最後一擊

賀年特輯去到呢到就完成，因為我要預留時間做糕比朋友

仲要去剪頭髮、修甲、換電話、、年貨、買新袋等等去迎接新年

最後係我最喜歡芋蝦，自從識做就每年都做

每年做都想起外婆，我有一年去佢屋企拜年時食到而驚為天人

所以每一次做都會想起佢

我無其他表弟、妹咁幸福可以成日見到婆婆

每年過時過節先會去外公屋企食飯，每次去到都覺得好珍貴

人生未必事事如意，但到最後有人會思念你已經是贏家

外婆煮得一手好菜式我無幾多個係記得，過時過節都係雞呀魚呀菜呀咁

但食芋蝦情景我一世都記得

有外婆小朋友係特別幸福，好彩包包都仲有個好錫佢既六姨婆

呢個芋蝦大少爺好鍾意，連只能食碎碎既包包都好鍾意所以過年前要炸多轉呢

食譜：

芋頭   半個

糯米粉    1湯匙

鹽    1/2茶匙

五香粉   2茶匙

糖    1茶匙

紹酒   1茶匙

心機    成擔

做法：

將芋頭做成幼條

我無刨絲既刨，整呢個就要好幼絲但又要長

結果呢…我刨成薄片再切幼絲，要落成擔心機的

所有調味料撈勻放入碗，然後分兩份

芋絲都係分兩分

炸之前將一份芋絲及一份調味料撈勻

*芋頭一沾上鹽就會出水，出水就會唔好食，所以一撈調味後就要盡快炸

分三份炸之前先撈就唔怕芋頭出水

用個圓到有細孔既漏勺放入已調味既芋絲(如下圖)

放入油鍋炸

放入油鍋中炸，個重點係當佢成形後(如下圖)你反轉個殼芋絲就會跌出來

咁你就由得佢晌油鑊中自炸，炸至金黃色就可以盛起

油既油度要燒得夠熱佢先會容易定型，炸既中途可以轉中火

但臨上碟時要較番大火逼番d油份出來就會好乾脆

大少奶's Delicatessen

宣傳你的專頁

燻蹄個friend

早前寫過燻蹄食譜，但原來好多人想要埋佢個friend 海蜇食譜

好幾年前我寫過海蜇頭食譜但唔知點解直至消失天與地咁唔見晒

咁就再你新寫啦

海蜇其實唔難整係要浸同埋買都係比以前難買

但晌白沙道間南貨店有得賣或者九龍城南貨店老三陽等等都會有

買返來浸下佢出下水又浸下佢又開個汁浸下就完成！幾簡單~哼

今日出埋等大家可以招呼親朋戚友時都整到

再作個賀年名稱，什麼你一睇就知佢…花開富貴等等

又或者櫻花樹下，咁就成碟青瓜過大海啦

海蜇皮    1塊

首先：將海蜇皮浸清水，個盤等等要好乾淨無油

4小時換一換水之後浸過夜浸走佢咸腥味便可以

之後我會先切絲，因為方便我會卷埋佢切幼條

開一煲水煲滾，然後放入海蜇絲，灼大約10-15秒就即時撈起沖水喉水

被沖水去..........

