大少奶's Delicatessen

2012年7月5日星期四

搓 MY breAd

琴日整紅豆包，入得口，但技術問題，唔夠鬆軟

雖然大少爺連食兩個

但都掩不住我既無語問蒼天心情，的確有點失落

幸好........麵包無情、人間有愛

我問Mommy Dearest 有無食譜可以比我試

結果…佢比了我一個食譜，同開展了今朝what's app授課

當我想爆粗XYZ(@$^*&同丟個麵糰落垃圾筒同不斷問…點解我未有薄膜？點解？

我對住塊麵糰咆哮：我整舊叉燒好多整你呀))))))))))))))))))))))))))))(出自電視d呀媽鬧仔：生舊叉燒好過生你)

Mom不斷話唔好放棄，不停教我下，最攪笑係Mom叫我忘記薄膜，哈

拎去發酵

最後成功了 d d

佢既質地唔係港色包咁既，佢中間軟熟得來，有點嚼勁，但當然又唔係咬到牙都軟果種

唔係日式又唔係港色

有少少似bagel、但又無咁重質感

係我愛既

我點會甘於平凡？

腸仔包係一定要試整，呢個係童年最愛

但就咁又太普通，決定加沙律醬同芝士，做成車打沙律腸包

Yeah~~~~~~~~~~

4個份量

高筋粉 180g

糖 16g

鹽 2.5g

奶粉 14g

牛油 11g

水 110g

快速酵母 2g (如用新鮮酵母就用5g)

將鹽放盤底(鹽不可以掂到酵母)，加高筋粉、奶粉、水、糖、酵母，一齊搓勻，再撻下佢，搓到光滑唔黏手先再加牛油

加牛油初期會好油，慢慢再搓到唔黏，再撻，搓到麵糰光滑有彈性，有薄膜

然後可以發酵，30~60分鐘，發酵完成後排氣，然後再整做成或加餡料，搽上蛋漿，第二次發酵30~55分鐘

180度焗爐焗 10~15分鐘，視符火力

*整麵包要做research，可以上youtube睇搓麵糰或者撻麵糰教學，或睇書，薄膜係乜等等

要肯定應付得到先好做，否則…只會浪費功夫

我都仲未完全掌握得到！嗚~~~~~~~~~~~~~~~~~~~~~~~~~~~~~~~

2012年7月4日星期三

包剪dup

好努力去整麵包，為既係…完夢

無錯！初開blog無耐，整過麵包，只得兩次成功

當時大少爺同我講：um.....其實出街買好方便

就係佢一句金石良言，令我寒天飲雪水、點滴在心頭

從此無整過

跟vanlily學過，但我從來都唔係一個乖巧專心既學生，學過程中我只係搵位可以捉弄下佢，哈

晌私人FB見到Agnes整左個零失敗，既麵包食譜，於是我又學

今次我同大少爺都好興奮

知我個性既人，都知我會沉迷一樣野，一次成功，攪到我決意沉迷下去，放眼迎以後~~~~~~~~~~~

不過…其實我只想學好手頭上個食譜，然後十八變

再無其他野心，只希望令大少爺開心

今次整紅豆包，大少爺聽到好開心，佢開心既樣總會打動到我

我會努力既，有朝一日我會整豆豉鯪魚包，呢個係我兒時幻想既包，哈哈哈

我用牛奶代替水份，感覺不一樣，唔錯

唔知點解總覺得自己未搓得夠，個面唔夠靚，但仍軟熟

紅豆餡

呢個係星期一整既包，好軟熟，亦因為佢我信心回來了

不過今日再整時有d問題，但最後解決了~~~~~~~

快樂情景：

我放入微波爐入面發酵，個微波爐唔需要開啟，只係要密室效果

第二次發酵時，我另一邊箱整緊豬肋骨，於是叫大少爺幫我晌微波爐拎個包出來

跟住聽到佢急促既腳步聲，好緊張問：做乜呀？佢變大既？做乜咁架？點解既？

好可愛！我望一望：佢發酵變大之嘛

佢如釋重負咁安靜

從來我都覺得…有一個零廚藝既丈夫好幸運，佢永遠當我superwoman

哈哈~

琴日同事頭婆午餐後去買，呢本日本翻譯本，都幾詳盡

教基本包十八變既技巧呢

我要努力再試多兩個食譜！

2012年7月2日星期一

冷氣巴士豆腐(附黑醋三色冷豆腐)

