2007年10月30日 星期二

咩嚟


上星期同鐘點姐姐討論鯪魚肉,佢話佢會自已剁

跟住琴日佢送咗一包自已剁既鯪魚肉比我

本來我想釀豆腐

但琴日大戰衣櫃後再焗蛋糕無落街買豆腐,只叫大少爺返屋企時買切雞

到夜晚我用魚肉煎蛋

當時飯枱上有碟切雞、煎蛋、我就炒緊菜

大少爺問:咦!得兩樣餸

我當時炒緊菜無答

到食飯時佢望住碟蛋問:呢碟餸嚟架?咩嚟架?

我開始唔耐煩地答:芝士蛋糕呀))))))))))))))

其實唔怪得大少爺,佢經常係我戲弄對象~







連早幾日英紅會

佢地班喪標成日將我既說話調轉,我講真既時候佢地猛話我玩佢哋啦!

P.s 近來迷上芝麻,將烘過既芝麻撈飯好味架!

2007年10月29日 星期一

好蕉


今朝鐘點姐姐到來,所以我早 咗起身就搵啲家務做吓

天氣快轉涼第一時間執衣櫃,仲將新既衫洗定隨時著得

再焗一個非常好味香蕉蛋糕 係妹妹Diana焗咗2次都讚好,我跟住整

噢!呢個係我整過最好味既香蕉蛋糕(而家連街都難搵好味既香蕉蛋糕)

香蕉加Gum酒後更香,質地好軟熟

我無用合桃,但加上我最鍾意既杏仁,好好味呀

我終於可以焗到一個好好味既香蕉蛋糕喇!哼!







材料:(8x21cm蛋糕模1個分量)Copy Fr Angel

熟透香蕉1隻、檸檬汁、冧酒各2茶匙、牛油100克、鹽少許、庶糖60克、蛋黃2個、蛋白霜料:蛋白2個、砂糖30克、合桃50克、低筋麵粉150克、發粉、蘇打粉各1/2茶匙

預備:在模中鋪上牛油紙。牛油放在室溫中軟化。粉類過篩。合桃烤過後切成粗粒。預熱焗爐170度。

做法:

1.用叉將香蕉壓碎,淋上檸檬汁和冧酒。

2.將牛油放入碗內,用木杓攪軟,加入蔗糖後用打蛋器打至起白色。將蛋黃逐個加入並攪勻,將1的香蕉加入去。

3.把蛋白放入另一個碗,加少許鹽打至起白泡,分兩次把糖加入。打成挺身的蛋白霜。

4.把過好篩的粉類的一半份量加入2中並攪勻,將3的蛋白霜的一半加入並攪勻。加入餘下的各種粉類,餘下的蛋白霜就分兩次加入,保持著起泡的狀態迅速利落地把整體攪勻,最後加入合桃。

5.將糕糊倒入模中,用刮刀在中間劃一道痕跡,然後沿痕倒下少許植物油。形成油坑。用170度焗約45分鐘。焗完後脫模待涼。

2007年10月26日 星期五

醉好!


今日整成個下晝得21隻粉果

粉果外皮係十分難控制既一樣嘢!

厚又唔得、薄又唔得、多餡又唔得、少餡又唔得

趁做粉果既時,我亦邊整  "紅酒燴牛肋"

上星期我同大少爺食韓國菜,牛肋條好好味,好想試整

今朝行入去Citysuper見到牛肋條,諗都無諗就買

從來牛肉…我都要食得好

再買一堆蔬菜去炆,最重要係紅酒

主要材料:

紅蘿蔔、西芹、洋蔥、蕃茄、茄膏、蒜頭、Bay Leaves、Beet Root

紅酒、黑胡椒、鹽

一堆蔬菜炆到溶晒,我掛住整粉果由得佢炆

而牛肋條係被咁多蔬菜再加上紅酒包圍著,當然感動到肉質鬆化啦!

我一定會再整!一定!因為我同大少爺都食到好感動

臨食前15分鐘再加多半個洋蔥,先可以見到洋蔥存在

P.s 從今日起我左側欄目會有一欄【我有說話想講】

係會記載我遇到某些人和事觸發起既感想

不過...絕對唔會係我要同大少爺講既說話

因為我會親自同佢講唔需要憑blog寄意既~~~







紅酒煮後酒精會蒸發、剩餘芳香唔會令人

牛與紅酒match呢

焗得


今日勁多嘢整,晌大家唔覺唔覺我已經出銅鑼灣買完餸

行咗個圈

下晝仲要整野,夜晚要煮飯

因為要包粉果,要用花生做餡

但唔記得買現成炸好,就用儲備用作煲湯既花生

唔想再炸嘢喎

呆呆望住30秒後就決定..............焗

乾焗怕太乾身就加半茶匙油令每粒表面微微沾上油

唔好落太多油焗,因為花生會出油

用180o度焗一陣自少少轉色及出油就轉230度焗到金黃

放涼就成脆花生,加少少鹽就成小食既花生

那個大少爺就唔停地.......................偷食

都一樣得得得得得~哼!




