2017年11月30日 星期四

秋冬防敏篇

秋天天氣涼快之外仲有變得乾燥,呢種乾燥對於皮膚最明顯
尤其有皮膚敏感、濕疹嘅小朋友係最辛苦
呢個時候保濕好重要,即使無濕疹都要注意皮膚狀態
記得包包曾經有濕疹,用好多唔同沖涼液都無改善,我索性唔用沖涼液幫佢沖涼反而皮膚狀態不錯
晌秋涼天氣後,我真係會只用清水幫包包沖涼,令佢皮膚減少剌激
其次沖涼唔可以沖太耐否則會沖走皮膚天然油份、水溫唔好太熱要感覺舒服溫度
沖完涼輕輕印乾水後就要搽cream,咁樣就可以保濕!但揀cream可以的話要選擇無石油或太多化學成份cream



另外…食物要有滋潤性質,冬瓜、雪糕等等寒涼又去濕食物就唔好食住喇

最好就係食梨、飲多d滋潤湯水,或者糖水都可以

分享一個小心得:話說包包晌2歲多時有一段長時間半夜會扎醒又喊又叫

莫名奇妙好一段日子,心諗:點算呢?

後來有一位長輩佢同我講:你要比d清熱糖水或者七星茶佢飲,佢腸胃熱令佢半夜唔舒服

於是我照做後包包就可以安睡(正確係父母可以安睡)
所以秋冬要比竹蔗水、雪梨汁、或者食下梨,呢類有滋潤功效食物有助滋潤及清熱呢



 
包包好好彩,轉飲雀巢®超級兒童能恩®奶粉後濕疹好快就好轉
奶粉對皮膚都直接有影響,有d 奶粉內含蛋白質唔容易吸收,一消化得唔好就會令腸胃出現不適,而腸胃唔好皮膚都唔會好,而雀巢®超級兒童能恩®奶粉係含已切割致敏原嘅pHF水解蛋白配方 https://goo.gl/fG98Xm ,腸胃容易吸收到養份!



2017年11月29日 星期三

煲仔週之......2.0


煲仔週唔好停,其實我開始好忙

今星期得兩晚晌屋企,今晚同明晚都有event要去

但開得個頭話做煲仔週比大家就要盡力

喜歡盡力去完成任務亦覺得係一種責任感,我記得第一份工老闆同我講:做人最重要負責任

呢句說話我記到今日,負責任係好重要亦係成功踏腳石

總覺得有一班人睇blog睇成十年,所以應承得就盡力去做吧

今日個煲係…香辣鹹魚芥蘭排骨煲

我覺得做煲仔菜要諗唔同材料點配搭,咁如果用豬肉又點整呢?

如果又要快手又要煲仔又要惹味又點呢?

呢個係好快手煲仔,有芥蘭晌裡面唔煮得太耐,而鹹魚又香辣椒又辣加埋應該得

唔用鹹魚可以用馬拉盞去整,會仲好食


食譜:

腩排    $35

梅香鹹魚    半件(切粒)

芥蘭    半斤

蒜頭   3粒

乾蔥頭   5粒切片

薑    2片

蔥   少許

辣椒    3隻

調味

生抽    少許

糖    1茶匙

水   半杯

生粉水   少少

做法:

鹹魚切粒,用梅香整就最好.........我估


排骨用生抽、糖、少許生粉撈勻醃 30分鐘咁上下

然後爆香排骨備用


爆香所有香料,加入鹹魚粒兜勻


放入排骨兜勻,加少許生油、糖、少少老抽

再放入芥蘭兜勻,贊酒

加入半杯水煮滾加生粉水便可以識火

*因為我要影相,如果原煲做張相無咁好,所以我做完先轉煲!





大少奶's Delicatessen

宣傳你的專頁

2017年11月28日 星期二

煲仔週.......

