2012年3月31日 星期六

Tasting@ Chef studio by Eddy


早前個澳門trip認識左不眠王子,大家有傾有講

之後返香港,佢邀請及安排一餐晚餐

有KC、meling、issac、yan、愛麗絲、王穎同埋我

一行八人,去香港仔工廠大廈裡面既 Chef studio by Eddy

無錯!呢度基本上係廚藝學校、晚上就招呼朋友,要訂位去Facebook訂,但未必有位比你、亦未必招呼你

Eddy話,openrice無啦啦開個account比佢,佢反而想cancel acct

所以我純粹分享,至於你訂唔訂到、就要上佢地facebook問問喇

多謝不眠王子安排呢

Focaccia




地方都唔算好大,只招呼到20人左右






自家種香草同Romaine




廚房開放式





外脆內軟既Focaccia



北海道帶子carpaccio伴海膽

帶子carpaccio係意大利既刺身,呢個個sauce好清,唔會搶走任何食材既味道



香煎鴨肝蒜香炒直菇

鵝肝用粟米粉,粟米粉not粟粉,係粟米磨粗粒粉,再煎

表面會更加脆




西洋菜大蝦泡沫忌廉湯

無錯!係西洋菜




低溫慢煮三文魚伴忌廉燴大蒜

呢個好滑,其實三文魚用呢個做法係最好味,夠滑



燜燒和牛面頰伴燒小牛排

牛臉頰係深色既,佢燘完後個牛臉頰好軟身之外,感覺有少少膠質

小牛排都好得!牛魔王超愛




自家制芒果雪葩

用一個玻璃瓶去裝,裡面仲有 Forzen鮮果




多謝不眠王子安排

第一次見既星級blogger nice to meet u all~

至於大家訂唔訂到位及要幾錢,要去facebook問呢!

2012年3月30日 星期五

復活節前奏(附 Egg Benedict食譜)




復活節快到
我唔知你點睇復活節,但在於基督徒,復活節既意義不在於假期

係當中意義


小時候,幼稚園的歲月,老師會用玻璃紙包住隻雞蛋
然後放晌課室唔同角落
然後我地去搵,當時年紀小小既我,拎住隻蛋返屋企,媽咪拆開係一隻蛋
當時既我都有失望,小小年紀已經不甘平凡

幸好,爸爸每年都買古力復活蛋比我,多數係兔仔型狀,裡面空心既

到我好大個,爸爸仍然會保留呢個傳統,每年送復活蛋比我

而我常會諗,點解復活會節有復活蛋

唯一同蛋有關係最後晚餐裡面有隻蛋?


又或者蛋係代表生命?

um...我唔會去考研復活蛋,但仍會用呢個蛋做既eggs Benedict 去代表啦

呢個係之前做得唔好,影又唔好既

所以我永不放棄去追求完美,今次做得好、影得都好呢

如果你真係認為復活節要有復活蛋既話,就送你一個用蛋做既食譜吧

波蛋做法:

用飲用水倒入平底鑊內,水要蓋過蛋面

用慢火將水滾至出現蝦眼,將隻蛋先打入隻碗中,然後慢慢從鑊邊倒入鑊中

慢火煮1分鐘,離火浸8分鐘(要離開個火爐頭,否則餘溫會令蛋過熟)

輕輕用篩撈起,隔水備用


荷蘭汁 (二人份)


無鹽牛油溶液  2湯匙

蛋黃2隻

鹽 半茶匙

檸檬汁  一湯匙

胡椒    少許 (最好用白胡椒)

做法:

先將蛋黃、鹽、檸檬汁、胡椒用電打蛋器打1分鐘

將牛油溶液放入鑊,用細火輕輕煮熱後熄火 ,慢慢倒入蛋黃汁攪勻直至變杰身

鑊唔能夠太熱,否則蛋黃過熱會起粒

可以用鬆餅、黑麥包做底,加入火腿、放上波蛋,再淋上荷蘭汁




上年我參加過受難節前夕晚餐,呢個係仿當時耶穌既最後晚餐

有羊脾、無酵餅、苦菜、乾果、雞蛋、葡萄酒

食呢個晚餐有好多禮節,好難忘

食完後參加崇拜

今年我唔會參予呢個晚餐,因為.................................



