2012年7月31日 星期二

乜叉?蜜叉(附蜜汁叉燒餐包食譜)


琴晚好緊張,睇男子團體體操

講真無晒李小鵬、楊威佢地,仲要滕海濱受傷

得番陳一冰、周凱,心裡面都暗自擔心到底得唔得架?

每一個項目都擔心!

最後可以奪金真係好開心!期待睇女子團體,但無程菲、又無我一直幾鍾意既江鈺源,都幾失望

仲有,今屆奧運英國隊既服飾係stella mccartney做director架!雖然…其實…都係咁上下,但仍然都會好欣賞的,哈

其實中國都應該搵個設計師去設計下,唔好次次都紅色加黃色既龍好嗎?

搵下鄧達智或者dorian ho設計丫,再唔係著Y3既運動服都會靚d(睇奧運上腦)

奧運日子,我只想睇奧運,連街都唔想出

於是搓包,今次搓乜?搓蜜叉

之前講過…返完崇拜上完主日學總會一班教友去飲茶,間茶樓野唔係好好食、地方又ummmmmmmmmm

服務又ummmmmmmmmmmmmmmmmm

仲有推點心既呀姐,只要你望住車內食物超過3秒,佢就會自動放上檯,我好多次都大叫:我睇下架咋,榨住碌繩(juz looking)

不過…我同大少爺都堅持去,因為一班教友飲茶其實係聯誼

食物…大少爺最愛佢既蜜汁叉燒包,每次都拎3碟,間酒樓事實又最好味呢樣

於是…我立志要整叉燒餐包,因為大少爺Like

自己整個包可以多叉燒,酒樓d好多時空心得幾粒蜜叉




噴上蜜糖水,好肉緊啊




食譜:


叉燒餡:

叉燒$25,洋蔥半個切粒

蠔油 1茶匙

糖     1茶匙

生粉1茶匙加2茶匙水攪勻

做法:

叉燒切粒,同洋蔥粒爆香,加入蠔油、糖炒,最後加生粉水快手兜勻至有少許黏熄火

(炒到有少少黏係因為咬開時叉燒唔會散晒)


包包:

高筋粉     250g


奶     80ml

水     80ml

鹽     3g

糖     25g

蛋黃   一隻

酵母   3g

牛油 20g

做法:

將奶、水、鹽、糖、蛋黃攪勻,加麵粉,加酵母,如用酵母

搓3~5分鐘,開始撻到光滑,加入室溫牛油

然後再撻至起薄膜

第一次發酵45~60分鐘,排氣(排氣後我會蓋上擰乾濕布放雪櫃2個鐘,會更鬆軟)

發酵完成將麵糰分成等份,搓圓,駁口向下,蓋上濕布靜置10分鐘,將麵糰反轉,唔需要再蓋上濕布,靜置5分鐘

放入喜歡餡料,整造型,可以搽上蛋漿最後發酵45分鐘

180度焗12~15分鐘,做蜜汁叉燒包的話,包剛出爐便噴上蜜糖水!

2012年7月30日 星期一

蠔情夜生活(蠔砵食譜again~)


奧運啊!開幕日我捱到04am只睇10分鐘就頂唔順睡了

好激氣

好彩…都有花絮睇下

呢幾日當然沉迷地去追睇奧運

但琴日單車賽,我有一刻感覺佢地似踩緊健身單車,睇極都得一個鐘頭同一動作同一群選手

好彩無耐有跳水同女子體操

唉…近來一定無得好訓,因為我要睇奧運

最弊係我無有線,然後呢…要不停轉台

無線又做怒火2、又重播巾幗,但我又要遊走明珠同國際台

還有…我人生睇亞視既次數好小,一年都唔轉去睇一次

早幾日轉台時,我有懷疑過自己部電視無國際台

細個我好唔Like老豆睇亞視,於是有一次將電視調較到所有台都係…TVB同明珠台

激到佢彈彈下

今日又post蠔砵,無辦法,我覺得實在太好味

而且買了個瓦砵去整!正


食譜:

果皮    1片浸軟切粒粒

芫茜    1小札切碎

鹹蛋黃   1隻

蠔仔    半斤至1斤

雞蛋    4隻

油條    半條

水 100ml

鹽 1/4茶匙

胡椒粉適量

做法:

先將蠔仔沖水,檢查有無蠔殼,然後用粟粉輕輕摔,沖水洗淨,再煲一煲水,灼一灼蠔仔,唔好灼太耐,剛熟便可以

果皮切粒





芫茜、鹹蛋黃切粒




將蠔仔、果皮、芫茜、鹹蛋黃鋪底




蛋打勻加100ml水、然後倒落已經材料既盤當中



加上切片油條



鋪上微波爐保鮮紙,大火蒸15分鐘,熄火



掃一層油晌蛋面,薄薄一層,此舉可以令油條鬆脆

預熱焗爐200度,再焗10~15分鐘,或呈全黃色(視符火力)





2012年7月29日 星期日

迪士尼之灰熊山谷試玩日


呢篇係7月13號灰熊山谷正式開幕前既

迪士尼比幾個日子我揀,山谷未開幕前就去試玩

原本7月8號星期日有一場,但我無去,好彩無揀,因為當日好多日

寧願7月13大少爺拎假去,同行仲有兩個朋友,一行四人

當日時晴時雨

由開幕到而家我入過去8次,晌blog都寫過6次喇

但我仍然好好好開心!一見米奇就癲


行到去灰熊山谷又好猛太陽



呢個礦車,亦係過山車

超好玩,好玩得來唔會要你好驚

佢會倒後,當倒後時你睇唔到後面會好刺激

但有會突然向前好快,快到好開心,連玩兩次





當日好熱,我背部貼散熱貼,原來可以散熱架




裡面都有米奇,但同卡通人物影既相都有我同少爺,唔post喇

表演歌舞




出面樂園好多人,個山谷試玩無乜人



小食亭




幾無人,哈!我第一次晌迪士尼係無乜人,只有呢個位置

開幕後相信好多人




呢個玩射水




平時我入迪士尼會瘋狂影相,今次只用iphone影,因為我唔記得插卡入相機

但可以完全享受,唔需要掛住影相

第一次睇golden mickey咁專心

第一次齋睇煙花

謝謝迪士尼邀請!我睇番d相都好開心呢



2012年7月27日 星期五

五花腩(附椰汁桂花糕食譜)


今晚約敗家仔晚飯,回家等睇奧運開幕

但唔知捱唔捱到咁夜?

等四年,晌我喜愛城市舉辦,期待

好大雨,今晚著乜衫好?

以下椰汁桂花糕,係我最喜愛甜點之一

好味!而且清甜,夏天係用來招呼朋友既一個好選擇

本身我好怕花味既食物,總覺得似肥皂,怪怪

但桂花又接受得到,同埋有d桂花粒晌度浮浮下又幾靚咁

呢個份量係我調較過,覺得唔錯呢



食譜:

椰汁層

椰漿  400ml

奶    100ml

糖    100g咁上下,其實多與少大家可以試味,我自己試到合適為標準,唔會度到好準

魚膠片  25g (如用魚膠粉用同一份量)

做法:

魚膠片冰水浸軟

椰漿加奶加糖,座水整熱,直至糖溶便可以,加入魚膠片待溶化

放涼備用

桂花層

乾桂花   1湯匙

滾水     500ml

糖   100g咁上下,其實多與少大家可以試味,我自己試到合適為標準,唔會度到好準

魚膠片  25g (如用魚膠粉用同一份量)

魚膠片冰水浸軟

滾水加桂花,加糖焗至出味,加入浸軟魚膠片

將椰汁層放底,雪至凝固(可以放入冰箱急凍,但要留意唔可以結冰)再加桂花層梅花間竹去做



辣椒豆豉雞


其實我細個好怕食豆鼓味既食物

大大下接受多1D、再多1D

配雞都幾好~


雞   半隻或1隻,視符人數而定

洋蔥 1個

青椒 1個

辣椒 1~2隻

蒜蓉 1茶匙

萬字豆豉醬   2茶匙

糖    2茶匙

紹酒 隨意

水    1湯匙

做法:

雞先用(額外份量)豉油,份量只需要剛好撈勻便可以,糖 1茶匙、酒少許、粟粉撈勻,醃一個鐘

雞撲少許粟粉,熱鑊滾油將雞下鑊,然後煎香兩邊,加入洋蔥及青椒兜勻及出香味後加豆豉醬、辣椒、蒜蓉兜一兜

加一湯匙水,將鑊蓋蓋上,半分鐘後開蓋,贊酒兜勻便完成


 http://www.facebook.com/kikkoman.hk



2012年7月26日 星期四

胡裡胡椒蝦(附胡椒蝦食譜)


噢!在大雨中的一天出發

就快奧運,好開心!一個當行街係運動既人,卻好沉迷睇奧運

但今界好似太多新人,中國體操無晒李小鵬、楊威佢地,跳水無晶晶,美國無菲比斯?仲有女體操連程菲都好似無!我怕投入唔到

2004年界好好睇,當時體操有俄羅斯冰美人,又有劉旋,男子體操有仍係少年既李小鵬

但今界點都睇下

今日都幾忙,忙於約朋友見面

琴晚終於食番d蝦,原本8號風球晚食,但我堅持8號風球要食午餐肉

原本d蝦普普通通乾煎茄汁蝦

但其實食物本身係可以有更多更多變化

於是我think 來 think去,think下點變

突然叮一聲:胡椒蝦

等同胡椒蟹

但我唔知點整,又再think

終於諗到……

先用生粉沾上蝦身,整8隻,薄薄一層便可以,然後煎到表面轉色,唔需要熟

調味:用生抽加酒、加糖做個僅僅夠既份量,約半湯匙生抽、1茶匙糖同半湯匙酒,酒要夠多先香,再加約1茶匙水

胡椒 1湯匙,輕輕一dup,另佢易出味,一 dup就可以(我覺得可以更多份量)

先將半個洋蔥、一札蔥白、幾粒乾蔥頭,胡椒粒爆香,加上蝦略兜,然後淋上汁,蓋上蓋焗一陣,開蓋個汁收晒便done

效果唔錯!但我諗用白胡椒會更香,擇日重賽

用有蓋鑊整,我用Fissler個西式鍋,所以焗完好夠熱,但個汁可以做多少少等佢焗耐dd


2012年7月25日 星期三

Afternoon Tea@Green(Hotel icon)


好大雨,又出唔到門口,傾盆大雨中

今日乜都唔整,我有d週身骨痛,避免又作病,都係休息下好

上星期六同事頭婆去Tea

自從去過Green 食lunch後,對佢好感大增,個龍蝦pasta令我愛上佢http://blog.yahoo.com/iamtaisiu9/articles/647414/category/delicious+%40+somewhere

一直想去食tea,好想同大少爺去,但大少爺唔喜愛Tea,佢永遠都揀日本菜

咁我就同事頭婆去,要230pm等位,呢樣唔太Like,我好憎等位的

但個tea來到又睇見都幾開心

價錢平過我新至愛Sevva,$388+10%



頂層,其實由底食上去,呢幾件都已經食唔落,我包走幾件

以前我唔包走野,但而家覺得食物唔好浪費

我已經浪費好多年,要學習一下



中層鹹點,佢每件都得我歡心

Tea set鹹點對我來講都幾重要

我愛鹹多過甜





甜點大部份唔錯

後面個scone刈細細件

個cupcake上次食檸檬味好好味,今次呢個差少少




呢個綠茶杯中間既mousse超好味

其實甜點整體都算唔錯



愛鹹點既我當然喜歡Sevva,Green但呢度都已經好唔錯,但我會偏向食佢既lunch同晚餐



2012年7月24日 星期二

十號的二、三事(附鹹包食譜)



今早比平時早起,因為我本身開住收音機睡
聽到可能十點改發三號風球
我即彈起
因為要趕及8號風球食鹹牛肉
同埋整早餐比大少爺及住樓上的教友,因為我姊妹去韓國宣教,所以得兩父子在家


琴晚已忐忑忑忐地考慮整唔整定麵包,萬一今日打風(我好諗多左,以為打全日,都有麵包食

但我個人好衰,唔食隔夜包

於是…都決定搓,雪住個麵糰都好

跟住10號風球,又諗,應該都hold到朝早呱?