午餐食煲仔菜有點瘋狂,但昨日個雞煲好多人鍾意

又想要多d煲仔菜食譜,於是我就決定…整多幾個

今星期煲仔週,哈哈

其實我成個星期都好忙,因為我連續幾晚要外出,煲仔菜要下午食真係火都嚟咁滯啦

先整"胡椒蝦粉絲煲",胡椒蝦我整過乾身版本,但做煲仔就要少少汁

胡椒係我教會姊妹晌柬浦寨短宣時買比我,d胡椒香到不得了呢

胡椒辣味同雞煲辣味唔同,我兩種都愛




食譜:

中蝦 1~2斤(視符你需要)

鮮魷    1隻

黑胡椒粒  2湯匙  要輕輕樁下佢,唔使太狠,等佢香味飄出

洋蔥   半個切絲

蒜頭   3粒

粉絲   一至兩扎

生抽   1湯匙

老抽   少許

糖     1茶匙

牛油    少許

鹽   半茶匙~1茶匙(視符你偏好鹹度)

花雕酒 半湯匙

做法:

胡椒樁一樁佢



蝦去腸去蝦眼位置抹乾水備用,鮮魷洗淨切件

蝦撲少少生粉再煎香




牛油爆香洋蔥、胡椒、蒜頭、炒至香味傳出放入粉絲、再加生抽、老抽、糖、鹽兜勻倒 1杯水入去煮


煮滾後加酒,再試一試味,味ok就加蝦回鑊,煮至收汁(你想多汁少汁自己話事)便完成

有無發覺我換了煲,因為煮完後影出來唔靚,所以咪換個小煲再影相




*我今次有少少鮮魷,你鍾意可以加,否則唔加都得

2017年11月27日 星期一

火噴噴

由大肚開始我口味變得好麻甩

若干年前興起雞煲我完全無動於終,但到大肚時我就好想試食

當然邊敢去試,太辣的話對孕婦腸胃或BB吸收都唔好

直到我生完那個冬天我就試食,一發不可收拾咁

可惜大少爺又唔食得辣,我就要同朋友去食

當然我對自己喜愛食物係一定會自己整,我試過唔落麻辣醬去整

整出來味道好似,今次買現成麻辣醬(大品牌有出的),個醬都唔夠麻

好彩我常備花椒,咁就自己加花椒做出來都唔錯

所以我就一次過寫埋用麻辣醬同唔用麻辣醬食譜

其實麻辣醬係方便但味道反而係自己調較好d,最重要:花椒


食譜:

雞         半隻或1隻

辣椒乾         5隻(可以用新鮮辣椒仔,辣度自己調教)


乾蔥頭          10粒

  花椒                    1湯匙磨成粉,或樁碎
(可以自己調教多與少,花椒係麻既感覺)

磨豉醬                   1湯匙

豆辦醬                      1湯匙

*如果用麻辣醬就可以skip磨豉醬及豆辦醬,麻辣醬用 1.5-2湯匙


生抽                       少許

糖                            2茶匙

水                          半碗

酒                          少許

蒜頭                         5粒

蔥段                        適量

*花椒要揀呢種,呢種係又名川椒,帶麻辣味道

另一種黑色一粒無乜麻香的



再磨碎,


辣椒乾

可以用新鮮辣椒,但用辣椒乾不但會辣仲會有一種味道

當然你喜歡新鮮辣椒味道都得


乾蔥頭   10粒(我用十幾粒)

用乾蔥頭香好多


做法:

將雞先用生抽、老抽、糖、酒、薑、生粉去醃,醃大約1個鐘

先行爆香雞,其實走油會好食d,但通常晌家做唔會走油



加入花椒粉,洋蔥、蒜頭、辣椒、蔥段兜至香味出


炒香後落晒所有醬料、生抽、水、糖等等調味

然後煮滾,炆45分鐘,要試下味,如果唔夠鹹再加鹽

想香味凸出d就加糖





大少奶's Delicatessen

宣傳你的專頁

2017年11月22日 星期三

反式健康

第一次覺得麥皮如此美味係因為呢個"麥片蝦"

一直以為要買專做麥片蝦嘅麥片去做,原來真係用普通麥皮就做得

你咪以為我唔食麥皮屋企就會無

屋企長備一包麥皮但無人會食咁解之嘛

做法都唔難,最難係要炸一炸d蝦,我知又會有人問焗呀?煎呀?等等

呢個菜式要香一定要將d蝦炸一炸,反而個麥片係炒香就可以

麥皮同九層塔(或用咖哩葉)、蒜頭、辣椒、鹽炒香後真係堅好食,甚至用麥麥撈飯



蝦     8隻

蛋    半隻

生粉     1湯匙

麥皮     半碗至1碗

九層塔    5片(原本應該用咖哩葉但我買唔到)

