2017年5月31日 星期三

1 duck 兩味


由於上次個鴨腿湯飯太好味,令我又想用鴨腿做另一味菜式

不過…我好明白大家成日話搵鴨腿難(其實唔難)

我決定為人民服務,做一鴨3食

將一隻鴨用到盡,咁大家即使為了鴨腿而去買成隻鴨都物有所值架喎

加上呢3味都唔係難

利申:我並不是什麼食平d、慳d、飽d嘅粉絲,相反我一集都無睇過

呢一鴨幾味純粹幫大家解決問題咁之嘛!哼

今日寫埋兩味

炒鴨鬆及煲冬瓜陳皮鴨骨湯

鴨骨係拆鴨肉剩下,加入冬瓜同洋薏米煲,味道真係唔錯的

個鴨鬆就用好多乜乜物物去炒咁之嘛~最神經病係我走去炸粉絲做底,哈






食譜:

炒鴨鬆
鴨   1隻(如果想留脾做其他,就去脾)

鮮冬菇   4隻(切粒)

唐芹    2小棵  (切粒)

馬蹄或沙葛   4-5粒  (切粒)

乾蔥    4粒 (切粒)

蒜頭   3粒 (切粒)

鴨醃味:

老抽    1湯匙

五香粉   1茶匙

鹽   1/4茶匙

汁料:

蠔油   1/2湯匙

水 2湯匙

糖   1/2茶匙

麻油  少許

(以上汁料撈勻)

做法:

將鴨搽上調味料醃一晚,然後就蒸 15分鐘至半熟,然後拆肉切粒



留起骨備用

將鴨肉爆香,加入所有粒粒兜勻,贊少許酒,最後加入汁料兜勻上碟



*我會做做成生菜包

*如果大家都想炸粉絲,就用個小煲加油,燒到熱後熄火加入粉絲佢就會自己發大,咁就要趁快盛起!
油夠熱及要手快就唔會吸油呢

冬瓜陳皮薏米鴨骨湯

冬瓜   1斤

洋薏米   2湯匙

鴨骨   1堆

陳皮   1小片

做法:

拆出來鴨骨出一出水,將調味料及油份沖走


冬瓜連皮,洋薏米浸一浸



2L水煲滾後落所有材料煲3小時,熄火加鹽調味







大少奶's Delicatessen

宣傳你的專頁

快速流感測試資料

家長們最怕嘅係小朋友病

每次個仔一病我就會好緊張

當然有好多過來人或者朋友都話:小病是福、小朋友發下燒會高、細路仔係要病下

但做媽咪點會唔擔心?有時包包流鼻水我要去留意下佢到底係傷風?感冒?定鼻敏感

一旦發燒就更困擾,佢感冒?定流感呢?


認識流行性感冒

流行性感冒(流感)是由流感病毒引致的急性呼吸道疾病,病毒共分甲、乙、丙型三種。 一般而言,本港最普通的流感多為甲型H1N1及H3N2。 健康人士患上流感後,通常會於2至7天內自行痊癒; 然而,免疫力較低人士或長者一旦染上流感,可以是很嚴重的疾病,並且有機會出現支氣管炎或肺炎等併發症,甚至死亡。

甲型流感最恐佈之處係會惹起併發症,而併發症往往會引起死亡

近年香港醫療制度出錯機會率有幾大?相信各位有留意新聞都知

公立醫院一等就幾個小時,仲要未必即時會幫你去測試到底係唔係甲型流感

到發現時就錯過黃金治療機會,後果有幾嚴重相信大家都知

好多私家診所都有快速測試,而快速測試只需要8分鐘


快速流感測試過程:


新型流感快速測試技術,只需用棉棒探入病人鼻腔或咽喉輕輕擦拭以採集適量的呼吸道分泌樣本,然後進行過濾及分析,整個過程可以在診所內完成,準備度達95%。測試既簡單又安全,即使一歲以下的嬰兒也適合使用 
好多診所都有引入快速流感測試
以下係日本生研QuickNavi-Flu A & B快速流感測試成人及小孩適用
準確度及靈敏度 >90%
有效判斷甲、乙型流感
判定時間只需 8 分鐘

如果大家想知自己住區域有邊幾間診所提供快速流感測試,可以whats app或打電話去問
我住既區域都有4間診所有
費用全免的,起碼有個渠道知道邊度有,唔使到需要時就週圍去問呢~大家都可以問定先
Whatsapp : 91317553
Tel: 35681531
Facebook : Asclepius 天醫


