2013年2月28日 星期四

補藥黨(紅棗焗蛋糕)



也許當年年紀小,我少年十五二十時同十八廿二既時候,紅棗係唔多掂得

人人話飲紅棗水好養顏既時候

我飲完就會勁燥

但今時唔同往日,我久唔久就要飲杯勝既

我做過好幾個紅棗食譜,今日又做一個新既

原因過年前我去過沙田18試菜,當中既甜品好特別

當人人focus晌佢既花雕話梅雪糕、五糧液古力雪糕既時候,我偏偏著迷於佢既紅棗蛋糕

佢既紅棗蛋糕熱辣辣,加入紅棗既香味,我超喜歡

總覺得佢既軟熟質感我會做到

的確…我今次做到幾乎一樣啊!實在太........."哼"啦

又一次食完好食的自己做老翻,但呢種老翻確實幾型!哈

點解叫補藥黨?因為紅棗有益,但個蛋糕同時吞下糖份、蛋、牛油及澱粉質,仲唔係支不抵債?哈哈




食譜:

蛋黃    2隻

糖    40g

cream 70g

牛油    25g

低筋粉    50g

鹽   少許

紅棗    6粒去核切碎

蛋白 2隻+糖15g

做法:焗爐預熱170度

1.牛油同糖打勻,再加蛋黃打勻後就加入紅棗碎,加入cream拌勻後篩入麵粉及鹽,輕輕攪勻後備用

2.蛋白加15g糖打至企身成為蛋白霜,加入(1) 輕手拌勻,倒入杯中,170度火焗25分鐘(視符火力而定)

*梳乎厘杯做到4杯

紅棗要買有核,寧願自己浸軟去核,有核紅棗香好多




就係佢令我一試傾心

篇試菜篇好快上映,未上映我已經寫食譜先,哈



Fans page仲有新blog. Click here and like --->   https://www.facebook.com/taisiu9





新facebook acct開始建立,慢慢upload上Fb、講飲、講食、講戰利品
仲會講祕密




2013年2月27日 星期三

娜姐(carbonara)


你好嗎?

我又再獨留自己在家中,去迎接…下星期

諗起都興奮

細個好喜歡番茄汁,今時今日我仍然好喜歡港式快餐d橙色意粉

但唔知點解我覺得自己點整都唔夠街外好食

當然都唔會差,但總覺得差少少

我個人來講唔算太喜歡食pasta,出街我都唔算多會揀來食

但作為一個乜都想整得最好既人,當然總會有一款強項

而我既強項係........娜姐carbonara

要每一條意粉都沾上醬汁,但又唔可以水汪汪,每一啖都係精華

我的確為自己做既娜姐,配上一句:哼~

配上烤既sc



正宗做法係唔加煙肉,但我覺得唔加又單調得滯

做法簡單得美味!哼

汁:

淡忌廉  100g

洋蔥      4份一個切粒

煙肉     2片

芝士粉    適量

蛋黃        1隻

黑椒        少許


做法:

意粉先煮好過冷河,唔好煮得太淋啊!

爆香洋蔥、煙肉,加入意粉兜勻,加入淡忌廉、蛋黃快手兜,再加少許黑椒、芝士粉,如果唔夠鹹味可以加少許鹽,但通常都唔需要

兜勻後上碟

加忌廉後趁未滾加蛋黃,否則太熱會令蛋黃熟了,做唔到醬汁效果~

*意粉要Al dente唔難,你煮好滾水後,加橄欖油、少少鹽,放意粉落去,翻滾後即熄火,蓋上蓋7分鐘,個意粉會剛剛好




Fans page仲有新blog. Click here and like --->   https://www.facebook.com/taisiu9





新facebook acct開始建立,慢慢upload上Fb、講飲、講食、講戰利品
仲會講祕密




 