蒜頭   2粒

辣椒    1-2隻

鹽     1/2茶匙

牛油    1湯匙

做法:

蝦去腸、煎走蝦眼及腳索乾水再放入雪櫃半個鐘

加入半隻蛋撈勻,再加生粉撈勻


用大火力炸熟,要大火先會夠乾身


用牛油爆香九層塔、蒜頭、辣椒


倒入麥片開始炒,用中火去炒,要邊炒邊兜勻


炒到金黃色就可以將蝦回鑊再兜勻便完成喇!佢真係好好食





大少奶's Delicatessen

宣傳你的專頁

2017年11月21日 星期二

防敏到底係由幾時開始先好呢?

防敏到底係由幾時開始先好呢?

懷孕時好多有經驗甚至無經驗嘅朋友都喋喋不休咁同我講:唔好食海鮮、唔好食芒果、唔好食牛肉、唔好飲凍嘢、唔好食乜乜、唔好食乜乜






否則BB出世後會乜乜物物敏感

雖然包包係我第一個BB,但本能上我都會諗:係咪呀?

於是我就做research,說法不一

最後問醫生,或者我問正個醫生比較貼合我思維

佢話:敏感其實係視乎於父母本身有無敏感,如果父母兩個都有敏感,BB就可能會有遺傳

um...最後我就從自己嘅想法去做

海鮮唔食蟹因為寒涼、唔食貝類容易中毒、唔食芒果怕濕熱、牛肉有食仲常常食、凍飲偶然會飲但唔會隨便飲因為唔知冰塊會唔會唔乾淨.....

包包出世後皮膚好靚、無乜敏感

不過…去到4、5個月時佢開始有鼻敏感及濕疹

鼻敏感就好明顯係我屋企大塵引致,因為我住嘅區域不停起樓、國際學校
跟本就係好大塵,唯有長開空氣清新機、勤換床單
盡量唔好積存毛公仔
將令佢敏感嘅元兇減到最少

咁到底係咪我防敏做得唔足呢?

我轉左含pHF水解蛋白配方嘅雀巢®超級兒童能恩®奶粉比佢食,佢啲濕疹好快就消失
好多媽媽都會因為見BB皮膚唔好有濕疹去自責,不停問:係咪我大肚時唔聽話食過海鮮?牛肉或其他?
當包包轉奶粉後皮膚幾乎立即好番,我就深明腸胃同皮膚係息息相關
正如:我每日食薯片,最終就會出暗瘡

長期食芒果同荔枝會起紅疹


甚至食麻辣火鍋必會肚瀉

人身體好多毛病或不適都從飲食及腸胃有關

尤其BB腸胃發展未成熟,而奶粉係腸胃及皮膚嘅關鍵

雖然最後未必完全可以控制得到腸胃發展,但至少都要盡量揀一隻好配方奶粉,將佢敏感機會減到最低

到現時,包包仲keep住食緊雀巢®超級兒童能恩®4號奶粉,揀pHF水解蛋白配方嘅奶粉俾佢,不單止poo poo去得好,仲有助防敏令佢皮膚無乜問題,俾bb全面營養,能健康快樂地成長!

想了解更多,可去呢到睇吓:https://goo.gl/z6YEDN

#資料由雀巢防敏1000天計劃贊助 #防敏好時機 #腸胃 #皮膚

2017年11月20日 星期一

彩虹方程式


大部人見到彩虹都會開心,彩虹感覺好有希望
即使天不會常藍,但雨後會有彩虹
正如呢個彩虹啫喱,只不過係啫喱但大部人見到都會"嘩"一聲
呢個彩虹啫喱係昨日同班教友BBQ,整嚟做甜品
其實唔係難整但要心機
我估啫喱人人識,但其實呢個係有一個方程式



我用一個1500ml模,當中整6隻顏色
彩虹本身有7隻色,個綠色同青色要合拼為一隻色
我有將啫喱分成6層,每層 150ml,而白色係椰汁奶凍層就每層80ml一層要做5層
最尾一層紅色就可以加多少少,否則倒轉放時會無咁凸出