今日去街，行完街買麵粉整麵包，無錯！我又抽起條筋想搓包

然後回家搓包，又再煮飯

Supermilk(超級大少奶)哈哈...............哼~

今次post冷氣巴士豆腐，唔知點解，我總覺得呢個冷豆腐好似巴士

解釋唔到既

我總係有別人猜不透既想像力

例如…事頭婆我覺得佢好似雞蛋仔、Vanlily似一片浮雲、大少爺是曬衫桿(呢個我明點解咁諗)

總之我腦內總容易有呢類既想像

呢個冷氣巴士豆腐(黑醋冷豆腐)好好味，清新呢

做法又簡單：

豆腐一盒(做冷豆腐用盒裝較好)

皮蛋 1隻

鹹蛋 1隻

炸菜隨意

醬汁：

黑醋或紅醋 2湯匙

醬油或生抽半湯匙

沙糖 2~3茶匙

熱水 2湯匙

麻油適量

將皮蛋切粒、鹹蛋烚熟切粒、炸菜切粒，加上豆腐面

然後將醬汁材料撈勻，糖溶後可以先試味，如太酸加糖、如太甜加醋、想鹹少少加醬油(但注意，鹹蛋、炸菜偏鹹，唔好加咁多)

醬汁放涼後放雪櫃，到食既時候淋上豆腐

醬汁又唔好太淡，因為豆腐出水，所以濃少少較好

豆腐切得唔錯，經過6年及上峨嵋山學劍法(亂up24中)........................我刀功有進步，

2012年7月1日星期日

旺金(鳳梨酵素)收成，旺來(黑提子酵素出場)

Yeah~旺金終於大學畢業喇！哈

鳳梨酵素收成，好心急試，加冰加少少凍水，感覺似cocktail

同埋佢如果加片薄荷葉會好清新

講真你問我係咪好有美容功效或減到肥？我暫時只覺得自己皮膚感覺好了

不過我唔係飲得好密，每日30ml到啦！即係一杯

多數係夜晚晚飯後先飲

不過…我相信恆心好重要，再試多一排再算吧

至少佢幾好飲

我將d鳳梨肉放榨汁機再榨一次，再隔d汁出來放埋入樽，好濃郁呢

原本滿一個大瓶，整完後得番好細瓶

旺來(黑提子酵素)

一直想試黑提子，佢嘔白泡係最利害既

第三日已經好多泡泡呢

我未諗到下次想整乜，奇異果我唔太鍾意，或者整雜梅

又想整西柚呢

正式告別美人鬢@Dermes

上星期終於告別美人鬢了，我再唔需要怕佢三時五刻唔夠睡等等.......會再生鬢

其實呢四個正式treatment個體驗唔錯

因為做完第三次後，基本上已經無乜點生出唇毛，只係有零碎既

今次第四次，應該可以放心喇

同埋用激光既部份係好平滑同其他方法唔同

其實做完整個treatment人都輕鬆了，至少人生煩少一樣事呢

今次呢條free link最後一次post，因為已經完成

在此多謝我美容師 Sammi，一個好可愛既美容師，祝褔你幸福快樂啊~

多謝dermes

所以大家要試既話就把握呢個機會，可以試做一次under arm、upper lip或者下腹線

http://www.dermes.com.hk/edm/ 201110/DBLOG1011E/Form.aspx? ref=DBLOM0612E

2012年6月29日星期五

青BB(附青咖哩食譜)

