2013年1月31日 星期四

爆炸(口水雞)


過年既食物都寫到重點幾樣

其餘既…下星期睇下有無時間做吧!一過年就忙瘋了

我........連利是錢都未唱囉!呢樣先頭痕

今晚有個event,所以都唔會整d乜啦

上星期同兩個朋友聚會,咁都係圍埋傾計同食,每人都整d野咁啦

發生了不可思議大爆炸事件

其中朋友AMY整既口水雞大爆炸

大爆炸到朋友Sara不停R個頭

個口水雞麻辣都不得了,個頭會痕

但佢又有一種神祕既魔力,令你不停咁繼續食

就似愛上一個不該愛的人,慾斷難斷、但又不能不愛

個大爆炸最不可思議既事係…唔見了兩塊皮蛋,

數學題:

Amy小朋友切了兩個皮蛋放在雞的底部,每個皮蛋切開四份,總共八份

然後Amy小朋友吃了兩件,Sara小朋友吃了兩件、大少奶小朋友吃了兩件

那麼應該還有幾多件呢?

重點:最後有兩件不見了~



雞    一隻(最好用鮮雞,會好食d)

雞抹乾水或風乾,再用紹酒2湯匙加1湯匙幼鹽搽勻隻雞,包上保鮮紙雪30分鐘

煲起一煲水,水要過雞面,然後放雞,雞胸向下,水再滾起時熄火焗40分鐘,然後即時放入冰水中

可以起骨或切件備用

口水雞汁:

豆辦醬            半杯

油                    1杯

辣椒粉            40g

薑蓉              100g

蒜蓉             100g

上湯            320ml

糖                   2湯匙

鎮江醋            2湯匙

鹽                   1湯匙

豉油               2湯即

另備:

花生  及青瓜,甚至加皮蛋墊底都好好食

汁做法:

將油、豆辦醬、辣椒粉薑蓉、蒜蓉略煮,加入上湯煮1分鐘,加入糖、醋、鹽及豉油調味,所有材料混和便可以

將青瓜及皮蛋放碗底,舖上雞件,再將醬料淋上

*呢個口水雞同我之前寫既唔同做法,我之前做既會帶有芝麻香,亦有醋香,而呢個係較麻辣,同大爆炸既香味

*油要用上一杯,因為呢類菜式如水煮魚、水煮牛肉、口水雞都係要將油做成醬汁

全天候update既page,pls like --> https://www.facebook.com/taisiu9

2013年1月29日 星期二

哼!蒸糕bell來了…(附蘿蔔糕做法與馬蹄糕)


每一年既過新年都似溫故知新,因為每年我總會放下d蘿蔔糕呀…乜糕呀、物糕呀既食譜

其實我寫blog那一年係2006年,咁到2007年我先第一次 慾望jungle jungle

晌2007年以前,我跟本無諗過自己蒸糕

蒸糕係唔型既事,自細老豆總會晌唔同渠道買靚既糕比我食,跟本點會諗住蒸糕bell?

但自從寫blog,新年好似有個使命,一定要蒸糕

而且…當我開始食過自己d糕後…已經無意慾去買

上星期六突然蒸蘿蔔糕,今年可以用高速煲,15分鐘有兩底

時間縮短了,一寸光陰一吋嘛

今次step by step去教蒸蘿蔔糕,至於年糕……今年唔重寫喇





先講蘿蔔糕:



材料:(兩底)
粘米粉    300g
粟粉 2湯匙
鹽 半湯匙 ~1湯匙
麻油    少許
胡椒粉   少許
臘腸  、 蝦米、瑤柱   隨意
白蘿蔔   3斤 =1815g (我做法係分成兩份,一半刨絲,一半切幼條,呢種質感較好)
水    12安士


