2006年7月31日 星期一

噢!My 打"檸"


十一點幾出門口與親友食Lunch,收到一份超名貴禮物!多謝晒!
跟住行左陣金鐘打算幫大少爺買恤衫,但揀唔到就返屋企
今日唔煮飯,但post番琴晚另一味(食送)
係...My 打"檸"
My 打"檸" 係乜?
咪就係...................西檸軟雞
西檸雞獻汁材料
鮮檸檬汁、水、糖、鹽、吉士粉
將檸檬汁加水落鑊煮熱加糖、鹽,調教自已鍾意既味道後遂少加入吉士粉煮至杰身
我自已份量檸汁兩湯匙、水大半杯!邊煮邊試味



2006年7月28日 星期五

玉桂蜜糖杏仁屋仔多士


大少爺已經下令要我留晌屋企休息(就算佢唔講我都無力行出門口啦)
我既brunch亦只得 muesli 同多士
但無聊既我又諗出無聊傑作
將麵包用屋型既曲奇模做出屋仔形狀
再加少少牛油、玉桂粉、蜜糖、杏仁拎去焗就做成
好食之餘又滿足我無聊既慾望




2006年7月23日 星期日

我係…大少爺私人衣食住行家事管理雜費統計清潔聯絡小組社交娛樂駛錢健康關注行政專員


以前對家務、烹飪毫無認識甚至缺乏呢方面常識既我
初初接管成為:
【大少爺私人衣食住行家事管理雜費統計清潔聯絡小組社交娛樂駛錢健康關注行政專員】
呢個職位時錯漏百出、不知所謂
一向以購物為樂既我,以為買野係我專長,原來要買家庭用品、煮食用品先發覺並唔係咁容易
尤其係買海味、甚至煲湯材料都經常買到劣質貨品
後來...終於晌"黃雙如"既雜貨店買到合心水既貨品
黃雙如可稱為名媛、食家、飲食作家、烹飪專家,佢店舖"有食緣"賣既都係比較靚貨
我買過最好既有……
越南出品魚露…係有鮮味,並唔係街外普通泰國入口貨色,起碼無腥臭味而家已斷貨,我仍然等佢返貨,因為大少爺係潮洲人鍾意食煎蠔餅,配呢隻魚露一齊食係絕配!
日本出產既麻油 係出前一丁既麻油!好香0架!
清補涼…,涼補涼煲湯有時有酸味,因為有琉璜,佢賣既清補涼係標明無琉璜
仲有下圖既:蜜糖甜餅兒,係兩塊蛋餅夾著蜜糖,好好食既餅!佢係荷蘭入口,個名真係叫蜜糖甜餅兒
最後有蜜棗,好大粒煲湯真係好甜
晌呢間店舖買野係貴過其他舖頭少少,但絕對可以接受
尤其初初打理屋企既人來講係好選擇,因為唔怕被呃錢或者經驗不足買劣貨
最後...
唔該我表弟,佢晌附近工作,經常晌Lunch time幫我到呢間舖睇魚露有無貨返
Thank you!







2006年7月21日 星期五

為無聊的我喝彩!


今日起身莫名奇妙週身骨痛,好累!
大少爺就話:【緊係啦!琴日你行左咁耐仲拎咁多戰利品!】
可能係啦!加上天氣好熱,分分鐘真係開始【夏眠】(參考動物冬眠),秋天先出街
今日我連街都唔想落,所以又摷雪櫃
雪櫃有預備整魚香茄子既矮瓜、蕃茄、西芹、冰格既粟米再加芝士
我就整左以下既"焗釀茄子",無聊既我專諗出各樣奇怪既煮法
焗完後加 Basil,好地地一個茄子比我攪到似PIZZA
不過...我仍然為無聊的我喝彩!






2006年7月19日 星期三

蝦餃、燒賣、叉燒包賣晒!新鮮熱辣馬拉糕o岩嗎?



蝦餃、燒賣、叉燒包賣晒!新鮮熱辣馬拉糕o岩唔o岩呀?
原來馬拉糕係非常易整既,佢中間會升起好高,打開鑊蓋時睇到好開心
唯一缺少欖仁,但好軟熟
無聊既我忽然間諗用叮叮點心,加埋呢個馬拉糕,今晚同大少爺扮飲茶都好喎!
但係我就好可憐,大少爺只需扮茶客…
而我...就要扮晒waitress、點心師傅、甚至洗碗
Oh no.........................
唔煮的話…都係出街食罷啦!
食譜
低粉       80g
泡打粉   1/2茶匙
吉士粉    20g
蛋           2隻
黃糖      40g
糖霜      40g
牛油      30g
奶         60ml
雲呢拿油兩滴
做法:
1)牛油坐溶備用 
2)將黃糖、糖霜及蛋攪勻,只需要用我攪勻
3)加入已篩低粉、泡打粉、吉士粉拌勻,再加入奶、牛油、雲呢拿油攪勻
3)隔水大火蒸 20~25分鐘