大家都可以上天醫網頁望望 http://www.healthsupplement.com.hk/rapid-flu-test

 #Asclepius 天醫 #快速流感測試 #8分鐘知結果


*資料由天醫健康顧問提供

*天醫健康顧問合作文章

BTW...我自己覺得預防都好重要,平日一定要包包食多d營養食物
多d維他命C,同埋多d出去曬下太陽
包包每次作病,我唔會要困佢晌屋企反而帶佢落樓下曬下太陽吸收陽光
尤其佢流鼻水,曬一陣太陽會好dd

同埋每日都要比高維他命生果佢食,佢好鍾意食奇異果呢

仲有洗手都好重要,d小朋友唔會知道乾淨與否就摔眼摔鼻等等
每次去完街一入屋我除了要佢洗手外,仲要換上乾淨衫
避得就避,盡量做好d等佢病小d,但佢就快返學喇!到時又一番作戰呢

2017年5月27日 星期六

Lenovo Miix 720 x芒果椰汁奶凍

包包偷睇緊乜呢?


佢偷睇緊媽咪做嘅芒椰奶凍

雖然呢幅相片係影部平板電腦 ,但仍然清楚睇到個奶凍一層黃色、一層白色,層次鮮明

今次除了介紹呢個食譜之外,仲介紹埋部Lenovo Miix 720

呢部平板電腦任何角度都睇得好清晰,因為可以隨意調整角度,有時係枱整野食自己可以較正常模式睇住食譜整,如果同包包一齊整就可以較角度細啲,等包包睇得清楚,所以無論用咩姿態睇都一樣咁舒服

觸控螢幕令我可以邊煮邊睇食譜及步驟,晌唔使急但要快手嘅煮食過程中令我萬無一失(不會漏step),一隻手指就可以loop上又loop落





Miix 720嘅電池好耐用,令我可以隨意拎入廚房邊煮邊上網睇食譜都唔怕要叉電
有時唔想包包騷擾我上網工作或睇韓劇真係要拎住部電腦逃離包包法眼
充足電力真係無後顧之憂

當我放低部電腦行開飲啖水,包包就會九秒九速度跑來擸走部平板電腦
因為部機又薄又輕包包拎走要真係話咁易

包包都有靜靜時候,當我要專心工作時佢就會坐晌部機前面去睇個Swarovski 背蓋逐粒水晶數 one two three four five 一直數到twenty然後又再重新數過
 

如果大家對呢部有靚靚水晶圖案嘅機有興趣可以去以下網址:https://goo.gl/gTWv3n

6月30日前,凡於Lenovo香港專門店及指定商戶購買Miix720二合一平板,即可獲得限定璀璨閃爍機背一個 (採用施華洛世奇®元素) (數量有限送完即止)


好!等我寫埋個食譜比大家

食譜:4杯份量

椰汁層
椰漿   150ml

奶      50ml

糖      30g

魚膠片  10g

芒果層
芒果汁   200ml

糖       1茶匙(如果芒果好熟好甜就可以skip)

魚膠片   10g


做法:

先做椰汁層,魚膠片用冰水浸軟

奶加熱(不需要滾),放入魚膠片待魚膠片溶化後就加入椰漿中

倒入杯可以以打斜放入雪櫃,放到凝結為止再倒入芒果層


芒果層做法,將芒果汁分一半,一半座水加熱,然後放入浸軟魚膠片直至魚膠片溶化

將有魚膠片芒果汁加入另一半份量之芒果汁攪勻,然後已有椰汁層杯內再雪兩小時以上

2017年5月26日 星期五

大少爺的初戀

大少爺口味就係佬味

但係佬味中又帶點堅持,佢從來唔鍾意食泡飯

只會湯就湯、飯就飯,撈埋就係唔鍾意,又係同我相反我好鍾意湯飯

但早前佢晌某餐廳見到我食鴨腿湯飯引起佢好奇

然後佢試完後就喜歡了,佢雙眼發光好似墮入初戀之中咁

我見佢情逗初開就成全佢整比佢食

搵鴨腿先最難攪,City's super其實有,法國鴨腿可以用來整 duck confit(無記錯係$60-70)