做法與步驟

1. 先將蝦米浸軟、臘腸切粒加少許蔥白炒香加半茶匙酒及豉油秒香



2. 將粘米粉、粟粉加12安士水開成糊狀,加少許麻油、胡椒粉、生油、鹽

*水份除了係純水之外,仲可以將浸瑤柱既水、浸蝦米既水、刨蘿蔔出來既汁混合而成,底糕會香同甜d架





3. 白蘿蔔一半切絲,一半刨絲後煮5分鐘



然後將已混合(2)加入稍煮至重身,再加入炒香的蝦米及臘腸兜勻




4.糕盤(塗上油)
*今年用Fissler高速煲,放兩層盤一次過用2度速蒸15分鐘,然後冷卻排氣就完成
#用鑊蒸既話大火去蒸約50分鐘即成。

*浸蝦米、瑤柱既水及刨蘿蔔時既蘿蔔水留起,代替步驟(2)既水份

*步驟(3)蘿蔔絲加粉漿時,煮到重身,感覺就快拎唔起隻鑊剷既感覺就OK

*倒入糕盤時要分幾次,每次倒入時要輕輕壓實,完成品就唔會鬆散







從那些年舅母自己整馬蹄糕比我之後,我愛上了

希望今年我仍有時間去整啦啦啦

煎香後真係好好食





馬蹄糕:

食譜:
桂花    2茶匙
馬蹄肉  8粒
馬蹄粉 110克
粟米油 1茶匙
冰糖 160g (最好扑碎晒佢會易煮溶)
水 600ml

做法:

馬蹄去皮切粒粒,桂花用少量水浸10分鐘

馬蹄粉用300ml水攪勻,另外300ml水煮溶冰糖、加入桂花水放涼

放涼後將馬蹄粉漿、馬蹄粒加落桂花冰糖水、再加1茶匙粟米油,攪勻後放入煲,慢火煮熱,一邊煮一邊攪直到個漿變成稀糊狀

倒入盤中大用鑊大火蒸40分鐘

#我用Fissler高速煲蒸2度速12分鐘,然後冷卻排氣就完成

2013年1月28日 星期一

賀年:蒸煮豆腐配三菇


的確好快過新年,但唔知點解今年仲未有mood去攪過年既野

不過…星期六都蒸左底糕

但我都有為個別品牌做賀年菜式

今次係百褔百腐

其實用豆腐都係一個考驗,豆腐軟身、加上白色

要做賀年菜式都要用下腦筋

雖然豆腐有sponsor我,但都希望一炮過,無take 2咁整

結果…我想起早前去酒店試菜,記起呢個款式

一把扇咁既,感覺好中國化,又可以用豆腐去做,加上簡單又清清地

豆腐千變萬化,加上過年的確有好多肥膩香口食物,呢個雖然未去到齋菜

但至少都少油、少脂肪丫

蒸煮豆腐配三菇,呢個三菇唔係六婆個friend、又唔係麻雀腳,佢係三款菇啊



食既時候將d菇配上豆腐



食譜:

百福蒸煮豆腐         1盒

三菇                          (自由選擇菇類,我用了新鮮冬菇、秀珍及及杏鮑菇)

雞蛋                      1隻

紅蘿蔔                  半條切粒                               

獻汁:

蠔油                       1湯匙

生抽                       半湯匙

水                           50ml

糖                             2茶匙

麻油                          少許

另備:生粉水  (生粉1茶匙、水 茶匙)

將豆腐切片,鋪於碟邊再加上紅蘿蔔粒,蒸5分鐘,蒸熱便可以

將三菇清理乾淨,然後備用

熱鑊加油倒入蛋漿,煎成蛋皮備用

將三菇爆香,兜勻,加入獻汁煮滾,然後加生粉水兜至杰身可以上碟

加上蛋皮做裝飾


大家都可以參予大獎賞








2013年1月26日 星期六

快樂彩虹蛋糕@美心西餅


近來大熱彩色既蛋糕,其實…晌某蛋糕名店都已經有

慢慢伸延到大眾化兼梗有一間晌左近既美心餅店

PR小姐話sponsor我時,都未有太大興奮,而且我本身食太勁色素會頭痛

直到切時.......................


