2013年6月29日 星期六

涼風有信.......麻醬雞冷麵


天氣好熱,有時真係無乜胃口

每逢夏天我喜歡研究涼菜

不過…我身體飲得太多凍飲,而家好易因為虛而頭痛及頭暈

所以我跟本係自己知道幾時要飲熱,幾時可以偷偷飲凍飲

湯水、涼茶都唔能夠太寒涼

唯獨食物我還可以

麻醬雞冷麵,用中式做涼,我終於研究到個醬

就係除了用芝麻醬外,要加醋、生抽、少許糖、小小蒜蓉、喜歡的可以加芫茜及辣椒

咁就會好好食,哼

今次用上海麵做冷麵,我呢d一向都好醒,煮好個麵放冰水攪掂

原來唔係囉!佢會變生勾勾既麵,即時硬左

所以用上海麵煙un,但唔好浸冰水,要同佢傾下計,等佢慢慢變涼,用稍涼既水沖一沖佢或啤水

配上涼浸浸青瓜及雞絲,Good

食譜:

雞肉,你可以用雞柳,用鹽同胡椒粉去醃,然後蒸熟切絲或手撕

青瓜切絲

上海麵,煮好放涼

重點:醬

中式芝麻醬   2湯匙

醋    半湯匙

生抽     2茶匙

糖    1茶匙

麻油  少許

水       2湯匙

蒜蓉     少許

芫茜、辣椒隨意

撈勻就可以淋上雞絲內,食時撈勻

如果份量大,就加倍去做,其實唔一定跟足,你隨意落試味,自己調較便可以

*加d睇戲要食既花生







Fans page仲有新blog. Click here and like --->   https://www.facebook.com/taisiu9

新facebook acct開始建立,慢慢upload上Fb、講飲、講食、講戰利品
仲會講祕密



2013年6月28日 星期五

蘋果乳酪日式咖哩雞


之前講過乳酪可以煮意粉外

      其實亦都可以煮咖哩,而最適合既咖哩配搭係…日式咖哩

      日式咖哩本身唔算辣,小朋友都能夠食得到

      再加人日式咖哩會加入蘋果,會令咖哩散發天然甜品,但又唔會甜得過份

      而且容易去煮,日式超級市場便可以買到日式咖哩磚

      只要用雞湯煮開便已經成功了一半呢

      十分方便快捷

      咖哩加乳酪其實都常見,好多時如果想咖哩變得厚滑,加乳酪係不二之選呢

      材料: 
      雀巢牛奶公司天然純乳酪 5湯匙
      


雞胸肉 2磅
      日式咖哩 ½(120g)
      日本富士蘋果 1個
      洋蔥 1個
      甘筍 2條
      雞湯 6杯


      做法:

