2006年11月30日 星期四

五行欠"辣"


今日瞓 醒好想食"泰式辣椒肉碎炒飯"
可能因為"流浪影子"泰國之旅 加埋 "麻辣太狼打令笨B媽媽"傳染
但臨時臨急好難約人倍我食泰菜,唯有自已動手煮
其實平時出外食飯我好少叫飯,因為本身唔太鍾意食飯
但食泰國菜就會叫"泰式辣椒肉碎炒飯"
其實我好鍾意食泰國菜,因為味道有層次感,又有甜、酸、辣、鹹加埋既味道
今次自已憑感覺整,效果直達95%相似程度
配料:有辣椒、少少肉碎、蔥粒、蒜粒、半隻蛋,另外自已加上菜甫
調味:魚露、青檸汁
估唔到自已都做得到!Yeah
平時每日我都會飲1~2杯無糖檸檬水,唔記得從幾時習慣
加檸檬既水可以為每日飲2L~3L水既我增添少少色彩

大家唔駛怕,側邊既辣椒係裝飾品


2006年11月29日 星期三

平凡是福


之前提過收到9張喜帖,最近收多1張,共10張
今晚既飲宴已經係11月最尾一張,已經完成11月份6餐喜酒
緊接12月1號就係12月第一張帖
而今晚既喜宴比較重要,因為係我好朋友,兩點就去觀禮喇
post番琴晚既晚餐啦!呢碟其實同魚香茄子做法一樣,不過無鹹魚
所以我就稱佢為"肉未辣醬炒茄子",其實肉佔少,加入蒜頭、豆辦醬一齊炒
其實,我鍾意馬拉盞炒茄子,每次去新加坡都會買番來,但大少爺話煮完廚房一大陣味
所以次次買完煮一次就送比人,馬拉盞炒茄子係我祖母居新加坡時學整既
我對馬拉盞及新加坡有濃厚感情呢!
炒茄子係平凡既菜式,但當飲宴頻密的日子,炒茄子反而係我最渴望食到
而且.....呢個菜式顏色深深既,大少爺又再次揀唔番蒜頭出來呢!
1710hrs: 晌飲宴場地-ing,尤於唔打麻雀所以到pacific coffee上網
其實個茄子用好少油,只用一茶匙油爆香肉碎、再加茄子,加少少水蓋上鑊蓋焗一陣就熟
咁樣唔吸油,落太多油茄子會吸油更會爛既




(而家我開始準備出門口,所有留言遲d回覆,敬請見諒)

2006年11月28日 星期二

逃避飲宴煲仔飯


琴日原定要飲宴 ,跟住下晝覺得頭痛就食粒藥瞓咗陣晏覺
起身頭痛消失但就無精打彩,結果......就只由大少爺代表一人去飲宴
而我就懶洋洋地睇電視直至夜晚八點肚餓
就晌雪櫃拎一包金錢牛展加埋洋蔥、蒜粒做煲仔飯,另加煲仔飯豉油、煎蛋
用金錢牛展既好處唔肥但又唔會韌又有牛肉味
當打開煲蓋時真係同街外煲仔飯一樣香,因為我煲到飯底焦黑(係意外)
好彩我煲多咗煲一碗飯份量,如果唔係就無得食
而配菜就用西蘭花,明明自已一個人都係要砌好西蘭花
好鍾意將西蘭花砌到好係盆栽咁
其實冬天自已整煲仔飯幾好起碼可以揀自已鍾意配料



2006年11月25日 星期六

懶人hot pot 賀訂閱者已達"1005"位喇!恭喜!恭喜!


