唔講得

星期日拍攝食譜，幸好同表弟先生有默契，可以好快就完成

但仲有兩個星期要拍，有時諗落有d驚

今次合作既無論出版社人與事都唔同，唔知效果會點喎

努力做好自己本份，起碼叫盡過力吧！

就快踏入週身唔得閒既12月

充滿開心去迎接，但書又未做完，加有d野又令我唔多高興，仍未感盡慶去安排12月節目呢

以下呢件唔講得，不過唔知各位認唔認得呢？

係甜品、之前做過、有d blog友跟住做都好成功、某某酒樓既甜品點心呢

今次更加準確去量度材料

但一切仍未講得，哈~

原來用殖膠模做，會靚咁多啊

煨番薯 and Oisix event

Hi~今日唔算太忙，但為著將會忙而煩惱

總之拍攝食譜我就會心如鹿撞，心亂如麻

好~長話短說……Look

自家煨番薯，無錯係自家煨番薯

其實好耐之前整過，咁見有一個日本番薯就再溫故知新吧

呢個番薯好甜美，加上有煨既香味！

無錯即使一個番薯，我都要整到最好既先食

注意：番薯皮係好高營養價值，只要洗乾淨係食得，日本人食番薯係連皮食的


呢個日本番薯…種子島....安納芋



Look！表面有光澤，有種煨番薯的香氣

祕缺：用濃濃既片糖水煮20分鐘，再放230焗爐20分鐘(視符焗爐火力而定)，沾晌番薯皮表面既片糖水會發出香味

個番薯邊度得來的？係我去Oisix既Event得來的

仲同笨B媽媽、Vanlily一齊去

今次係介紹京都綠茶產品啊

呢阿蘇去京都買既綠茶卷呢，"丸久小山園"既出品

原本我打算去京都時都會買，點知去之前已經食得到，Oisix獨家發售

無錯！我來緊有兩個trip，一個係會去京都

個綠茶忌廉卷好好味！真係好得啊！裡面既cream又香綠茶味，又滑

其次我愛Matcha financier，即係件綠茶蛋糕

佢質感軟熟，而且有點濕潤 moist<---原來可以形容蛋糕的




同場仲有香港大師姐既薑同薑醋

仲有富士蘋果，好清甜

同埋有兩個blogger朋友做義工幫手切，Nice to meet u

仲有柿，可惜~我係唔食柿，但B媽話好味！我都相信佢地出品係好的

呢個紅芯奇異果，好靚

仲有茶藝添，個茶攪到起泡，飲起來又香又滑

同場加映.....Vanlily個仔，呀陳仔食綠茶卷

佢琴日連我隻手都食，仲要自己大大力捉實我隻手不停咁食啊，哈哈

最後走光相

今日陽光普照，下晝又有event

晌屋企打點下，食個午餐再休息下然後化妝出門口

點都要做下正經事，影下新書食譜


最後走光相，無喇！新書唔可以再走光的，今朝既brunch...海膽配日式娟豆腐

呵呵！好"哼"既brunch

其實都係為了你們


表弟先生仍會幫我影，但自己影10個多d，等佢唔水咁辛苦

50個有40個佢要影，真係辛苦晒

就快deadline，每次我寫完晒最喜愛既部份...散文就會放慢腳步

簡直弊傢伙

12月頭仲有個短trip要去，而家都唔知點算好

不過…每次我都係咁，唔急就唔起勁

唯有祈禱，等天父好好提醒我要專心工作吧吧吧吧吧

軟乃乃 (附椒鹽九肚魚食譜)

如果愛既人好鍾意食一樣食物，我唔會扮唔知

就因為咁，我係都要整一次

初初以為無乜難度，原來唔係

一係軟乃乃既魚，原來要炸到成型係會經過忐忑同忑忐

佢軟乃乃攪到我心癢癢好想篤下佢、攪下佢

直到其中一係玩爛左，就唔敢搞

但炸極都唔硬身又開始懷疑佢係咪點整都軟乃乃？

之後開始有點眉目，心情放鬆少少

終於達標

好一味椒鹽九肚魚，居然考起我

但你軟乃乃都逃不過我兩隻手加埋既十指山，哼~

其實好易，買九肚魚、洗淨完完全全索乾水

跟住呢…就鹽同胡椒粉略醃，加大量生粉，熱鑊滾油炸

炸到佢硬身，睇到佢都應該夠十八歲(夠脆)就可以瀝起非刑事"索油"

用另外隻鑊，加蒜蓉、辣椒略炒加椒鹽，淋上魚面，done

*唔好兜d魚，好易爛的

禮物(加食譜)