2006年7月18日 星期二

載著"泰式粉絲沙律"既魚(加材料清單)




雖然…而家只係下午5點幾但今日好充實,一早起身預備定"泰式粉絲沙律"作為今晚既晚餐
之後趕住出銅鑼灣既 EL CID Spanish Restaurant與好朋友食左一餐好味又滿足既午餐
預祝好友生日點都要搵間好既請食lunch慶祝
唔知係唔係受到城中熱話銷售稅影響,好似要趕及落實前買咁(其實通通都係籍口)
又可能係同好朋友一齊太開心、心情大好!買得暢快!
我今日好似進入忘我世界,短短三個鐘買到唔識停
本來為著9月一個特別日子而買,但而家好似買左好多唔係幾關事既野!
當今晚大少爺睇到呢篇日記會點呢?(佢係我big fans,每晚都會睇)
不過…就當作人工啦!我去街都趕番屋企預備晚餐!抵番晒啦~
講番"泰式粉絲沙律"其實係琴日魚魚cafe既話事人魚魚問我有關沙律問題
令我突然好想食,跟著今朝早就動手做
內有粉絲、海鮮、蕃茄、洋蔥、西芹,味道有齊甜、微酸、辣、又夠凍
而隻碟係魚型架!
後記:大少爺返來睇見我今日既戰利品後話:不如你參與反銷售稅既遊行丫!
我心諗:咁熱......................................!
材料清單(唔加份量,因為沙律汁需要親自試味才可以調教精出自已口味)
沙律汁用料:
魚露、青檸汁、少許檸檬葉、乾蔥粒、蒜蓉磨汁連碎、泰式辣椒粉、莞茜、砂糖
沙律配料
粉絲(灼至軟身過冷河)、洋蔥、蕃茄去皮、各類海鮮







2006年7月16日 星期日

變種炸雲吞


呢個係"變種炸雲吞"
將雲吞皮炸成花狀,放上自已鍾意餡料,我揀蕃茄、粟米、洋蔥、牛肉
其實個底係小小既杯狀,可以承托餡料
以前我成日諗有無蕃茄餃子既呢?有無蕃茄雲吞既呢?
我鍾意食炸雲吞,但又唔識整,所以就自已發明呢個變種炸雲吞
以前去Shooter's 52食 沙律係有個質感好似炸雲吞皮又炸得好靚既小盤子載住沙律上檯
另外…細個出外食飯好鍾意食雀巢牛柳絲
一來我鍾意食牛肉、二來雀巢係用芋頭絲炸成雀巢狀,又靚又好味!
我係好鍾意賣相好既食物
後記:大少爺見到呢個變種炸雲吞時,佢話:點解你會諗得出咁奇怪既野架?
好彩佢試過後話好好食




2006年7月14日 星期五

古惑的青椒


朋友個個要返工,無人能夠日日陪自已,所以食Lunch都幾煩惱
又唔想落街買,但又要食,所以我經常會睇下雪櫃有乜就煮埋一碟
而今日既Lunch係呢個青椒

但其實佢係一個古惑的青椒


裡面有意大利雲吞(Tortellini)幾粒,今日先知得番幾粒
仲有螺絲粉、粟米、磨菇、雞肉,全部都係晌雪櫃搵出黎煮埋一碟
個青椒其實灼過,特登無完全抹乾
因覺得有少少水份晌表面感覺好fresh呀!
好彩屋企有既係青椒、如果係冬瓜的話,可能會變"騎呢冬瓜盅"

心太軟


今日中午出左街一陣食完Lunch已經叫要返屋企
好彩熟悉我既人都知我唔熱得!
加上好想睇重播既"天國的階梯"
我第一次睇韓劇係睇天國的階梯、第二套係Full House
而家翻做天國的階梯,我有本事睇第二次都繼續喊
其實劇情係好老土既橋段,仲有男女主角不停喊住叫對方個名
但偏偏吸引我呢種內心擁有滿瀉感情同澎湃眼淚既觀眾睇
大少爺知道重播已經話:【你唔好睇啦:去街啦!你又邊睇邊喊】
但天氣咁熱我寧願流淚不流汗..............
第一次整"心太軟"
我睇好多討論區,好多人試做都會焗到個心實晒無流醬
所以當呢個蛋糕焗緊既時候我好緊張企晌焗爐側邊望實個蛋糕
好彩!都有朱古力醬流出!




