【棉花糖從成長中曾送你愉快天堂 經過同樣跌盪 可會學會釋放？】
呢句歌詞長期晌我心中
尤其今年有好多令我失望既事發生，更覺得係真理
一粒棉花糖晌細個時會係寶物，覺得佢既甜好可貴，幸好我有個同樣愛糖果既爸爸，我經常都可以嚐得到
到長大後，一粒棉花糖，你會厭棄佢，你會覺得佢太甜
成長後，一粒棉花糖你會BBQ時先諗起佢，因為你覺得棉花糖配上焦焦既外皮先係絕配
到有一日，你好唔開心，你好想搵一種甜到想死既糖果去慰籍你心內既傷口，會諗起棉花糖
棉花糖從你成長內都出現好多變化
呢種變化未必係味覺上，而係心靈上
我愛棉花糖，佢有種似有還無既感覺
輕飄飄，患得患失，但佢既甜度令你感到實實在在
我好羨慕棉花糖，佢輕飄飄得毫無負擔
從我學煮野既成長過程，棉花糖都佔一位
從前跟食譜整，以為整得好好，只係有d太軟、太濕、太唔成型，當時就諗係咪食譜有問題
近來經過5年學整野既經驗……發覺當日問題出於我
同一食譜原來係可以好實在，乾身，仲有彈性
問題在於打蛋白既過程，原來當你有耐性打得耐d，打打下就已經成型
跟本係一個好好既食譜
今日唔再係白紙既我，終於做得出無令自己失望既棉花糖
呢個係士多啤梨味，見到佢我感覺好開心
當你打得夠透徹，打既途中都已經成型
蛋白 3隻
啫喱粉 1盒
魚膠片 25g
糖 1茶匙
熱水 100ml
冷開水 100ml
做法：
將魚膠片用冰水浸軟，啫喱粉加100ml熱水攪勻，趁熱加埋軟化魚膠片，再加100ml冷開水
蛋白加1茶匙糖打至企身，慢慢邊打邊加入(1)
座冰水打10分鐘或打至蛋白重身凝結
倒落盤雪凍再灑上椰絲
*啫喱粉要咩味可以自己揀
*打蛋白後加啫喱水係會變成液體狀，只要再打，佢慢慢會杰，甚至變成重身，要有耐性
Fans page仲有新blog. Click here--->
回覆刪除F