2009年2月27日 星期五

學乜好呢?


今日下晝有特備節目,繼續post下舊野先

上星期 Fiona問我可唔可以幫佢整咖哩牛腩
佢一家都想食
我當然應承佢啦!仲要脅佢幫我新書寫序

之後我整好去拎比佢,就開行turbo返屋企玩pet,比佢話我癲左

不過…呢幾日…我突然覺得點解我會幫朋友整咖哩牛腩既呢?
成件事好唔型

如果有朋友叫我幫佢整陶瓷花瓶、整大衛石像,我覺得型好多啊

係時候要去學陶瓷,哼~~~~~

一係去學畫畫,到時有人喇我畫幅瀑布下的水點都幾型

↓留起少少比自己試味,good~~~~~~~~




2009年2月26日 星期四

當我想起你


今日潮濕,停止任何煮食活動

時光倒流........................唔記得邊個星期日

話說唔記得邊個星期日,fiona上我屋企拎日本旅行手信
咁我就整Cannelloni比佢做late lunch

當時我晌街後到佢電話,話晏d上我屋企
正在timesquare買 skincare,就唯有飛撲落city's super買材料
六神無主之際,記得有包Cannelloni,就求其買包菠菜、碎牛肉返去整

其實呢盒cannelloni,我本身唔知買嚟做乜?
一直放晌屋企不見天日
但適當時候又會記得佢晌樹

所以有時我買買埋埋既嘢係有用既

只係唔知幾時用............之嘛~
哼~~~~~~~




買呢款cannelloni,厚薄適中




已釀入炒過既碎牛肉、洋蔥、菠菜

略為拖水先放入餡料,再加大量醬汁去焗




焗好既裡面,其實應該好多菠菜、好多洋蔥,少少牛肉會更好




呢兩日我沉迷地玩pet pet,但係我又會一邊寫稿
玩玩下就有靈感寫
寫寫下又會覺得要玩一陣,原來pet pet係剌激到我腦袋
好想叫隻pet 幫我寫序啊!

2009年2月25日 星期三

春日之癲


原本約Kathy shopping,但我頭痛
係比天氣悶焗到頭痛
出現獨有【春天煩燥症候群】

睇下今晚好唔好d,否則要除消今日之約
心情煩悶,好想旅行散心
而家既天氣令到購物意慾都無埋
一諗到踏出車門就要被濕熱煩擾,真係乜心情都無啦

好想楂車漫無目的咁向前去,去到俄羅斯停低車,飲羅宋湯兼入油
再直去到韓國買泡菜
然後夠鐘就開車返香港整泡菜炒飯比大少爺食~~~~

型!

又痴線!都係玩下pet舒解下悶悶的心情吧吧吧吧吧

今日凍甜品…椰汁馬豆糕,原本係kathy既小禮物

佢食唔食到隨緣吧......吧............




椰汁馬豆糕 

材料 A

馬豆      100克

材料 B
  
冰糖     適量

水       5杯

材料 C

奶      160g

椰汁    400g

鷹粟粉  170g



製作

1. 馬豆洗淨先浸一個鐘,再煲淋

2. 材料B煮滾,直到冰糖完全融掉,加入煮淋既馬豆

3. 材料C攪勻,慢慢加入步驟(2),邊煮邊攪,直至感到重身及杰身,熄火入模

*馬豆先浸一個鐘,放滾水煲20分鐘熄火焗20分鐘,如未夠淋就重覆做

2009年2月24日 星期二

moody 糊


呢兩日好煩悶,比天氣攪到我好煩悶

好潮濕、又濕焗,加上我屋企特別潮濕

皮膚又出現變化,總之就週身唔聚財,火都嚟埋

除抽濕機外,已經要開冷氣,因為濕焗天氣好難受啊

琴日試整合桃糊,係試整

我用整芝麻糊既食譜轉做合桃,合桃用焗既方法先焗香先磨

都ok啊!不過仲可以改善下

日內會整多次,到時再寫食譜呢!等我啊

呢張相似呢兩日我既心情,moody







2009年2月23日 星期一

彩色玻璃


初初見到呢個玻璃曲奇已經好想整
之後去別墅玩,小冬都整
當時我立志要整

哼~~~~~~~~~整左

呢個係令人開心既曲奇,覺得呢款曲奇好靚
加上我本身鍾意食糖
所以更加愛佢

Fox's糖我最鍾意食紅色
打開罐糖我實會食晒紅色
所以我有理由相信我整既玻璃曲奇係唔會有紅色既呢

噢~~~~~~~~~~~~




食譜 copy fr :Vanlily


印模曲奇食譜 (約20件星星/心心曲奇)