      先將雞柳洗淨,然後切塊,飛水備用

      洋蔥切粒、蘋果及甘筍去皮切粒後,蘋果要浸水以免氧化發黃

      甘筍及洋蔥加雞湯煮大約10分鐘至軟身,然後加入雞肉煮3~5分鐘,再放入日式咖哩磚,咖哩磚煮溶後加入蘋果煮到翻滾後煮多3~5分鐘

      最後加入雀巢牛奶公司天然純乳酪即成

      *用乳酪煮咖哩個汁會香滑又去除濃膩感
      















2013年6月27日 星期四

泡菜大豆芽蘿蔔答問大會……第二回


大少奶發言:
首先,近日收到好多整泡菜既各樣問題
我想澄清一點:無寫過既程序證明唔使做,尤其d菜要唔要煮,煮左又點發酵?
一點完了


問:隻辣椒醬邊度買
答:City's super,之前都寫過,我晌City's super買


問:買唔到你隻可否買第二隻?
答:既然買唔到我買既,都要買第二隻


問:點解唔夠鹹
答:6湯匙都唔夠鹹?醃肉都只需要1湯匙,再鹹就同街外一樣太鹹


問:點解要落生果?只見過蘿蔔
答:生果係醃料,韓國人多用梨去醃肉醃菜,蘿蔔係泡菜之一,並非醃料



問:浸菜同幾多鹽?
答:少過1/4包


問:用邊隻魚露?
答:越南富國


問:唔食得辣用邊隻辣醬好?
答:泡菜用邊隻辣醬都係有辣味,因為辣醬係辣的,咁唯有唔用辣椒


問:如果用辣椒粉代替辣椒好唔好?
答:當然好,韓國人係用韓國辣椒粉,色澤都會靚d,但我用辣椒代替,因為容易調較辣度

*請用韓國辣椒粉,唔好走去用四川辣椒粉,忠於原著


問:d菜既水點隔都晌樹
答:唔需要擔心,好難全乾,有小小濕都無問題


問:d水係生怕嗎?
答:有濾水器既話唔怕,無既話用煲過既水沖下佢都得,甚至唔怕既話,唔使特別處理


問:會唔會雪櫃好大陣味?
答:唔會!用玻璃密實盒就唔會傳出味


問:可以存放幾耐?
答:我試過存放兩星期都仲ok,最重要夾泡菜既筷子要乾淨





記者會完畢~



今次整大荳芽菜同白蘿蔔

大荳芽菜洗淨,切個腳切走,白蘿蔔去皮切粒

用鹽水浸…兩個鐘

然後用食用水沖一沖,然後瀝乾水



用一個蘋果一個梨
可以 2蘋果、2個梨都得



將蘋果、梨去皮切芯再加蒜頭5粒、薑蓉少許再打,打成一體




打成蓉後可以加入大蔥1條切塊、再加…

韓國辣醬  6湯匙、魚露  6湯匙、辣椒  3隻(視符你喜愛既辣度),撈勻

就可以加菜撈勻佢,撈勻後加入玻璃瓶,放雪櫃然後2日後食得,如想再入味可以放足一星期,最後每日得閒翻動佢,令佢醃得勻循d

放入白蘿蔔同大豆芽菜





撈勻,放入雪櫃三日後食得,如想再濃味可以醃一星期,但三日都已經可以




韓國辣醬






















Fans page仲有新blog. Click here and like --->   https://www.facebook.com/taisiu9

新facebook acct開始建立,慢慢upload上Fb、講飲、講食、講戰利品
仲會講祕密






2013年6月26日 星期三

棉花糖


今日要去studio拍食譜,昨晚去半島酒店試菜又夜返

所以今日係post專欄稿

專欄今期係…棉花糖

題目係…別忘記包容…

婚姻最大元素…包容

喜歡棉花糖既輕柔感,軟軟、輕輕甜甜,人長大後負擔太重,好懷念棉花糖既自己

輕省而快樂

想睇食譜請到專欄觀看:

要完整的link才可以 :) http://www.tietheknots.hk/articles/別忘記包容





























Fans page仲有新blog. Click here and like --->   https://www.facebook.com/taisiu9

新facebook acct開始建立,慢慢upload上Fb、講飲、講食、講戰利品
仲會講祕密





2013年6月25日 星期二

狂龍2之龍蝦海鮮湯



 今明兩日將會忙癲,所以昨日我瘋狂地做自己想做既事

連續兩晚陪唔同大少爺晚飯,佢居然同我講:um....其中一晚我要食公仔麵

那一刻我當然瞪大眼望住佢,個口爭少少想講:想創你個心

不過收來收番句說話,因為...係我唔能夠陪佢

如果兩個出前一丁令佢開心,咁我會加包魚蛋同兩條菜比佢


昨日兩轉馬卡龍

晚餐又龍,不過係龍蝦湯

龍蝦湯我網上參考d食譜,都唔知邊d係ok

睇到眼花,於是就自己諗

總括來講:茄膏近乎每個龍蝦湯食譜都有,其次係月桂葉

咁其他就自己DI Y

呢個龍蝦湯非常好味,因為我用2隻龍蝦、半斤蝦頭、魚骨去淆的




食譜:

龍蝦 2隻

海蝦    半斤

東星斑既骨   1條

洋蔥   1個

紅蘿蔔    1條

茄膏    2湯匙

月桂葉 2片

白蘭地   1/4一杯

做法:

龍蝦你可以叫海鮮檔老闆代為處理及斬件,然後回家後沖一沖水,唔好拼命三狼咁洗,會影響蝦肉質感

海蝦挑腸,先切去蝦頭,將蝦頭留起煲湯,蝦身留待最後先用

魚起肉,用魚骨部份煮湯,魚肉切件後加

洋蔥、紅蘿蔔切粒粒

先用牛油爆香洋蔥及紅蘿蔔,然後放入蝦頭、及龍蝦,兜到龍蝦轉色贊酒

然後可以熄火,先將龍蝦肉起出(龍蝦肉煲完會無晒,但其實真正鮮味係蝦殼及膏)