噢！好累的

近日開始要做食譜又要諗好累

好想去慰勞自己

上星期成日出街同行街，但都唔覺得身心舒泰

跟本我就好累，突然好想食chesse cake，又好想整

整蛋糕個過程其實係減壓既，焗好後既結果會開心既

同煮餸唔同

從來我都唔會覺得煮鹹蛋肉餅會令我快樂，又唔會覺得炆牛腩會快樂

煎牛扒會點點快樂！煮西餐都會幾開心

但焗蛋糕比自己食係會開心既，個過程，尤其打蛋白我會感到開心的

今日整個5吋芝士蛋糕比自己，唔知食到幾時先食得晒，但個過程我好開心

唔用任何裝飾，普普通通咁都足夠，等於我有時唔想化妝一樣，哈

個蛋糕好易整，我用另一方法去試，因為我買一磚cream cheese放雪櫃一直唔知佢有幾多個g

但當落手整時就發覺爭少少，個譜要300g

所以我用50g 淡忌廉補上，如果我因為50g要買多舊cheese，咁又會剩番200g唔多唔少唔知做乜好

味道好好啊！哼~




食譜：

cream cheese 250g

糖    70g

淡忌廉 (室溫)    50g

蛋 (室溫) 2隻

檸檬汁    少許

牛油   70g

1.先用餅底碎+牛油溶液做成餅底，放入模壓實(可用消化餅、或去烘焙店買餅底碎)

2.cream cheese放軟，放到軟身及室溫，加入糖用打蛋器打至滑身

3.加入室溫淡忌廉，與芝士糊打勻

4.加檸檬汁

5.蛋液分三次加入芝士糊，每次加蛋用打蛋器1號速打勻，完全勻就可以停唔好打太耐

6.加入牛油溶液輕手拌勻倒入已放餅底蛋糕模內，焗爐150度焗40分鐘

7.焗好後放涼入雪櫃

no!

兩個人打邊爐，買一次食物夠打兩次

近日愛上日屋企打邊爐

一星期第二次

但我好想講…唔好用"九肚魚"打邊爐

因為會好奇怪呢！條魚會軟乃乃都唔知點好，九肚魚真係只適合炸？噢

呢度只係一半，仲有菜、水餃同埋花甲

每一次都飽到上心口，然後話：唔會再想打邊爐

但通常隔兩日條癮又起，特別係我鍾意自家整醬汁

來緊返風，睇我忍得幾耐！哼

二十分鐘的甘甜

今朝好早起身，同由SG回港既mommy dearest飲茶

仲有菇奶奶同呀妹diana，每次見到mom都好開心

感Thanks God令我晌blog識到佢地

飲茶期間佢地講起羅漢果

我好怕羅漢果的，細個飲羅漢果湯就覺得係苦事

到大個後我從來無煲過

今日佢地講起，我都無太大反應

跟住去九龍城親戚家，路經生果店，見到有新鮮羅漢果

於是就買啦

講真有益既食物，自已唔食，無奶油令大少爺都無得食

所以點都要煲下

原來好易

唔好睇佢白色，好甜的甘甜味會徘徊晌喉嚨之間

我加一個雪耳去煲呢

我用2粒新鮮羅漢，搗碎再加4公升水，煲20分鐘，焗10分鐘就done，可以入樽雪凍飲的

同埋新鮮無乾貨既怪味啊！後面兩粒青BB係新鮮羅漢果

羅漢果可舒緩什麼病
中國滿清嘉慶年間，羅漢果對抑制喉痛，聲啞及咳嗽的藥效最為人所熟識。根本近年研究分析，當羅漢果進入體內，來到身體的不適或失調部位時，抗氧化淨化物質就會與遊離基結合，清除游離基的氧化作用，解除發病隱憂，而不需要的淨化物質則排泄刑體外。如果沒有不適的部位，那麼所有淨化物質都會排泄掉。這就是說，羅漢果對因游離基氧化而引起疾病如高血壓、糖尿病、胃病、便秘、肚潟、炎症、哮喘、敏感症等等，都有一定的舒緩療效。另外如身體陽盛，過食辛熱厚味，以致胃熱積熱而導致的便秘，或外感熱邪，又或者熱病後期，耗傷津液而發消喝，也可選用羅漢果潤腸通便，清熱瀉火，生津止渴。