牛油 100g

糖粉 60g

雞蛋 40g

低筋麵粉 200g

泡打粉 2g

鹽 2g


1) 室溫放軟牛油, 加入糖粉及鹽打至鬆發

2) 逐少加入雞蛋, 直至蛋汁完全混入牛油糊

3) 篩入低筋麵粉及泡打粉, 以切伴方法伴勻,

4) 弄成糰放入凍格雪1小時以上, 取後後碌平, 用餅模印出曲奇




玻璃做法

Fox's 果汁糖 約15粒


1) 將果汁糖壓碎, 放在曲奇中央, 以160c焗15mins至金黃色及糖溶

2) 出爐後要等曲奇完全涼透便可取出


* 果汁糖可以不用壓得太碎, 否則會有很多汽泡的, 每粒果汁糖約分開一半就可以

* 曲奇可以印得厚一些, 效果會好一點

* 焗的中途, 留意每塊曲奇果汁糖的份量, 如果太少可以中途加上, 不要做到"穿""玻璃哦~

2009年2月20日 星期五

粉葛新譯


要開始努力寫稿喇!

今日突然好有勁咁寫稿,但都有玩pet pet,哈哈

唔想落街,自己整午餐,有我10炒9次衰既炒飯

仲有09春夏...........我最愛既湯粉葛赤小豆紅蘿蔔粟米煲瘦肉

粉葛係我春夏最鍾意既湯,好甜、又清熱、赤小豆又去濕喎

粉葛而家晌我心目中係美好既!

所以…如果我話人粉葛,可能係讚美架!

例如…

你真係好粉葛    (話人好甜、好sweet)

你好粉葛架你   (我口頭蟬...好叻架你)

你真係令我好粉葛啊! (你令我好開心)

哈哈!我隻pet pet個樣好粉葛、佢好粉葛架!真係令我玩到好粉葛

痴左線!







2009年2月19日 星期四

咁腦暈飩


今日大少爺半日安,其實都係休息下

我就一早去買料煲湯、仲整小食比佢食

因為....呢輪我實在太喪心病狂咁玩pet pet

實例…我試過

煮飯前量好紅米,掛住玩,唔記得浸紅米

話去沖涼,點知行入沖涼房,已經係...2個鐘後既事

日日夜夜講隻pet,大少爺習慣兩個鐘打比我一次,我兩個鐘去報告隻pet既近況


哈哈!所以今日我要努力整下嘢

是日小食........錦滷雲吞
我想整好耐,甚至gathering都想整,但係比較繁複呢

噢…炸完食物最重要係乜?..........記得洗臉啊!唔好被油煙攻陷皮膚呢

好熱氣?唔怕…我今晚煲粉葛赤小荳湯清熱呢







雲吞裡面係墨魚膠同蝦




咁今日隻pet pet點算?無人理?

唔怕,我叫大少爺幫我玩住先丫嘛!大少爺已經識玩,仲知道$500寶箱的奧祕

這一次我執著面對 任性地沉醉 我並不在乎
這是錯還是對 就算是深陷 我不顧一切
就算是執迷 我也執迷不悔

哼~~~~~~~~~

2009年2月18日 星期三

又係佢啊


無錯!又再見到佢
無論我blog、我本書都跟到佢蹤影

今朝我去補給糧餉,諗唔到lunch食乜
行過肉櫃見到牛肉
突然有股澎湃既漢堡包慾望爆發

哼..............既然爆發出咗,就唔好逃避吧!

結果咪.......整漢堡包囉囉囉囉囉







唉........繼續沉迷pet society,但只可以放縱地玩埋呢個星期
編輯開始追交功課喇!其實我都寫得六六、七七
但食譜部份有好多未做
散文又略嫌唔夠,我係時候要好好地培養靈感

不過…玩多幾日先....罷啦!到時我玩少d,唔係唔玩喎!hahahaaaaaa

To my dear pet

逃避你...卻又期望可跟你做情人 而用情的心  可天昏地暗

2009年2月17日 星期二

有圖為證


琴日我既下午茶

chiffon cake同泡沫綠茶

日本好多食chiffon cake既餐廳,每次行過大少爺都會沾沾自喜咁講:你都識整啦

哼~~~~~~~~ 無錯!我都識整!

但日本都賣得幾貴,一件要600yen,成$50一件

一個蛋糕可以切開8件,即係話一個蛋糕唔計零頭可以賣$400

所以...........以後想食我既戚風蛋糕的話,我遂件賣

最大競爭對手應該係我近身vanlily!

有見及始我決定大割價賣$48一件,vanlily賣$52架

好抵呢?hahahahhaaaaaaaaaaaaaaaaaaaaaaaaaaaa




望下都收你錢!哈哈!




有圖為證架!