今年會去camp,一個簡直係大大大挑戰既camp
一個唔可以用電腦、用電話、睇電視既camp
仲要係大少爺唔會去既camp
但越大挑戰可能對自己在信仰上有更大幫助


其實個camp係似希臘小屋咁架!好靚
不過…係要我地遠離一切電子誘惑,專心去學習呢

復活在我 生命也在我 信我的人 雖然死了 也必復活





2012年3月29日 星期四

信不信由你(附蛋白杏仁露食譜)


近日好忙,我屋企進行希望工程,所以要好好安排一下

呢段日子可能會多post外食

要個廚房攪掂先可以再整其他

之前咪潮濕既,咁個人好濕熱又腫腫地

咪起勢煲去去濕湯飲

原來去濕湯唔飲得多,會令皮膚乾架!噢

唔怪得之我塊臉有酥皮啦!

跟住就不停諗到底有乜養顏野

就係蛋白杏仁露,其實我教過好多次

但今次想話你地知…杏仁磨完可以磨砂

信不信由你,反正我信了

首先食譜

龍王杏    3兩

北杏 2兩

蓮子 隨意

冰糖 適量

蛋白 一隻

白米 半嘜(糊狀係全靠白米)

做法:

杏仁略浸,蓮子略浸、白米最好浸數小時

將杏仁同白米放入攪拌機、加入水750ml、打至杏仁碎晒,隔渣

放入煲加蓮子煲滾,轉慢火滾15分鐘,或至杰身,熄火加入蛋白攪勻





龍王杏係大粒既南杏


好!杏仁渣有乜作用

我用來磨砂

但注意:

你皮膚無敏感

你信得過你所買既杏仁

你明白天然既材料有最好功效

首先可以磨下雙手,睇下效果

有信心可以磨臉

你會發現有光澤仲滑左,杏仁甚至可以做mask,加奶、純乳酪等等,可以上網查考資料




我好信天然美容,原因係當年有本"青春"

裡面有個專欄 Fi Fi & you,專教人美容

佢出過好幾本書,而家已經無得賣,我擁有既都遺失了

當年我滿臉暗瘡,都係跟呢本書去醫,而家無人發覺我塊臉曾經瘡海

佢教既粗鹽治暗瘡,我教過好多人但無人信我,個個都會驚訝,呢點我幾失望

我搵過圖書館有得借,可以去借,賣就無得賣了

睇完呢本書你會發現好多祕方,薯仔去黑眼圈、粗鹽去暗瘡等等

有時間借來睇吧

網上有佢成套系列既簡介,上網search FiFi and you吧

天然美顏自自然然的美麗泉源
女性至高境界的美,是自自然然不著痕跡的,而創造這種令人羨慕的氣質,不靠昂貴的高科技美容產品,而應借助大自然的力量!

天地之大,蘊藏了無數能令你皮膚光潔美麗動人的天然物質,你要做的,只是把它發掘出來。




當然我仍會用skin care,天然美顏要自製,有時花不少時間呢





2012年3月28日 星期三

um.......@豚王 and The excelsior hotel


今日好忙

寫下外食篇

話說上星期無啦啦我得閒得滯唔知做乜好,就叫事頭婆半日安

再約埋呀繼去吃喝玩樂

於是就揀不如先去試豚王再去怡東食tea

豚王銅鑼灣分店無中環咁多人,我從來唔會屈服一間食店之下

你要我排一餐去食既話,No way~

又聽過d人話怡東個tea set抵食又好食

於是心癢癢啦

於日開心去三人行,行完街再去食

跟住呢

um....我揀豬骨湯叉燒麵,麵揀普通

但係個麵淋左,失望,叉燒係唔多肥肉,夠軟身

不過…反而值得讚既係…佢有自助式辣芽菜任添加,個辣芽菜又的確唔錯啊



隻蛋係我最滿意既




呢個係事頭婆既赤王,佢話一般





The excelsior hotel既tea set

成棟野,係成棟野最好味得一件類係拿破侖既蛋糕同三文魚多士


成棟得兩款好味喎

最離譜係最近餅頭個原來係Quiche,唔太好食




呢個係Parma ham & Rocket pizza

我覺得佢好唔得,佢似"Peter 克"既peter

個ham唔似係parma ham





呢篇你睇到嗎?





2012年3月26日 星期一

正宗糯米雞


終於選完,終於都選完

但選完,唔代表個結果係滿意

琴日微博、FB都係見到朋友們既嘆息

無錯!係嘆息~

只能期望明天會更好,你好我都好吧!唔講689,講我琴日玩過乜

之前整富貴雞,我同大少爺都愛上煨到爛既雞肉,我唔知你地明唔明我講乜

即係d雞肉變成鬆化,骨都軟埋既呢!

