動人時光

有無試過…面對面望住一個人但仍會有掛念感覺？

眨下眼暑假尾聲了，初初包包放暑假時我就諗：失自由了、我無得週圍走無得輕鬆食個afternoon tea

但慢慢我發覺原來佢晌我身邊我係最有存在感(佢由朝到晚都媽咪)

而且又發覺我同包包有點朋友關係，我會同佢商量去邊、食乜午餐

我會整蠱佢，佢又會諗計仔整蠱返我，我同一齊發明d只得我兩個先識玩嘅玩意

佢跟我入連卡佛、我跟佢入反斗城仲變成一個模式

佢同陪我遊歷去看風景、我陪佢去睇超人特工隊同鬼靈精怪大酒店

每日同佢一齊起身食早餐、一齊午睡、一齊改daddy花名

我同大少爺帶住忐忑忑忐心情帶佢坐15小時飛機去見我最愛嘅阿姨，包包用最大能耐去坐足呢15小時

佢一日一日長大，我將自己媽咪身份放下學習同佢做朋友

呢幾日望住佢會諗：我個好朋友要返學喇

今日特別post一個早餐：棉花奄列，將雞蛋打起令個奄列變得輕柔個質感反而有d似疏乎厘pancake

食個輕柔早餐去提醒自己懷著溫柔的心去面對挑戰，尤其呢個年代為人父母甚艱難

都讓小朋友有個新意早餐

也希望大家每日都有一個：Good morning

食譜：

雞蛋    2隻

鹽    少許

餡料：

火腿、洋蔥、粟米、芝士，大家可以隨意配搭

做法：

餡料材料切好粒粒備用

雞蛋放入盤用電動打蛋器打起

要打到淡黃色，大約打幾分鐘

平底鑊抹少許油再倒入蛋液，用中慢火煎

當開始定型後就加入餡料

蓋上蓋用慢火煎3分鐘便完成，將奄列對摺後可以上碟

大少奶's Delicatessen

宣傳你的專頁

15分鐘

就快開學個個家長都忙

忙帶小朋友出去玩、忙住睇下做晒功課未、忙住諗下點比小朋友適應

我唯一忙就係陪玩、諗下去邊同煮飯

有時我帶完包出街都會煮晚餐因為唔想包餐餐出街食

去街前我會諗定當晚食乜預備好晒然後回家就會煮

呢個醬燒南乳金沙骨係其中一樣，話說金沙骨唔係咁容易就淋身

所以閒時叫人買定一斤金沙骨，跟住出定水放冰格到煮時只需要15-20分鐘就煮好

又夠味肉質又剛剛好

雖然相片影得麻麻得佢真係好味又易做的

金沙骨買回來沖洗後就用凍水開始出水

將金沙骨放入凍水加蔥、薑開火煮滾再轉中小火煮1小時，最重要加一粒仔冰糖

1小時後就可以撈起瀝乾水放冰格，想煮時就拎出來解凍

*可以保存2星期

解凍後就可以煎一煎

醬汁：

南乳     半件

生抽     1茶匙

老抽  1/4茶匙

糖      2茶匙

將所有醬汁撈勻

另備冰糖   1小粒 

*用冰糖係可以軟化肉質，所以金沙骨炆完唔會變硬

再醬料倒入鑊快手兜勻金沙骨

再落  150ml水及冰糖，用中火邊煮邊兜勻直至收汁便完成

大少奶's Delicatessen

宣傳你的專頁

must try

由於大少爺今年濕疹不停發呀發，所以飲食上都要好小心

最要小心係盡量唔好比佢食牛肉，同海鮮類連魚都唔太敢食太多

呢個時候就係雞、豬肉、雞、豬肉無限輪迴

雞都要食無激素雞，網上訂送來就十分方便

不停蒸雞蒸雞就係蒸雞你唔悶我都厭，到最後我決定發奮圖強終於沖出蒸雞整"左宗棠雞"

