圓圓

貶下眼農曆新年都好快就過，今日初十二過幾日就元宵節

每年年宵節前幾日我情緒或心情就會自動有失落感

元宵節就係我爸"星星忌"每一年我都會有d傷感

不過人總係要向前望，我覺得唔可以因為咁而意志消沉

最好方法就係：面對

最好面對方法就係出個元宵食譜，哼

元宵大家都會想起湯圓，剛過去新年每逢同朋友食飯無論晌我家定係出面食都係食湯圓

但今次係做一道客家菜式"鹹湯圓"，我唔係客家人唔知係點但我憑自己想像做出一個湯底

再自己搓湯圓做出來大少爺同包包都鍾意證明成功啦啦啦

食譜：

蝦米     半碗

鮮冬菇    4隻切片

瘦肉    $20切絲

菜     適量(可以選擇白菜、娃娃菜等)

雞湯     750ml

油蔥酥、菜甫粒、芫茜等       隨意

糯米粉   100g (可以做20粒)

暖水  80ml

紅麴粉    少許

做法：

瘦肉切絲再用少少糖及鹽、生粉少許撈勻

蝦米浸軟

冬菇我用鮮冬菇，大家都可以用乾貨

雞湯滾後放蝦米、瘦肉及冬菇

如果用盒裝雞湯就加多少少水否則好鹹

滾大約半個鐘

最後先放菜 然後試味，如果覺得唔夠鹹就加鹽

再滾起時就放湯圓，湯圓浮起時滾多兩分鐘便完成

食時可以隨意加少少芫茜、油蔥酥、菜甫粒

湯圓係自己搓無餡的，我整了紅色同白色

白色忘記影相，其實步驟一樣

糯米粉加大約80ml暖水，用暖水質感係最好

水要慢慢分次加，因為每隻粉受水都唔同

(如果你覺得濕就補少少糯米粉，如果太乾就補水)

搓成糰後就可以搓圓做湯圓，下圖係加了紅麴粉做紅色的

old dish is so............... exciting

開始一連幾日都有朋友上我家吃飯，所以諗菜式都要諗d方便我煮又時間剛好

昨晚煮四道菜但我好似好悠閒咁

其實望落好似好勁，時間配合得好跟本就唔會似打仗呢

有一味不得不提就係焗魚腸個friend 焗蠔砵

係用焗魚腸做法但換上蠔仔，呢味菜式其實我久唔久就寫一次，書都寫過

但佢真係好值得寫，因為好多朋友都會鍾意

old dishes is so............... exciting,、哼

蠔仔    1斤(我今次用韓國蠔)

雞蛋   4隻

油條 半條(切塊)

果皮 1片 (浸軟切絲)

芫茜   1小札

鹽 半茶匙

水 100ml

胡椒粉   少許

做法：

蠔仔用粟粉摔，摔完後沖洗，然後煲滾水放蠔仔略灼至半熟後索乾水放入砵中

將蛋打勻加入水、芫茜、果皮絲、鹽、胡椒粉打輕輕打勻倒入砵中

再收切塊油條放入砵裡，面層鋪上微波保鮮紙，大火蒸  15分鐘，熄火唔開蓋焗5分鐘

取出蠔砵，在蛋面上均勻搽上一層油，薄薄地搽一層

焗爐預熱220度，將蟹砵放入焗爐焗 10分鐘或表面呈金黃色

昨昨其他菜式有近來至愛整燒乳鴿

蒜蓉蝦

瑤柱扒豆苗

大少奶's Delicatessen

宣傳你的專頁

啟市

大家新年快樂、身體健康~

話咁快就啟市喇！其實我想休息多幾日不過之後日日會有朋友上我家

我會忙過今日於是乎我就決定今日出篇文啦啦啦

呢幾日新年假期都係忙於吃喝玩樂食同買，昨晚先再煮飯

包包終於要再食住家飯

過年期間我好想食臭豆腐，但係搵唔到而我又無勇氣出旺角(怕太多人)

突然諗起之前睇過有個豆腐食譜用麥片包住豆腐去煎，諗諗下不如加埋紫菜啦

加紫菜後會多一份香味咁就當佢臭豆腐咁食，我仲加甜醬辣醬食落真係幾分似

而且仲係健康菜式，今年我開始做運動之餘仲會發掘d健康但唔悶菜式呢！哼

食譜：

硬豆腐   1-2件

雞蛋     1隻

麥片     半碗

紫菜絲  1/4碗

做法

將豆腐用隻碟盛起，然後面層放上重物一小時至兩小時，將豆腐水份壓出後索乾水份

麥片同紫菜

撈勻，紫菜絲最好剪碎d

豆腐沾上蛋漿

將豆腐沾上麥片同紫菜後就可以煎，煎至金帶色仲會帶微脆呢

食之時加辣醬同甜醬就更似臭豆腐(你懂的)