我杯泡沫綠茶晌呢間買架!經過既就入去睇下啦

泡沫綠茶係加有奶同糖既,好好味架,一大包有5小包呢






2009年2月16日 星期一

大阪遊後記


今次大阪之旅都玩得好開心,因為同大少爺去玩嘛

um.............大阪比我想像中好,加上d野較平,不過就始終唔夠東京令人興奮

平時我唔會介紹酒店,但今次都想講下

今次我第一次online訂酒店,係我睇一位blog友abebe介紹既
當時對酒店毫無頭緒之際睇到佢個blog
首先多謝佢詳細答我既問題呢~




間酒店晌大阪城附近,對面係大阪博物館,的確較寧靜
後面係警署,有幾個政府部門晌附近





但係間酒店好舒服,係比我晌池袋住既crowne plaza metropolitan 細

價錢亦都平一半

有空氣過濾機




房內有電腦,亦都有lan port




雙人床係5呎床




價錢只係 7000yen一晚,即係唔駛 hkd$600一晚

我住4晚 $2500唔駛呢

酒店會晌你online booking後會send confirm email
再會晌你入住日期前幾日再email你

返到香港後又收到酒店send來既多謝email

間酒店既services好好,係細間d,但令人滿意

近地鐵站,地鐵一出連馬路都唔駛過,2分鐘唔駛就行到
附近有幾間居酒屋、好多間便利店
對面有麥當當、KFC、Mos burger

由機場往返酒店,都只需要搭地鐵到天王寺轉JR


但問題係,你搭地鐵去心齋橋就要轉車,但都唔煩既

酒店個地鐵站係谷町四丁目--->搭一個站去谷町六丁目轉(長堀鶴見綠地線)-->心齋橋

但由酒店去梅田就完全唔駛轉車

所以我都覺得係方便呢

酒店網址:http://www.hotel-lut.com/guestrooms01.html

晌日本每晚大少爺都要食杯麵,仲要食大杯既







但我發現蕃茄芝士味,一試之下覺得好好味啊!

我唔食即食麵既人都覺得好好味啊



返到香港咪駛旨意再食啊

呢款麵包亦係大少爺消夜之一,有好多唔同口味
最好食係牛油楓糖味
其次係呢隻蛋沙律呢

無論去幾多次日本,大少爺都一定會買來食




今次晌日本愛上關東煮,黑門市場有一間食物店,個湯底係好甜
便利店既..........麻麻地




2009年2月14日 星期六

情人節晚餐


情人節快樂!

晌一月辦年貨時,大少爺已經送禮物比我

原本大少爺係計劃晌大阪過情人節,但因工作關系要提早去

所以情人節係變成香港渡過

預備禮物送比大少爺,但以為自己已經無禮物後

估唔到收到一束我最愛既紅玫瑰




去完旅行好疲倦,所以整一個簡單既情人節晚餐

呢個係沙律,原本想切晒粒撈埋就算,結果整成以下模樣

係簡單到唔可以再簡單既.....合桃菠蘿蘋果蝦沙律

將大少爺鍾意既食物做埋一堆,佢實滿意呢




焗洋蔥湯,大少爺鍾意既西式湯




永無失手既紅酒煎牛扒,晌citysuper肉櫃買既,肉質好好




juicy~~~~~~~ 哼~~~~~~~~~~~~~~




世界之鹽

呢個牛扒用其一個國家既鹽去醃呢






甜品:原本係火焰雪山

結果係.........無火焰雪山

將meringue包雪糕,面層燒一燒,好好味啊!燒過meringue實在太似燒棉花糖

大少爺好鍾意呢~




大少爺多謝你~~~

多謝你令我每日都充滿歡笑

2009年2月13日 星期五

Day 5@Osaka


我實在唔想隔夜遊記,而且聽日想寫情人節晚餐
又想遊記連貫喎
星期一我會寫埋後記,介紹埋間酒店啊


我住既酒店晌大阪城附近
所以最後一日就去大阪城公園

附近有間電視台,晌大阪博物館隔離
就入去八掛一番




呢度有拍攝啊!可以入去做現場觀眾
我同大少爺話,如果晌日本上電視都幾型
當然我地無咁做啦







之後去大阪城公園
當初無乜期望,只係想去行下
入到去覺得好舒服




大少爺唔肯坐呢架火車
因為............佢話呢架車無路軌,唔係真火車喎




賀牛年既牛花





入到去大阪城梅林,梅花盛開,好多日本人晌呢度影相啊










小食亭





原本計劃落天王寺轉車時先食lunch
但係我好想試下晌度食啊!
初初大少爺唔肯,但佢見到一樣食物後就改變心意

係..................炒拉麵,佢見到後就話晌樹食喇
味道都好好味啊!即炒既呢




呢個係五平餅,即係燒年糕




我要天婦羅烏冬,烏冬係普通烏冬,但當時環境令人食得開心


繼續影相










之後到天守閣




我唔會放過任何抹茶雪糕既呢




噢!之後就返酒店拎行李

再度重遇摩天輪




飛機餐,都ok啦
件蛋糕同個雞肉沙律就好好味啊!




大阪遊記完喇!仲有一篇後記呢

期待5月去東京,大少爺你要努力爭取大假啊