上我家，我整下午茶比佢，有咖啡同日本黑糖合桃包



咖啡機對我來講，最大得益…打奶泡

可以加落熱古古力上

唔飲咖啡既我琴日陪大少爺行街揀靚咖啡豆，又多樣嗜好，我齋睇，佢就買來飲

每次整包造型都唔會知結果係點

因為發酵後總係唔同樣

食譜：日本黑糖合桃包

高筋麵粉     250g

黑糖    50g (我用沖繩黑糖)

鹽    3g

水    160g

酵母     4g

牛油    12g(室溫)

合桃     適量(先烘)

做法：

黑糖、鹽加埋水攪勻

高粉加酵母、加已烘過合桃，然後加入黑糖水，攪勻開始搓，搓3分鐘開始撻，撻到光滑後加牛油再搓，再撻大約200下

搓到有薄膜，鋪上擰乾濕布第一次發酵，約45分鐘至1個鐘，麵糰發大兩倍

排氣，再滾圓，面層鋪上擰乾濕布，放入雪櫃雪兩個鐘

再排氣，平均切割份量，大約6~8份，滾圓蓋上擰乾濕布靜置15分鐘

整造型進行最後發酵大約30~45分鐘，麵糰發大兩倍

最後搽上蛋漿，180度焗10~15分鐘(視符火力而定)

是鮑不是包

天氣熱到我厘左晌屋企大半個月，真係無日落都唔想出去

今日好熱，我出左去CWB，行左陣買條褲

再去午餐

午餐後都三點，好熱

我今日仲要著長袖雪祊衫

跟住去整頭髮，整完都唔知到底煮乜好

只想回家沖涼

好累！

咁煮乜好！

決定以本傷人……煮個麵比佢

大少爺返來時我唔比佢入廚房，煮好後一拎出晚廳，佢："嘩"

的確好易煮，鮑魚凍水連汁煮，煮滾加水、加少少蠔油，打個生粉獻

淋上先煮好伊麵，同灼好既菜

哈！見到佢都開心！個罐頭鮑一開十隻，原來唔係想象中細隻

佢今日無得食我搓既包，但有鮑食，哈

葡萄成熟時(附白玉葡萄食譜)

09年我去完沅紗廚房食過後整過一次

原本做書整第二次，但而家擺晌blog上

冬瓜唔係吸引我既食物

但呢個葡萄造型令我難忘你  的姿態動靜，略帶憂鬱的一雙眼睛

這個菜式是我在大坑一間食店吃到的

那時候大少爺用了一副"哼"的表情向我說：你都一定識整啦

而我當然用更"哼"的表情但又扮謙虛去回答：乜咁睇得起我呀？

哈~當然我也真的有做過

把冬瓜變作葡萄的確令我對冬瓜的好感大增

每次見到葡萄就想起：

我是葡萄樹，你們是枝子。常在我裏面的，我也常在他裏面，這人就多結果子。因為離了我，你們就不能作甚麼。”（約一五：5）

感謝主~

冬瓜    一斤

雞湯    兩杯

瑤柱    五粒

生粉    一茶匙

水      兩茶匙

冬瓜用粒粒工具，做成粒粒狀

放上碟，蒸10分鐘

瑤柱先浸軟，用雞湯煮滾，兩杯煮成一杯份量，再加生粉水煮到杰身淋在冬瓜粒粒上便成

炒 (豉椒炒蜆附食譜)

今日忙碌日

豉椒炒蜆好似係學貝類海產入門既菜式

我15、16歲時有一次上同學屋企，佢局然親手炒豉椒炒蜆，那一刻我…覺得驚天地泣鬼神

點解咁都識整？

到早前，打算整時，才發覺...........車~易過煮白飯(因我而家仍成日忘記按掣囉)

