哇哈蝦

今星期我得幾日時間可以整野食

屋企一來有希望工程，要攪掂個廚房先再整得

二來要去以馬忤斯之旅

所以今星期整既會較簡單

我好鍾意豆漿、豆腐花、腐竹、枝竹、豆卜呢類食物

其中腐皮卷我超愛

愛既程度有海咁深

以前舅母晌香港，我總會request舅母整比我食

每個星期日完崇拜後，我會教主日學，然後總會同一班弟兄姊妹去飲茶

那間酒樓唔係特別好食，服務唔係特別好，但我同大少爺總會抽時間去一齊飲茶

呢個係一個聚會咁，透過飲茶時間會令教友間更熟落，增進感情既機會，教會唔係7-11路經邊間就邊間

係要建立一份感情，自己係一份子，等於週圍都係學校，你唔會鍾意轉就轉呱

每次飲茶剔點心紙我總會叫：鮮蝦腐皮卷

那間酒樓既點心唔係特別出色，但我總算搵到一樣我喜愛既

琴日忽然想自己整，自己整可以更多哇哈蝦嘛

睇！哼~

鮮蝦腐皮卷

蝦仁   半斤至一斤，視符你所需

韭黃    半札至一札 隨自己喜好

腐皮     2塊(一塊做到4~6條)


做法：

蝦仁先處理好，如果大隻就一開二、韭黃切碎，將兩者撈勻加1湯匙蛋白

腐皮用濕布抹軟身，然後剪開所需既闊度，通常剪成四方型會易包既

將蝦仁放上已剪裁好既腐皮上，卷起，塗上蛋白封口

熱鑊加上適量既油，放上腐皮卷慢火煎香，最後開大火逼出油份上碟

腐皮唔可以全程大火煎，否則會變黑內餡唔熟

街外通常炸，自己做否以減少油份，煎脆佢



*然後蝦仁處理方法，講過好多次，每次post都要講

就係…先用粟粉/生粉、鹽摔d蝦

摔到有d滑潺潺出現，然後沖洗，再完完完完全全全全索乾水

再加少許鹽、胡椒粉、粟粉/生粉去醃，最後加上麻油

雪落雪櫃半個鐘就會爽架喇

Fissler個pan煎，只需要輕輕一層油，就可以

但無論用乜鑊，都要用細火煎，否則好易深色同埋裡面唔熟

用好少油都可以脆

但你睇，我手痕，較大小小個火腐皮就好快轉色啊