2006年7月11日 星期二

Prawn Caesar


之前講過我係唔鍾意食菜
通常預備晚飯都會煮一碟菜,都只係覺得"循例"有碟菜同"循例"要食菜
真正鍾意既菜就係翡翠荳苗、同caesar  salad
不過...下圖既caesar salad係我晌某日資超級市場買既包裝沙律
蝦係我琴晚晚飯時碟白灼蝦剩低既
以前只會出外食飯先食得到,但自從我發覺日資超級市場有入口既caesar salad後
我就經常買定一、兩包,一包足夠代替一個正餐,仲會好飽
初初以為包裝貨式唔能夠同餐廳既相題並論,但試過之後已經無呢個想法
內裡既醬汁、croutons、romaine同芝士係同餐廳一樣有水準
所以而家出外食飯appetizer我唔會再叫caesar salad
原因係同樣既味道、質素超級市場$30一包、但餐廳既要$100或以上
我係至叻精明眼0黎0架!哼!


每塊菜葉都被芝士包圍既~




2006年7月10日 星期一

嘩!得o左!(已加食譜)


終於得0左喇!哇哈哈
我最鍾意既.......班蘭蛋糕,今次唔駛打格仔呀!



 


材料
蛋黃            3個
細砂糖(a)   30g
橄欖油        50cc
班蘭葉        5條
暖水           50cc
低粉          60g
泡打      1/2茶匙
蛋白霜
蛋白  4個
砂糖 (b)  60g
做法:
1)將班蘭葉用暖水榨汁備用
2)將蛋黃同砂糖(a)拌勻,加入班蘭液及橄欖油
3)粉類過篩加入蛋糊直至完全混合
4)將蛋白加入砂糖(b)打至企身,加入蛋糊用Fold-in方法完全混合,入模以180度焗50~55分鐘,取出後要倒扣放涼直至完全冷卻才可以脫模

2006年7月7日 星期五

Italian Cuisine


今晚食飯既座位比較隱蔽,所以影相就算加閃燈都無人知,亦唔會難為情
夏天去街特別累,所以無心機慢慢諗食乜
揀左一間意大利餐廳,本來唔寄厚望
因為揀兩個頭盤
我揀一個煙三文魚caesar salad幾好、大少爺就揀燒雞味道好一般
餐湯又麻麻地、麵飽都唔好味,勝在可以點橄欖油、調味架又有黑醋供應!
但主菜既Pizza同西冷牛扒又唔錯喎!
個Pizza即場用火山石爐烤既,唔好睇佢無乜材料好香脆又濃蕃茄味
又有新鮮磨菇、Salami 唔太鹹、芝士又夠香
一向都無可能將正宗意大利餐廳既pizza同pizza hut鬥多材料
我食牛扒只鍾意美式牛扒,唔需要調味汁只求夠肉味同juicy,多數會揀 Rib eye steak
初以為一般港式牛扒,但原來件牛扒都符合我要求,都幾滿意
雖然唔可以同我覺得好好味既意大利餐廳Sabatini相比(價錢都相差得遠)
但都OK 啦!











2006年7月6日 星期四

書得


我好鍾意睇書,小學六年級得到過"閱讀獎"添
平時無聊都會睇八掛雜誌、時裝雜誌、甚至買完野既說明書都會睇一餐
十幾歲睇愛情小說,當時校內大部份女生都係睇岑凱倫
岑凱倫既小說通常女主角美若天仙、男主角英俊有型,有錢又架勢、架車又夠威.而家當然覺得好笑
漸長大既我就沉迷睇張小嫻愛情小說、散文,張小嫻寫既愛情比較真實
雖然有好多本都悲劇收場,但係有幾多個人能夠有完美人生結局呢?
去完北京開始睇歷史書,貪慕虛榮既我最鍾意睇各代皇后傳、帝王生活,最鍾意睇既朝代係清朝
The Da vinci code係睇得最耐,因為內容要慢慢消化,尤其係我唔係書中講述既宗教
仲有一本在天堂遇見的五個人,內容並唔係關於宗教,男主角死後天堂遇那五個人,令男主角得知好多曾經發生過既事件背後真相,每件事發生並唔係表面睇咁簡單,係一本有啟發性既書
我要睇字既書唔鍾意睇漫畫,但就鍾意插圖書
幾年前迷上幾米,圖畫好靚,有時好彩色、有時得黑白色,幾米曾經患病,覺得佢既世界比較悲觀
但圖畫好吸引,我覺得係成年人既圖書,似真實既世界但又好虛無飄渺
2005年開始就鍾意睇高木直子,圖畫中既佢有d似小丸子,佢既作品比較生活化
一個人的第一次…最新出版,內客好得意,講佢好多既第一次
第一次吃麥當奴、第一次打工、第一次開車既心情
因為佢個人細膽,所以好多第一次發生既事令佢忐忑不安



