Happy Lunch@PizzaZaZa

今日好朋友Avis結婚，希望佢唔會因為情深深 雨濛濛影響好心情

好期待今晚見到佢

我下星期勁忙，希望維持到有好既食譜分享啦

早幾日同Avis仲有朋友Belle一齊午餐

呢個午餐過後，今晚Avis已經係人妻鳥

祝佢幸福快樂，期待今晚見面

個午餐又到Pizzazaza食，今次無食Pizza，食其他食物

水準仍非常之高

我好喜愛呢間餐廳，感覺舒服食物好食，上次海膽意大利飯，今次蟹粉pasta

前菜：芝士白露筍，見佢賣相已經可以cheer up自己



大蜆，多肥美啊

今次無飲海鮮湯，要磨菇湯

主角到了，渴望試好耐既蟹粉pasta

斤量十足，滿足晒蟹粉願望

仲提供薑茶呢

限量和牛臉頰

牛臉頰又軟又滑，牛魔王既我當然Like

戒凍飲既我忍唔住要凍古力

但係又怕成杯會浪費

結果我要求……半杯

哈

楊師父既芒果拿破侖，超好食啊

蟹粉pasta至到12月度，如果要食蟹粉pasta或海膽意大利飯最好訂位時先問一下會穩陣

同埋而家供應白松露，唔需要成個set去叫，例如一個pasta你可以要白松露或唔要都得，一切自己決定

要既話就即即刨比你

白松露特選菜式由$198慢煮滑蛋起，額外添加每克只係$148

祝各位週末愉快

暖風(附薑汁梳乎厘食譜)

呢兩日心情都麻麻地

昨日那個菜肉包，大少爺回家後見到話：咦…有吞拿魚包？

然後夜晚佢蒸來做消夜時，打算補飛：豬肉包豬肉包我食豬肉包

跟住我咆哮：菜肉包啊)))))))))))你講極都錯

跟住佢就不停晌我附近拎住個包講：菜肉包菜肉包

我啦你講，我一定要整多次，係都要佢白色先收手

我好原則、堅持~

夜晚心情麻麻之際，想整個甜品比自己，要令自己暖既

於是…薑汁梳乎厘又出現

呢個係一個好好既食譜，我用May姐既橙酒梳乎厘改編

梳乎厘係好似一陣風，一陣暖暖既風

但我永遠都影唔到佢最高一刻

當你出爐後，拎到要影相位置佢已經縮了一半咁滯



食譜：焗爐預熱200度

蛋黃   2隻

蛋白   4隻

麵粉   15g

糖        60g

奶       125ml

薑汁   45ml

粟粉     5g

牛油    少許(座溶佢搽隻杯既)

1.蛋黃加麵粉、糖、粟粉攪勻

2.奶煮熱，只需要熱唔使滾起，轉細火加入(1)，要快手攪勻，否則d蛋會一舊舊

3.慢慢邊煮邊攪3分鐘，成為吉士狀便可以停，加入薑汁攪勻

4.蛋白加另外30g糖打起，打至企身，然後同蛋糊fold in

5.倒入杯，放入焗爐焗8~10分鐘(視符火力而定)

哼......叉(日式叉燒食譜)

餘下半個月，我只得一日時間係屬於自己

諗落都有d驚，到底我應付得到嘛？

我只希望快d 12月，12月每年最開心月份，到底我最著生日月而開心

定聖誕氣氛而開心？兩樣都有

不過先要努力多半個月先

一直想整日式叉燒，即係日本拉麵上面既叉燒

拉麵塊叉燒好重要，唔能夠太瘦，要炆得稔，又要夠味

但從無諗過原來可以咁容易，因為我屋食囤積既醬料太多，剛好能夠整得到

d醬料亦係我之前都用得多，例如清酒、味醂、鰹魚汁同日式醬油

呢d晌超市唔難搵，甚至吉之島都搵得晒，同埋你整完d醬料用晌其他地方都用度

又或者參考我之前既blog食譜都有好多用得著

不過我覺得美中不足係…塊肉我買得太瘦，我買梅頭肉，但唔敢買太肥，所以永遠整完出來無論中式叉燒同日式叉燒都偏瘦

但係無辦法，每次去揀見到太多肥肉都揀唔落手，所以買肉都係一個思想掙扎

另一樣係我切得太厚，明明拉麵食既薄薄一片加嘛

今次一次過教整三樣野，日式叉燒、炆蘿蔔同埋半熟蛋，尾兩樣係額錢既，但你都要比足學費

哼

食譜：

梅頭肉 一條，我唔知有幾重，你可以自己揀一係，最好大係d，因為要札起佢既

日本醬油 一杯

鰹魚汁     一杯(如搵唔到就照用一杯日本醬油代替)

