2016年8月31日 星期三

BB餅

之前用超級能恩整過不同食物,呢次整BB餅乾

BB餅乾幾乎係每個BB都食過,除了星星餅外,自己焗既餅乾會係最不錯既選擇

因為揀比BB食最重要少香料、少甜、少化學劑及少色素

要有齊以上條件又有乜好過自己焗

自己焗可以做到少甜或少鹹,但記住最好加少少調味引起BB們興趣

餅乾加奶係令餅會帶少少香味及質感會好些少

加上麵糰比較乾,都要加少少奶去混和的

但係牛奶蛋白係小朋友常見嘅致敏原

所以我用咗包包飲開嘅pHF水解蛋白奶粉雀巢能恩3

將腸胃敏感既機會降至最低,如果您都想試可以去http://goo.gl/8wdBKD拎免費試用

今次用了一個無蛋既食譜,因為蛋係牛奶之外另一重常見嘅BB致敏原

BB腸胃敏感晌一歲前都要小心揀食物!

包包飲雀巢能恩奶粉,雀巢能恩奶粉將腸胃敏感既機會降至最低


食譜:

低筋麵粉  80g

鹽        少許

橄欖油    10ml

雀巢能恩配方奶      20ml

做法:焗爐預熱160度

將橄欖油及鹽加入麵粉中

雀巢能恩配方奶分次加入麵糰中撈勻

輕力搓勻做成麵糰

將麵糰用保鮮紙保著再放入冰箱雪15分鐘,然後壓平麵糰用印模或切成理想造型

將餅乾放入焗爐焗15分鐘至微金黃

*將餅乾做成長條型可以訓練BB用手拎住餅食

*每種麵粉吸水情況不同,如麵粉太濕可以加多少少麵粉,相反太乾可以加多少少奶

#資料由雀巢營養天地贊助

2016年8月30日 星期二

呃仔系列

每日諗呀包食乜唔算難,最難呃佢食植物

佢有能本事晌撈埋一堆中搵到植物所在然後吐出

幸好…佢肯食生果

食生果唔夠的,於是我就久唔久將菜蔬混入主材料中等佢食了都唔覺

呢樣算係可以令佢食得多少少既方法咁啦

佢衰到唔係太食蛋,一時食一時唔食,今餐食下餐又唔食

但我諗日式甜蛋佢會喜歡呱.........不過日式甜蛋有味醂所以我一直無整過

今日試用另一方法整,用紅蘿蔔粒混入,加入紫菜做成

味道就只加醬油及糖再加一湯匙水,做出來無論質感或味道都同日式甜蛋好相似

我係有辦法去對付偏食既孩子的


食譜:

蛋   2隻

紫菜    1塊

醬油  1/4茶匙

糖   1/2茶匙

水   1湯匙

蔬菜粒    隨意

做法:

將以上材料撈勻  (紫菜除外)

先熱鑊加油燒熱然後倒入蛋漿,只需要做成圓蛋皮就可以

跟住放上紫菜卷起放晌鑊另一邊


再倒入蛋漿跟住凝固8成時再卷起


如是者重複就做成大蛋卷便可以,放涼切件





大少奶's Delicatessen

宣傳你的專頁

2016年8月29日 星期一

金銀蒜粒蒸扇貝

相信上星期大家睇過消委會做既豉油檢測都一額汗

原來好多大家常接觸甚至會用既品牌豉油都不達標,甚至有d會危害健康

而且豉油對於煮中菜來講係主要既調味品

所以更加要小心選擇

好多朋友都問我用開邊隻,好彩既係我一直都用開李錦記金醬油

佢不加防腐劑、不加人造色素、頭遍釀造、非基因改造大豆,味道小咸多鮮。除了滋味,還令我同家人都食得安心!