加1.5公升既水入鑊,開火滾一下,加入魚骨黑胡椒及茄膏、香葉,當佢滾起時倒入煲中

(因為爆龍蝦等材料時,好多精華黏到鑊上面,加水去滾係原汁原味,當然你可以一開始用個煲做,但我個煲高身唔太方便)





煲滾後轉小火煲2個鐘以上,當然用高速煲既話,用45分鐘就可以熄火排氣



煲好後…將蝦殼、魚骨等等隔走,用手動blender或者攪拌機打一次,打成濃湯

放回煲中,呢個時候可以加回龍蝦肉,預先留起既蝦、同魚肉,再滾起時海鮮剛熟,加鹽試味

*你臨食前可以加d淡忌廉,但我覺得個湯打完之後已經滑同埋濃味,所以無加




Fans page仲有新blog. Click here and like --->   https://www.facebook.com/taisiu9

新facebook acct開始建立,慢慢upload上Fb、講飲、講食、講戰利品
仲會講祕密



2013年6月24日 星期一

狂龍


星期六去學整Macaroon,令我燃起一團火

一直都唔肯試整,甚至有Vanlily咁好既老師都唔去學

估唔到一個event讓我那把火燃起,仲要唔係一把,係把幾火.......咁多

昨日同大少爺返完教會,去買材料

講真…我第一次自己整,加上個人唔衰得,採取敵不動 我不動既政策

先去體驗下去學那個食譜先

當熟手我會整好多唔同味,因為我瘋狂愛上了整macaroon

我會整咖啡、古力、希望整埋抹茶,總之乜乜物物都整



第一次不敢寄厚望,因為我個焗爐火力大猛實在難以捉摸

*我個爐火力大,導至14分鐘後個底會焗深色了少少,所以下次我會再低d溫度焗,焗佢多幾分鐘


*1700 忍唔住做多盤,Round 2色較深,餡厚了







Round 1太淺色



食譜: 6個

蛋白   1隻

糖    25g

杏仁粉     30g (烘焙店有特幼杏仁粉)

糖霜     55g

色素    少許

做法:

先將糖霜同杏仁粉混合,然後壓至無粉粒,你都可以過篩

將蛋白打起,然後加幾滴色素



將杏仁粉+糖霜分次加入,Fold到佢混合



當Fold完後會比較結實,用刮刀輕輕按壓佢到光身

質地如下圖,有少少流既效果




唧上牛油紙或不黏布




用風筒吹,較細既暖風吹佢大約10分鐘

吹到表面啞色同埋有少於凝固既狀態



放入焗爐 140度焗14分鐘

重點係…你個焗爐要同你好friend,因為爐火係關鍵




朱古力餡夾心

黑朱古力    100g

淡忌廉 100g

黑古力加cream座溶攪勻,放室溫放涼



Fans page仲有新blog. Click here and like --->   https://www.facebook.com/taisiu9

新facebook acct開始建立,慢慢upload上Fb、講飲、講食、講戰利品
仲會講祕密



2013年6月23日 星期日

藍精靈與Macaroon


藍精靈、十分勁

從來無打算學Macaroon

Vanlily教過我幾次,每次我學既途中都係整蠱佢,又一係滋擾佢,跟本無學到

但其實內心又唔輸得,萬一學唔識,我大少奶仲使行走漿糊?