點樣知道自己個模有幾大?好容易將個模入滿水再倒落量杯中就知
知道份量後再去計每層有幾多ml

我個比例係一盒啫喱 80g對160ml熱水,做出來有200ml份量
但我只係用150ml,其餘50ml做到個細版本


整啫喱無難度,但其實將熱水倒入啫喱粉未必會溶晒
所以熱水+啫喱粉攪勻後仲要座一座熱水確保完全溶晒
啫喱要做完一層先再開另一層啫喱粉



反而想講要買齊6隻色啫喱唔容易
我去一間一田、一間百佳、一間惠康先買得齊
本身我想6隻色都買Jello,但係我呢邊間一田得兩隻色
然後其餘超市都係唔齊色呢,最難買係綠色
藍色一定要買jello



咁椰汁奶凍層點做?
我要做5層即係400ml,但要預多100ml做走踐位
咁用250ml椰漿+250ml奶+4茶匙糖+25g魚膠就成奶凍層
椰汁層可以一次過做起,如果怕凝固可以座暖水



每做完一層啫喱雪到凝固就加一層奶凍再雪到凝固後重複倒上啫喱

就係咁…就可做到喇

不過…我做成一日,大少爺話我做乜不停進出個廚房呢

#彩虹係上帝同人嘅約定
#BlueMonday變成彩色



大少奶's Delicatessen

宣傳你的專頁

2017年11月17日 星期五

一Beer可炆牛

通常我寫完遊記就比生活重回正常軌道

出廣告前都要出個食譜先

一返到自己屋企第一時間都要煮飯,起碼食返幾日住家食物先

唔可以比包包食慣外食,去旅行每一日都要有一餐清清地,否則小朋友習慣太豐富會變得更擇食

昨日晌度諗煮乜好,即管去一田邊行邊諗跟住見到牛肋條又想炆

但又唔想炆太濃味再繼續行望一見到啤酒

不如就煮啤酒炆牛肉,用啤酒炆可以鬆化牛肉肉質,加洋蔥、紅蘿蔔同薯仔一齊炆

比較清又唔會無味,一於咁話

正所謂:人生唔能夠淡而無味亦不能太重口味

呢個就啱你,哼



牛肋條   約 1磅

洋蔥   1大個

紅蘿蔔   1條

薯仔   1-2個(我用小新薯就大約5個)

蒜頭   2粒

啤酒   1罐(我求其買罐,你可以用黑啤)

冰糖   1小粒

生抽   少許

鹽   適量(最後先落)

牛油   適量

做法:

牛肋條切大粒,中發白麻雀咁大粒,放少少生粉撈勻

紅蘿蔔、洋蔥、薯仔切件

牛油爆香洋蔥、紅蘿蔔、蒜頭,然後放牛肉入去炒至轉色

喜歡香草可以加少少

贊少少生抽入去兜勻



加一粒小冰糖


倒晒一罐啤酒入內 ,滾後就轉小火蓋炆 45分鐘

呢個時候先加入薯仔,再炆30分鐘便完成

跟住可以加少許香草及放鹽調味便完成,鹽絕對要最後先落



大少奶's Delicatessen

宣傳你的專頁

2017年11月16日 星期四

波兒

旅行完後感覺一頭煙,好多工作都無從入手咁

個人仲係好累,又覺得有壓力

呢個時候我通常都會埋頭苦幹去整嘢,當然最好係整嘢食

我好鍾意炸嘢,炸物所花心機係比一般食物更多,我會好集中精神去炸

既然今次用來減壓就整望到會開心食物

呢個豆腐冬甩,又名:波堤冬甩

佢用豆腐做但因為有用白玉粉或糯米粉,所以係煙煙un un

其實做個過程係好治癒又有滿足感呢

我係跟個日本網站整,整完人都開心d呢 


食譜:tastyfood改編

軟豆腐   250g

白玉粉或糯米粉   100g

低筋麵粉    100g

糖   50g

粟粉   1湯匙



做法:

將所有粉加糖撈勻


豆腐壓爛


將所有粉加入豆腐內撈勻


撈成一個大波波


牛油紙剪成小四方型

再搓成小波波,6粒成為一圈放上牛油紙

每一粒都要互相緊緊貼一起


將冬甩連牛油紙一齊放入油鍋內炸,當定型後可以夾出牛油紙


炸至金黃色就可以撈起


可以灑上糖霜或沾上朱古力再裝飾



大少奶's Delicatessen

宣傳你的專頁