只要有個豆豉醬已經成功了一半


豉椒炒蜆

蜆   一斤

萬字豆豉醬   半湯匙

糖 1茶匙

蒜蓉   1茶匙

辣椒   1隻

做法：

將蜆加入鹽水吐沙，浸大約一個鐘後倒清水份略沖洗一下，然後撈起瀝乾

熱鑊加油，先下蜆兜兩下後加豆豉醬、蒜蓉、辣椒，炒至所有蜆開口，想香少少可以贊酒，然後可以熄火

的確，萬字除了醬油，還有…醬料

今次用豆豉醬

萬字facebook   http://www.facebook.com/kikkoman.hk

陽光天使蛋糕@美心

美心西餅出左兩款迷你天使蛋糕

有士多啤梨味同埋芒果味

佢地有鮮果夾心既

加生果味個感覺FRESH D，而家買$88一個

只係暑假期間出



士多啤梨味，我愛多DD

因為佢感覺好靚呢

如果想試去美心西餅買

黃豆四弄(附豆漿、甜豆花、鹹豆花、豆渣餅四款食譜)

孤單的滋味天知我知....最著緊的事已錯過無限次~

呢輪成日洗腦式聽呢隻歌，隻歌最勁係呢配合到我心情

仲有，播完後我同大少爺不停晌度唱

我心情係因為之前寫好既書…因為某d原因出版唔到

唔想具體去講點解

以下黃豆四弄…

全用黃豆做出來，有鹹有甜，我唔想浪費呢個idea，所以擺在blog

豆腐花做甜品之外，也可以做菜式
自己做的豆腐花幼滑外
還滿香豆味
還可以自選配菜

豆腐花與甜豆腐花一樣做法
但配料是另外做的

熱豆漿   500ml

石膏粉    1/4茶匙

粟粉 1.5茶匙

飲用水    100ml

將石膏粉與粟粉混合加入飲用水攪勻

將熱豆漿撞入粉漿，倒入時盡量舉由高處撞入，像拉茶這樣

撞入豆漿後盡快蓋上蓋子等20分鐘，撇走豆腐花上的泡泡便成

配料

雞扒 一塊

西芹 半棵

紅蘿蔔   半條

冬菇 四隻

汁料

生抽 半湯匙

糖    1茶匙

生粉 1茶匙

水    1茶匙

麻油少許

雞扒去皮切丁粒，加鹽一茶匙、糖半茶匙、胡椒粉少許、生粉半茶匙撈勻，最後加麻油

西芹、紅蘿蔔、冬菇浸軟後切粒

燒熱鑊加油，爆香雞肉、再放入其他配料兜勻，雞肉熟透後加入汁料兜勻便可以倒上豆腐花上(記得要輕輕手啊)

每次見到被榨乾的黃豆蓉都會希望物盡其用

後來才知道可以做豆渣餅呢

一物二用又有營，哼~

豆渣    80g黃豆的渣或視符做完豆漿後還有多少份量，沒有規定的

合桃    12粒

洋蔥碎  2湯匙

鹽   少許

麵粉    少許

將合桃用150度焗5~10分鐘，視符焗爐火力，也可以從肉眼見到金黃魚便可以

合桃焗完放涼後弄碎，混入豆渣內

再加入洋蔥及鹽，搓成餅型

做後撲少許麵粉，煎至兩邊金黃色，煎時要輕輕力啊！否則..容碎呢



愛喝豆漿，那時我住在炮台山
跟著大人到春央街街市，內有豆腐店
豆腐店還有冰凍豆漿及豆腐花
從那時起，我便很愛豆腐花及豆漿了

這份愛沒有改變
只是....我把自己喜好搬進家人
自己去做豆腐花
做自己喜愛的食物，有著除了是美味的食物，還有一份大滿足感呢

熱豆漿   500ml

石膏粉    1/4茶匙

粟粉 1.5茶匙

飲用水    100ml

將石膏粉與粟粉混合加入飲用水攪勻

將熱豆漿撞入粉漿，倒入時盡量舉由高處撞入，像拉茶這樣

撞入豆漿後盡快蓋上蓋子等20分鐘，撇走豆腐花上的泡泡便成

另外…用冰糖加水煮成糖水，黃糖隨意加在豆腐花上

*石膏粉藥材店有售

愛自家做的豆漿
但其實做豆漿都有竅門
豆漿很容易會黏鍋底，一定要不停攪伴
還有…如果豆漿煮得不夠透的話，會令人有嘔吐感及有一股草青味

後來，買了豆漿機就不用再費心神

但是如果想自家做都不太難呢

豆漿做法：

黃豆   80g

水 600ml

將黃豆浸過夜，然後加600ml水放進攪拌機，打至黃豆完全綿碎

把剛打完的豆漿連渣倒進魚湯袋，大力擠壓直至袋內豆漿完全壓出

放進小煲，用大火煲滾，轉小火煲20分鐘，其間要不斷攪動，否則會有燶味

二次創作(附鬼馬油條食譜)