今次終於學到,仲要發現原來唔係想象中難,不過當然我要看看自己焗爐個爐溫啦

一學學藍精靈版本,對於一個只懂畫眼線既人來講,不敢想象

後來發覺得得地喎,我起碼唧個餅型同埋畫個框都可以丫

點解會學藍精靈版本,因為一個Event,因為藍精靈套電影就快上映,公關朋友話有個整餅班問我有無興趣

於是去relax心態去學呢

好好玩,我會盡快自己整一次圓形版本然後寫食譜分享,等多一日,祝我成功!我覺得好靚又好食外脆內軟



原來都唔難,加上打蛋白係我強項









打完蛋白加色素,我真係好喜愛打蛋白



Fold in也是我常做的


原來有呢個步驟,令佢更加幼滑,個表面會更靚



好緊張,預備…唧



張想模紙放底,然後放牛油紙上面唧

初初唧我好驚,後來就變得容易呢

跟住用風筒吹十分鐘,然後先入焗爐




都幾光滑靚仔,滿意


我將剩餘做個圓型,好靚啊

令我決心自己去整


好心急自己整

不過擔心唔得,因為你要同個焗爐好老友

而我個焗爐太猛火

希望可以啦啦啦


上色,又係好難

用icing sugar調色,但我畫野真係


好彩車人晌我身邊,我畫帽同圍邊

佢幫我畫眼呢d細緻位





好開心!第一次整馬卡龍,仲要多謝車人幫忙

但我d邊都畫得唔錯,果然畫眼線係好有幫助,哈


暑假藍精靈回歸,好興奮,好想快d有得睇啊

片名:《藍精靈2》
上映日期:8月1日







2013年6月21日 星期五

瘋枝


我決定今日去街,先去做d私務,下午放自己假

昨晚我出去晚飯,買了堆衫,發現原來當你知道往後一段日子有衫著,係會放下心頭大石

然後更起勁工作

哈~所以…我理論係good

昨日下午終於買今年開齋既荔枝

我呢d人係自殺式地食荔枝,每年總會食到生晒紅點先識停

所以一係唔好比佢開始,一係就沉迷下去

昨晚食完,而家又想食

好彩我個人學懂儲蓄習慣,將幾粒做成果凍,今日仍有得食

桂花+荔枝味道係好夾的,呢杯果凍真係好好食

張相重點係我想告訴你…佢係堅的,不是流的

好喜歡這張相呢

食譜有人需要才寫,我咁忙仍堅持出blog寫食譜,但當無乜人有反應,我就覺得有點失落

倒不如真的想要才加吧

食譜:2~3小杯

荔枝    8粒 (脫殼及去核)

桂花   2~3茶匙

熱水   250ml

糖      適量

魚膠片  7.5g -10g (如果想整糕狀就10g,如想jelly狀就7.5已經可以,魚膠粉同魚膠片同等份量)

做法:

先將桂花放落熱水度等佢出味,用冰水浸軟魚膠片

然後加糖,要加白糖或冰糖,否則顏色無咁靚

然後將浸軟既魚膠片放入桂花水,倒落小杯,最後加荔枝,放雪櫃雪到凝結


Fans page仲有新blog. Click here and like --->   https://www.facebook.com/taisiu9
新facebook acct開始建立,慢慢upload上Fb、講飲、講食、講戰利品
仲會講祕密

2013年6月20日 星期四

變超人(酸梅湯)


晌寫新書既日子,發生了一件災難

呢件災難等於小朋友砌Lego,砌到個巴黎鐵塔咁高既大廈,突然散了

又或者公司剛剛上市但要破產

再貼身d當你化好妝後,突然一盤水淋落你個頭,成個妝溶晒

而我…一個作者寫書期間部電腦……瓜柴

好彩…我有班好好教會弟兄,一個熱血年青人救了我一命,用送信純熟迅速送出既速度幫我晌Hard disc抄番份稿

否則…我今日應該滿盤皆落索

而家用緊大少爺部電腦,十分唔慣,呢個星期去買過部新電腦,要用一部好快電腦我寫書先會寫得開開心心

雖然我抄番份稿同陳豪張合照,但心情都麻麻

決定去行街散心,乜都唔做埋頭苦幹買野,哼

今日天氣好好但又好熱,煲寫酸梅湯雪凍比大少爺飲,讓佢消暑消暑

晌日本買既水瓶終於出場,超Like




煲酸梅湯好易,你去藥材舖買$20,佢會執比你

有烏梅、山渣、甘草同麥芽

用個筲箕盛住沖水,沖完後放落煲大火煲滾、然後細火煲1個鐘,熄火加片糖或冰糖

重點:其實兩個人買$10-15已經夠+2000ml或2500ml水

我買該$20煲成3000ml水,應該夠我變超人




Fans page仲有新blog. Click here and like --->   https://www.facebook.com/taisiu9
新facebook acct開始建立,慢慢upload上Fb、講飲、講食、講戰利品
仲會講祕密

2013年6月19日 星期三

腐腐得蒸(肉醬豆腐)