羅漢果能「排毒」
羅漢果含有幾種抗氧化淨化物質，化解體內因新陳代謝而產生的游離基，防止游離基氧化細胞組織，致令身體機能失調，引起疾病。簡單地說，羅漢果的淨化功能，能針對並化解廣泛疾病的源頭 ─ 游離基。

羅漢果可預防什麼病？
既然羅漢果有助除去體內積聚剩餘的氧化游離基，即指出羅漢果亦能減慢因氧化而老化的情況，防止未老先衰而逕生的臟腑衰竭現象。因老化而引起身體機能失調的病症，包括因血管運作失常，動脈硬化而導致的心臟病、腦中風和老人痴呆等病變。對於隨年齡增長而出現的老人斑、白髲及脫髲、白內障等現象亦有一定幫助。

契女芝士餅生日會上集(附banoffe 食譜)

琴日敗家契媽替芝士餅開生日會

其實係......敗家契媽自己大食會

全個生日會無樣食物餅餅食得既，哈

無錯！敗家仔五個人得閒無事都會搵籍口見面，跟本就係籍口

個Banoffee完成了，都ok

但太甜，拖肥本身都應該好甜，所以如果整，反而薄薄一層拖肥醬加香蕉，個cream唔好落糖打

食譜：

消化餅碎，可買現成餅底  160g

牛油   100g

將牛油座熱，變成牛油溶液，加入餅碎，放入模然後壓成餅底
*******************************************************************************************************************

鷹嘜煉奶    一罐(細size)

將整罐煉奶放入煲，加大量水，水一完要蓋過罐面、烚2個鐘，其間都要確保水份高過罐面

(我用真空煲，煲滾水加煉奶，放入真空煲兩個鐘取出翻滾，再放多一個鐘，真空煲共用三個鐘)

當煉奶烚夠時間後，唔好開罐，取出放涼

*******************************************************************************************************************

香蕉   2隻

當煉奶烚夠時間後，唔好開罐，取出放涼

放涼後就開罐，先塗一層薄薄既批底，再放上香蕉片，再塗一層薄薄晌香蕉面

淡忌廉200g

最後打發淡忌廉，忌廉打發後鋪上批面！鋪上批面隨意便可以

完成

個批面可灑上可可粉做裝飾







生日會食物聽日先再post，知你地心急想要食譜就寫左先

芝士餅病了，眼仔腫腫，餅餅你要快快病好啊

琴日見佢狂咳，咳到肉赤

以前見呀吱整埋無謂野我就會話佢

但慢慢發覺…其實佢好比心機去令到個女有更多美好回憶

覺得佢真係好愛個女，感覺餅餅好珍貴

雖然我仍反對佢一日到黑團購影相同playgroup試堂

諗深一層，佢唔係為自己，樣樣都為個女，想留住個女每個階段美好時刻

更想個女得到更好學習

見到佢每個契媽送一盒咭仔，有晒餅餅每個成長階段，心裡有一絲感動

琴晚餅餅咳，佢成夜晚十點幾走落去余仁生買猴棗末，自己連外套都無著就走落街

吱，呢一刻我覺得你係一個好媽媽 (但下一刻我可能又被你舉動覺得你係傻瓜)

明天待續生日會食物篇

未完成的Banoffee (星期一post完成品再後補食譜)

聽日契女芝士餅生日會，身為識整蛋糕既契媽，實要負責整蛋糕

但係個蛋糕明明餅餅無份食，但其餘幾個契媽同佢媽媽烏吱卻要我整banoffe

聽日個大閘蟹海鮮生日會要星期一先post

個生日蛋糕睇下花絮先

原來個拖肥醬係成罐鍊奶燉成架！好神奇

係用鷹嘜煉奶成罐燉兩個鐘，燉好就係拖肥醬

花絮，批底放拖肥醬再鋪拖肥，最後會加忌廉，聽日去到呀吱度先整個忌廉

完成品將會係咁，如果成功既話

呢幅相係我去Zamber食既

有興趣整嗎？想知食譜嗎？你知道嗎？星期一來睇嗎？

待續~~~~~~~~~~~~~~~~~~~~~~~~~~

金寶湯系列.....瑤柱海鮮蔬菜豆腐卷

又係我

顧客服務熱線之金寶湯系列

今次又另一菜式

由於金寶湯方面要求係中菜，咁我就用中湯啦

今次用瑤柱海鮮湯去整

佢個湯都幾好，因為好濃冬菇味，原來我想改為碗他翅，加d粉絲就done，哈

Anyway......今次整豆腐卷

瑤柱海鮮蔬菜豆腐卷

http://www.campbellskitchen.com.hk/zh/vegetable-and-beancurd-roll/?utm_source=blogger&utm_medium=iamtaisiu9_11-2011_R2&utm_campaign=blogger-recipe