都放下新年相片啦

初一去海景軒飲茶，隻乳鴿同灌湯餃好好食

初二休息一天，初三大團拜再加自煮開年飯

初四最後一擊先落樓下睇醒獅

再去怡東軒飲茶、再行街、再食tea、再買相機比包包

大少奶's Delicatessen

宣傳你的專頁

百花如意結

已經做了12底蘿蔔糕，仲有6底咁上下

包包停課令我戰鬥力減慢

佢已經好乖仔，大部份都唔攪我但始終都要帶佢去下公園玩下、出下街所以都做慢了

糕不停蒸食譜又寫過當然要寫下年菜

其實團年飯今年出去食，因為人去到年廿八即使唔使我自己做清潔及大掃除但已經好累

打算年三十早d帶包包行下花市出街食下咁

年初一就開始吃喝玩樂食買瞓咁囉，從前我日日如此過人生但包包出世後得過年幾日可以咁咋

今日寫個"百花如意結"，昨晚包包話好好味

佢好容易整方便大家百忙中整道應節菜式咁囉！下面係豆角上面係墨魚肉(街買的)再配蛋白瑤柱湯做獻

忙到蝦膠都無時間打但又做得到喎，哼

食譜：

豆角    8條

墨魚膠    6兩

瑤柱   1粒

蛋白   1隻

生粉 半湯匙加2湯匙水

鹽少許

做法：

先做個豆角，將豆角洗淨後放入滾水煮1分鐘

即時再浸冰水令佢保持嫩綠

將豆角打結

打結後將個豆角尾屈入個結內

咁就完成，可以修短d豆角尾

將豆角索乾水灑上生粉

釀上墨魚膠，可以用蝦膠、用魚肉、甚至用豬肉也可以

蒸15分鐘便完成

獻汁做法：

用一碗水將瑤柱浸軟，水連瑤柱肉倒入小煲內，煮滾後加入生粉水

當開始杰身時就倒入蛋白、鹽、攪勻可以淋上墨魚肉西

大少奶's Delicatessen

宣傳你的專頁

承傳

上年試整芋蝦大少爺驚為天人，佢覺得點解我可以整到

但上次臨過年病了無得再整，我一直都記住大少爺好鍾意所以一定要整

今年係進步版，炸得色澤無過火，加上芋頭切絲切幼過上年所以賣相都靚過上年

包包問：咩嚟？

我：芋蝦

包包：邊個教你架？

我：無人教只係我食過你太婆整......

上兩代嘅人乜都肯自己整，而家d人乜都只會買，我要承傳下去希望有機會整到比自己d孫食

(包包家陣先四歲未夠，哈)

呢樣食物唔難整但要有心人...

寂寞也揮發著餘香 原來情動正是這樣 曾忘掉這種遐想 這麼超乎我想像

你要肯切肯去炸唔怕辛苦無勤工獎無雙糧都肯做就一定做到

哼

食譜：

芋頭   半個

糯米粉    1湯匙

鹽    1/2茶匙

五香粉   2茶匙

糖    1茶匙

紹酒   1茶匙

心機    1擔

做法：

將芋頭做成幼條

我無刨絲既刨，整呢個就要好幼絲但又要長

結果呢…我刨成薄片再切幼絲

呢度成擔心機

所有調味料撈勻放入芋絲中

*芋頭一沾上鹽就會出水，出水就會唔好食，所以一撈調味後就要盡快炸

用個圓到有細孔既漏勺放入已調味既芋絲(如下圖)

放入油鍋中炸，個重點係當佢成形後(如下圖)你反轉個殼芋絲就會跌出來

咁你就由得佢晌油鑊中自炸，炸至金黃色就可以盛起

油既油度要燒得夠熱佢先會容易定型，炸既中途可以轉中火

但臨上碟時要較番大火逼番d油份出來就會好乾脆

大少奶's Delicatessen

宣傳你的專頁

蒸糕bell最終回....蘿蔔糕

又到蒸蘿蔔糕時候，每年都大量生產每年用同一食譜

呢個食譜用了近十年可以話零失敗，除了上年我重感冒其中三底失敗了

我好鍾意食自己整蘿蔔糕，朋友大部份有99%都喜歡，所以就繼續整落去囉

哼

材料：三斤

粘米粉    300g

澄麵或粟粉     2湯匙

鹽         2茶匙至半湯匙

麻油    少許

胡椒粉   少許

臘腸  、 蝦米、瑤柱、冬菇   隨意

白蘿蔔   3斤 =1815g (我做法係分成兩份，一半刨絲，一半切幼條，呢種質感較好)

水    12安士 (我用浸瑤柱水同蘿蔔水代替)

蔥白粒    少許

做法：

將蘿蔔一半切幼條、一半刨絲(刨絲時蘿蔔會出水，水份留起)

將粘米粉、粟粉、鹽、胡椒粉、麻油混合埋一齊加入水份

12安士既水

(我用浸瑤柱同蘿蔔水代替水份)

臘腸、切粒後加入蝦米、瑤柱蔥白粒爆香，加入少許生抽同酒兜勻至出香味

蘿蔔絲同幼條用白鑊煮到半透明及軟身(大約幾分鐘)

加入臘味配其他配料兜勻再倒入粉漿

開始用中慢火邊煮邊兜煮到重身，感覺就快拎唔起隻鑊剷既感覺就OK

可以熄火入糕模(糕模先搽油)

分三次放，每一次都壓實先放上第二層…等等，最後可以放上臘味做裝飾蒸45-60分鐘

3)蘿蔔絲加粉漿時，

*倒入糕盤時要分幾次，每次倒入時要輕輕壓實，完成品就唔會鬆散