味醂    兩杯

清酒    一杯

糖   1湯匙

蔥   一小札

薑 兩片

將梅頭肉洗淨，然後抹乾備用

將醃料同薑蔥全放落煲仔煲一煲，煲到微滾便可以，煲好後放涼

將梅頭肉用白棉繩扎起，扎成一條，要札得夠緊，然後放入汁料中，因為條肉會浮起，所以面頭要用重物壓住，令佢全條浸於汁料中

醃半日

*跟住我放落Fissler高速煲，連汁隔水用2度速蒸煮30分鐘，減壓排氣

*如果用明火，就用炆既方法，用醃汁炆2個鐘，然後熄火唔好開蓋等佢焗至汁涼

放涼後切片



拆開綿繩切片

*咁多汁料好浪費？唔怕，用汁料炆蘿蔔，將汁料再煮滾，然後放蘿蔔片炆，完全唔需要再調味，炆一陣就得
*跟住想整埋隻蛋，呢隻蛋係半熟，比糖心蛋熟dd

將蛋放入水煮滾，當水大滾時煮2分半至3分鐘，唔能夠多唔能夠少，然後放入冰水冷郤，剝殼

放入冷卻既汁料內浸10分鐘，攪掂


我配烏冬，只需加少少鹽落水，煮好個烏冬，淋少少淋上去已經好好食

成碗同一樣味似盤菜一樣，哈哈

「IC電磁爐 ∙ 飯 ∙ 堂」試煮班

今日參加一個cooking class

對於我來講係正式第一次，因為我從來未去過學煮野

因為我唔專心，又無耐性，好難我會定定地去學

之前中電搵我參加呢個event，原來係一個「IC電磁爐 ∙ 飯 ∙ 堂」試煮班

體驗電磁爐煮食，電磁爐唔陌生，但其實無真正去了解過

例如火力問題？用電磁爐炸食得唔得？用電磁爐炒飯呢？

煎炒煮炸都得

今次個cooking class就睇到原來炸食物都無問題

電磁爐佢最大既好處，唔會攪到你個廚房好熱，夏天炆煮食物或煲湯，用媒氣廚房簡直係…爐旺達






今次係何寶龍師傅教



佢示範椒鹽鮮魷、咕嚕肉同蛋白瑤柱炒飯



師父教完會試煮

我今次有助手車人去幫我手

師父用厚切豬頸肉去整，原來效果唔錯，佢爽而較實淨

當然我本身都鍾意整咕嚕肉，但無可否認每個人煮法唔同，總會學到d竅門




似模似樣

Done~

跟住就炒飯

電磁爐既火力彈性較大，佢可以細緻d去調教火力

炒飯唔需要較到最大已經可以

而炸食物就較到最大，咁夠猛火一放食物落去已經可以炸封表面

炸都無問題，炒更加無問題

助手車人試範，唔錯唔錯





Yeah~成功了

師父炸椒鹽鮮魷，可惜行到埋去影相都無得影，太搶手

參加辦法，呢個cooking

https://www.facebook.com/events/491037540916293/

參加資格
於本港任何商號購買雙頭或以上IC電磁爐（不限品牌），可憑購買收據登記參加「IC電磁爐 ∙ 飯 ∙ 堂」試煮班一節，名額20位。

*2 人1 爐，包括實習材料 (每2 人一份實習材料)，廚具及圍裙由場地供應，歡迎自備保鮮盒帶走製成品。

詳情及細則
1. 每名參加者最多可攜帶一名親友參加活動。所有參加者及其親友必須年滿十八歲。
2. 參加費用全免，名額有限，先到先得，須受有關條款及細則限制。
3. 每張購買收據只可登記一節烹飪班。
4. 參加資格必須以中電職員致電參加者確認相關資料為準。
5. 中電恕不負責有關活動及其內容之責任。任何有關活動及其內容的申索，投訴或糾紛應由有關服務供應商戶負責。中電不會因客戶就第三者提供的活動申索而招至損失。
6. 中電保留隨時更改條款及細則之權利，亦可於任何時間取消、結束或終止推廣活動而無須另行通知。
7. 中電有權使用相關活動之資料（如相片，影像，錄音，及文字描述等）作其他商業及宣傳用途，而無須另行通知。
8. 中電保留任何有關推廣優惠之爭論最終決定權。