近日太忙,加上早幾日唔舒服

令我煮晚餐更加no idea

但我唔食…大少爺都要食

同埋我話過無論點忙都好,都唔可以忽略佢

無佢…跟本無大少奶既出現

為免佢唔再覺得我係超值…我一定要保值,保留做太太在先生心目中既價值

至少都要佢放工返屋企有住家飯食

佢既健康先係我既一切

不過矛盾既係…近日我忙到連自己唯一娛樂去行街食野都無時間,煮飯既時間更加小

要晌我回家短短時間內煮餐飯的確唔易

而且…我近日堅累,寫書的確用晒我腦汁,加上我跟本連自己想食乜都唔知

昨晚決定快手快腳蒸豆腐,豆腐係我呢幾日突然想念既

講真…平日我對豆腐唔太起勁,但呢幾日好想食,加上方便,蒸完食得所以就整啦啦啦

我決定炒個肉醬配豆腐,我唔太喜愛麻婆豆腐,先蒸好豆腐配上肉醬

個肉醬用炸菜、芫茜、蒜蓉、肉碎去炒,仲加辣椒

配上清甜豆腐好好食,今晚想再食

食譜:

豆腐     2盒

炸菜切碎    半碗

芫茜           1小棵

蒜蓉           1茶匙

辣椒仔        1隻

肉碎             1碗

汁料:

生抽              1湯匙

水                    半湯匙

老抽              1茶匙

糖                    1茶匙

鹽                     少許

麻油                少許

另備生粉水

做法:

肉碎先用生抽、糖、少少鹽、胡椒粉、酒、生粉去醃

然後預備炸菜碎、芫茜切碎、蒜蓉、辣椒等等,其實你如果喜歡加冬菇、或其他配料都可以

先爆香豬肉再加配料去炒,然後將汁料撈勻倒入去肉碎同炒,滾起後加生粉水,煮好後淋上豆腐面



豆腐我用 Miele steam oven蒸8分鐘,pure steam既豆腐好甜

同埋近日好彩有呢個蒸爐,一層蒸豆腐或餸,一層蒸飯

我完全放晒入去就攪掂餐飯咁滯,有時仲會蒸埋菜呢

Miele獨立式蒸爐內有3層蒸盤層架及特殊換氣設計,同一時間蒸三款食物,味道也不會混和一起,烹調方便快捷。同時烹調多層食物,最適合一人烹調整頓菜餚,既省電又省時。進行烹調時,用戶可隨時打開機門,加入其他食物烹調。關機門後, 溫度會調至己選擇的溫度,才繼續開始計時。






2013年6月18日 星期二

再蹄(燻蹄)


有d事唔好提,但人生總有d值得提

我早兩日病鳥,發燒同極渴睡,然後昨日安然出晒敏感

太累了,近日我都半夜先去睡,因為d稿都幾趕,結果…估唔到我會因前咁而病

都話我個人唔辛苦得架啦啦啦

所以而家要調節自己最遇12am就要入睡,唔好比自己再慣性捱夜

不過…趕稿到半夜係極度型既事,夜晚真係容易寫到野

日頭個mood爭好遠呢

早幾日最忙時整埋燻蹄,我話過一定要再整

之前整過…但因為我加太多滷水料,攪到好似……敷了跌打藥的豬腳一樣

感覺唔太完美

今次減少好多滷水料,剛剛好

整燻蹄個感覺幾得意,你無啦啦晌屋企都整到,又係型既事

今次幫團契做的,我同大少爺都只分得一件兩份食,哈




今次醒,用5粒八角、兩片香葉、一片桂皮、幾粒丁香就算

上次用半包滷水料太多喇

仲有3湯匙粗鹽同兩湯匙紹酒

水既份量只需要蓋過豬手便可以


食譜:


新鮮豬手   一隻

5粒八角、兩片香葉、一片桂皮、幾粒丁香、粗鹽  3湯匙、紹酒 2湯匙

薑、蔥


先煲滾水,水份量蓋過豬手,然後放薑、蔥、紹酒出水,大約煮20~30分鐘

然後再開一煲水,水份量要蓋過豬手,然後落香料、薑、蔥、酒,鹽煲滾,落豬手

煮滾後熄火,然後靜置佢8個鐘或過夜,期間唔好攪佢,翻滾後熄火

跟住放涼後起骨,起骨後用保鮮紙包實,扎到最實,最好用幾張去包,最後封上錫紙,放雪櫃一晚

浸好後既豬手好易起骨,唔使擔心

另外…配燻蹄既醋汁
白醋2湯匙、加糖半湯匙、加蒜蓉、辣椒,然後加1湯匙滾水令糖溶化便可以



起骨後卷起佢,要卷實同札實,雪一晚便可以切片了

切片後加少少麻油上面會好食的





Fans page仲有新blog. Click here and like --->   https://www.facebook.com/taisiu9
新facebook acct開始建立,慢慢upload上Fb、講飲、講食、講戰利品
仲會講祕密