佢每層都有顏色,但唔算深色

每層都夾生果,但感覺係聰明,因為加深每一層既味道

眼見感到開心,食落又有生果味

食完至少無頭痛!仲幾開心




Wowwwwwwwwwww.那一刻真係會開心架!抵食之選呢



美心餅店仲送4個迷你蛋糕比我

四款唔同口味,我愛栗子同芒果呢

迷你版本真係超開心,細細個至少兩個人都唔怕一個大蛋糕食幾日啊



謝謝美心西餅









2013年1月25日 星期五

幸福的攻鼻(日式芥末沙律醬配脆雞)


昨日hea了大半日,原因早起身

無錯,因為太早出去,我累足全日

無辦法我感冒又唔清,個鼻成日塞,又唔可以成日噴鼻,結果…狀態仍然麻麻地

早上出出去後,下午就整新攪作

日式芥末沙律醬配脆雞,其實係參考May 姐個做法,我指個醬

而雞我用番自己方法,其實雞扒可以好簡單,用鹽搽勻佢,加黑胡椒及少少七味粉,再加幾粒乾蔥頭切片,撈埋去醃

煎之前沾上麵粉,煎到佢金黃色,煎時既鑊同油要夠熱,一放雞扒落去就已經封住表面,然後中火煎熟,最後又較番大火逼出油份

件雞會又香又脆

再用2茶匙既日式芥辣wasabi加1湯匙沙律醬撈勻,配雞食就可以

好easy呢

我又趕住出去,唔講住喇!乖~錫晒


2013年1月23日 星期三

生煎(附生煎包)


某d人同事晌我生命當中係唔work既

例如…

某一個人即使點想奉承你,或者佢點去裝出好人,你都明白佢同你之間其實係...唔work

又有

某d事你好努力,到最後你終於發現原來天時地利人和也不能配合,又係唔work

某d食物別人驚為天人,但你只有震驚,你明白某d味道對你係唔work

甚至

人人都認為我對食物好有恩賜,但偏偏有d食物我唔會整得好,菜肉包

甚甚至

中式包最重要係個椗,我唔知點解總係做得唔好,個紋總係唔出,整完會變成一個發水包咁囉

偏偏佢又好食呢下先夠抵死

我唯有用我那部跟我幾年既大機、那個從來都唔想換既定焦鏡再加那張唔係我style花花桌布去轉移你視線

呢個生煎包好好食,我跟一個台灣網站學的

好值得推,佢易做,加上我有少少改過下,佢外表有缺點仍值得寫下

但好不幸地,我錯手del個過程既相片,激死



睇!佢鬆軟得來個底香香脆脆架!切開仲似粒栗子囉,哈



食譜:

無糖豆漿           90g(座暖)  或用水都得

麵粉                150g(唔該:記住我無講明高筋或低筋,即代表係用普通麵粉,超市賣既普通寫住麵粉)

鹽                     1/4茶匙

糖                     1湯匙

油                     1茶匙

酵母                 1茶匙

另備麵粉水

一湯匙麵粉+200ml清水

做法:

糖及鹽放盤底,加入麵粉、油、酵母,倒入豆漿,攪勻

然後開始搓,初初有dd漏,搓到唔黏手便可以

放晌溫暖地方發酵,發至兩倍大(大約45~60分鐘)

然後分成7個 等份(大約35g一個)

包入餡料然後封口,靜置20分鐘

鑊加油,放上包包落鑊煎,灑上芝麻,然後加入麵粉水,較慢火然後蓋上鑊蓋,用慢火煎至收乾水,底部呈金黃色

餡料:

豬肉碎          100g

椰菜切碎       100g

豬肉加入椰菜碎用鹽、糖、薑汁、酒、粟粉撈勻,最後加少少麻油,然後攪攪攪,順同一方向攪攪到佢起膠

然後放雪櫃半個鐘,要連菜一齊醃,因為如果菜唔醃會同d肉好似唔關事咁,無交流的

如果日日夜夜都想見到我既分享,請Like my page.......https://www.facebook.com/taisiu9

2013年1月22日 星期二

那晚(附忌廉焗薯片食譜)