登記方法
1. 請將購買IC電磁爐的收據連同參加者姓名及其聯絡電話，
a. 電郵至aeh@clp.com.hk，或
b. 遞交至中電「綠適天地」或任何中電客戶服務中心，或
c. 致電2678-6414查詢，並以傳真進行登記。
2. 中電職員於核對基本資料後，將會致電參加者確認相關資料
3. 確認完成後，參加者可憑確認編號及購買收據正本，於指定日期時間，前往指定地點上課。

導師介紹
何寶龍師傅
何師傅擁有20年廚師經驗，2002年憑白玉蟹炒飯奪得香港美食之最大賞金獎，2006年憑柑桔脆魚卷奪得香港美食之最大賞銀獎，2007及2011年分別獲得台北世界廚藝邀請賽銅鼎獎及銀鼎獎，現任鴻星海鮮酒家灣仔店廚部主管。

鍾文波師傅
鍾文波師傅擁有20年廚師經驗，曾參與香港旅遊發展局明火廚神國際挑戰賽並榮獲五星明火廚神金獎(團隊)，2007年獲台北世界廚藝邀請賽銅鼎獎，現任鴻星海鮮酒家尖沙咀店廚部主管

白松露盛宴@Chef studio by Eddy

十一月白松露季節，感謝Chef Eddy邀請與眾食家一齊品嚐白松露

今次試白松露

據知個價今年貴了好多，而且佢係時價，我食既當晚個價係$57000 /1KG

而且白松露只做到11月尾

詳情可以到Chef Eddy個page查詢 


https://www.facebook.com/pages/Chef-Studio-by-Eddy/374565555892578

Chef Eddy出了新書，仲會同慈善機構合作，但詳情同書既樣要佢Post我先可以介紹呢

Chef studio雖然晌香港仔工業中心裡面，但吸引唔少名人，譚校長係常客

以私房菜形式去做，所以訂位未必有位，唔訂位更加無位

哼(我代佢哼)

先來白松露炒蛋

個蛋係座熱水去炒，所以滑既程度比直接法更滑

幾分鐘後…done



然後配上slow cook三文魚及刨上白松露

白松露比黑松露香及珍貴，所以價錢亦無可相比

雅枝竹Artichoke湯

平時雅枝竹多數係沙律，但係做湯好少有，不過好好飲

藍貝，藍貝一定要唔好太熟先會鮮同滑

呢個好得

白松露田雞意大利飯

其實平時我唔食田雞，一個形態、二來有d腥

但係我唔會浪費人心機點都試下，佢唔腥，個飯既汁係用田雞淆制再用白酒推個汁

好好食

清一清口腔既Sorbet

我既主菜：牛仔肉；同和牛臉頰

個燉牛臉頰非常濃味，個牛仔肉嫩，超Like

呢個我無食…佢係豬肉啊，據聞好食架，唔食牛可以有額外選擇

通常我飲得既酒、我話好飲既酒都會係偏甜

呢個有氣甜酒好好飲，我第一次要飲兩杯，實在係好飲

甜品：一頓完美晚餐

謝謝Chef Eddy，最後仲送我Pesto醬，開心

當晚還有收到何師奶手製麵包

Chef Edy本書既詳情我去探索一下才介紹呢

蕉力力力力力力(朱古力香蕉蛋糕卷)