點知…扎醒比我聽到10am可能改掛3號風球,就即時彈起,好彩整得切

大少爺有新鮮出爐包包食,而我有鹹牛肉食,我教友兩父子都有早餐食!

好鍾意個包既造型



當最後發酵後,個包變成個牛肉盅




早餐仲有滑蛋


昨晚既打風晚餐

大少爺返到屋企指生晒,要燶邊流心蛋、又話餐肉要厚切

跟住又話打風食罐頭好有風味

大少爺,你出街食風仲好味,試唔試?














繼姐都買左我介紹本日本麵包書,佢都話好得

因為易做易明,d包每款都好鬆軟


我已經靜靜地整過多次,因為太正喇

呢款鹹包係乜呢?



肉鬆包



拎去送比人既腸仔包

晌包要加沙律醬去焗靚之餘仲好味





食譜:

高筋粉     250g

奶     80ml

水     80ml

鹽     3g

糖     25g

蛋黃   一隻

酵母   3g

牛油 20g

做法:

將奶、水、鹽、糖、蛋黃攪勻,加麵粉,加酵母,如用酵母

搓3~5分鐘,開始撻到光滑,加入室溫牛油

然後再撻至起薄膜

第一次發酵45~60分鐘,排氣(排氣後我會蓋上擰乾濕布放雪櫃2個鐘,會更鬆軟)

發酵完成將麵糰分成等份,搓圓,駁口向下,蓋上濕布靜置10分鐘,將麵糰反轉,唔需要再蓋上濕布,靜置5分鐘

放入喜歡餡料,整造型,可以搽上蛋漿(我今次無)最後發酵45分鐘

180度焗12~15分鐘

2012年7月23日 星期一

8號包(附日本黑糖合桃包食譜)


我知,我知大家趕車趕船趕飛機趕乜趕物

因為8號風球了

而我今晚終於有得食午餐肉了

如果聽日仍8號,我就可以食鹹牛肉三文治了

對於我,打風...係唔應該出街

但近年,總係會有朋友打風出去睇戲、去朋友屋企打麻雀、出去睇浪、睇風、甚至去滑浪

我堅持打風唔出得街,要食罐頭

無錯!唔知點解,我總係保留傳統文化,新年整年糕、端午節包粽、還有…8號風球要留晌安全地方

除了節憸外,我係好傳統既女性

今日咁遲post blog因為我搓包,可惜整好天都黑,影極都影得唔好

好彩有前包可鑑

日本既黑糖合桃包,同之前個唔同食譜,呢個更簡單

我發現將麵糰第一次發酵後,排氣,然後放雪櫃2個鐘,再整,會鬆軟好多

這日朋友丁丁上我家,我整下午茶比佢,有咖啡同日本黑糖合桃包



咖啡機對我來講,最大得益…打奶泡

可以加落熱古古力上

唔飲咖啡既我琴日陪大少爺行街揀靚咖啡豆,又多樣嗜好,我齋睇,佢就買來飲




每次整包造型都唔會知結果係點

因為發酵後總係唔同樣

食譜:日本黑糖合桃包

高筋麵粉     250g

黑糖    50g (我用沖繩黑糖)

鹽    3g

水    160g

酵母     4g

牛油    12g(室溫)

合桃     適量(先烘)

做法:

黑糖、鹽加埋水攪勻

高粉加酵母、加已烘過合桃,然後加入黑糖水,攪勻開始搓,搓3分鐘開始撻,撻到光滑後加牛油再搓,再撻大約200下

搓到有薄膜,鋪上擰乾濕布第一次發酵,約45分鐘至1個鐘,麵糰發大兩倍

排氣,再滾圓,面層鋪上擰乾濕布,放入雪櫃雪兩個鐘

再排氣,平均切割份量,大約6~8份,滾圓蓋上擰乾濕布靜置15分鐘

整造型進行最後發酵大約30~45分鐘,麵糰發大兩倍

最後搽上蛋漿,180度焗10~15分鐘(視符火力而定)









2012年7月20日 星期五

是鮑不是包


天氣熱到我厘左晌屋企大半個月,真係無日落都唔想出去

今日好熱,我出左去CWB,行左陣買條褲

再去午餐

午餐後都三點,好熱

我今日仲要著長袖雪祊衫

跟住去整頭髮,整完都唔知到底煮乜好

只想回家沖涼

好累!

咁煮乜好!

決定以本傷人……煮個麵比佢

大少爺返來時我唔比佢入廚房,煮好後一拎出晚廳,佢:"嘩"

的確好易煮,鮑魚凍水連汁煮,煮滾加水、加少少蠔油,打個生粉獻
淋上先煮好伊麵,同灼好既菜
哈!見到佢都開心!個罐頭鮑一開十隻,原來唔係想象中細隻

佢今日無得食我搓既包,但有鮑食,哈



2012年7月19日 星期四

葡萄成熟時(附白玉葡萄食譜)


09年我去完沅紗廚房食過後整過一次

原本做書整第二次,但而家擺晌blog上

冬瓜唔係吸引我既食物

但呢個葡萄造型令我難忘你  的姿態動靜,略帶憂鬱的一雙眼睛


這個菜式是我在大坑一間食店吃到的
那時候大少爺用了一副"哼"的表情向我說:你都一定識整啦
而我當然用更"哼"的表情但又扮謙虛去回答:乜咁睇得起我呀?

哈~當然我也真的有做過
把冬瓜變作葡萄的確令我對冬瓜的好感大增
每次見到葡萄就想起:
我是葡萄樹,你們是枝子。常在我裏面的,我也常在他裏面,這人就多結果子。因為離了我,你們就不能作甚麼。”(約一五:5)
感謝主~

冬瓜    一斤

雞湯    兩杯

瑤柱    五粒

生粉    一茶匙

水      兩茶匙

冬瓜用粒粒工具,做成粒粒狀

放上碟,蒸10分鐘

瑤柱先浸軟,用雞湯煮滾,兩杯煮成一杯份量,再加生粉水煮到杰身淋在冬瓜粒粒上便成



炒 (豉椒炒蜆附食譜)


今日忙碌日

豉椒炒蜆好似係學貝類海產入門既菜式

我15、16歲時有一次上同學屋企,佢局然親手炒豉椒炒蜆,那一刻我…覺得驚天地泣鬼神

點解咁都識整?

到早前,打算整時,才發覺...........車~易過煮白飯(因我而家仍成日忘記按掣囉)

只要有個豆豉醬已經成功了一半


豉椒炒蜆

蜆   一斤

萬字豆豉醬   半湯匙

糖 1茶匙

蒜蓉   1茶匙

辣椒   1隻

做法:

將蜆加入鹽水吐沙,浸大約一個鐘後倒清水份略沖洗一下,然後撈起瀝乾

熱鑊加油,先下蜆兜兩下後加豆豉醬、蒜蓉、辣椒,炒至所有蜆開口,想香少少可以贊酒,然後可以熄火





的確,萬字除了醬油,還有…醬料

今次用豆豉醬

萬字facebook   http://www.facebook.com/kikkoman.hk






陽光天使蛋糕@美心


美心西餅出左兩款迷你天使蛋糕

有士多啤梨味同埋芒果味

佢地有鮮果夾心既

加生果味個感覺FRESH D,而家買$88一個

只係暑假期間出



士多啤梨味,我愛多DD

因為佢感覺好靚呢




如果想試去美心西餅買

2012年7月17日 星期二

黃豆四弄(附豆漿、甜豆花、鹹豆花、豆渣餅四款食譜)