其實興之所致係可以無啦啦整西餐,仲要係快、求其、是是但但咁

但又睇唔出來

西餐比人體更奧妙,只要加多少少,又好似唔同d

我唔係全天候都在狀態既人,但就係堅持晌有限狀態裡面做得似樣少少

上星期美心西餅送來蛋糕券,我就因為張蛋糕券打算整西式食物

就係咁…一份漫不經意,但又整色整水,唔精美又唔樣衰既晚飯出左來

首先個番茄湯…我目的係想試打個奶泡,一直都想試,結果Fissler神仙棒就打出了milk foam

個湯就利害啦啦啦!係那一日神驚無神叮噹,金寶湯送來聖誕禮包,裡面既番茄湯罐頭

係…罐頭湯,我認!仲係送既添~





個羊架係睇肥媽度勾起我條筋

佢話用油去醃就肉質會好,呢樣係我好少做,於是就加橄欖油去醃,煎出來的確係嫩d

不過…我無加雞汁,因為…我唔想食雜扒味羊扒

我推了好多雞汁做食譜或濃湯寶既sponsor,因為我唔會用



呢個好好食既薯片

用奶同忌廉去煮,煮到個汁收一半,再加芝士焗,佢好魔鬼但超好食





薯仔切片用1比1既奶同淡忌廉去煮(2個薯仔150ml奶+150ml忌廉),煮到收汁薯片又夠淋就可以熄火加芝士去焗

220度焗佢15分芝士溶晒轉金黃色就完成,好好食的


就係呢四個迷你蛋糕…產生出呢一餐鳥~~~~~~~~~


2013年1月21日 星期一

泰(泰式燒豬頸肉)


昨日不是狀態下完成了14個人既gathering,原本覺得唔難,但每次忽冷忽熱既天氣下

我總有中招的份兒

不過…我仍相信自己得,幸好有兩位朋友仗義幫助,否則都唔知點算

唔想改期、亦唔想同人講自己中了招,免得掃興

幸好!順利舉行,無乜失手

今日我仲有半日休息,所以都ok

每次請一堆人回家聚會,我總喜歡整泰式燒豬頸肉

佢好香,好食,通常都受大家歡迎

但之前總覺得醃得太深色,有次BBq仲被誤會燒黑了

今次決定減老抽,結果得到顏色靚呢

不由自主地哼~








材料:
豬頸肉 2~3件
醃料
檸檬葉   半杯
乾蔥碎    半杯
芫茜碎    半杯
老抽        50ml
魚露        5湯匙
米酒        1/4杯
砂糖       7湯匙
另備:麥芽糖
做法:焗爐預熱230度
1)將豬頸肉洗淨抹乾,將醃料拌勻放入豬頸肉醃過夜
2)醃好豬頸肉放入焗爐將兩面燒熟15~20分鐘,再塗上麥芽糖,焗大約5~10分鐘燒至焦香
3)放上涼架放涼,切件上碟
*呢張相影時我未切乾蔥頭,但我想講,檸檬葉、芫茜、乾蔥頭一定要落足先有香味的
要配上一個汁食,但我無影相醬汁做法:

青檸汁或白醋      5湯匙

魚露          2茶匙

砂糖          2湯匙

蒜蓉         半茶匙

乾蔥頭兩粒切片

將所有材料拌勻即成汁醬

2013年1月19日 星期六

Tea Time(Sevva 、 洲際酒店、L'ATELIER de Joël Robuchon)


