整一次寫一次(燒腩肉食譜)

琴日過得好開心，因為同大少爺去街食食食同買買買，然後去一個音樂會聽classic詩歌

今日起身仍心感大滿足

星期六Bear Bear舅父一家人到我家晚飯

晌自己屋企煮可以自在好多

我又整燒腩、焗雞、蠔砵、炒蜆同菜

你地見得多，但舅父佢地卻第一次食

個燒腩肉的確整一次就會想寫一次，實在太易

但我想講既係…每個食譜有每個既做法

唔係一定有一個係一定好，更唔係人地個step唔同代表唔好

最怕係化簡為繁既野，化簡為繁唔係代表叻，跟本手到拿來既話就隨手便可以

我鍾意將18個step 化到得一個，但成功才係最重要，唔需要特登去賣弄技巧


注意

呢個食譜唔需要篤洞！每次我都解釋好多次，唔需要就唔需要，呢個係跟May姐做，個皮唔篤洞一樣鬆脆

至於d鹽會整到塊肉好鹹？係視符你手勢，你整到d鹽落塊肉中，就自然鹹，鹽係鋪上豬皮

最後我唯一改了做法既係，用錫紙包住個肉，只有皮外露，原因塊肉唔會乾，更唔會被鹽去整到

先用薑蔥出水，再放入冰水中浸到塊肉變涼，完全索乾水，係完完全全乾身

用1湯匙幼鹽、加1湯匙紹酒搽勻塊肉，今次我塊肉大塊，如果你塊肉唔太大塊，可以搽勻便算

放雪櫃一晚夜，一晚後將所有水份抹去，要好乾既



晌豬皮面鋪上粗鹽，記住晌個面，塊皮會唔會好鹹？唔會

你用錫紙包住塊肉會保持肉汁、唔會乾，又唔會因豬皮出油整溶d鹽令鹹味流落肉中

150度焗 1個鐘

一個鐘後將d鹽抹走，用200度焗15分鐘或至顏色均勻兼爆出沙泡泡皮

有相有真相既成品

焦黑既係我那個焗爐，中間火力好大，側邊又唔均勻

成塊爆脆中間難犧牲