但富貴雞唔可以成日整,我覺得富貴雞列入請朋友回家食飯既驚喜菜式

如果我再整得多,只得驚無喜,所以諗下從呢個方面去進發,但又有新意思既

於是諗不如試下用荷葉包住隻雞去蒸,裡面改為糯米飯、蓮子等等

即係似八寶鴨,但係我又唔太like鴨

所以整左荷葉糯米雞,之前我整過點心版既糯米雞,係糯米包住隻雞

今次係雞包糯米包,好味架

蓮子好甜啊!仲有菇,雞又嫩滑

但係我用高速煲整都要一個鐘

如果明火蒸要3個鐘,我知…你地實話浪費火力嘛

但人生總要有新嘗試的呢~我同大少爺都Like呢個版本

食譜:

雞   一隻

生炒糯米飯 一碗

瑤柱   幾粒浸軟

蝦米    1湯匙  (浸軟)

蓮子   1湯匙   (浸洗)

菇   隨意,可用冬菇或乜菇物菇


醃料:

老抽   1茶匙

生抽   1茶匙

紹酒   1茶匙

鹽 半茶匙

糖     1/4茶匙

薑汁 1茶匙

另備:

荷葉   一塊

做法:

將雞洗淨風乾一晚,將醃料上所有材料都撈勻搽上雞內外然後放入雪櫃1小時

將生炒糯米飯、蝦米、蓮子、瑤柱,菇塞入雞腔中封口

然後用荷葉包好,用高速煲2號蒸1個鐘、減壓排氣後取出,剪開荷葉上碟

而用普通鑊就放上蒸籠蒸3個鐘或以上,期間要睇下有無乾水,補水




未撩爛時,個面淋上雞流出既汁,味道剛好,個糯米飯係生炒糯米飯,其實個雞真係希望工程咁大架




Look






我用Fissler高速煲去蒸,其實都要成粒鐘

如果明火蒸就要3個鐘或以上先做到個效果

但係又一定要隻雞軟晒先叫完成



喂喂!近日我又開番個微博,有興趣就粉我吧!http://weibo.com/aubreydelicatessen






2012年3月24日 星期六

女人有話兒@Mist pizzeria






今星期好過份,過份地忙、過份地post外食
但有時我又覺得,食物既相片好靚

即使你地當圖畫睇都好丫!哈哈

Mist老闆娘 Belle邀請我同vanlily去食Peter仔(pizza)

佢晌意大利訂了一部機返來焗pizza

其實呢…即使唔試食,我同老闆娘都係傾得埋,我地主要天南地北多過講食物,我就係愛呢種感覺

所以呢餐午餐係好女人有話兒咁囉~哈哈

呢塊餐牌…型!地點晌沅紗街




呢個係我會試整既,我信我估到點整,而家我專係將餐廳食過既,然後自己鑽研一番

佢係一個黑松露磨菇溫泉蛋,但底係一個濃濃既磨菇汁咁,但係呢又唔係湯,總之撈埋食係好味

而我一定會試整呢!

其實係將佢撈埋食,但我覺得撈埋會浪費佢既靚,所以無撈得好勻

下星期試整!等我




生牛肉!i like it

牛肉控既我,去邊都要牛肉一番





呢個沙律,靚,但我無食,側邊有蜆凍



白露筍蝦湯

味道清清地,唔膩





呢個蔬菜pizza,而呢度peter有乜唔同

我整既好脆,但唔夠鬆

呢度既係少少鬆既,唔會係死實實既脆,睇個邊就會明我up乜

個茄味清新,配合得幾好

個茄醬係新鮮茄味,唔係我自己整既茄醬味,爭好遠既


但我更愛呢個

呢個係魚籽蟹肉pizza

我超愛

但係你要留意,我係好愛anchovy d 鹹鹹香香

而呢個乾魚籽就似anchovy 種鹹鹹香香味,我受得覺得好

如果唔受得呢!就唔好勉強

我鍾意呢個peter係因為佢夠鹹香

如唔愛濃味呢!選擇其他較好



呢個意大利雲吞,用菠菜汁去做個皮

係似水餃,餡係雞肉,側邊有開心果醬

唔錯!




呢個淡水龍蝦仔蝦意大利飯,蝦好味

上桌時見到感覺開心




你估下係乜?




塊古力片係放落熱古力度,然後會變成咁架!我無得飲,好想飲,因為我戒40日古力啊

另有一款係細杯espresso




呢個古力蛋糕vanlily超讚,但我無食,我唔食得古力直到復活節




呢個甜品呢…個波波係果行雪糕,加咖啡食既


我都無食,又係呀vanilly一臉幸福咁我同講:好味呀


而我食左呢個橄欖雪糕,好滑,感覺係濃滑
但又唔太甜
好味





2012年3月23日 星期五

MR.Gordon (補加食譜)


今日我又出街,其實好累,但今日決定去CWB豚王拉麵,再去埋Tea

然後…我要四月中先再得閒喇

所以今日要用盡全力吃喝玩樂一番


今日我要介紹 Mr.Gordon,哥頓先生

佢美味

細個曾經吃過,那時候爸爸話有雞有芝士有火腿,到上桌時我問點解唔見火腿同芝士?