2013年2月23日 星期六

Sunday brunch@Hugo's


星期六就寫Sunday Brunch啦

我同大少爺好難就到時間去食brunch,星期日返完教會,教完主日學,跟住同d教友去午餐都無了大半日

不過…上星期日我終於可以同大少爺食brunch了,全靠了姊妹頂替我教主日學

然後我同大少爺崇拜後就去了Hugo's食 brunch

Hugo's從舊地址搬到新地址後,開初星期日同假期係唔開

因為咁…我一直都以為唔開,直到上次一問之下,原來而家星期日都會開

而且星期日有個brunch,我好想試

結果上星期日試到

brunch個形式係 semi buffet,頭盤與甜品任食,主菜就自己揀

好抵,我平時去揀個Rib of beef都$480,但個brunch主菜已經包埋個燒牛肉唔使另加錢

仲有龍蝦揀

跟住頭盤有海鮮、生蠔比你任食,抵過平日





我揀得唔多

有龍蝦同長腳蟹,係有鮮味既,龍蝦肉質係有彈性,蟹腳有甜味

點解我要咁講,人人食自助餐都追求有龍蝦同蟹腳,但好多質素都唔好,d蟹腳溶雪溶得唔好,又有雪味、龍蝦就得個un字

但至少呢度有海鮮應有既味道,所以我先會敢講得咁盡






佢個肝醬好食,極度幼滑



我愛飲香檳,多過紅白酒,大少爺一樣,所以點了香檳package,香檳及soft drink任飲

如果揀香檳package,佢紅白酒、果汁等都係任飲既

但揀紅白酒package就會無香檳

我係唔會想浪費既人,唔會因為個package有紅白酒都一定要人倒杯比我

飲完大約3杯香檳後…我飲了果汁!哈




主菜menu



大少爺要 Rib of beef

一向都係保證,從未失過水準,太好食




我要龍蝦therminor

therminor即係將龍蝦肉起出來,切碎然後再同其他材料煮,跟住釀番入龍蝦裡面再焗

中文好似叫:龍蝦米咁上下

佢個汁用上我喜歡既芥辣去做,配上濃濃既忌廉芝士汁,好食

佢唔止個醬汁好食,最重要龍蝦肉剛剛好熟,爽而甜




甜品時間

自助形式,同平時甜品有d唔同

最唔同係佢極度好食既拿破侖無啊!噢



但仍然有鐵板cream brulee

又有雪糕、鮮果







先來熱辣辣既古力梳乎厘,好溫暖,我喜歡佢多過心太軟囉





大少爺主攻macaroon,佢堅喜歡食macaroon既人






呢粒紅梅味超好食



我的,栗子蛋糕好好食

個蜜桃杏仁蛋糕都好得


super like







總括來講,無論食物、裝修或服務 Hugo's係走classic路線

我喜歡佢所以我會將佢列入介紹名單

個brunch我一定會再食既!

價錢:$598+$280(wine package)+10% per head



Fans page仲有新blog. Click here and like --->   https://www.facebook.com/taisiu9





新facebook acct開始建立,慢慢upload上Fb、講飲、講食、講戰利品
仲會講祕密






2013年2月22日 星期五

走肉湯 (降血壓及去水腫既雜菜湯)


我昨日休息了一整日,今日都唔見得好精神


今日約左朋友午餐,出街散散悶氣

其實呢…新年前一星期至到而家,即使新年期間都日日到醫院探病

朋友上星期六出院,我就搓d包去探佢

日日煲湯,不過無提過,熟我既朋友會知

我有個好朋友身體唔舒服,佢住院時唔想食肉,加上佢身體缺乏鉀質

於是有另一朋友教我煲一個菜湯,其中既材料有豐富鉀質

如是者我每日都煲,大少爺回家就聞到菜湯味

就係咁…我朋友出院回家休息我仍然煲緊個湯

一路以來我未煲過唔落肉既湯,以為唔好飲

但其實呢個湯好好飲,我既癲狂症病發,自己都日日飲

飲完後覺得個人都幾舒服

亦都令我食多好多蔬菜同紅腰豆

有時癲狂都有益處,至少我人生好難得為菜而狂丫

咁都幾型囉!哼~

鉀質有助降血壓同去水腫既呢



做法好簡單:

紅蘿蔔 1大條 

番茄   3~4個  ( 1開4)

椰菜   半個    (切粗條)

西芹  2條(用來加味,唔需要太多)

薯仔   1大個

紅腰豆  大半碗  (先浸半個鐘)

*如果你用有機菜,紅蘿蔔同薯仔洗淨可以連皮切件就煲

否則,要先批皮切件


將所有材料洗淨切好,加2.5公升既水,煲 2.5~3個鐘,熄火加鹽

我用Fissler高速煲,就用3度煲半個鐘,減壓翻滾後熄火加鹽



資料fr頭條日報

鉀質屬於身體所需的電解質,大部分的鉀質儲存於細胞內,用以維持細胞、肌肉及神經的正常功能。另外,鉀質亦有助平衡體內鈉水平,從而幫助降低血壓,且具暫時去水腫的功效,對女士減肥有一定助益。鉀缺乏症並不常見,鉀質攝取量不足,不會引致鉀缺乏症,但都市人常有的高血壓問題,可藉攝取鉀質加以作改善。血的鉀含量過高會引致心律不正問題,不過這問題通常發生在慢性腎衰竭患者身上。多種水果、蔬菜及豆類食物均含豐富鉀質,例如每一百克冬菇就有一千五百三十四毫克鉀,紅腰豆、黃豆、綠豆、開心果及杏仁等食物,均富含鉀質。建議成人每天約攝取二千毫克鉀,每日攝取上限為四千毫克。

腎病患者攝取量則有所不同,必須請教醫生。


* 含鉀豐富的食物有:


水果類:香蕉~楊桃~山楂~桃子~梨子~芹菜~美濃瓜~桃子~榴連~龍眼~~奇異果~哈密瓜~香瓜~草莓~果乾~橙汁~新鮮的番茄汁~柿餅~



蔬菜類:番茄~油菜~韭菜~菠菜~川七~芫荽~空心菜~莧菜~菠菜~茼蒿~青花菜~豌豆~金針菇~甘藷~玉米~馬鈴薯~草菇~蘑菇~胡蘿蔔~紫菜~海帶~高麗菜乾~蘿蔔乾~




2013年2月20日 星期三

母子重逢


我每一日都懷緬過去一星期,因為過新年,大少爺又晌我身邊

唔知點解,大少爺返工反而無乜野,但佢太太…即係我就好似有上班憂鬱咁

不過…佢好快又放大假,咁心理上都好d呢

我放假mood仍在,都係游手好閒,出去同朋友食下午餐,順便行個圈

晚飯簡單為主

其實我近來迷上雜菜湯,即係番茄、西芹、椰菜、薯仔、紅腰豆煲湯,唔加肉

呢個湯似羅宋湯但無內晌裡面呢

然後逼埋大少爺連渣去飲,個飯反而簡單,因為飲湯都飲飽佢

親子丼,即係雞蛋同雞肉

不過以前我會買親子丼汁去整,自從識用味醂後,我就自己整個汁

食譜:

雞脾肉       一隻去皮再切絲

雞蛋          兩隻

洋蔥          半個

汁料:

醬油或生抽       1湯匙

味醂                  1.2湯匙

鹽                      少許

水                      2湯匙

(以上材料全部攪勻)

做法:

雞脾肉用鹽、胡椒粉去醃,然後爆香佢,加入洋蔥

雞肉半熟後加入汁料煮滾,然後兩隻雞蛋打勻後倒入雞肉中,唔好攪佢,蓋上鑊蓋慢火煮兩分鐘

兩分鐘後就完成架喇!淋上飯面,可以加少少紫菜或飯素

哼~



2013年2月19日 星期二

滅粉之作


是日年初十,起身陽光普照

感覺好快會夏天,今年無乜凍過咁,無乜d打鼓嶺結霜,又無乜6、7、8度

唯有等旅行時,感受下凍既天氣吧

每一年新年後都要滅粉,呢個係指定動作

每一年d糕都留下一包二包粉

但好奇怪,我唔會將d粉再整賀年糕,例如…我新年前整過蘿蔔糕,剩下d粘米粉唔會再整蘿蔔糕,會用來整紅豆糕

糯米粉我唔會再整年糕,反而諗下整其他

湯丸又唔Like,卻愛整呢個黃豆粉小丸子配蜜紅豆

呢個小丸子沒有心事,但就好味囉

加上黃豆粉既小丸子同湯丸完全唔同感覺

糯米粉要用暖水搓先最好食

大約200g糯米粉配 120~150ml暖水

個小丸子我用100g粉配60~75ml暖水

其實你見到佢成糰就可以

然後搓成粒粒,放落滾水度煮熟

撈起瀝乾水份,然後放上黃豆粉上碌碌碌,再配上蜜紅豆

咁又消耗糯米粉同增加卡路里喇!哼



2013年2月18日 星期一

超級萬能膠


年初九了,大少爺上班了

無人陪我吃喝玩樂

又無人陪我睇電視

感覺有d淒淒慘慘又戚戚,但佢唔返工我又點繼續我既生活

唯有佢有佢既生活,我有我既忙碌,期待晌家中撞到吧!哈

一直想整牛筋,唔係炆,係痴埋一片既呢

佢勁膠質,昨晚整時好痴手

之前晌凱悅軒同沙田18都出現呢個牛筋

佢成塊亞加力膠咁

我見到may姐本書有教,我睇完、消化過,跟d唔跟d就整左呢個酸辣牛筋片出來

先用個滷水微微滷佢,唔可以太重滷水味,只要淡淡既香味,配上酸辣汁

本身個食譜係麻辣,我唔太Like,於是改佢成為酸辣汁





今次用急凍牛筋,唔使煮咁耐

急凍牛筋磅半整兩條

牛筋出一出水

然後呢就預備一片桂皮、2片月桂葉、4粒八角,加1500ml水、生抽兩湯匙、鹽1茶匙、冰糖1小粒,花雕酒1湯匙總之唔需要滷水咁鹹,淡淡既滷水味便可以

跟住放牛筋慢火炆半個鐘

然後瀝起放涼


(如果用新鮮既,就要先出水,然後炆3個鐘,用高速煲都要45分鐘,所以整小食用急凍既就慳功夫,急凍既係已經出左水,炆半個鐘已經好稔)