風和日麗,今日又約了班敗家去Tea

星期六就出篇relax篇,集了近來去過Tea既地方

講真…我從唔太欣賞三層糕糕餅餅,直到搵到間我真正喜歡既

下午茶文化唔係我嫁了人,做了大少奶先發生

我爸爸本身就有下午茶文化,佢去街一定會食tea,從小跟著佢走,被感染了

所以在家我也會有Tea既時間,出街一定會食Tea

我既活動時間晌平日下午,有時樂得安靜自己一人去血拼就會食得簡單點,甚至快餐店既下午茶我都會食

同朋友去街就可以去食個afternoon Tea

所以我認為afternoon tea並唔係什麼太大玩意,係習慣一種



我真正搵到喜歡既地方…Sevva

無論環境,食物都真正my cup of Tea

每一件都好味,除了甘筍蛋糕,都只係我本身就唔愛呢款蛋糕罷了

佢個scone都好食,鹹點出色,我講過鹹點唔能夠凍冰冰,三文治唔可以個邊都硬埋,Scone唔能夠似冷凍石頭,如果呢d都做唔到

我會覺得唔合格



Sevva既 Pastry都好得,佢個酥皮實在太好食

呢個芒果焦糖脆pastry滿分



上星期同朋友Agnes去Tea,洲際酒店LObby lounge

早幾年我食過…完全唔得,當時我篇blog簡直形容得似災區

幾年後進步,全部都算過關,除了那個朱古力波波,有d唔明佢想點

其餘都ok



Scone,暖而鬆軟


鹹點夠落本錢,肝醬多士、parma ham、蟹肉puff,各樣都唔錯


Earl Grey Jam,唔太濃味但易接受


呢個額外既甜品,too much

too much意思係……佢有熱情果醬、香蕉、朱古力mousse、nuts

味道too much,我寧願似早幾年送Macaroon




令我破戒飲既凍檸檬茶,佢既冰都係用茶做,個茶我喜愛呢






L'ATELIER de Joël Robuchon
早幾年開始食,每幾個月去一次,因為就腳、易等位
可惜幾年來千篇一律,佢即使唔錯都厭了,甜品都忘記去影了



不過不失呢

2013年1月18日 星期五

黑痴(黑糖糕)


又係甜品時間,其實我想post鹹,但呢個又想post先

係黑糖糕配黃豆粉

呢個組合係最夾

好喜歡黃豆粉既味,當然有d人唔太接受得到

但我鍾意佢獨特既味道

每次食佢我就想起晌新宿食既抹茶雪糕,裡面都有呢個黑糖糕

我好快就去到食喇!諗起都開心……

黑糖糕配黃豆粉=皮蛋瘦肉粥配珍珍薯片,一樣咁夾咁令人難忘

最重要係我喜歡、大少爺又喜歡,皆大歡喜

大少爺放工見到佢時,係霹出可愛既笑容,呢個笑容足以令我想吞左佢落肚

呢個版本唔係煙un版,係糕,你要記住佢係糕囉

我遲下研發一個煙un版出來先,好快,旦禾




 番薯粉          175g (記住係番薯粉,唔係木薯,粗粒既)

粟粉                25g

黑糖               90g

熱水              200g

室溫水          320g

將黑糖加熱水,令個糖溶,或者可以煮一煮佢

室溫水加番薯粉及粟粉,攪到成為漿,番薯粉會難溶d,攪完後杰身可以過一次篩,篩完後會幼滑

加黑黑糖水,攪勻,放入盒蒸20分鐘

冷卻後切件,沾上黃豆粉



蒸前蒸後



黃豆粉晌吉之島$12店有售,或者Sogo ,City's super都有







全天候食買玩既update晌我個page,pls like:https://www.facebook.com/taisiu9

2013年1月17日 星期四

回憶總是甜.............(麵煎餅(冷糕))


那些年...呢套電影已經係那些年既事

但係每個人既人生總會有令人懷令既那些年

從前細個總唔明白d大人經常講:2毫子一碗麵、舊時d乜乜好好食、舊時物物的確好好

但人越長大,越發覺…人總會懷念從前

我晌炮台山長大,我會好記得順利大廈門外既砵仔糕、春央街既流動小食檔

在電氣道不停大叫:臭豆腐的臭豆腐檔、晌我幼稚園北角衛理堂那條長康街小斜路有檔粟米檔

還有……

那一次我比了$2買即炸油條,突然走鬼,細個呀爸教走鬼你就要避開,否則d小販車黎撞到你,滾水會淋親你

結果……我跑得比那些小販快,那$2都放棄了

記憶總係快樂的,或許30年後我睇番自己個blog都會同樣快樂

呢兩日想起天后站那位伯伯,佢賣既係麵煎餅(冷糕),即係中間好多花生碎、沙糖、芝麻,外面脆脆裡面鬆軟

同薄餅唔同既,薄餅係花生醬、煉奶同沙糖

我愛既係厚厚一片

個伯伯用既係炭爐車,有個大鐵平底鍋,倒d漿然後...蓋上蓋,等一陣就大大片厚厚鬆鬆既夾餅誕生

那個伯伯已經成好多年無出現,或者已經退休了

沒有他們當小販,就沒有了美好回憶

而家d街頭小食完全無晒當年味道,包括那售賣既人

今天我自己做,哼



雞蛋               3隻

糖                   75g

奶                   250g

牛油溶液       30g

梳打粉          3g + 10g水

低筋麵粉        250g

泡打粉            6g

做法:

將雞蛋、糖、牛奶攪勻、加入牛油溶液,再篩入麵粉攪勻後,過篩一次,等個漿更幼滑

加入梳打粉水,再攪勻,然後呢……靜置一個鐘



餡料:

花生           1碗

砂糖           2~3湯匙

芝麻           少許

用油撈勻放落焗爐用180度焗5分鐘或至到香脆便可以,裡符火力而定,然後放涼,去衣



將花生打碎或椿碎

*而我就加入Fissler攪拌棒既碎果仁配件中,打兩下已經碎晒

打好花生碎後可以加砂糖,大約兩湯匙撈勻佢備用




一個鐘後……

平底鑊加少許油搽勻鑊面,較最慢既火,蓋上蓋3~4分鐘,開蓋熟後加入花生糖碎及芝麻於一邊

再將另一邊反上面做成夾餅

done~外要香脆裡面鬆軟既夾餅誕生了

今次我用Fissler既西式鍋去整,煎得好靚呢

全天候食買玩既update晌我個page,pls like: https://www.facebook.com/taisiu9

2013年1月16日 星期三

中飽私囊(蠔仔飯)


陽光普照,原本今日好忙,但有一個約會決消了

結果又有半日閒情,半日對我來講已經好開心

我又可以玩一個人的午餐,正~

大少爺無論口味、習慣、加上今年濕疹仔完完全全都已經令我煮食既方法、理想改變

佢有d唔食,有d唔食得,但我係一個奔放既人,奔放得乜都想攪一餐

心裡有好多想法,但因為佢無法實現

所以我真好享受一個人午餐

尤其今日個蠔仔飯!簡直令我開心

可惜…今日d蠔仔唔靚,太細隻了又多殼,我揀殼揀好多先揀得走

大少爺最怕蠔,今次中飽私囊,佢無份囉!哼~



呢個鮮味既有味煲仔飯,太給力



做法:係要攪一大爛餐

首先:

米    1嘜(一個人食唔晒,我留低了一半今晚)

蠔仔     1斤

做法:

先開一煲500ml水,加入1條浸軟昆布(切碎),蔥白 幾粒

日本醬油、味醂煮起一個醬油湯,大約3湯匙醬油、1.5湯匙味醂,滾起試味,如果唔夠濃可以再加少少醬油

蠔仔用粟粉摔,摔走污物,再去除d殼碎,然後沖乾淨,再放入醬油湯中出水,只要灼一灼就可以盛起蠔仔

米洗淨,加入醬油湯,份量同你平時煮飯既一樣

然後中火去煮飯,煮到乾水就將蠔仔放上面,再煲多5~8分鐘,熄火唔好開蓋焗佢10分鐘便可以



全天候分享,食買用玩既都會update既,pls like my page :https://www.facebook.com/taisiu9#

2013年1月15日 星期二

千茄(茄子千層)


今朝大少爺打電話比我,叫我起身刷牙洗臉

因為會無水,佢驚我黑口黑臉所以十萬火急咁打比我

於是我行屍走肉咁去刷牙洗臉(其實當時已經10am)

但到而家仍然有水,我懷疑佢睇錯通告,唔係無水,係無廁所水囉

話9am-2pm無水,但而家仲有,不過…無左廁所水

如果比我知道…佢因為無廁所水而叫我起身刷牙洗臉,我一定會狠狠整蠱佢一餐,然後寫落書度

等佢遺笑萬年

既然有水,我又有半日晌屋企,咁不如整個午餐

又整茄子,其實原本條茄子係for晚餐用

不過…即整……茄子千層

佢似千層麵做法,將闊麵換了茄子,無咁漏但又好味

我覺得佢個樣幾型架



用日式肉醬意粉個醬,你都可以自己整個醬,但因為我今日用快餐形式去做,所以用現成

先將茄子切成20片均等厚度,噴一層橄欖油上茄子面層

碟上先放汁,加茄子,然後以下程序

茄子片放上一片煙肉及1茶匙肉醬汁+茄子片搽上cream cheese+茄子片放上一片煙肉及一茶匙肉醬汁

最後蓋上一片茄子,淋上肉醬汁,封上錫紙焗220度焗15~20分鐘,揭開錫紙加灑上芝士再焗10分鐘(視符火力而定)