越菜週 2.0

今日繼續越菜週，最開心莫過於整越南春卷

我自細都鍾意食越南菜特別係春卷，佢個春卷皮真係有無窮魅力

可惜係現今香港越菜水準下降，正確係食店水準下降

到底以前美食天堂之稱嘅香港去咗邊？真心嬲的

所以我要食好食春卷都唯有靠自己，越南炸春卷個皮都幾難控製可能我唔係專業包春卷

用啤酒去軟化春卷皮先去炸令到個皮起泡泡會更加鬆脆好味

另一款同餡不同皮係越南蒸粉包，又係非常好味

可惜個外皮我係用越南買既粉去做

香港唔知有無得賣如果無可以考慮用綠豆水晶粉皮去做

先來越南炸春卷

食譜：

越南春卷皮    6-8片

啤酒    半罐

木耳絲   20g

甘荀   半條

沙葛   半個

檬粉或已浸軟粉絲    少許

豬肉碎  3湯匙

調味：

魚露    適量

糖     少許

做法：

甘荀刨絲、沙葛切粒、木耳絲浸軟

加入豬肉同檬粉碎，如果用粉絲先浸軟後剪碎便可以

加入魚露及少少糖撈勻醃15分鐘

將所有餡料炒熟，加多少少魚露便可以備用

先炒熟餡料就方便炸春卷時唔需要炸太耐，又唔需要怕餡唔熟

預備啤酒餡料及春卷皮後就預備包

春卷皮掃上啤酒令塊皮軟身

將餡料放上春卷皮之上，再包起

包好後備用

越美麗的東西我越不敢碰....................

炸春卷真係好開心，你見到佢表面起泡泡嗎？起泡泡特別鬆脆

家陣d越南餐廳有本事個皮都係又油又un的

全程用大火就唔會吸油，一金黃色就可以上碟

配生菜及檬汁食

呢個粉包大少爺最喜歡，但個粉皮(唔淮亂諗)個粉係我晌越南買

用水開成粉漿再蒸再去包的

我唔知香港有無呢隻粉賣，但可以去Aeon買綠豆水晶粉皮攤開去包

又或者買腸粉蒸幾分鐘再攤開去包

如有朋友去越南的話就可以托人帶包粉比你，到時黃石碼頭等不見不散，哈

就係呢隻，我前年去郵輪去越南時，晌當地超市買到

之後我朋友去越南我托佢買再買

佢做出來個質感係好軟滑帶點彈性，真係肌膚一樣

開個粉漿就蒸幾分鐘

蒸好就包得喇！好希望大家能夠搵到包粉

因為自己整粉包又係好好食的 

先睹為快及生活雜粹粹
Pls Follow My IG
  https://www.instagram.com/taisiu9_aubrey


/ 大少奶's Delicatessen

宣傳你的專頁

越菜週

今星期都會post 越南菜，點解呢？純粹係我鍾意食就拉埋大家落水去睇

先來係牛油雞翼同香茅豬肉檬

呢兩樣都係我喜歡越菜之一，尤其夏天真係熱到無胃口時就走去食檬

自己整其實好容易整個汁就得，我鍾意醃香茅豬肉去伴食

至於牛油雞翼就無街外咁凶狠因為街外係炸自己係煎

所以雞翼個表面係唔會咁鬆發但都有微脆，而且我煎都保留原有外貌係黃色靚靚仔仔咁囉

個味道係一樣街外味，又有牛油香又有蒜香因為我發現了奧祕，哼

先來牛油雞翼，自家做真係好難下下去炸所以呢個係煎版本

只要控製得好佢可以微脆又唔會煎到太深色

食譜：

雞翼   8-12隻

魚露           適量

牛油      15g

蒜頭     2粒切碎

乾蔥    1粒

鹽   1/8茶匙

另備生粉

雞翼醃法非常簡單，只需要用：魚露

不需要落太多調味令到雞翼味道複雜化就失去原有特色

雞翼我只買無激素雞翼，通常都比較細隻，大家用普通雞翼會大隻d靚d開心d

魚露撈勻每一隻雞翼便可以，醃大約1小時

每一隻雞都充份上到生粉

煎至金黃色盛起備用

油溫好重要，燒熱油放雞翼隨即轉中火

兩邊煎熟後就轉大火等油份逼出至乾身，手要快將雞翼夾起

夾起所有雞翼先可以熄火

蒜頭切碎、乾蔥切薄身就可以

平底鑊燒熱熄火，放牛油蒜頭同乾蔥，記得要熄火牛油好容易焦黑

加1/8茶匙鹽兜勻就雞翼回鑊

將雞翼沾滿牛油便可以

牛油一定要夠，如果你怕牛油就唔好整，整就要整到足

另一款凍檬

整佢好容易最重要個汁

我無詳細影但睇完都會識

材料：

檬粉        1包

甘荀        一條  刨或切絲

青瓜          一條  刨或切絲

唐生菜          一棵

花生     適量

炸乾蔥碎    適量

(泰國鋪有售)

豬肉     $20

香茅    1條(切碎)

乾蔥         1粒(切片)

