DIY

日期：26.06.2007
夏日炎炎熱到影響思維，成日都唔知煮乜好
從來只鍾意飲煲既湯、唔鍾意滾既湯，冬瓜粒湯更加 not my cup of tea
夏天好似一定要食冬瓜咁，夏天食冬瓜=生日要食生日蛋糕一樣
But...對冬瓜我又無乜idea
結果....將罐頭粟米湯加冬瓜粒再加隻蛋白出嚟效果好好，而且無肉
唔需要加肉都好飲喎...哼！

清炒西芹魚片，西芹係主角，魚片只係點綴
最後發現魚片係多餘，我倆個只想食西芹

呢個diy排骨，唔肯入街市既我趁鐘點姐姐嚟做家務時托佢去街市買嘢
諗唔到有咩買，就叫佢買排骨，鍾點姐姐話呢種叫腩排
唔鍾意食豬肉既我跟本諗唔到點整
結果…就用茄汁、0急汁、老抽、蜜糖、少少水做咗個好好味既汁

(無一定份量，我係自已調配要試味)
大少爺話要再食呀

另外…發現一個好好味既炒排骨方法
(1) 將排骨醃好放雪櫃備用，到臨放入鑊煮既時候加粟粉撈勻

(可令表面金黃裡面滑唔會乾爭爭)
(2) 燒熱易潔鑊加適量既油，爆香已切片既乾蔥片及蒜頭片直至金黃色撈起備用，而爆香料頭既油繼續使用
(先撈起料頭避免會燶，但油就有香味)
(3)將已撈粟粉既肉排平放鑊中用煎既方法令一邊金黃後再反另一邊，兩邊OK後將事先爆香料頭回鑊同肉排同炒
(呢個方法令肉排唔駛炸但都會好香)
(4)將汁料倒埋與肉排一齊兜勻上碟，done~
實驗証明：
最重要係有一隻易潔鑊，我有一隻$600買既五層鑊，結果只用作蒸嘢，十分黏底
反而特價$300既易潔鑊用好少油就做到好好效果