爸爸笑而不答

我切開後就發現原來藏晌裡面

現在我自己做得到,做時點點回憶令我微笑

知嗎?我多數大笑、喪笑、爆笑、指住人來笑,微笑.....是很難得的

當牽動了心裡美好回憶的點滴,就會自然地微笑

感謝令我有著微笑回憶的每一個人




食譜:

雞柳    6件

火腿    6片

車打芝士  6條厚身

麵包糠   適量

雞蛋    1隻

做法:

將雞柳拍扁,然後用鹽、胡椒、醃味

醃30分鐘或以上後將雞柳放平,鋪上火腿及芝士卷起,用牙簽串實

塗上蛋漿,唔使太多,足夠便可以,沾上麵包糠,放入冰格雪45分鐘(可以定型)

用220度焗 20分鐘,或至金黃色

芝士我用一磚磚既車打芝士切條,可以隨自己喜愛去切份量

2012年3月21日 星期三

飯局@養和醫院



一向寫外食都係分享,唔係食評

但我決定呢篇寫食評

哈~我去探朋友D,朋友小小唔舒服,我就同另一朋友M去探病

我晌養和醫院出世,之後未再試過行入去

反而法國醫院、港中醫院、瑪麗醫院都住過

攪到我入去養和好大件樹,仲有dd興奮(變態的)

我出世時得舊院,而家當然搵唔番我住過間房啦啦啦!哈

夜晚去探朋友D,正值晚餐時間,於是就同朋友m去canteen晚飯

因為據聞住跑馬地既人都會落去買外賣

好!去片

Caesar salad,菜夠新鮮,重點個醬,唔係一般好漏好濃

佢有黑椒味,酸度剛剛好!芝士唔太多

但個菜新鮮到令人開心



忌廉粟米湯

個湯唔杰,唔會好似糊狀,但夠濃

感覺佢係用奶既份易多過忌廉,麵粉唔多

夠熱!好熱熱,餐包軟熟



我既牛扒,um....我自作多情,見牛食牛

有飯、意粉及薯蓉揀,我要薯蓉

雖然有汁,但個汁分開上,個汁唔係好鹹

塊牛當然唔係我愛既款式,但至少唔係梳打粉牛牛

有椰菜花、西蘭花、甘旬粒!有鹽味

牛扒會問你幾多成熟既呢




朋友M,煲仔雞飯

個雞好得、夠滑、即煲 等45分鐘

飯有少少濕,但簡直係名物

我晌法國醫院都食過雞煲飯,相比下…呢煲好d

仲有甜豉油添

*雞煲仔飯有兩款,一款鮑魚雞球飯,無骨既

一個雞煲仔飯有骨,即係呢個呢


甜品:

jelly,好可惜係橙味,我問有無非橙味,佢話無,扣分!我最怕橙味!

朋友M紅豆沙,無問好唔好味




個jelly居然係我馬仔,佢跟我既...................