終於唔逼大家睇我既一個人的午餐

今日終於唔可以終日窩在我暖暖的家，要出外走走

呢幾日完全與街外畫上休止符，晌家睇電視、攤左攤右、踩健身單身、聽歌

諗下生日大計、聖誕今年出外食飯所以要諗邊樹食

總之就晌屋企好開心

我開心，就整蛋糕，整蛋糕好講心情，要完全放鬆先整得好

終於試整香蕉古力蛋糕卷

之前一直想試原係香蕉做蛋糕卷，但總左顧右盼

成功了好開心，好有個蕉力力力力力力力力

你睇佢個蕉樣？做乜蕉你咁可愛！哈哈




個食譜我調較過，咁樣會清楚d，同埋呢個可可粉同麵粉份量剛好，呢個食譜最大好處，你用保鮮紙包住佢放雪櫃，第二日依然鬆軟


海棉蛋糕 ~~



A)

蛋白..... 4隻

砂糖..... 60g


蛋黃..... 3隻克

砂糖.... 30克

菜油.... 60克

牛奶.... 60克

麵粉 ..... 60克

可可粉 ....20克

泡打粉 ... 1/2 茶匙

梳打粉 ... 1/4茶匙



自製雲尼拿忌廉 ~~



淡忌廉 ...... 200克 ; 砂糖 ....... 20克 ; 雲尼拿油 .... 1/2茶匙 ; 冧酒 ..... 1/4茶匙



饀料 ~~



自選喜愛生果/果醬 (自由發揮!)



做法 :



先打起雲尼拿忌廉 ~~



1) 用電機以中速打起淡忌廉至多泡, 分2-3次慢慢加入砂糖打均, 最後加入雲尼拿油及冧酒, 繼續將忌廉打至企身, 備用!



海棉蛋糕 ~~



1) 將A 份材料既蛋白用電機打至起泡, 分2-3次慢慢加入A份砂糖, 繼續打至企身, 備用



2) 準備另一器皿, 用電機以中速將蛋黃稍作打勻, 分2-3次慢慢加入砂糖, 繼續打至淺黃色(確保打至淺黃色先好停!)



3) 將牛奶及菜油倒入2之蛋漿內打勻; 分2-3次用篩篩入麵粉、泡打粉及梳打粉, 然後用電機打勻即停



4) 先將1/3 打起的蛋白霜混入3, 用手輕輕拌勻; 然後將3全部倒入蛋白霜內, 繼續用手輕輕攪勻



5) 將4之混合物倒入一個已鋪牛油紙既平模到, 用膠刮抺平表面, 以180度焗15分鐘 (視乎焗爐火力而定)



*蛋糕要徹底放涼，然後倒上另一牛油紙上，預先唔好落任何餡料卷起一次，靜置10鐘(咁樣預習一次，當放餡料時就會較易卷起)



*然後攤開搽cream放生果再卷起，用保鮮紙包實放雪櫃2個鐘才切件



*唔好一次過放大多生果，因為一切時好易跌番出來

*如果用香蕉，你用檸檬汁搽下佢上下左右就唔會變黑

孜然(羊架配pesto蝴蝶粉)

又係午餐，無辦法，大少爺因為濕疹仔要戒口，晚餐了無新意蒸雞蒸豬肉蒸魚

攪到我近來食撈飯

煎蛋蔥花甜豉油撈飯、粟米肉粒挑走晒d肉粒去撈飯

只有午餐才屬於我自己

我晚餐無啖好食，唯有供個午餐讀大學等佢出人頭地

所以我今星期會有三日可以自煮午餐

過呢三日我至12月頭都唔得閒

咁你由得我啦！比我post午餐吧吧吧

我愛牛肉，但都唔可以日日食，內心總覺得唔好日日食牛肉

咁就轉為羊吧

順便試下個生炸鍋炸羊架，噢！側邊肥油位置變得好脆

今次用孜然粉去醃羊，無得輸

孜然同羊肉超配，跟本係一對，可以用佢整羊肉串，推出MK賣$8一串(有次我路經見到有好長羊肉串賣$8)

只需要用鹽、黑椒、孜然粉去醃，拎去煎、焗、炸、燒都可以

孜然粉晌蒙古、雲南有售！但我晌香港中式雜貨店買的

另外個蝴蝶粉更勁，佢勁在個Pesto係Chef Eddy自己整既，超好食，撈落pasta便done~

哼~大少爺濕疹仔有得睇無得食

不一樣的......塩麴(附鹽燒牛舌及塩麴用法)