放上不黏布上,半茶匙油都會少少卸油

所以唔駛落大多,落油後就撈勻




最重要焗透,用180度先焗係避免個心焗唔透就唔脆

一開始大火的話會易燶

以上內容係"大少奶"話你知既~

2007年10月22日 星期一

念舊


好耐無見既一個人午餐隨著我閉關又開始從出江湖

其實無乜特別既 "香草白酒蜆肉磨菇意粉"

但我鍾意張相影得靚啊

全靠我部老爺相機

話說我部相機用咗幾年,我唔換全因我控制得揮灑自如

但大少爺已經頂唔順地講:今年你生日無得揀,一定係相機

我就答佢:噢!我想要番XX牌子、XXX型號,No:XXX

大少爺:咁有乜分別?

我答:係同一牌子、同一型號、像素大啲、功能最重要一樣,咁有乜分別?Um..咪就係個mon大1吋、再薄身啲咁囉!但舊果部我依然會用架!

大少爺即時露出想"噓"既表情

我樂於用我部老爺機,係你無啦啦話要換我部相機之嘛!哼!

  


我係

新科技缺乏及新資訊自動過濾症既

大少奶..... 噢!

2007年10月21日 星期日

同枱食飯


經常都同自己講:【你要記住係2個人同枱食飯】

大少爺口味較中式、同我完全相反既

但時時我都會諗:我學煮嘢都係為咗佢,好應該煮合佢心水既食物

前幾日見到珍珍煮各樣煲仔菜式,我就決心學整比大少爺

第一擊:蒜子豆腐火腩煲

我一係唔整、一整要整到足,蒜子炸過先炆香好多、豆腐與街賣一樣炸過先炆

煮緊既時候大少爺就話:好香啊

見到個煲既時候就話:嘩!好似啊

食落口後流露開心表情話:好味呀!同街既一樣

之後仲虎視眈眈煲內既醬汁

我心足喇!

雖然…我唔太鍾意炸嘢、討厭炸嘢既過、要抹番週遭既牆壁

但見到佢開心既表情比一切重要

要記住係2個人同枱食飯,適當時候要遷就一下對方口味~

下個目標:啫啫雞煲!







煎、炒、煮、炸後記得即時洗過臉,油煙係變黃臉婆既元兇

我甚至會換過件衫先食飯

2007年10月20日 星期六

"有食緣"搬遷





還記得我多次提及由食家黃雙如開辦食品雜貨店"有食緣"嗎?

鍾意去買,因為包保係靚貨,我就算乜都唔識都唔怕會買到劣貨

尤其推介各樣煲湯乾貨、各國既調味品、佢既陳皮、蝦米、蜜棗

剛去補購時知道就快搬遷

10月30號將會搬遷到 :

中環砵甸乍街22號地舖

電話:25236565

2007年10月19日 星期五

想念"蘇丹紅"


大閘蟹季節 嚟 喇

呢碟 "蟹粉扒豆腐"係今晚其中一樣既菜式

最重要係.................................




其實係假扮蟹粉,係晌晏晝我出街前睇到都市閒情烹飪環節內教既菜式

跟住夜晚就即刻試做..............哼!

我加菜心苗墊底,幾好味易做無難度呢既一個菜式

(如果用蘇丹紅鹹蛋整,個賣相一定更似蟹粉...噢!)

食譜:

鹹蛋  2隻

豆腐  1件

獻汁:

水  半杯

糖 少許

生抽  2茶匙

粟粉  半湯匙

鹹蛋白液 少許

做法:

1) 豆腐切粒

2)鹹蛋分開蛋黃、蛋白、蛋黃蒸熟、蛋白留起備用

3)蒸熟蛋黃後揉爛成蓉

4)燒紅鑊加少許油爆香鹹蛋黃蓉,加入獻汁及大約一湯匙鹹蛋白液兜勻

5)加入豆腐兜勻,上碟

可以用菜墊底建議用豆苗或莧菜墊底更適合,當蛋黃汁流入菜中更好味

2007年10月18日 星期四

友情之包


話說琴日同索龜GG食Lunch

佢送咗幾塊麵麭比我,係佢用麵麭機做既

我仲見佢整到好夜添

佢好無信心咁同我講、怕唔好食

琴晚大少爺唔返屋企食飯

懶洋洋既我就用唯一會儲備既罐頭、罐頭磨菇湯去配麵麭

但我覺得好軟熟,連麵包邊都好軟

更因為咁令我又想買部,我一向唔鍾意儲印花換嘢

我要的話就會買,所以一直無留意早前萬寧換購既麵包機呢

To:GG ,多謝你既麭麭,我同大少爺都甚為欣賞呢!







我覺得個罐頭磨菇湯襯唔起塊友情之麭啊




相片copy自 GG

就係呢部啊

           


2007年10月17日 星期三

美好時光 @ Pacific Grill & 眼中的 Soho


今日相約 索龜GG秋香 一齊食Lunch,相約晌我十分鍾意既Soho區

原本仲有Cindy但佢要覆診及皮膚敏感未能出席

席中當然少不了笑聲

索GG居然三番四次夠膽摸我個頭,佢不停咁摸呀!