之後開冰+煮過既冷開水做一盤冰水

再浸海蜇 1個鐘就可以瀝乾水

做個汁料浸佢

汁料：

魚露   1.5湯匙

白醋  2湯匙

水 半碗

糖  2茶匙

麻油    少許

浸佢起碼4小時就入味，汁料味道要重d因為如果配青瓜的話青瓜出水會溝淡汁料味道

我配青瓜及咸雞絲

青瓜用個批皮器就可以批出薄片

咸雞絲我用大塊雞胸肉加鹽抹勻醃幾個鐘再蒸20分鐘放涼撕成雞絲

唔使落好多調味，因為個海蜇汁又有味的

咁先放青瓜晌底再放雞絲最後放海蜇就ok，可以先用汁浸一陣青瓜等佢唔好似搭檯咁無味道

如果喜歡食麻辣味可以加麻辣醬晌面撈勻食或者好似我咁用碟仔裝起隨意加呢

我就用開呢隻麻辣醬

大少奶's Delicatessen

宣傳你的專頁

蒸糕bell最終回

終於到蒸糕最終回，過年蒸糕係到呢度為止喇

下星期會出下其他小食咁啦

但呢個係我堅持今星期出但又波折重重既紅豆椰汁年糕

其實已經係第二底，第一底我居然犯了低級錯誤用錯了沾米粉

完全係崩潰又要買過晒材料再做，然後相片又非常難影

我話過出年整呢底糕唔用圓模好難影

加上我心急影相出佢未雪實時拆模影又有少少變形金剛

不過呢款糕好值得整又幾好食呢，哼

年年寫都有人問到底邊度買買乜牌子

老實講我就手就買架啦

今年去Aeon買呢隻，大家買罐裝都得架

紅豆椰汁年糕食譜：一斤裝

罐裝蜜紅豆蓉     350g  

暖水      200g

糖   2茶匙

糯米粉    220g

澄麵粉       80g

油    1湯匙

紅豆蓉加水再加油攪勻

糯米粉、澄麵、糖攪勻，將紅豆水加入粉類中撈勻

唔好一次過落太多，如果照加完食譜份量仍感覺未夠可以再加水

*留意返每隻糯米粉吸水情況都唔同，所以真係要慢慢試

蒸之前抹平佢

相對上椰汁層較容易整

椰汁層：

冰糖   75g

椰漿   130ml

水     120ml

糯米粉    110g

澄麵       40g

油        半湯匙

水加冰糖煮做成冰糖水放至水暖加入椰漿及油撈勻

糯米粉加澄麵粉撈勻，加入椰漿水攪勻攪勻

糕盤搽油，先放紅豆層蒸 大火20分鐘、再加椰汁層蒸20分鐘，最後再加紅豆層一次過蒸30分鐘

最後一層時，可以加粒紅棗上面及蓋上錫紙

蒸好後放涼再入雪櫃雪至定形就可以切件煎香後食

呢個食譜做到一斤裝 1底，唔好問我整到幾多底，係要睇自己個盤既容量

最簡單方法：如果你個盤裝到600ml水份，即係一斤裝份量

900ml水就係斤半裝份量，如此類推，我唔會知你個盤幾大可以做幾多底

大少奶's Delicatessen

宣傳你的專頁

吾家有參初長成

過年前廣告要出都出晒，最忙係整食譜比大家

由2006年自己學煮同寫blog開始就背負著呢個使命就係過時過節做下應節食物

晌13年歲月裡面當然有不同食譜又有d改良版返做

但每一年都希望做到新嘗試多試煮唔同類別食物

今年就整海參，是咁的自小跟著老爸生活個個都話我食盡好食物，但個問題係佢唔識煮丫嘛

咁我對食物認知都係由2006年開始，海味我只識發花...膠

仲有我本身唔食海參，細個老豆話d曳細路會比人拋落海餵海參

我於心何忍食呢？

但到今時今日乜都要試，加上朋友賣海味信得過又唔貴就買d玩下啦

不過唔係就咁炆，我係做"百花釀海參"，而個汁唔係用蠔油做而係用瑤柱水加少許調味而成

做出來好好食呢！包包問包住係乜？我答佢：魚皮

否則我答佢海參佢又實唔食呢

食譜：

海參       3條

蝦膠    1碗

瑤柱   3粒

鹽   少許

生抽   2茶匙

老抽   2茶匙

糖  茶匙

麻油   少許

生粉水   少許

做法：

先用瑤柱加水小火煲45分鐘至出味加少許鹽放涼後加入海參，等海參吸味

可以放2小時最好，因為海參來身無味的

唔用瑤柱水可以直接放清雞湯都得

將海參中間灑上生粉或粟粉，釀上蝦膠

打蝦膠方法如下：

http://iamtaisiu9.blogspot.com/2017/06/s-delicatessen.html

蝦膠面再灑少許生粉先煎，海參要完全索乾水

煎至金黃色備用

將瑤柱水加入生抽、老抽、糖去煮滾

煮10分鐘後可以加麻油及生粉水做成獻汁就可以上碟

睇到呢度…我無理由唔寫埋發海參架

首先要預備一個無油完全乾淨盒，將海參加水入盒浸，水蓋要過面的

每12小時換一次水，每次換完水都放入雪櫃下格

如果是兩日後...............

當你發覺隻海參軟身就可以開肚，如果仍感覺硬呢就再浸多12小時至1日

剪開肚後就去走沙、石、內臟同筋，總之個肚有乜都拎晒出來

之後可以用個無油乾淨煲加水，凍水落海參煲滾

煲多10分鐘蓋上煲蓋焗浸至水涼就放返入盒浸佢12個鐘

之後又用個無油乾淨煲加水，凍水落海參煲滾10分鐘熄火再蓋上煲蓋焗浸至水涼就放返入盒浸佢12個鐘

之後你摸佢夠軟身就完成，如果仍完全未軟身就再做多次焗浸

將海參倒走d水，再抹乾水可以放冰格保存

煮之前可以煮一煲薑蔥水去出一出水

蒸糕bell之主角"蘿蔔糕"

是咁的，呢個蘿蔔糕食譜寫咗12年，每一年過年前係都要寫過先安樂

今年直頭拍埋片比你睇，將活生生蘿蔔糕紀錄片活展現眼前

將零失敗蘿蔔糕食譜推至負失敗，哼

多謝各位~

#陸續有來的過年食譜

#寫到賣懶當日_除非唔係

#包包停課都阻我唔到

#好有氣勢咁話

睇食譜→ https://youtu.be/Bq9by4wTUZc

----------------------------------

想睇更多食譜上去Youtube 睇啦！

Follow and Subscribe 

Youtube: https://bit.ly/2Aa2c0R

Ig: https://www.instagram.com/taisiu9_aubrey/

Facebook:https://www.facebook.com/about.aubrey/

大少奶's Delicatessen

宣傳你的專頁

大樹先生的家

早前帶包包去銅鑼灣皇室堡既大樹先生的家玩

當時我去係未正式開，呢間親子餐廳名字絕對唔陌生

但無論係台灣或者荔枝角分店我都未去過

今次帶包包去佢入到去個門口已經好開心

的確環境氣氛我見到都開心呢

地方比我想像中大設施都比我想像中多，有適合包包年齡玩既設施又有比較細個BB區

大家一齊睇下相片啦

呢個波波池顏色好Lady，我想玩多d囉！

男兒當入樽中

呢個撈魚仔係包包玩得最耐的

我都唔明屋企有Lego佢又唔多砌，去親第二d地方有就起勢去砌

包細個唔肯玩呢d，而家自己又係咁捐來捐去呢

有大火車軌，女仔都可以玩後 Barbie屋

我對呢類玩具有偏好，因為我細個最鍾意玩呢d玩具

年紀較小區域室都好足安全措施

大樹先生的家當然有廚房啦啦啦，食物總類都多

講真親子餐廳唔使煩去邊度食，玩完食又得、食完玩又得

 邊玩邊食絕對唔得~包包係食完先准玩的

小朋友兒童餐

包包的

呢個pasta都不錯

大家有興趣可以去，不過一定要訂位

上次我去都未正式開晌FB登記試玩都全場滿座

當然啦！有個室內地方比小朋友玩真係落雨不怕落雪也不怕

地點：銅鑼灣皇室堡15樓