每一個清晨世界都變得不一樣

昨日花開、今日花淍謝

每一日每一樣事都會令人生變得不一樣

例如……

昨日我食了兩隻大閘蟹.........今日膽固醇應該升了~
昨日事頭婆買錯了菜沙律........今日我無caesar salad食

大少爺生濕疹令我無得晌晚飯中煮牛肉.........令我成日煎蛋加蔥花加甜豉油撈飯(crazy)
有朋友常勸我戒凍飲，昨日有個傻婆朋友同我討論利賓納問題....................令我醒起利賓納可以熱飲，咁我可以戒凍可樂

從前我唔食牛舌.........因當年去日本食一串燒牛舌，從此我愛上了(但唔能夠有舌胎，所以我只食牛舌片)
買了塩麴…從此愛上用塩麴
我的午餐：鹽燒牛舌片配菜沙律及氣炸薯丙(餅)

個牛舌先用塩麴醃15分鐘，用LC個Grill pan去煎，唔用油燒熱個pan辣落去，好好食

塩麴既鹽同鹽唔同，多一個層次感，佢既鹹味唔會好似鹽咁鹹得直接，好難形容，但我超愛

用佢醃肉唔會令肉類水份流失，所以肉類唔會變乾，相信醃牛肉會唔錯，我個牛舌咁薄去grilled都唔"un"

只需要用鹽醃，加上蔥花，感覺不一樣了



塩麴.....日本人熱賣既鹽

佢係鹽加米發酵而成，一盒得160g

如果你醃300g既肉就要用上30g，因為佢唔係鹽咁鹹

晌City's super賣$32，晌放牛奶既凍櫃搵到，佢通常放晌芝士或日式味噌附近

要晌凍櫃搵唔係賣鹽既counter搵的

我要落去掃多幾盒！

讓半球(獅子頭食譜)

自從大少爺變成濕疹仔，我就永無寧日咁

以前可以自由自在，而家無得自由更唔自在

因為無論我去邊，都會掛住煮飯

我以前去試菜、去晚飯又街，大少爺就如天空的飛鳥，任意亂食也可以

而家無論我晌屋企、晌街、晌邊度都只能夠…煮定野比佢食

早幾晚去試菜，煮定既係獅子頭

一大舊豬肉，加大量既菜

用少少火華火腿去淆個湯底，咁個菜式襯番濕疹仔，濕濕地，又夠味可以令佢食大量既菜

呢個獅子頭，得半個，因為有人走去焗佢，咁個底盤係平的，所以得半球囉

係！有錯、做得唔好我會認！因為…煮野就係咁，懶多少少就世界都變得不一樣了

哼

我今次又用Fissler個鍋煮湯底，先用火華火腿數片、冬菇、紅蘿蔔去煲，煲到到出味先放菜，咁個菜就會保持綠色



個肉先買豬肉攪爛或剁爛，然後加少美生抽、鹽、胡椒粉、糖、酒、生粉、最後加dd麻油，撈勻，再加半隻蛋白，順一方向攪

攪到起膠就可以做成個圓波波，通常拎去炸，但我會焗，焗到表面金黃就放落鍋湯度煮

你亦可以唔去炸/焗，放埋落湯煮熟，就會清d呢

roBert 絲(焦糖拔絲番薯)

今日好忙，幫教會整特刊

做完又眼睏，最後堅持唔去nap，走去玩番薯

一直想整拔絲番薯，但又懶

因為話易唔係易，難又唔係

今日玩一番

其實呢個我晌大阪食過

話說前一次去大阪，我好肚餓，行過見到間壽司店放題，好多人排隊

咁一定無屎，一於二仔底跟

點知出事，裡面d壽司不知所謂，最奇特有章魚波波壽司，同納豆壽司，仲有變鴨屎綠既海膽

我同大少爺無語問蒼天之際見到……拔絲番薯

結果不停食，唯一好食的

今次自己一償心願去試整，um........................一次便夠了

番薯  1~2個切條

糖 100g

水 30g

先將番薯(唔使出水)炸一炸佢，又或者搽d油放焗爐焗一焗，200度 10分鐘

1) 糖加水用小火煮至起泡
2) 加入番薯後熄火拌勻, 此時糖會結晶令番薯表面變白
3) 再開中火繼續輕手兜, 直到有顏色也會開始變金黃
4) 熄火，將佢放入冰水中令佢冷卻糖面變脆便可以