其實到呢一刻已經訂閱者唔止1005人喇!
當初開blog無諗過有呢個成績,無諗過小女人手作仔會吸引咁多人欣賞
多謝你哋每一位!emoticon60.gif

懶人hot pot
今日同大少爺行咗陣金鐘陪佢買衫(無錯!今次我係陪佢買,自已無買,乖)
跟住就去吉之島買一包火鍋料返屋的企打邊爐
現成一包裡面已經有晒想要既,只需要買多少少配料就得
方便適合我呢種懶人
↓芫西皮蛋豆腐湯底

↓今晚hot pot料有
芫西、皮蛋、豆腐 (湯底)
火鍋包
白菜
菜肉餃
鮮蝦火
黑椒牛筋丸


↓火鍋包好抵,墊底既係菜
菜方面有...冬菇、金菇同黃芽白

↓素食者如有不適請告之,我會delete
肉類有...3塊去皮雞肉、3片牛肉、4片豬頸肉同2片豚肉

↓丸類有...獅子狗卷、日式魚蛋、墨魚丸、龍蝦丸、肉丸同蟹柳

↓日式蔬菜魚餅

↓唔少得既鮮蝦,好鮮甜,學笨B媽媽方法洗完放冰格,易脫殼
雪完先影已經唔識掙紮

↓菜肉餃

↓火鍋包內既菜唔多夠,另加白菜,反而最多功夫因為多沙,洗好多轉又浸,乾淨晒!

↓芫西辣椒豉油,㊣

總結…個火鍋包對我來講唔太good,因為我本身唔太食豬肉
打邊爐唔鍾意淥雞肉
而火鍋包太少牛肉,始終自已買料好d~
想快d去日本食shabu~shabu,大少爺你快d放大假啦!我唔想等到三月咁耐呀)))))))

2006年11月22日 星期三

墨魚茄子burger


早幾晚整過一次,但個樣實在太肉酸所以只post過5分鐘
但大少爺十分鍾意喇!今晚又再整
但得四個好樣少少,煎茄子原來唔易
首先要塊墨魚膠熟,又要小心唔可以跌出來而且茄子好吸油
最尾步驟要較猛火逼番油份出來、茄子又會變晒色
結果....一碟裡面得4個好樣少少(其餘好醜樣),不過太好味喇!
尤其是墨魚膠好彈牙、茄子又好味!




重返校園計劃


開Blog初期曾寫過一篇關於贊助中國貧窮地區小童上學既網誌:重返校園計劃
當寫初係因為收到贊助學童上學期成績表同佢親手畫既圖畫
今日再寫係收到下學期成績表及另一幅圖畫
我同大少爺都好開心
雖然...兩幅畫都係樹,上次係蘋果樹、今次係開滿花既樹
或者因為學童身處貧窮地區、無豐裕物質既單純世界,樹就係佢既良伴
我都希望佢可以似樹般茁壯成長
每年用$200就可以令一個小童過著有書讀既生活,圓到一個貧窮地區小童讀書夢
無論如何...一開始我就唔會比佢停,直至贊助到佢小學、中學畢業係我既理想(中學每年$1000)
我唔奢望能夠改變佢一生,只希望佢識多個字有機會改善生活
下年度我要贊助多1、2個兒童,能力內做到既都盡力做!
有興趣既可睇番舊網誌:http://hk.myblog.yahoo.com/jw!DcxzHG2bBhZrEAWNm6wiWrwYTP8-/article?mid=495
 有興趣資助可睇--->    http://www.hkcc.org.hk/BTS/010.asp






其實…睇到貧困地區既人,就領略到自已幾咁幸福
所以更加要好好珍惜一切,好好愛惜身邊既所有人
【知足】亦係快樂既泉源!