呢個做法好好好好食，食到我一家都好開心又唔算難整

不過…大家可以用雞扒或者雞脾肉做，因為佢要先泡油後再炒

無啦啦泡油係好難過到心理關口，我就無泡油但就落多少少油用煎方法但雞骨位就比較難煎

用雞肉或雞扒做呢就方便整，咁當然你唔介意泡油就可以用鮮雞啦啦啦

個醬汁係靈魂所左，好好食呢

*左宗棠雞係一個台灣菜，亦可以講係一個官府菜式

食譜：

雞    半隻或一隻(可以用雞扒或雞脾肉代替)

醃料：

生抽    少許

雞蛋    半隻

片粟粉或生粉   2湯匙

蔥、青椒或紅椒  

醬汁：

茄汁     1湯匙

生抽     1湯匙

糖       1湯匙

酒       1湯匙

醋       1湯匙

蒜頭     3粒

辣椒      隨意(因為包包唔食得辣我無落)

片粟粉或生粉  1茶匙

做法：

將雞加入生抽撈勻，份量只需要夠撈勻便可以，再加入半隻雞蛋醃30分鐘備用

將蔥切段及紅椒切件

將醬汁材料撈勻備用

雞肉加入片粟粉撈勻再放入鑊煎或炸至金黃色撈起索乾油份

爆香蔥及紅椒後雞件回鑊，再倒入醬汁快手兜勻便可以上碟

大少奶's Delicatessen

宣傳你的專頁

講故

蔥油豬扒撈丁....自家製有段故

我本人好憎食公仔麵，禁止埋大少爺食

上星期日返完崇拜帶包包睇戲，由於無乜時間晌戲院隔離茶餐廳食飯

我見大少爺望住餐牌慾言又止心亂如麻咁，望一望佢眼睛望住撈丁

由於時間關係我話：你想食就叫吧！趕時間

到碟麵來到時，包包又想爭食

大少爺同包包講：你呀！知唔知我都唔知做幾多好事，你媽咪先比我叫咋

那一刻我真係忍唔住笑出聲，包包見到我又大笑又跟住笑

既然係咁…我自己整一次，仲要個豉油汁有祕方

出來效果色水夠唔太鹹又無咁油咁囉

哼~

今晚除了撈丁仲有一大碟菜同涼拌雲耳中和內疚感

大少爺又會沾沾自喜以為自己拯救了銀河所以得到公仔麵，銀河唯一的祕密 將惡人重罰~~~~~~~~~~~

食譜：

豬扒    2件

醃料：

糖    1茶匙

生抽   少許

蛋白   少許

片粟粉   1茶匙

*蔥油部份

蔥   好多條

薑   2片

油   適量

*汁料 

老抽    3湯匙

生抽   少許

糖      2茶匙

熱水   100ML

麻油     少許

另備

公仔麵   2包(出前一丁優先)

做法：

1.將豬扒順序加入醃料撈勻備用

2將蔥洗淨抹乾，切走蔥白位置(留用)，蔥綠色位置切粒粒再加少許鹽

油加入鑊燒熱，淋落蔥粒上做成蔥油備用

鑊唔好洗，將切出來蔥頭及蔥爆香

將汁料材料撈勻，再倒入鑊煮滾後便完成

一滾就熄火

豬扒煎香及熟後上碟

煮公仔麵(呢樣我唔太識教你，但唔好太淋)

