2006年6月30日 星期五

每年$200資助中國山區兒童上學


上年偶然晌地鐵站見到一張宣傳海報,內容係話:每年$200資助中國山區兒童上學
於是好奇下上網找資料,原來一個宗教團體舉辦既【重返校園計劃】
我本身唔係教徒,但覺得用$200足夠供一個山區兒童讀一年書都幾有意義
於是就填表交錢
相隔幾個月就收到該女童既家庭背景資料及相片(未得該女童同意,所以唔post女童相)
另外…該團體話大約暑假就會寄該女童成績表比我
今日終於收到女童成績表、仲有一幅佢親手畫既畫
成績都唔錯!幅畫都幾靚丫!另外…仲有一張繼續資助表格,當然我會繼續資助!
能力範圍內能做到既事,何樂而不為呢?
↓女童成績表


↓女童屋企有困難,無能力供她讀書


女童畫了幅畫送比我同大少爺


我相信知識改變命運
出生於貧窮地區佢無得選擇,但希望佢讀多少少書將來生活得到改善!

2006年6月28日 星期三

下午茶


"Double chocolate Muffins"
因為加左黑朱古力粒,好香濃既朱古力味!仲有我最鍾意既杏仁
我絕對係一個朱古力狂,但我焗蛋糕盡量都唔焗朱古力味
我知道大少爺唔鍾意朱古力,避免佢因為唔想令我失望而扮鍾意食....
所以盡量唔整朱古力味既食物!
因為朱古力太香濃到影相時覺得個muffins太黑色
加上個紙杯又太深色,所以加埋隻杯一齊影
呢隻杯跟左我幾年,係我最鍾意既杯,影出來好似 Tea Set
好悠閑既感覺!!!





2006年6月25日 星期日

懶人煮意


懶人煮意....
名符其實係懶人煮意粉,同懶人南瓜湯
天氣實在太悶熱,連出去行街既意慾都無,除左開冷氣降溫,我真係唔想郁
結果...開罐頭

唔記得從幾時開始,除左打八號風球之外
我嚴禁大少爺食即食麵同罐頭,我覺得即食麵同罐頭係天下第一 Junk Food
但今日晚餐,居然雙罐齊開


餐湯........南瓜湯 Pumpkin soup估唔到罐頭南瓜湯咁好味,招紙話無味精
初初我唔信,但飲完居然唔口渴,完全係南瓜蓉湯
有濃濃南瓜甜味!本來係要用半罐水及半罐奶煮
但我唔鍾意奶只加幾滴裝飾,用水煮都依然creamy同好濃南瓜味!㊣

主菜...香草蜆肉忌簾汁意粉  Spaghetti with  white Clam sause我用橄欖油炒蜆肉、洋蔥、意粉
淋上罐頭忌簾湯加少少雞湯做既意粉汁
最後灑上 Basil、Parsley
就完成呢個懶人意粉喇!

甜品.......就係今朝焗好既 mini puff






2006年6月24日 星期六

炎熱下午既Soho 區


今日同"忌簾bun小姐"去Soho區食Lunch
以往去Soho區都係夜晚,但今日下晝去覺得好靜,同夜晚兩回事
去"忌簾bun小姐"介紹既英國餐廳食Lunch,都幾好味
先來一個
頭盤:薄荷葉橄欖油做既沙津汁配新鮮生果
主菜:係炭烤肉眼扒配香草牛油汁
甜品:傳統英國麵飽布甸
比我想象中好味,個麵飽布甸同我晌英國食既一樣味,所以有種熟悉既味道
我見到其他客人點既Fish & chips賣相都同英國既一樣
當然我相信會比晌英國食更好味!起碼唔係用報紙包既~
今日天氣好熱、真係覺得有9個太陽
我由12點幾開始行IFC、跟住食Lunch、再行中環、再過尖沙咀行街
返到屋企都幾累!!!
但覺得好開心,今日我有個新花名.............大卷蛋



2006年6月23日 星期五

我們的相逢中,天意常在


近兩年已經無再睇張小嫻既小說
我已經真正長大對愛情再無太多憧憬,不再沉迷愛情小說
亦因為…
張小嫻既愛情小說比較悲觀、不適合悲觀既我睇
張小嫻寫既故事愛情觀比較寫實,唔係每個人既愛情都有美滿既結局!事實確實如此
近日朋友借予我一本未睇過的張小嫻小說【我在雲上愛你】
講述女主角由F.4至到升大學既過程,跟住海嘯意外中死亡
故事最後講述女主角過身後用39個星期零4小時回望與男主角既一段情
及女主角死後…男主角劫後餘生既生活
小說最後有一段說話:
在相遇之前,我也許喜歡過別人,那個人並沒有喜歡我
又或是別人喜歡我,我卻不喜歡他。
為什麼會是你和我呢?原來,那些人都只是為了恭迎你的出場。
我們的相逢中,天意常在。
我好信天意,但又好怕天意!
我信天意安排我現在既安隱生活
但最怕睡醒一覺突然失去一切,身邊人紛紛安慰我
然後又對我講 "呢d就係天意喇!"
唉...........我都話我呢種悲觀人唔適合睇呢類小說架啦!>.<"


2006年6月7日 星期三

越快樂、越墮落之 Godiva Chocolixir



越快樂、越墮落之 Godiva Dark Chocolixir

我知道朱古力會致肥、我知道朱古力會燥熱,甚至導致狂生暗瘡
但我唔理,因為我真係一個朱古力迷
只要有朱古力,我願意承擔一切後果



尤其係夏天,我既至愛 Godiva既Dark Chocolixir
由2004年夏天開始,我每次飲chocolixir都有快樂既感覺!所有後果都會拋諸腦後




2006年6月4日 星期日

矛盾


我人生充滿矛盾...............
我好易笑...........但喊更易

 我討厭某人...........但又要經常接觸

我愛我既朋友...........但更享受獨處

我自細被寵壞........但童年並不快樂


我愛聽人傾訴...............但我怕比人知內心世界

我愛熱鬧...........但又怕應酬 

我渴望被人了解.............但又怕人太了解

我享受做大少奶...........................但又怕要每日諗煮咩晚餐

我想請傭人..................但又唔想屋企有陌生人

可以肯定又無任何矛盾就係我愛大少爺!

同埋我愛shopping