2006年11月21日 星期二

南瓜怪又再南瓜


今日又要飲宴,噢!
懶洋洋既我預早知自已懶洋洋,所以買定罐頭南瓜湯做懶洋洋午餐
唔記得買麵包做多士就焗薯條,自從發現焗薯條可代替炸之後我就會擺定包晌屋企
話時話我發現原來南瓜會上癮,除咗可樂外,我居然有南瓜癮會朝思慕想南瓜湯
難怪"打令笨B媽媽"叫我"南瓜怪"
但我又唔會用南瓜做菜式、甜品之類
無論中式或西式獨愛南瓜湯
雖然…今次用罐頭南瓜湯,真係咪睇少佢,佢充滿南瓜味
仲不加味精、不含防腐劑、不含人造色素、不含人造味料
仲有59%南瓜製造而成,我無加奶煮只用清水煮一樣 creamy




焗薯條只需要將薯條鋪平在不黏布上入焗爐就可以,如用錫紙就要反下佢怕黐底


勁推介既南瓜湯


2006年11月20日 星期一

撞板傑作..........香檸低脂芝士餅


今日晌屋企等送貨,手痕又玩焗蛋糕
原本整低脂new york cheese cake,並將食譜份量減半
但其中檸檬蓉同檸檬汁唔記得減份量仲落多咗
好彩焗完試味發覺好香檸檬味,加上個餅夠薄身所以幾好味
相信大少爺會接受得到既~


好開心呀!不枉我成朝只飲咗碗湯嚟等個芝士餅凍
好香檸檬味,原來檸檬皮好清香、又薄身唔漏、餅底做厚d,因為大少爺鍾意食餅底!
Oh! yummy yummy
食譜暫時唔提供,因為係我撞彩整出嚟!整多一次先補番啦


2006年11月18日 星期六

唔夠薑 (附食譜)


好攰既一日,尤於晏食lunch,所以無食晚飯

返到屋企好想食薑味既食物

曾經睇過一本書話當你特別想食某類食物既時候

就表示身體缺乏某種營養

我相信我唔夠薑所以想食薑,一路返屋企一路諗,結果就即時上網搵薑汁撞奶

好多食譜話要拉過d奶先整到,咁麻煩!我就膽粗粗唔拉就撞

結果.............居然成功既~前後唔駛10分鐘就做到喇!

好攰攰攰攰攰 -ing




↓睇下匙羹都可以放上面就知幾成功啦!


食譜:


全脂奶           250ml

薑                  適量  視符你愛薑程度)

糖                  2~3茶匙  (想甜d可以自已添加)

做法:

1)薑磨成蓉隔渣,只要薑汁

2)將奶煮熱(唔要大滾)加糖,只需感覺到熱就得,熄火等2分鐘

3)將奶既煲輕輕提高撞入薑汁,即蓋上碟焗3~5分鐘,done

我已經試過兩次都OK,奶既溫度好重要,你可以搵探熱針量度80度奶溫就可以

2006年11月16日 星期四

9張喜帖


今晚要去喜宴、晏晝唔多想出街,自已整叉燒腸粉

十一月、十二月共收到9張喜帖

噢!我替朋友開心,但9張喜帖類積既人情帳面都唔少

大少爺既下屬請既同好朋友請既就一定到

有d唔太相熟或者只係禮貌上比帖既都只會比禮但唔去飲

自已整當然無街外卷得咁靚,但味道都好好,同街外無分別

個食譜係for微波爐,但我對微波爐信心不足(到而家都未摸熟個微波爐)

所以用番原始方法"蒸",可以蒸定,食既時候蒸熱或煎

好想買條油炸鬼返來整"炸兩"

食譜參考"韋太教室"

材 料 : (2-3人份量)

粘米粉       150g 

粟粉           20g 

生 油         1 茶匙

水              460 g

 鹽           1/4 茶匙

 蔥粒適量、  叉燒適量 (用生粉拌勻)

腸粉豉油 :
水 5 湯匙 

生抽 1 湯匙 

老抽 半湯匙


糖 2 湯匙 

雞粉 1/4 茶匙

把所有豉油材料混合細火煮滾放涼即成.