哈哈



朋友D個老公食焗豬扒飯都話ok架

2012年3月19日 星期一

Day 2@Galaxy Macau









第二日,先去食早餐
個早餐好得我歡心,尤其係…麵包

本身呢…我無打算食,仲同PR講:10am唔見我就幫我斟定杯果汁

PR:咁你要乜果汁

我:um...我唔飲橙汁、蘋果汁都唔太like、菠蘿汁就ok,但無就蘋果勉強接受

哈哈

好得寸進尺

之後朝早都好施施然起身、化妝之際見到不眠王子晌FB check in仲話早餐好多選擇

於是…我裙拉褲甩走落去餐廳,哈哈

早餐@群芳




麵包都好多款式,好開心感覺

早餐來講佢好多選擇,同埋每樣都唔錯




食完早餐後…就去參觀Galaxy旗下酒店

先到銀河既高級套房,有兩種款

第一款感覺trendy d




酒店房洗手間既用品設計,細心睇係砌出酒店外型既

我用完既時候無發現,唔太細心既我





第二款傳統d四四正正格局,我覺得似結婚出門既格局
一張長椅,斟茶既位,哈



Banyan tree

首先去睇village版先,一條路經過人造沙灘

然後條路好靜,開始進入渡假feel


到了!佢係一間獨立套房




房內夠大之餘,有私人泳池同埋spa房

無錯!你可以召美容師到房替你做spa

個私人泳池好吸引







當然,仲有其他客房

Banyan tree既客房全部係套房設計,房內都有私人浴池

好想住呢間啊

Banyan tree酒店一入大堂就有香薰味,係香薰

香薰油既香薰,好舒服既味

並唔係某d酒店會有洗手間香精味

較細既房,個池細d、大d既房個池大d




房內有小食架!好想試



之後過大倉酒店,大倉酒店係日式既

大堂會有日本人做接待,唔同季節唔同和服既呢



酒唐房既設計柔和一d




跟住係午餐時候,其實行三間酒店都花時間,因為太大

午餐@葡軒




招牌菜式:黑毛豬火腿

肉質較一般parma ham有彈性,唔太鹹



馬介休焗薯蓉








葡式乳豬

對於唔太食豬肉既我來講,豬味太重,我食一啖就唔食得到

但問題其實在於我,因為我怕豬肉

佢其實肉嫩、有肉味

我認為可以更好,因為個皮唔係我想像中咁脆

仍有進步空間




炒飯





麵包咖哩雞,個包好出色好脆,咖哩好濃



木糠布甸,Like



之後又去睇酒店裡面既名菜同茶道

@山里

神戶牛

神戶牛係唔輸出口,唯一供應比Galaxy

如果我同大少爺去,一定會去山里食飯





指定証




總廚:淺召澤先生




試味!我愛牛,牛肉無論如何都美好既!哈哈



呢個我覺得似.....山根

其實係茶道房

KC話佢去過睇茶道,時間係好長既

雖然我去過多次日本,以我份人又急又燥又坐唔定,首先要長期訓練完先睇得






茶道師好優美地示範,面帶優雅微笑

我真係要學下

有參觀同親身體驗既時間,我會補加資料



有和果子配茶,可惜我錯手del左茶既相!嗚~

但杯杯好滑,感覺似抹茶Lattle啊



裡面仲有個日式花園啊



之後去清酒吧

一個品嘗清酒既地方,清酒有好多種類

清酒師係美女Fu Fu







裡面有一個$150五杯連一個前菜既 Tasting menu

即係呢個

味道由淺入深

你睇頭兩隻杯無晒,係因為好飲,我飲晒,甜既呢

之後開始濃,講真我唔太愛酒既味道,所以老實講我無乜認識

不過每杯我都有試,因為我覺得要有參與精神嘛




呢個小食係配第四杯,個魚子帶咸味,再飲清酒會帶出清酒甜味,好既配搭




跟住出大堂休息,配合復活節有古古力兔啊

仲好多款古古力添




跟住再去群芳晚餐

晚餐自助餐當然較早餐更豐富,而且講真味道的確唔錯

至少比一落千丈既香港JW好,我對JW變差耿耿於懷

群芳多選擇,都係唔錯嘗試

最驚喜係有全隻烤羊,更難得仲好嫩





乳鴿啊!無頭架!開心!哈哈~不過乾左少少,但都令我開心

係半隻上添啊

烤羊脾位好味

仲有剌身

生蠔有澳洲同法國,近年我愛法國蠔多一d




兒時回憶……


甜品櫃、仲有雪糕櫃

甜品櫃由師父取餅較好

你知啦…有d人好鍾意撩爛塊蛋糕,同埋取走蛋糕上既生果、creme brulee就拎走塊焦糖

而家肯定唔會出現呢種事




好味



甜品多款,可惜我興奮過度out focus晒



本來仲去睇3D電影,但我唔太鍾意睇

而且事頭婆過左澳門,所以我同事頭婆出街呢

LastDay @ Galaxy

第三日到百樂門早餐,係潮式酒家

味道好好啊!各款都唔錯尤其紅蘿蔔造型既鹹水角




同各blogger食完早餐就各自走,繼姐朝早都過來澳門

我同事頭婆,繼姐繼續週街亂食,但遲下再介紹啦!


Btw....多謝Galaxy邀請,整體來講,好開心

順帶一題:第一晚我覺得枕頭好軟,唔慣,後來有關方面跟進,原來枕頭有四個硬度,所以大家入住時記得要request自己枕頭既習慣硬度啊

同埋呢…


其實呢個旅程開心之處係可以同其他blogger交流
當中好多趣事
例如…
我逼佢地Like我fans page,即使想add我私人FB,都要Like我fans page

佢地發現我對眼獨特之處,就係我以為人地唔覺,但其實好覺眼地睥住人

叫個PR做流沙包,然後叫到唔記得佢到底叫咩名

哈哈~多謝各位啊!哼~