好熱，今朝落街d風係熱既

我覺得自己好似晌焗爐中既麵包，仲要係有蒸氣既焗爐

熱得要命

回家後睇下電視，nap一陣

今個星期太忙，忙到好累

尤其琴日…我做埋兩個食譜交比萬字醬油、再幫清熱酷寫篇文，再去可口可樂event

回家後再改篇稿，跟住散晒

於是今日又望天花板，同睇番琴日集心戰，噢！你個勒兆楠殺左章世言，我嬲你呀

今次陳豪個角色雖然有點變態，但我覺得佢好型，一個好型既cupuinno，哈哈

睡醒後…整青咖喱雞，悶熱天氣真係要辣一辣佢

我愛青咖哩既香料味，又易整喎！Like

青咖哩醬已好重香茅味道，又夠辣，基本上唔太需要加其他

我會加少許芫茜，同青檸葉，但今日無青檸葉賣

椰漿要熄火先落

做法：

雞    半隻或一隻切件及略醃備用

青咖哩醬     一包

淡忌廉 50ml

水    100ml

魚露少許

糖     2茶匙

乾蔥頭    5粒切片

蒜蓉    1茶匙

如果落香茅或青檸葉就隨意，唔加都可以，好多香港人未必慣太重香料味既

做法：

將雞略煎至5成熟，只需要少少轉色便可以，加入蒜蓉同乾蔥片兜勻(如落香茅等香料可於呢個時候落)

加青咖哩醬，兜勻，遂少加入淡忌廉，然後加水，及糖，煮滾試味(唔夠辣可以辣椒，太濃味可以加熱水)，轉細火炆20分鐘便可以

熄火加椰漿便可以上碟

有其他菜式，所以用半隻鮮雞整，大少爺有咖哩雞腳，哈

上次放個Fissler鍋入焗爐，便了黃色，心痛

好彩Fissler marketing小姐好人，sponsor我支保養劑，用完後靚仔番

如果用不

2012年6月28日星期四

拿咋沙(附薯仔沙律食譜)

今日天氣實在太熱，又焗

攪到個人憫憫憎憎

晌書房開冷氣，但陽光既剌眼都感覺出面好熱

有個風來緊嗎？真係風雨前夕風平浪靜？

今日一起身，幫一位前輩寫一篇紀念文章，憶述她身前點滴

晌教會裡唔係經常溝通，但一個陽光般既笑容，原來已經令我懷念不已

到生命終結一刻，原來令人懷念既.....即使係一個燦爛笑容就足夠

陽光    可以係好熱，令人煩燥

陽光    可以形容一個燦爛既笑容

陽光     更加可以係一包檸檬茶

我又陷入矛盾中

矛盾不單止係情感，也可以係食物

沙律可以係健康，可以肥到爆，而呢個沙律好多女仔鍾意，但係支不抵債肥到爆的

不得不提，沙律上既蝦，係雪蝦，但閒買包晌屋企點綴下

配沙律，都唔錯，但唔好當白灼蝦食，哈哈

沙律

薯仔兩個

洋蔥碎粒半碗

紅蘿蔔粒半碗(先灼一灼佢)

沙律醬大量 -__-"

做法：

將薯仔洗淨連皮烚熟，烚既時候篤得入，可以熄火唔好開蓋焗熟，連皮烚可以保存薯仔香味

放涼後，薯仔去皮，壓爛成薯蓉

加入洋蔥粒、紅蘿蔔粒，加一大pat慘不忍睹咁多既沙律醬，黑胡椒粒拼命三郎地撈勻

可以加煙三文魚、蝦、蛋、乜乜物物配合同食！

2012年6月27日星期三

天花板(附紅豆豆腐布丁食譜)

琴日唔見我，有望穿秋水嗎？

其實呢輪比較忙

咁琴日因為忙嗎？

唔係

我琴日替萬字醬油做食譜，然後大部份時間都係望天花板

每逢我有心事、唔開心、或者失意，我總會懶洋洋乜都唔想理去望天花板

夜.....天花板有這段戲總關不上心裡的放映機

不過…望完係無解決得到既呢！哈

咁我琴日係咪唔開心？um....又唔算係，只係個腦多野諗，所以望下之嘛

雖然咁過一日，但我都有做食譜同埋甜品比大少爺

大少爺有個習慣，每日回家會打開雪櫃去檢視雪櫃裡面有無出奇蛋，即係有無甜品、我又買過乜等等

有時我同佢去街，正諗緊雪櫃有乜，佢講得出架

尤其冰格，因為佢乜都鍾意放入去

癲癲地

琴日整呢個豆腐布丁，好清既一個甜品，配紅豆蓉

哼

盒裝豆腐 200g (我用蒸煮滑豆腐)