如果有壽司蓆就鋪底,然後一層錫紙、一層保鮮紙,用力卷實佢,然後札實

放入雪櫃一晚,第二日就可以切片喇

酸辣汁做法:

白醋   2湯匙

生抽   半湯匙

鹽   1/4茶匙

糖 半湯匙

辣椒油 2茶匙

小辣椒 3小隻

麻油    少許

將佢 攪勻,辣味隨個人喜歡加減!然後可以淋上牛筋片伴食




2013年2月16日 星期六

飲宴@黃金海岸


今日年初七人日,祝人人都生日快樂~

um....人日寫下喜慶事

參加了一場婚宴,但無新郎又無新娘,因為係試菜啊

除了我、KC同何師奶,仲有一個新婚網Checkha.com一同試菜

Checkha.com仲安排兩對準新人試菜呢

黃金海岸對我來講好遠,但環境真係幾靚,而且好多靚景可以影相

我有諗過、或見意,如果怕親友太長路程,可以去城巴租一輛巴士啊!上次我好友結婚佢都租左架城巴

教會d大旅行又係會租架城巴,$1000唔使就可以坐好多人呢







唔好意思!我無辦法放d豬頭、雞頭上blog,唯有用後現代文藝復興唔關事既手法去影,都幾靚丫



靚豬,皮脆



紫菜鵝肝蝦卷

無炸蟹鉗,但呢個卷幾好食

起碼有新意




露筍蝦球

露筍比西蘭花好,清甜又爽

西蘭花太厭了



瑤柱節瓜甫



15兩燕窩羹,黃金海岸無翅食的

因為當日有15個人,所以有15兩

如果酒席有12人,就12兩,每人總會有一兩




鮑片


魚,蒸得好好,好滑



無辦法去影隻雞,所以影自己份,哼




炒飯,用上紅米去炒


炒伊麵


桂花小丸子



兔仔棉花糖,見到都開心



場地太多間隔好,無乜柱,任何環境都可以影靚相呢

2013年2月15日 星期五

家常與米糠油


其實我未啟市架!大少爺星期一先返工,呢幾日主要吃喝玩樂探朋友

不過吃喝玩樂得多,卻想念家常菜式

好想食煎蛋角,加菜甫加肉碎加蔥、加芫茜,加乜加物

人其實真係好需要住家飯

所以各位女生,唔識多都要識小

仲有係煲湯,係好重要的

當你識煮下住家飯,晌屋企既地位會得到自動提升,男人背後講女人壞話時,都講少一樣丫

哈哈



近日我轉用了米糠油,因為一個對營養有研究既朋友介紹

講真煮野既人點可以唔用油,用油好多人都怕油呢樣又果樣

但有d食物係少不免既

而且人無油份係唔得架!咁我寧願用隻有營養價值既油

米糠油、吉之島、City's super、有機店有售,有唔同牌子既

有泰國、有日本出既,唔太貴,下圖呢支吉之島減價$79

我晌city's super見到有一隻好似日本都係

佢質地無咁油膩杰身,我搽上手都唔算太油,佢話可以煎炒煮炸,比橄欖油更加多用途

Rice Bran Oil
稻穀去掉外殼後,那些穀殼叫做「粗糠」,去掉粗糠的稻穀叫「糙米」,糙米外表有一層薄薄的皮,這層皮就叫「米糠」,米糠中含油類物質,可以拿來製油,而製出來的油就叫做「米糠油」。米糠油含維他命E,甚至還有人將它摻入洗髮精或身體保養品當中。

米糠油是怎麼製造出來的呢?可以有兩種方法:一種是將米糠炒熟後壓碎,再瀝出油來!(花生油也是這樣製出來的!)一種是加入某種介質,如多氯聯苯,將油萃取出來,再將此介質移除。



2013年2月14日 星期四

情人節快樂



情人節快樂~有無情人都要快樂~

今日大少爺繼續放假所以我都一定會快樂~

不過…我無特別預備點慶祝,我只知兩個街精一定會去行街

然後太太會自己揀禮物

再揀件送比先生,佢喜歡與否都要"硬食"的


我連去邊樹食都未諗到

但就post個粟米湯,祝大家金玉滿堂啦啦啦

我係好喜歡粟米湯,我指罐頭既粟米湯

自從去過新葡京既天巢法國餐廳飲過佢個粟米湯後,我話過要二仔底...跟

所以動起手來

其實好簡單咋
哼~



用3條新鮮粟米,起粒,然後加大約750ml水煲15分鐘


跟住將所有湯汁同粟米用個攪拌器打,打至二合為一

我當然用Fissler支神仙棒啦




再隔渣






最後可以加大約50ml cream,同埋少少鹽調味,一個好甜既粟米湯就做好喇

cream可以唔加,只係無咁creamy呢