索GG送咗親手做既麵包比我,今晚大少爺唔晌屋企食飯

麵包將會成為我既晚餐,我會另作介紹呢

我同秋香兄弟一向合拍,感到好有默契,好享受相聚時光~

To:索GG,無論麵包味道係點,我一樣覺得開心、我享受朋友為我而造既感覺,另...多謝你既古古力!今日好 攰欠你一個彈蛋糕啊

To:秋香, 始終如一既默契,你睇到隻囂張的烏龜仔幾咁抵打啦!你要記得洗碗碟機械人同鹹蛋啊

我同索GG各自訂位,我訂Al Dente、佢訂 Pacific Grill

最後我選擇到索G介紹既  Pacific Grill,因為環境較舒服






外脆內軟既麵包




好好味既....Caesar salad




好新鮮既 romaine


非常好味既 ...Rib eye steak

好香炭燒味




焦糖香蕉批

好好味既焦糖批底啊




*************************************************************************

今日食lunch前一如以往行咗陣IFC,之後特登早d上Soho影相

一向好鍾意中午Soho區,感覺好寧靜

平時同朋友一齊好少會專誠影相,今日卻可以如願

噢!其中一條電梯壞了




喜歡舊有建築,中環差館

爸爸曾經於此工作,好想影低

好想入去行一個圈去經歷爸爸行過既每一梯級、每一間房、每一個轉角

去感受他當時情景、景象







Soho~
















自細...我喜歡花花世界既感覺,沉醉五光十色

但人長大後......卻享受寧靜環境

我喜歡黃昏前既Soho,獨有一份寧靜感覺~


2007年10月16日 星期二

快潤


其實...我對於烹飪既知識好少

通常我學既都係由自已鍾意既食物開始

杏仁露係我鍾意既中式甜品

臨出街前浸定杏仁同米

返到屋企用攪伴機攪碎、隔渣煲就可以喇!

十分之快捷方便

原本諗過加蛋白、後來改用雪耳一樣好味....哼~







食譜

南杏100g

北杏 10g

米  40g

水 750ml

冰糖適量

雪耳或蛋白隨意

做法:

將南杏、北杏、米 浸3~4個鐘,加水用攪伴機攪碎

隔渣煲滾、落冰糖

done~

(如落雪耳就要浸發,一齊煲)

(如落蛋白就最後先加)

2007年10月15日 星期一

轟烈


今晚Kathy放工相約行街、食飯

下晝我終於可以抖抖喇

我決定趁有少少時間整午餐比自已

今次係奄烈,份奄烈裡面有....

火腿、洋蔥、磨菇、粟米,仲有日式意粉醬淋面

貪心既我餡料多到好轟烈咁走晒出嚟啊!









導致我整奄烈既原因係...........一份禮物

係Diana送比我既禮物

一個我去到日本掛住買其他嘢而忽略咗既奄烈器具啊

Diana...多謝你

使用方法 

 (我呢個既說明書有少許分別,我呢個要掃一層油,效果都好似煎)




2007年10月13日 星期六

@ 北京樓


@北京樓

冷盤:海哲




九不理、小籠包


 


三鮮溜豆腐

超級滑又香豆味,好似食豆腐花咁




松子魚

佢個魚頭無蒸既咁淒厲,我無咁驚




2007年10月11日 星期四

相認 @ Roma Roma


今日同菇奶奶、Diana相聚、還有十分忙於跳來跳去穿梭兩張枱既Cindy

第一次見Diana,我轉髮型後第一次見blog友

同菇奶奶見過面但仍然感覺好興奮,而且每次見佢必會Auntie到架!同邪風蛋糕一樣

先講食物,尚算OK但服務唔太好









柚子牛油果蟹肉沙律好味




呢個意粉唔錯、仲有一個pizza但無影到




Brownie & ice-cream




cheese cake




Diana:比我印象好似一面鏡,不過我無佢咁可愛

佢既背景、經歷確確實實晌我身上發生過

所以我確信Diana一定會幸福,因為佢好得人鍾意

菇奶奶:依然係我親愛的菇奶奶,相處得好舒服,佢處事比我冷靜(除咗計屋企雜費)

始終我係尊敬佢既,好奇怪既感覺,邊個蝦菇奶奶我一定唔放過佢,哼!

最後....

To: Diana

多謝你餐飯,好高興認識你,你再返嚟既時候一定一定要再約啊

To:菇奶奶

一句:那麼愛你為什麼?你係一支史上最強勁既通經針

P.s 今日我無癲到,因為M到不適!而且對住菇奶奶好自然變成正常人

笑納


呢個蛋糕係送比兩位朋友

因為時間關系、同我好多嘢要做,所以只能夠做兩個細

雖然唔係好特別既蛋糕但係每次整蛋糕送比人

我都用上好多心機去整!要明白整蛋糕唔係好難但一定要用心做先會做得好

從今起我只會做蛋糕送比懂得欣賞既人

希望收到既兩位朋能夠領悟出我既心意!






P.s我真係好討厭此刻心情既公仔頭

做乜逼我用如此無品味既公仔頭晌我網誌上?仲要標題隔離喎!