最重要係經過消委會檢測後被評為達甲級品水平(以甲級品為最佳)

大家選擇豉油一定要揀最好既呢

今次寫個金銀蒜粒蒸扇貝

食譜

扇貝  6隻

粉絲  1扎

蒜頭   6粒

蔥粒   少許

調味

李錦記金醬油   適量

做法:

扇貝略為沖洗淨抹乾水

粉絲浸軟

蒜頭去衣後剁碎,將一半份量半煎炸至金黃色

將粉絲鋪上碟,然後將蒜蓉放上扇貝面再放上碟蒸8分鐘

灑上無炸過既蒜蓉碎及蔥粒,然後再淋上李錦記金醬油便完成




2016年8月24日 星期三

乜都加


星期日我屋企攪BBQ最難諗就係點醃食物

BBQ我喜歡食烤多士,棉花糖啦、蜜糖啦

但唔喜歡甜既人咁點?如果我燒金菇咁點?咁我又想燒粟米就咁食又齋了點

結果我諗起我之前睇過台灣玫瑰小姐整過香草牛油,於是乎就一於整定一塊

做法簡單,我今日整好後仲用來炒蝦做午餐

煮意粉放一篤落去撈勻炒再加辣椒比自己,包包就食蝦同鮮番茄扁麵

如果想放耐d可以切成一粒二粒用保鮮紙包好放冰格

否則就只可以放最多兩星期

我用晒一塊牛油去整,大家人小的話用半件吧


食譜:

鹹味牛油    1件

蒜頭    2個

鹽    少許

油    少許(用來掃蒜頭)

香草   1棵仔
我用parsley

做法:

將蒜頭切一半,掃一層油加少許鹽及可加胡椒

然後用170度焗爐焗 25分鐘


蒜頭焗完軟身就可以壓成泥


牛油放軟到下圖既程度


加入香草碎及蒜泥撈勻


用保鮮紙包好做番個牛油造型放入雪櫃一小時就會硬番架喇








大少奶's Delicatessen

宣傳你的專頁

2016年8月23日 星期二

熟而不爛的實而不華

呢幾年好少焗蛋糕,有時焗完個蛋糕就衰咗

人生既時間要用來諗今晚煮乜餸比兩仔爺多過去好諗整乜蛋糕

當癮起時我都會整下既,但就要整d實而不華既蛋糕

好好食但賣相又唔見得特別,相信好難一個家有四個人下下都整個忌廉蛋糕或者整d糖膠蛋糕出來食

呢d心思用晌煮正餐對我來講會實際d

呢個香蕉棉花蛋糕就係實而不華個friend

你睇佢咪蛋糕一個,但佢其實係非常好味既蛋糕,但質感你覺得佢實在之餘但又軟熟綿密

加上少少濕潤,佢完完全全係滿分既蛋糕

我用了熟而不爛既香蕉變相用糖就可以減少又唔難整喎


食譜:

蛋黃   3隻

全蛋   1隻

糖     1湯匙

淡忌廉  40g

牛油溶液    25g

低粉    50g

鹽    少許

熟香蕉   60g

蛋白霜

蛋白   3隻

糖     45g

做法:焗爐預熱180

蛋黃、全蛋、糖打勻,再加入淡忌廉及牛油溶液攪勻

香蕉壓爛放入蛋糊中




分次篩入麵粉及鹽輕手拌勻備用



蛋白加糖打至企身,將蛋白加入麵麵糊中然後粉輕手拌勻備用


放入焗爐用170度 座水焗焗15分鐘,再用150度焗45-50分鐘






2016年8月16日 星期二

孖燉

之前晌萬豪酒店中菜廳食到近期紅爆大廚Jayson Tang師父既"椰皇雪蓮子燉鮮鮑魚"
由於鄧師父晌度講解個湯點做,講得太詳細我記晒入腦,哈
於是我又去搵雪蓮子啦、今日將冰山劈開個椰皇啦、緊急週圍搵鮮鮑魚幾檔都話無得一檔細細隻、偷了之前淆比個仔既雞湯
仲記得鄧師父話過椰皇要焗先會夠香、咁咁咁後我整到喇(但忘記了椰水同雞湯比例係2:1定1:2)
呢個湯好潤之餘好香,多d功夫都值得