幾個step..done~

手信午餐

充滿冬日氣息的早上，想得到暖洋洋的食物

即刻煮琴晚收到既韓國手信.....生生烏冬

其實呢樣烏冬香港有得買

但一向對類似即食麵抗拒既我，係唔會茂茂然去試既

剛好呀繼去韓國就叫佢買比我

我打爆晒人地超市架既數量返來

原來佢真係幾好食，我只係加隻水煮蛋

一個簡單方便既午餐，一個暖洋洋既午餐，哼~

琴晚班敗家又五缺一咁去吉仔打邊爐，呀繼手信大晒冷

原來隻Market O brownie超好味，好食得好緊要，係好緊要，緊要得好緊要，你明唔明？

超好味！唔怪得知呀茄講成380次一定要買啦

自己去或朋友去都好，記得買呢個brownie

我本身已經日、韓旅行大交戰，攪到去韓國加了分，因為呢個烏冬同brownie啊

圖中寫住生生既係烏冬，認住佢

著乜好？

突然凍了，措手不及

仲要落雨

然後話突然17度，我不停諗…今晚著乜衫好？今晚去街著乜呢？

衣櫃未換季，咁著乜好呢？

仲要落雨，又著乜鞋呢？

男人真係唔會有呢種煩惱，我問大少爺你聽日著乜？佢好輕描淡寫地講某一件外套

但我呢…諗到著乜外套又要諗埋裡面著乜，咁件外套衫領低，裡面唔好著太高領

咁不如襯頸鍊，但我最怕帶頸鍊

然後著乜褲呢？

跟住著乜鞋呢？有雨喎，呢對新鞋落雨唔著、高跟鞋又唔方便，呢對又怕入水、著水鞋又怕唔襯

咁又著乜呢？

即使大少爺算姿整都無呢種煩惱

琴晚急不及待整煲仔菜，(0者 0者)雞煲

豬潤切片後，用豉油、胡椒粉、紹酒、少少薑汁醃下佢就唔會有腥味，炆之前煎香佢

跟住個雞炆到咁上下先放落去炆，咁會好味d呢

大少爺愛食豬潤，但我唔會炆太多比佢，

屬於我的肉餅

心情仍悶悶的，好想懶一日乜都唔做

但咁未免大虛耗光陰

都係出外走走吧.......啦

有d食物你喜愛，但又唔係會成日整，出去食又唔多好食

咁點呢？

就等自己某年某月某日抽起條筋去整

無乜奶油地去整，只為想整而整，又可以話係過下身癮

又或者我好想食自己整既某樣食物

覺得自己整既比其他地方好味

例如…西式鹹蛋肉餅"Quiche "

自己整既係最好味，可以揀餡料，將煙肉轉為煙三文魚

芝士揀自己所愛既味道，我愛重口味芝士

個pie可以好鬆脆去食

好多時街外焗起，個pie都已經淋晒

即使愛Harlan's如我，都覺得佢既Quiche唔好味

想食自己喜愛食物又可以過手癮，就係唔懶得

懶會令自己錯失好多

恨不得即幹掉這個Quiche，可惜仍然滾熱未夠時候脫模呢

哼~~~今日至少會有美味下午茶

等我出街打個大大白鴿轉先

未焗，但刨了芝士既Quiche，都已經係好靚既圖畫

愛之深 恨之切

是日brunch...肉眼扒三文治

持續好幾日既無精打彩

Cheer up自己最好方法，逗自己開心

整自己最喜愛既食物

我真係好愛牛肉，癲地愛

但有時諗…塵世間有幾多隻牛落入我既消化系統

愛之深 恨不得每日都去切牛扒

Anyway....今日個brunch既三文治，實在大愛

今次唔用茄汁，用Mayonnaise實在太美味

哼~

Sandra kulu (山楂咕嚕肉食譜)