豆漿 300ml

whipping cream 50ml

糖 50g(視符口味)

魚膠片 10g

做法：

1. 豆腐用攪拌器打爛至漿狀

2. 魚膠片凍水浸軟備用

3. 豆漿、忌廉加糖煲熱，至糖完全融便可以，加入浸軟魚膠片，放至暖身

4. 將放涼既豆漿加入豆腐中，輕輕攪勻

5. 用篩隔一次，令布甸更滑，然後放雪櫃少3小時

可以配紅豆蓉

2012年6月25日星期一

飲勝(附黑啤豬肋骨食譜)

星期六同大少爺起身時已經兩點！無錯…係兩點

於是落街食下午茶

又他他條條咁過一日

一早已經計劃唔會外出，因為我要煮晚餐

假期煮晚餐我會比較嘆慢版

假期煮晚餐係享受，所以會比平時慢6、7、8倍

平時我唔知點解總係會好似清兵入城門咁沖呀沖，唔知為乜架

大少爺生日上山頂，驚覺發現佢愛食豬肋骨

於是我就諗，希望買到整比佢食

最後晌又一城既Taste買得到，我開心到癲

癲係因為…我又可以親手將你喜愛的，整比你食

我覺得能夠親手整比佢食，見到佢鍾意，呢種係好幸福既感覺

付出都係幸福既一種，有個人令你認為值得去付出都係幸福既一種

而我能share食譜比大家都好幸福，一直以來你地愛錫我都令我感覺到好幸福

我無乜可以回報，只能夠將值得share既食譜送比大家

今次呢個黑啤豬肋骨好得，開心屎我，用啤酒醃令到個豬肋骨用鬆化唔un，得到我想要既效果

Look~

首先：我用既材料

1 黑啤(本身我想買健力氏，可惜我家附近間百佳一買要買一pack，好煩之際見到呢隻，都ok~不過下次我都係會試健力氏)

2.燒烤汁(City's super $21)呢隻係我覺得好似街外食既烤燒味道，佢有兩隻，我揀Honey味

3.豬肋骨 (Taste) 一條都係$50有找

4.乾蔥、同埋保鮮袋一個

做法：step 1

將豬肋骨解凍，然後洗淨抹乾，跟住先搽一層醬油、1茶匙糖醃1個鐘(生抽都可以，我用萬字醬油)，因為唔搽層醬油，個燒烤汁會唔太入味

跟住落半罐啤酒，再加半碗烤燒汁搽勻件骨，最後加入乾蔥，放入保鮮袋醃一晚

焗爐預熱220，豬肋骨首先用錫紙鋪面焗20分鐘

做法step 2：

用1/4碗蜜糖、1/4碗燒烤汁，撈勻(做成蜜糖燒烤汁)

拎開鋪面錫紙，搽上蜜糖燒烤汁

每隔5分鐘搽一次，共四次後約20分鐘以熄爐

然後唔好拎出來，約5分鐘後先出爐

2012年6月22日星期五

時光倒流

琴晚屋企全女班，連大少爺都避席，哈哈

好開心一晚，琴晚既朋友全部都係年青人，2字頭既青蔥歲月

幸好，我相信我同佢地溝通得到

佢地教識我玩..........唔知乜遊戲(唔記得個名)，同牛頭王(呢個我初初第一鋪好似京華春夢一般，後來都明係乜)

唔係煮好多野，但諗既時候方向係要諗年青人愛食乜

之前30人生日會既食物未必係佢地鍾意

於是諗d我認為會佢地喜歡的

以下呢個蛋糕送比明日壽星

To:K，生日快樂！希望你每日都快樂，主恩滿滿，咁就大家樂吧