星期五、六、日都爆忙，星期五入迪士尼個灰熊山谷試玩

我同大少爺+2個朋友一行四人入去

人人都知我怕熱怕曬，但我對我喜歡既係會全力去喜愛！克服困難

而且如果我唔喜愛，我唔會因為有門票係唔係都貪左先，然後就扮滿不在乎

所以好熱好曬但我仍開心，尤其個礦車好好玩，我整理下相片會post

星期六、日都忙於教會既活動，忙得來好開心

終於今日可以比我安靜地沉澱一下

大少爺好鍾意鬼馬油條，其實我都好鍾意

因為原來油條二次創作後會更好多味

終於明白點解政府要禁二次創作，因為二次創作將會更加抵死同埋更加到肉

所以我急將食譜寫；出，免得連二次創作會包括埋…食譜

加上油炸鬼係咁有歷史，容乜易…話我改歷史架？噢



其實做法好簡單

先買油條，剪段，釀入墨魚膠(墨魚膠偶然可以晌大百佳搵到、康怡吉之島都有)

半煎炸，將墨魚膠炸熟，唔好太大火，否則好易會變黑

炸好後盛起備用

醬汁：

茄汁        3湯匙

白醋       2湯匙

糖           1.5~2湯匙，視符口味而定

生抽       半茶匙

水          3湯匙

以上攪勻備用，另備洋蔥、青椒


青椒、洋蔥切塊，爆香加入醬汁兜勻上碟，只需要每塊油條沾上汁便可以
今次用Fissler鍋半煎炸，佢有個好處，你放墨魚肉落去，佢封左表面你先可以將佢反轉，咁就唔會晌佢未熟煎攪得太多而甩掉

"旺乜"出場(士多啤梨藍梅酵素)

終於有人發現我皮膚好左，當然我會好勤力做mask、飲好多水

但酵素發揮既作用又另一樣野

至少酵素可以平衡身體裡面

初初大少爺唔飲既，後來菠蘿味佢又飲

之後連提子都肯飲

大家可以睇呢個分類：http://blog.yahoo.com/iamtaisiu9/category/%E6%88%91%E7%9A%84%E9%85%B5%E7%B4%A0

有做法同資料

呢杯係黑提子，其實我都愛黑提味，但飲過菠蘿又愛那種清新

聽日奇異果菠蘿味收成，唔知係點既呢？

黑提子顏色好靚

呢對杯係當年買Bellni時送，係一隻蜜桃酒

唔愛酒既我，對佢情有獨鍾，好味之餘顏色好靚

就似呢杯加了水既黑提酵素顏色

黑提子嘔白泡好勁的

最新酵素進行中"旺乜"

藍梅加士多啤梨，今日已經出晒汁好靚，遲d再報導

可口可樂App

我諗睇開我blog既都知我係可口可樂迷

無論飲既、擺設同產品

早兩星期去可口可樂既event，試玩當時仍未發佈既app

當晚有歌聽有遊戲玩

2012 年 7 月 8 日起，透過使用 iOS 或 ANDRIOD 系統運作的智能
手機*，從 Appstore 或 Google Play store (前稱 ANDROID Market)
免費下載「可口可樂」MUSIC 拍子 GAME。
*「可口可樂」MUSIC 拍子 GAME App 適用於大部分智能手機

購買 330 毫升罐裝或 500 毫升樽裝「可口可樂」或「零系可口可樂」，記下罐底或樽身（招
紙覆蓋範圍下）PIN 碼，填妥「可口可樂」MUSIC 拍子 GAME App 登記表格，預備玩拍子遊
戲。於活動期間，每部手機只須登記一次。


今年個game好玩，最重要係可以兩個一齊玩

佢好刺激，當時試玩時我同KC、不眠王子、Carmen、愛麗斯一齊玩，玩到好緊張！

大家不妨Download玩啊