矛盾

有試過你送禮物比人，但自己好驚果份禮物嗎？
我試過！
大少爺同我最鍾意送古靈精怪核核突突唔知做乜食之無味棄之可惜既禮物比....表弟先生
原本星期五去Bear Bear舅父屋企食飯時，影低呢幾樣"死雞"禮物放入書
表弟先生晌新書做序人，有講我同佢獨特相處
我想講下我送過既禮物，但因為本書排起做得校對，唔想再插相，所以放blog

多年來，我最鍾意買死雞物品比表弟
因為核突、唔知要黎做乜、夠晒食之無味棄之可惜既

睇下中間果隻，好核突，佢軟淋淋、個身質感好肉酸
我唔敢掂，買既時候係大少爺拎
前晚表弟先生用呢隻死雞拋落我身，嚇到我大叫

隔離支死雞筆，係當時表弟先生轉工，我叫佢簽約時用死雞筆去簽約
或者放晌檯面辟邪呢

最後果隻係最新，上年生日送既，上年九月呀茄生日同表弟生日都係收呢隻天國之雞

近日我心情唔太好，有d唔開心

因為Bear Bear舅父同舅母返加拿大定居喇！只有表弟先生同表妹小姐留香港
星期五食晚飯，應該係送行飯，因為今個星期都無時間再食飯
食完飯返屋企途中，我同大少爺都好靜無乜講野
因為我倆個都好唔開心！好唔捨得~

呢段日子
見親Bear Bear舅父都會攬住佢

然後質問：你走喇！我點算？你話丫！我初一去邊？

其實Bear Bear舅父、舅母係我晌香港唯一親人
每次去舅父屋企都有好溫暖感覺，呢種感覺係我由細到大渴望既
單親家庭長大既我，由細到大所渴望既家，係會晌舅父屋企感受到

但而家又要失去呢.............

當晚晚飯其中四樣蒸大石班、生菜鮑魚、梅子炆鴨、釀節瓜，仲有雞同炆齋無影

條魚晌未蒸既時候影既呢！

雖然舅父舅母如果返到過去，唔適應都可能會返

好矛盾！加國福利比香港好，環境又舒服，當然想佢倆會享受下

但我真係好唔捨得呢~~~

又或者我以後叫表弟先生做舅父

叫表妹小姐做舅母，可能個心會舒服，但表妹小姐唔會炆鴨啊！