當煮好公仔麵後就撈起瀝乾水份加入豉油汁撈勻上碟，跟住就淋上蔥油完成

大少奶's Delicatessen

宣傳你的專頁

TGIF

星期五放個甜品食譜，人同個Blog都開心d

唔知仲有無人記得從前酒樓係有推車仔，好多時甜品車都會有蜜瓜西米露

而同車通常又會有埋啫喱糖，我唔特別喜歡啫喱糖但總想擁有那那傘仔

蜜瓜唔係我最鍾意嘅生果只係近年迷上日本蜜瓜

既食有食淨半個倒不如整個甜品啦啦啦

抓住夏天的尾巴整個甜品吧

食譜：

西米    50G

水   750ML

冰糖    適量

鮮奶   200ML

蜜瓜   半個或1個

做法：

先煮西米，西米唔係煮到透明係焗到透明的

煲滾一大煲水，倒入西米煮幾分鐘再蓋上煲蓋焗20分鐘

如果做一次都未完全透明可以重複再煮滾熄火再焗

通常兩次就會透明

煮好後就沖水喉水，沖到完全冷卻佢就會粒粒分明

總會有少少仲有白點，不要怕，它不會孤單因為通常有幾粒係咁

浸完糖水後白點會消失

用750ML水煮溶冰糖，加冰糖要偏甜少少

所以你要自己調較份量，你試到合自己口味

冰糖溶後熄火然後放涼再收西米倒入煲中，放入雪櫃備用

蜜瓜刮出果肉打成汁，可以留起少許肉加入西米露中

西米糖水加入杯中，再放少許鮮奶，最後加入蜜瓜汁便完成

你喜歡多蜜瓜汁又得、多奶又得、只用蜜瓜汁加鮮奶再放少許西米都得

(後面枝 tabasco唔關事的，佢只係路過)

大少奶's Delicatessen

宣傳你的專頁

反轉再反轉

近日有點兒手痕好想焗下蛋糕，今時今日我要焗蛋糕的話一定係焗我想食的

一來唔再太愛甜、二來人生都係時候唔可以食太多甜

所以一做就做自己想吃的

今次整焦糖菠蘿蛋糕，其實我想用蘋果無奈地屋企原來無蘋果

而菠蘿就因為早幾日包包朋友仔上我家學整pizza用剩的

否則我覺得應該用新鮮菠蘿會更加好味

唔好以為加焦糖後個蛋糕會好甜，當糖變成焦糖後甜度會低了

底下牛油蛋糕係用我一貫做法，用蛋白去做牛油蛋糕好處係佢唔會死實實

帶一點鬆軟的牛油蛋糕咁囉

滿足到我手痕、滿足到我突發性想食甜品、滿足到我個blog有唔同食譜

而家我就要去滿足包包個胃煮午餐，然後滿足佢放假玩樂帶佢去街……

食譜：

菠蘿     4片(完整圓咕碌果種)
白砂糖   60g
水           10ml
牛油       10g
做法：

將白砂糖加入小煲中，然後呢就用中火煮到微金黃色

再然後佢開始轉金黃色時就要小心好易焦

再再然後呢煮到深少少色加牛油

跟住放入菠蘿煮一陣，菠蘿會出水

所以要煮多一陣佢杰返少少為止

跟住就可以倒埋入蛋糕模中，你用牛油蛋糕模又得用圓模又得

放佢一陣就做第二個step

材料：
牛油           50g
砂糖 A         33g
蛋黃           2個
低筋麵粉       75g
泡打粉         1/2茶匙
鹽              少許


蛋白           2個
糖  B          30g



做法： 焗爐預熱175度

牛油放室溫加入糖A打勻

分兩次加入蛋黃再打勻

分三次篩入低粉、泡打粉及鹽，輕手拌勻備用

蛋白加糖B打至企身

將蛋白加入麵糊中，再輕手拌勻

放入焗爐焗 20-30分鐘(視符火力而定)，出爐後放涼反轉個蛋糕甩模

大少奶's Delicatessen

宣傳你的專頁

green蚊地

今日好忙下午邀請包包朋友仔回家玩，不止小朋友放到電連我都累埋一份

所以都係長話短說

星期一想green一點點，就是一點點

一直想整呢個日式滑蛋豆腐，用豆腐代替肉類

雖然天氣未涼，人反而不知不覺想食多d熱辣辣食物

呢個豆腐可以原鍋上而且好好送飯

味道一貫日本菜味道甜甜鹹鹹咁啦

食譜：

硬豆腐   1件

雞蛋     2隻

菇菇     隨意

洋蔥     1/4個

汁料：

醬油 或生抽    2湯匙

味醂     1湯匙

糖       1/2茶匙

鹽        少許

水       250ml


做法：

先炒香洋蔥及菇菇

將汁料撈勻再倒入鍋中至滾起

滾起後放入豆腐再煮6分鐘

雞蛋只需要略為打發

雞蛋再淋上豆腐面蓋上蓋，用小火焗煮1分鐘便完成，可以加少許7味粉及蔥粒

大少奶's Delicatessen

宣傳你的專頁