孤單的滋味天知我知....最著緊的事已錯過無限次~

呢輪成日洗腦式聽呢隻歌,隻歌最勁係呢配合到我心情

仲有,播完後我同大少爺不停晌度唱

我心情係因為之前寫好既書…因為某d原因出版唔到

唔想具體去講點解

以下黃豆四弄…

全用黃豆做出來,有鹹有甜,我唔想浪費呢個idea,所以擺在blog

豆腐花做甜品之外,也可以做菜式
自己做的豆腐花幼滑外
還滿香豆味
還可以自選配菜
豆腐花與甜豆腐花一樣做法
但配料是另外做的

熱豆漿   500ml
石膏粉    1/4茶匙
粟粉 1.5茶匙
飲用水    100ml

將石膏粉與粟粉混合加入飲用水攪勻
將熱豆漿撞入粉漿,倒入時盡量舉由高處撞入,像拉茶這樣
撞入豆漿後盡快蓋上蓋子等20分鐘,撇走豆腐花上的泡泡便成
配料
雞扒 一塊
西芹 半棵
紅蘿蔔   半條
冬菇 四隻
汁料
生抽 半湯匙
糖    1茶匙
生粉 1茶匙
水    1茶匙
麻油少許
雞扒去皮切丁粒,加鹽一茶匙、糖半茶匙、胡椒粉少許、生粉半茶匙撈勻,最後加麻油
西芹、紅蘿蔔、冬菇浸軟後切粒
燒熱鑊加油,爆香雞肉、再放入其他配料兜勻,雞肉熟透後加入汁料兜勻便可以倒上豆腐花上(記得要輕輕手啊)





每次見到被榨乾的黃豆蓉都會希望物盡其用
後來才知道可以做豆渣餅呢
一物二用又有營,哼~
豆渣    80g黃豆的渣或視符做完豆漿後還有多少份量,沒有規定的
合桃    12粒
洋蔥碎  2湯匙
鹽   少許
麵粉    少許
將合桃用150度焗5~10分鐘,視符焗爐火力,也可以從肉眼見到金黃魚便可以
合桃焗完放涼後弄碎,混入豆渣內
再加入洋蔥及鹽,搓成餅型
做後撲少許麵粉,煎至兩邊金黃色,煎時要輕輕力啊!否則..容碎呢



愛喝豆漿,那時我住在炮台山
跟著大人到春央街街市,內有豆腐店
豆腐店還有冰凍豆漿及豆腐花
從那時起,我便很愛豆腐花及豆漿了
這份愛沒有改變
只是....我把自己喜好搬進家人
自己去做豆腐花
做自己喜愛的食物,有著除了是美味的食物,還有一份大滿足感呢

熱豆漿   500ml
石膏粉    1/4茶匙
粟粉 1.5茶匙
飲用水    100ml

將石膏粉與粟粉混合加入飲用水攪勻
將熱豆漿撞入粉漿,倒入時盡量舉由高處撞入,像拉茶這樣
撞入豆漿後盡快蓋上蓋子等20分鐘,撇走豆腐花上的泡泡便成

另外…用冰糖加水煮成糖水,黃糖隨意加在豆腐花上
*石膏粉藥材店有售



愛自家做的豆漿
但其實做豆漿都有竅門
豆漿很容易會黏鍋底,一定要不停攪伴
還有…如果豆漿煮得不夠透的話,會令人有嘔吐感及有一股草青味
後來,買了豆漿機就不用再費心神
但是如果想自家做都不太難呢
豆漿做法:
黃豆   80g
水 600ml
將黃豆浸過夜,然後加600ml水放進攪拌機,打至黃豆完全綿碎
把剛打完的豆漿連渣倒進魚湯袋,大力擠壓直至袋內豆漿完全壓出
放進小煲,用大火煲滾,轉小火煲20分鐘,其間要不斷攪動,否則會有燶味