魚露     2茶匙

老抽      少許

鹽    半茶匙

糖    1茶匙

生粉      1茶匙

做法：

將香茅拍扁切碎或粒

豬肉先加糖撈勻再加香茅及乾蔥

加入魚露及老抽撈勻，最後加生粉去醃佢大約1小時

之後將佢炒熟就可以加上檬粉拌食

檬粉用乾身較好，因為買已經出水既返來再煮再過冷河實在會太軟身

泰國材料舖有售

買回來先浸15分鐘水，再煲滾水放檬粉去煮軟過冷河

最後用飲用水浸一浸就可以瀝乾水份去食

放上香茅豬肉、甘荀絲、青瓜生菜絲、花生碎及炸乾蔥碎

淋上檬汁

檬粉汁又名碌冧

魚露   3湯匙

糖 3湯匙

青檸 1個榨汁

水 3湯匙

醋 2湯匙

蒜蓉   2茶匙

辣椒3小隻切碎

以上撈勻放入雪櫃一晚！

*呢個份量整到得約一飯碗既汁，糖份係比較多，注意~自己認為OK先去整

青檸用生粉去摔可以洗走農藥及臘質，任何生果都適用

個汁最好放一晚先入味

先睹為快及生活雜粹粹
 Pls Follow My IG
https://www.instagram.com/taisiu9_aubrey


/ 大少奶's Delicatessen

宣傳你的專頁

IQ題

近年煮親都係為家人同為出食譜，為自己一個人的午餐買少見少

實在無法子，要煮午餐比包包、要煮晚餐得閒又要做下食譜

將自己放埋一邊係理所當然

一日行超市見到包松葉蟹腳就觸發自己神經

IQ題：假如大少爺唔食得蟹、包包唔喜歡食蟹，咁大少奶買包蟹做什麼呢？

答案：大少奶一定係發花癲啦啦啦

錯：大少奶只係煮午餐比自己食

老實講手痕買包蟹腳但點整午餐都係一個謎，無奶油就咁食當贏

突然諗到不如整個日式滑蛋加蟹肉啦！

咁再不如日式清酒滑蛋煮松葉蟹糙米飯

如果大家整最好用新鮮肉蟹，我諗落都覺得自己太年輕？！？！太沖動

用新鮮肉蟹會平d又鮮味d

但呢個飯真係好好食，個飯底用蟹殼淆出來湯汁去煮個蛋又滑加鮮味同香

星期六日整都不錯，哼

食譜：

松葉蟹腳    1pack

雞蛋    2隻

雞湯   250ml

鹽   少許

清酒   1/2湯匙

片粟粉    1/2湯匙

(可用生粉、粟粉)

糙米或白米    隨意

(食幾多煮幾多)

先將松葉蟹腳拆肉

一包蟹腳得一碗仔

用雞湯+半碗水烚蟹殼，可以煮滾後熄火等佢浸至暖

隔走蟹殼留起湯汁

用蟹湯汁去煮飯，平日份量便可以 

用蟹湯煮完d飯又香又鮮味

剩下湯加入蟹肉煮5分鐘

留起少許放飯面，令到碗飯係威係勢咁款

加清酒，再用片粟粉/生粉或粟粉加水，倒入湯中煮至微微杰身

將雞蛋打勻倒入蟹湯中，再蓋上蓋用慢火煮2分鐘

熄火再焗2分鐘便完成可以淋上飯面喇

先睹為快及生活雜粹粹
 Pls Follow My IG
 https://www.instagram.com/taisiu9_aubrey/ 

  大少奶's Delicatessen

宣傳你的專頁

改頭換面

為了包包健康著想，返香港後個幾星期都幾乎每餐都自己煮

煮到我都感到好累...........

旅行食街外食物7日每餐都好豐足，唔想佢因為咁而唔喜歡食屋企飯所以要更加努力

佢好乖返到屋企食返屋企菜式都食得好開心

有一日屋企無乜材料見雪櫃有三文魚就試下另一方法去整

三文魚晌我懶時係最幫到手，可以加少少鹽煎香又一餐

但包包唔厭我都怕，所以做一個新方法

正所謂：晌你仲愛我時 要你更加愛我...............哼

味噌沙律煎焗三文魚

又來到春眠不覺曉的日子，沙律醬用來燒

加上味噌做成特別味道醬汁，包包話好好食呢(果然係我個仔都愛沙律醬)

實有人問味噌買邊隻？去Sogo地庫、Aeon可以慢慢揀有白味噌又有赤味噌又有係鹽等等等等

要煮食係先要同材料溝通摸索的

食譜：

三文魚    3件

醬汁：

沙律醬          3湯匙

味噌     1茶匙

味醂     2茶匙

做法：焗爐預熱200度

將沙律醬加味噌子味醂撈勻

灑少少少少鹽落三文魚，再煎至半熟

焗盤放上牛油紙或不黏布，再放上三文魚

將醬汁淋上魚面，放入焗爐200度焗8-10分鐘，你見到個表面焗到靚仔其實都代表得

先睹為快及生活雜粹粹
 Pls Follow My IG
https://www.instagram.com/taisiu9_aubrey/



  大少奶's Delicatessen

宣傳你的專頁