叉燒腸粉做法:

1)將粘米粉、  粟粉 、  水 、生 油  、    鹽 、   蔥粒攪勻

2)將平底碟塗上一層薄薄既油,倒上粉漿,加叉燒於側邊位置(唔可以太多,會易穿)

3)放上滾水鑊蒸2~3分鐘或粉漿凝結成粉皮

4)枱面舖上微波爐保鮮紙,將粉皮用刮刀輕輕整塊刮起再卷成腸粉狀









↓腸粉就係咁樣形成既


↓呢碟齋腸粉整比親愛的大少爺聽日早餐既~



2006年11月15日 星期三

$6換來既滿足感 (附食譜)


已經第三晚早睡早起,連森美小儀既架勢堂都聽唔晒就瞓著
到目前為止已整兩底豬肉乾、洗衫、吸塵
今日鐘點呀姐上來幫手,但我一瞓醒就忍唔住吸塵
琴日買定煲湯材料、買定煲湯瘦肉同埋$12免治豬肉
買$12攪免治肉好多呢!買咁多因為一半做晚餐餸菜,一半整豬肉乾
下圖既豬肉乾只係$6成本既豬肉,仲要有兩大塊,味道仲同街外買既差不多
鐘點呀姐都話我"犀利"
食譜:韋太烹飪教室
免治豬肉     $6 
生抽            1湯匙
魚露            2茶匙
糖                 75 g
蜜糖            1湯匙
玫瑰露酒     2茶匙
鹽               1/8茶匙
做法:
1)將所有調味料同豬肉攪勻,攪至起膠
2)將一半豬肉舖上不黏布或牛油紙上,再蓋上保鮮紙用麵棍轆平
3)放入預熱焗爐180度焗至金黃再反轉焗另一面,放涼
由於豬肉有蜜糖,所以要自已睇火,個邊好易(火農)
另外…唔可以太薄又唔可以大厚,太薄容易乾晒硬掘掘,太厚會做唔到肉乾效果!




↓Before baking


2006年11月14日 星期二

Blueberry cheese cake- ing


琴晚又再10:30瞓,朝早08:30起身
呢幾日好攰好想晌屋企休息下
但又會不停晌屋企整呢樣整嗰樣,索性整蛋糕
今次只用一半份量,做薄啲比較似pie既效果
希望大少爺會接受多啲啲,整得好既就下次整一個比表弟!
2030hrs:好嘢!我親愛的大少爺鍾意呢隻款蛋糕呀!佢鍾意藍梅醬呀!Yeah!!!!!




2006年11月13日 星期一

懶人慳家好煮意


自從病完後日日走出街,琴日又做成日家務,十分攰
結果夜晚10:30就瞓,朝早08:00就瞓醒
聽903【晴朗一天出發】谷德昭暫代林海峰,勁好笑
我好鍾意聽谷德昭做節目,佢真係好攪笑!
我同大少爺瞓覺有一個習慣,係通宵開收音機,仲一定要903
原本係我既壞習慣,但而家傳染比大少爺無收音機瞓唔著
如果半夜中途收音機無聲我會即刻醒架!
****************************************************************************
早咗起身自然會食早餐又會早食lunch
今日推介懶人慳家好煮意,其實係一隻日本出既爽口意粉及日式意粉醬
呢隻意粉真係爽口,而且一札代表一人份量
由於有幾種長度所以每種長度會寫明煮幾多分鐘
下圖呢隻煮7分鐘就得,每包5札 $10.9
而意粉醬係我午餐良伴,1人份量只需要倒半包落已煮熟及過冷河既意粉上
入微波爐3分鐘就食得,又好味,仲好多口味選擇
今日煮既係紅色包裝既,有大量茄肉、磨菇同少少肉碎,非常juicy $11.9
而白色包裝都係我經常買既,比較濃味,減價$8.9
如果兩個人食就落一包、一個人半包已足夠,全部吉之島有售
我試過用意粉醬伴薯蓉都好好味,平均一個人午餐只用$8,係咪好慳家又方便呢

↓呢個長度煮7分鐘


↓今次煮呢包

↓呢隻比較濃味但茄肉比較少,肉碎較多


↓加少少香草仲好味,一札意粉加半包醬既份量


↓食到一半都忍唔住要影,隨處可見磨菇及茄肉,非常juicy