呢兩日有d悶悶不樂

好想令自己開心，唔想又買嘢

我實在買得太多太多，要學習滿足

整一樣自己好鍾意既嘢比自己食

原本想晌屋企打場轟轟烈烈既邊爐

但又唔想買一太爛餐食物、然後剩餘物資夠整一星期車仔麵

索性整咕嚕肉，不過加山楂既版本

今次個肉用生粉同吉士粉撈勻，無加蛋

原來效果更好更脆啊

個汁加山楂後更香更好

好開心

有時學識一款菜式唔代表叻，係要發掘更好

人要不停進步，學識整一款菜式後，好多時都會沾沾自喜，甚正紅雙囍

但其實每樣野都可以整得更好

所以人唔可以懶，一懶就原地踏步，甚至退步呢

唔係用山楂餅，係用山楂

食譜：

豬肉切片，用豉油、糖、雞粉、少少酒、生粉略醃

洋蔥半個、青椒一個切件


汁：

茄汁   3湯匙

白醋   1.5湯匙

糖    2湯匙

鹽 少許

山楂    10片 + 熱水  1/4杯，浸半小時

生粉   1茶匙


豬肉加2湯匙生粉、2茶匙吉士粉撈勻，猛火落鑊炸至微金黃色，撈起，然後再開鑊油再次滾起，再放豬肉回鑊，炸至金黃色盛起備用

汁料攪勻

將洋蔥、青椒爆香，加入汁料煮滾，放入豬肉快手兜勻上碟

金寶湯食譜...蕃茄魚塊鍋巴

Hi ~又係我啊

今次呢…就想同大家介紹用金寶湯整既菜式

其實初初我都有考慮過做唔做，因為我實在太忙

但有關方面佢任我自由發揮

同埋要簡單既

咁我就有興趣

可以諗d我認為靚、簡單既 mix & match

最後揀左兩款湯

但講真…我一向好少用罐頭煮餸，今次發覺原來個番茄湯好味既

我想整個紅噹噹既

So…用上魚柳、鍋粑去配個湯

真係好簡單，得幾個step，同埋呢你晌好忙好亂好急好餓既時候去整幾個step既野都幾好

蕃茄魚塊鍋巴

Click:http://www.campbellskitchen.com.hk/zh/fish-fillet-with-guoba-in-tomato-sauce?utm_source=blogger&utm_medium=iamtaisiu9_11-2011_R1&utm_campaign=blogger-recipe

另一個食譜將會一星期後發放

那些年.....之前@喜喜冰室

今晚有個食譜示範要發佈

但未夠鐘，大家今晚要7pm再來看看，同某品牌合作做食譜

又再外食一下先，琴晚去睇....那些年

之前敗家幾個女人要放工先去睇

所以睇戲前食個快快晚餐

去喜喜

之前唔知邊個飲食節目推介過呢個浮台雞批

有個豆茸湯上面一個雞pie

對我來講…no good，個湯唔熱，個pie唔脆、放耐d就融化晒咁

我寧願要一個雞批



但係其他食物幾得

佢係走....那些年....既路線

有好多被遺忘既味道

焗牛利意粉，但意粉味道係以前酒樓，蛋撻車內會有既焗意粉味道

而家酒樓食唔到喇！好開心遇番呢種誰令我心痴既味道

炸雞脾西炒飯

個雞脾又係，佢係以前非集團式既快餐店味道，無粉漿既

小時候既恩物，只怕不怕遇上

星洲炒米

呢個焦糖香蕉pancake係同雞批浮台同一個套餐

個焦糖漿好味，但pancake略厚

我好唔鍾意睇戲，都唔知點解會咁

我只會睇一d我好有興趣既戲

之前三兄弟人人睇完都激讚，包括大少爺

又有人會晌FB見親人睇呢套戲都會失控地講一番

但我偏無興趣

相反，呢套係我約去睇，我鍾意睇呢類型既戲

無冷場既一套戲，睇得舒服呢


今晚七點見

那些年...我同烏吱去Tea @四季酒店

我知你地大家都大方得體，好體諒我既

近來我新書散文部份大致完成

開始要諗食譜，今次d食譜係xx同xx，所以難諗d

變得我平日無乜精神同時間去自己玩煮飯仔

相對外食會多少少

體諒啊

琴日同烏吱去Shopping同 afternoon tea

噢！依然係四季

對於唔太鍾意一次過食太多糕餅既人來講

呢度既Tea set我都幾鍾意

因為連鹹點都出色

今次同上次又有d唔同，所以點都會開心啊

甜，款款都好味

Scone.即使不太愛，仍覺幾可愛

鹹點我最愛，佢有個烤脆芝士卷大愛啊

另外有幾款甜點比你揀，每人兩款，我愛栗子酥同古古力

我最愛的Mint Tea

特別嗚謝烏吱吱半日安陪我，自從佢生左個女，加上敗家仔5個人太齊心，齊上齊落齊玩齊買齊食後

少機會單獨同佢見面

不過…今晚又見，一齊去睇"那些年"

那些年係我好想睇，相反三兄弟我無興趣

同埋那些年內容應該比到好多靈感我呢