最鍾意一個人住第五年,講述佢自已一個人因為要上東京自已獨立生活所發生既事,內客好有共鳴
裡面有些事都發生過晌我身上


另外兩本150cm life第一集同第二集,因為佢得150cm身高發生佢身上既趣事
呢本我就得唔到共鳴(因我有165cm高),但很有趣味性,內客寫因為佢既身高帶來各種生活不便


   

一個人上東京講佢要離開家鄉到東京實現佢既夢想,佢家鄉同東京有好大對比,重新適應生活既趣事


睇書其實會令人快樂
不過悲觀既我就唔適合睇好悲情既書,尤其係天國的階梯裡面個........"靜書"
我每睇佢喊一次,我就會發神經跟住佢喊一次,爭d跟住佢叫:誠俊哥 >.<"
我試過喊到嗚嗚聲,大少爺晌書房都聽到我喊就走出來以為我發生咩事,跟住勸我唔好睇
但偏偏我又繼續睇

2006年7月3日 星期一

五十步笑百步


每星期都會睇美女廚房,睇電視對於我來講只求娛樂
的確覺得美女廚房幾好笑,雖然某些女明星睇落好誇張,切海蔘攪到喊
但其實我只係比佢o地好少少...............
我本身天生好驚動物,我相信係天生既
因為爸爸同媽咪都話我細個時候見到毛毛公仔會喊,而家都唔鍾意毛公仔
我怕既動物係總括性,即係話...無論海陸空所有背部向天識郁識行走既非人類動物我都驚
自細已經被寵壞,4歲就已經識只選擇日本百貨公司才肯進入
其餘…非日資或非大型百貨公司就拉扯大人走點都唔肯踏入,何況係街市?
但而家要照顧大少爺飲食既我,去街市係無可避免,因為始終每晚出街食唔健康
而超級市場未必有我所需,去買(食送)問題就出現喇
大少爺鍾意食魚,但我好怕魚檔、海鮮檔,怕乜?
怕生猛靚海鮮彈下彈下,又怕刮魚鱗會彈落我身上
又怕海鮮檔附設既田雞,怕新鮮魚被捕既時候猙扎,我每次會不其然叫出來
所以每次買魚都要大少爺放假又決定唔去街先會買,因為係大少爺幫我買,返到屋企幫我洗埋.........
怕雞檔既生雞、試過以前學買新鮮雞,雞檔老闆娘好心拎隻雞出來比我睇新唔新鮮
佢一拎出來我就大叫 "唔好呀" 就邊走
豬肉檔怕豬頭,牛肉檔怕個牛頭、牛尾、內臟
買完返到屋企我都會帶上即棄膠手套先會掂生肉,仲將所有餐具分類,分生肉及熟肉器皿
大少爺經常話請鐘點或全職既家務助理,我覺得得兩個人既家又無必要
除左買(食送)外,我自問其他家務都可以應付得到,因為潔辟既我唔能夠忍受污糟逼住要學做
睇美女廚房我取笑人,其實係五十步笑百步
已煮熟既都唔好得好多,出外食飯最怕乳鴿頭、飲宴既乳豬頭、雞既頭,蒸到張開咀既魚頭
如果得大少爺同我出外食飯,大少爺會用紙巾幫我拎走果d已煮熟既動物頭
最好笑有時大少爺叫(食送)會直接講:(例如叫乳鴿) 唔該!個乳鴿頭唔好上碟
有時與朋友飯聚唔好意思拎走,唯有唔望,或者偷偷地擰轉碟(食送),但求睇佢唔到
不過…蝦頭同龍蝦頭就唔怕
話雖如此,偏偏我又唔係素食者喎!夠奇怪呢?
後記:當大少爺睇完呢篇文章後,講左一句:你係成個街市都驚啦!
錯!行生果檔同菜檔我係輕鬆自如0架!

2006年7月2日 星期日

突然想念新加坡......刨冰


雖然…大少爺依然放假,但天氣實在太熱,無行出屋企門口意慾


突然想念新加坡......刨冰

香港我係唔會買刨冰食,但去到新加坡我就每日都要食
簡直係年年去年年食
爸爸生前去新加坡每次都要食紅荳冰,而我每次去就會食芒果刨冰
食完真係有涼快感
今日我同大少爺又提起出年3月又要去新加坡
唔知點解我同佢好怕熱,但又十分接受新加坡既熱
或者我受到祖母同爸爸影響啦!我真係好鍾意新加坡
泰國我已經唔再鍾意去,日本就怕地鐵令我盪失路 ,睇見地鐵路線圖已經頭痕>.<
其餘去過既都唔會想再去
但今日我同大少講到出年每半年放一次大假的話
異口同聲話新加坡係必去,但另一個行程就唔知想去邊
我係一個只鍾意商業區地方既人,去旅行只鍾意去國家首都
我真係完全唔識享受郊外風景、吸收大自然氣色
好多人都話去新加坡悶同香港差唔多,但對我來講絕對唔係