其次晌賣凍肉地方,賣外國凍肉( 唔係佳X呢d)有外國入口鴨腿,我上網見到有美國品種

最後我呢…忍唔住去搵人去街市問,有d雞鴨檔原來可以只買鴨腿但要遂檔問呢

就係咁我決定用雞鴨檔鴨腿,簡直開心跳起 Yeah~

做法唔難非常好味!大少爺昨晚食得好開心

我說過要你快樂  換你一生開心的感覺~~~~~~~


食譜:

鴨腿   2隻

冬瓜   1斤

瑤柱   2粒 (浸軟)

金華火腿   3片 (可以用瘦肉代替)

陳皮   1-2小片(浸軟)

冬菇   隨意(我最怕冬菇所以無落)

做法:

鴨腿洗淨然後抹乾水


每一隻鴨腿都有 1茶匙老抽、1/2五香粉、1/2鹽抹勻醃一晚

兩隻都咁做,你整10隻也如是


煎之前將鴨腿沖水再抹乾(免得老抽令鴨腿過度深色)


煎完一面反另一面


你睇佢幾靚仔,你見到佢咁油當然又要用熱水沖一沖佢


煲滾水,放入冬瓜、瑤柱、金華火腿、陳皮再翻滾時加入鴨腿

慢火煲大約2-2.5小時便可以

隻鴨腿會越煲越出味好香的



大少奶's Delicatessen

宣傳你的專頁

2017年5月25日 星期四

可口可樂特選套餐@ 大街餐廳(迪士尼樂園)

之前大少爺生日玩足幾日,其中一日入了樂園

其實當日我有個任務就係去迪士尼大街間 cafe corner tasting個特選套餐

本身我入樂園的話都當去大街餐廳,貪其坐得舒服食物都叫做唔算差

可以舒舒服服食午餐係好重要

今次可口可樂同呢間餐廳 crossover,菜式都係用可口可樂公司飲品去配合

初初我聽時以為都係 pairing形式,即係似wine pairing咁…紅肉配可樂、白肉配雪碧

但原來唔係,係每一個菜式都會用飲品去做醬汁

前菜係

煙鴨胸配芬達 特製黑醋忌廉汁伴番茄及香橙沙律

呢個好好味,佢係用芬達橙汁混合埋黑醋忌廉汁

但汁係打成泡沫咁,微微酸味泡泡,加上新鮮沙律菜

當日熱到一個點,所以食呢個時感覺爽好多


香烤牛柳及慢煮小牛排配可口可樂小點子
伴香芹頭薯蓉及紅酒汁

可樂小點子係乜?你見到牛柳上小點點嗎?
小點點唔係魚子醬,係可樂小點子
將可樂用份子料理方式做成小點子,食落當然有可樂味
可樂同牛肉從來都係好朋友,個慢煮小牛排非常鬆軟呢


香煎鱸魚配雪碧 特製香茅汁伴意大利芝士雲吞

個鱸魚煎得香香配雪碧忌廉汁,雪碧將忌廉汁變得無咁膩


甜品有:朱古力慕絲伴可口可樂焦糖燉蛋
及雜莓芒果汁

飲品方面:焦糖雪糕浮冰同西柚園
怎能沒有可口可樂呢?

總括來講成份餐都係有心思,而且見到現場都多人點的
夏天去迪士尼最重要係有坐得舒服及食物不錯餐廳呢







我愛迪士尼


當你行到身水身汗時..........見到呢部汽水機

如天降甘露咁緊要


見到都爽晒可口可樂










2017年5月24日 星期三

黑雨

原本包包今日要上學習班,但因為紅雨

紅雨我都已經決定唔帶佢出去,後來仲黑雨添

每個星期三包包上完英文班後,我就會帶佢去食午餐

通常佢乖我都准佢自己決定食乜

佢通常都會話:廚師雞肉飯,但實情我都唔知係乜

有時佢話要食壽司,試過一次拉我入麥當奴

久唔久我都會比佢食一次

而我呢?每次佢上課時我都會到附近茶餐廳飲凍檸茶

今日一場雨我同佢都留晌家,不過我家總會有食材

晌床下底個餅罐有半隻鮮雞…哈哈

成日蒸雞好悶,但時間緊逼又唔想炆,於是整照燒所

由於今日本身無打算寫食譜所以無影step,見諒

食譜:

雞半隻(或1隻)

醬汁:

老抽    1茶匙

生抽    半湯匙

味醂   2茶匙

糖   1茶匙

水    1湯匙

洋蔥    1個

蒜頭   2粒

做法:

雞用少許鹽撈勻,加少許生粉再撈勻醃15分鐘

將雞煎至金黃色,加入蒜頭兜勻,再加入洋蔥兜勻

將醬汁所有材料攪勻後倒入鑊兜至收汁便完成

可以灑d炒過芝麻增加香味



大少奶's Delicatessen

宣傳你的專頁

2017年5月23日 星期二

ham ham地

話說我睇到一個雞肉火腿食譜,咁又試下

佢只需要用鹽、糖同兩塊雞胸肉,咁又試下

之後要浸水令雞肉變軟,咁又試下

跟住個煮法係浸熱水,咁又試下

切出來凍食係軟身,咁又試下

但呢個做法整比包包食我又唔太放心,於是煎一煎佢點知打回原形係會硬

所以呢個只可以凍食,但係做三文治配沙律乜乜物物又唔錯

只係比小朋友食要小心d咁囉!

今日包包個午餐,佢個臭包食蘆筍唔食個頂只食條莖


雞胸肉 2片+用1湯匙糖抹勻佢

然後先加 2茶匙鹽搽勻

跟住包好放入雪櫃醃過夜


之後就放入一盤水中先浸30分鐘,再換水浸30分鐘

*呢個過程其實叫啤水,令肉吸水軟化,啤一聲個啤


抹乾水,然後就將兩片雞胸疊好,跟住用微波保鮮紙卷起(用錫紙都可以但一定要夠實)

卷到似粒糖咁扎實佢

煲滾滾水,放雞肉入去等到水再滾就滾多4分鐘

跟住熄火唔好蓋蓋,用熱水去浸熟佢,直至水凍為止

做出來是咁的,佢凍食真係好ok,配沙律醬食最好味




大少奶's Delicatessen

宣傳你的專頁

2017年5月21日 星期日

包粽第一回

一年一度包粽又到,我真係好鍾意包粽

而且好鍾意包完送比人

過時過節送自家應節食物呢樣玩意似失傳

但人家食到心意係重點

呢樣係由我舅母身上學,那些年我仍未懂煮食佢過時節總會送我過節食物

就係份心意我記到而家

今日包了28隻、下星期會包30隻先夠派呢

自己包嘅粽無華麗包裝、無什麼"出奇蛋"驚喜,但就係實實在在一份自家風味呢

今次加入燒鴨,燒鴨皮油香滲入糯米帶多點香味


食譜:10-12隻

糯米     1.5斤

綠豆 半斤  (浸過夜)

豬肉 $30,用半肥瘦豬肉,最好用肥肉,因為肉越肥越香,但會用半肥瘦

鹹蛋黃 視符你包幾多隻或者用半隻定一隻蛋黃

瑤柱    3~4粒或喜好而定

栗子    隨意

燒鴨肉   隨意(連皮)


做法:

早一晚準備:

豬肉切件,似燒肉咁大件就可以,用糖醃,夠撈勻便可以,再加五香粉可以醃過夜
*係用糖,只需要少許便可以,糖先可以令肉軟化,而鹽會將肉水份抽走變實
放心!塊肉唔會變甜,配埋其他係夠咸既
亦可以鹽包之前放少少鹽撈一撈


將糯米浸過夜後隔去水份,加油同鹽略醃夠撈勻便可以


綠豆早一晚浸



包之前準備:

鹹蛋黃切半或一隻,可以用現成鹹蛋黃或者鹹蛋隔走蛋白

瑤柱浸軟

粽葉洗一洗浸3個鐘再灼一灼,用新鮮既就沖洗乾淨再灼一灼

栗子烚好剝殼


今次我都用新鮮粽葉包,因為車人媽咪容易買得到

其實乾粽葉會更香但要花時間洗

先將兩塊粽葉疊好


做成兜型,然後先鋪上糯米


加上綠豆


放上餡料:五香豬肉、栗子、肥肉、蛋黃、燒鴨


再加綠豆


最後再鋪上糯米


底部加多一片粽葉


將底部粽葉對摺,然後再將(上方)粽落蓋下


用條草繩扎實



打個結便完成,晌我 FB page有影片的,再唔明再睇


我用高速煲烚30分鐘,如果曾通明火烚就2小時




大少奶's Delicatessen

宣傳你的專頁