煮後失調

今日為著要去 shu uemura買卸裝油就走出街
跟住去一間把鬼既老字號越南餐廳，食咗一餐無論服務同食物都把鬼既越南午餐
跟住就發奮圖強買餸
買咗接近5磅既荔枝，係我隨手拎起兩札就5磅，分開幾日食啦
其實我唔食得太多荔枝會敏感，但大少爺好鍾意食，噢！
好彩返到屋企表弟打電話比我，笑笑傾傾大半個鐘
買餸既時候諗有乜餸係適合炎熱天氣呢？
結果......就煮以下菜式
三色甜椒照燒牛肉卷
只係買火鍋西冷牛肉片卷三色甜椒，先煎後焗
再加上照燒汁
先煎既原因：想表面金黃
後焗既原因：係因為想卷晌裡既牛肉及甜椒熟，又唔會乾爭爭

↓煎熟表面就去焗，表面都需要蓋上錫紙
就唔怕裡面唔熟，出面乾晒

冬瓜粒湯
照舊冬瓜加罐粟米湯，加鮮冬菇煮齋既雜菇同肉粒，但我反而鍾意無肉版本

羅漢齋
其實齋唔晒，因為蠔油獻汁
琴晚煲湯特登留起一塊紅蘿蔔作為呢個菜既點綴



今次既齋煮法：
材料：
任何素菜類
獻汁：(我有加蠔油)
蠔油、鹽、糖、粟粉攪勻備用
做法
將菇類及新鮮粟米仔加少少鹽先出水、支竹買炸支竹或將支竹放焗爐焗脆
豆腐卜沖洗表面既油、木耳浸軟、菜洗乾淨
所有材料爆香、加菜兜勻，加獻汁，煮到收汁加少少麻油就上碟

仲有個甜品聽日先post~~

心情唔多好~無乜心機食
我廚房一向唔多熱，但當焗爐開緊、一邊爐隻鑊煮緊、另一爐就滾湯、仲有飯煲蒸氣
就足夠令我好炆，煩！好想發脾氣！
2145hrs:
終於搵到【煮後失調】原因：發燒