第一時間要搵雪蓮子

佢係植物版燕窩重膠質,由浸開始你會發覺膠質比雪耳多好多倍
(網上資料:滋腎、健脾、清肝明目、潤肺止咳、祛痰開竅、潤腸通便、潤膚善顏、提神補氣等功效)

踏入秋冬要為身體及皮膚作最好準備

終於我晌九龍越海味店買得到,佢賣$30一兩,我買了 4兩,每次用1湯匙浸開就好夠了




食譜:

椰皇   2個

鮮鮑魚   隨意

雪蓮子   1湯匙

鮮雞湯        2碗

做法:

將椰皇水倒出,其實椰皇頂有洞一篤就可以倒椰水出來,我影相當然又要劈開個頂啦


將個椰殼放入150度焗爐焗,佢就會好香的


因為鮑魚燉得耐會好硬,所以我先將雞湯同椰水混合然後先燉1個鐘



將新鮮鮑魚洗淨然後放入椰皇內

加入椰水雞湯再燉一個鐘

因為我個雞湯本身都淆了好耐,所以我無燉太耐 ,飲之前加少放鹽


雪蓮子可以做糖水,其實又可以燉椰皇唔落鮑魚加冰糖

但我先燉木瓜

將兩個小木瓜切件,加入500ml水放入燉盅(可以分兩個)

然後加入已經浸發雪蓮子,及南北杏、一小粒冰糖燉1小時便可以


雪蓮子又名皂角米,晌海味鋪有售的

百幾蚊一小包但都夠用多次,用之前要浸幾小時的


浸後變成咁,浸既水都充滿膠質








大少奶's Delicatessen

宣傳你的專頁

2016年8月12日 星期五

龍頭


有一次我行一田見到龍躉肉得6片就九十蚊

呢個價錢令我好奇於是買來蒸比包包食

點知愛上了,當我愛上一種食物就會心猿意馬朝思慕想

第二日我就去街市搵,街市都唔係平好多

但將佢炸完再炆d魚實實淨個外皮脆脆就覺得…我們的故事愛就愛到值得 錯也錯的值得

愛到翻天覆地 也會有結果

炆呢個魚我仲加了燒腩肉、枝竹同用乾蔥、蒜頭、薑蔥去炆

真係堅好味的



龍躉腩    (我買了$150但唔知幾重)

枝竹    1包 (先浸軟)

燒腩肉    1條骨份量

乾蔥         6粒

蒜頭         3粒

薑、蔥  隨意

醬汁:

蠔油    1.5湯匙

生抽    1湯匙

糖    2茶匙

水    1.5碗

麻油    少許

酒    隨意(因為呀包食我無落)

做法:

龍躉肉買回來沖一沖水,再完完全全索乾水


沾上生粉,再去炸或半煎炸

用生粉去做係效果最好的



將香料及燒腩爆香加枝竹

然後加蠔油、生抽兜勻,最後加水煮滾後加糖炆15分鐘(可以試味唔夠鹹既話可以加少許鹽)

魚肉回鑊炆多5分鐘後可以加生粉水令個汁略為杰身

*因為魚肉脆身唔想炆太耐,你亦可以炆耐d但我又唔見議,魚炆太耐就會唔好食







大少奶's Delicatessen

宣傳你的專頁

2016年8月9日 星期二

扮晒嘢

今日扮晒嘢整…扮晒鰻魚飯

我成日晌FB見到一個日本網站有不同食譜

跟過兩次都失敗連我都失敗喎!幾咁難得,哈

但呢個扮鰻魚我幾有信心

佢用乜整?原食譜用豆腐同埋魚餅,那種魚餅係關東煮似發泡膠咁款既魚餅,香港當然唔知邊度搵

我就用墨魚肉代替,紫菜墊底扮魚皮,用鰻魚汁煮完再用火槍燒一燒個味道同質感都好似

因為裡面有豆腐做成少少滑既感覺,就同鰻魚既質感相近呢

大少爺見到叫我今晚整多次呢,包包咁細個就食過份子料理,哼



食譜:

紫菜   2片

墨魚肉   $15

豆腐   1件

生粉   2湯匙

鰻魚汁    大約兩湯匙

做法:

將紫菜剪成下圖咁既樣


豆腐同墨魚肉加生粉搓爛,千其唔好加鹽否則會出水


將墨魚豆腐搽上紫菜上,再用叉按壓成魚既花紋


放入鑊煎

要先煎魚肉部份先再反轉


兩邊都煎熟後就加鰻魚汁,慢火煮至上色及收汁

放上飯面後可以用火槍再燒一燒,最後再加少少鰻魚汁上面便完成








大少奶's Delicatessen

宣傳你的專頁

2016年8月8日 星期一

呃仔食豆腐

今界奧運我無得睇,意思係我無得睇直播

時差其實唔係問題,而係我唔可以好似4年前咁睇天光先去睡

家陣要湊個仔就唔可以自私,睇重播我又好難集中精神去睇

So Sad~~~~~~~~~~

我記得以前睇奧運每次都好集中精神甚至連街都唔會出

買定材料晌屋企自給自足咁,如今都一樣買定材料自給自足但就多了個包包

今日整醬燒豆腐豚肉卷,呢個堅好食

呀包食晒d肉同豆腐,如果就咁豆腐佢又揀起晒但連埋d肉佢又比呀媽呃

個醬汁係精華所在,好易整既呢



食譜:

豬肉片   大約8-10片

盒裝硬豆腐   1盒
(因為深山無得賣新鮮,所以我用盒裝,大家可以自己去買新鮮)

醬汁

生抽   1湯匙 
(如果用醬油做就唔使加老抽,用1.5湯匙醬油代替)

老抽   1/2茶匙 

茄醬      1湯匙

糖      2茶匙

水    2湯匙

*將所有醬汁材料撈勻

做法:

豆腐切成長條型,再用豬肉片卷起

*豆腐如果怕出水可以蒸5分鐘等佢出緊d水先卷起


將豬肉豆腐卷煎至金黃色


醬汁材料撈勻,然後就倒入鑊慢火去煮至收汁

期間可以兩邊煎下,上碟後灑上蔥花或芝麻







大少奶's Delicatessen

宣傳你的專頁

2016年8月3日 星期三

擁抱焦洋

近來一定係迷上捉精靈啦!但我未有比卡超所以非常之沮喪

其實我真係屬於爛玩既,不過…生完個仔後無得再爛玩

否則我真係會週圍捉

昨日打風雖然打得半日,但我早就存放定食物晌雪櫃

打足7日都唔使驚乜都執定d,包括早前晌city's super買了牛仔骨

但一直都無乜諗點煮,其實牛仔骨都係煎啦、之前做過中式牛仔骨啦

然後都唔知點整好,諗下諗下就做了焦糖洋蔥牛仔骨

焦糖洋蔥係將洋蔥煮到釋出糖份,然後呢加少少生抽、鹽就可以煮到個醬汁

而個醬汁既甜味就係由洋蔥而來,唔需要加糖的

雖然個汁料無乜材料,但炒洋蔥都炒近一個鐘,而慢慢炒,炒到變色再焦糖化

但大少爺話個汁好好味呢


食譜:

牛仔骨   4條(每條可以就番個骨位分件)

汁料:

洋蔥   2個(最好用大個的)

醬油或生抽   半湯匙

鹽    少許

水    半碗

生粉水   適量

做法:

牛仔骨用少許鹽搽勻再加少許生粉

將牛仔骨煎熟備用

洋蔥切幼條,鑊加少許油放洋蔥去炒,炒到轉色後再用小火炒



炒至甜味釋出(其實你會睇得到洋蔥或個鑊有少放黏就代表糖份釋出)

*呢幅圖係未夠的,但都開始轉色同埋少少糖份,再比心機炒耐d轉深色你會見到唔同



加醬油及兜勻加水及少放許鹽


加少放生粉水變杰身後可以放牛仔骨回鑊兜勻上碟






大少奶's Delicatessen

宣傳你的專頁